Tate Yavo O Ambalaiau Ine Eliapu?

Sesusi nkhele ankho ukahi mo Selusalei Motyipito Tyomakaka (ine Onohinge), utualako okulongesa otyili tyakolela. Ova Sundeu vamwe ankho veli-po, avemupopila okuti: “Onthue tuatuka mu Ambalaiau, katunekale ovapika vomunthu nawike.” Sesusi akumbulula okuti: “Ame ndyityii okuti muatuka mu Ambalaiau. Mahi onwe muhanda okundyipaa, mokonda kamutavela etyi ndyilongesa. Ame ndyipopia ovipuka namona pu etyi ankho ndyikala na Tate yange, mahi onwe mulinga ovipuka mueiva ku tate yenyi.” — Suau 8:33, 37, 38.

Sesusi ankho uhanda okupopia okuti Tate yae welikalela na tate yavo. Ova Sundeu avahanoñgonoka etyi Sesusi apopia, avawane vali okuti: “Tate yetu o Ambalaiau.” (Suau 8:39; Isaías 41:8) Ankho vatuka mombuto ya Ambalaiau. Moluotyo, ankho vasoka okuti vena ekolelo ngo lya Ambalaiau, epanga lya Huku.

Mahi, Sesusi evepopila otyipuka ankho vahakevelela, ati: “Inkha muali ovana va Ambalaiau, ñgeno mulinga ovilinga vya Ambalaiau.” Omona wotyotyili, uhetekela tate yae. Sesusi atualako okuti: “Mahi pahe muhanda okundyipaa, ame nemupopila vala otyili neiva ku Huku. Ambalaiau kalingile ngotyo.” Konyima, Sesusi apopi onondaka mbunguanguanesa, ati: “Onwe mukahi nokulinga ovilinga vya tate yenyi.” — Suau 8:39-41.

Ova Sundeu avahanoñgonoka olie tate yavo, ankho Sesusi ekahi nokupopia. Avapopi okuti tyotyili ovo ovana va Ambalaiau, avati: “Onthue katuatyitililwe mouhayo; onthue tuna Tate wike vala, Huku.” Okuti otyili Huku o Tate yavo? Sesusi ati: “Inkha Huku wali Tate yenyi, ñgeno munthyole, mokonda ame natunda ku Huku, iya ndyikahi pano. Ame heile kehando liange muene, mahi Huku oe wanthuma.” Sesusi evepopila okuti: “Onwe kamuhande okutavela etyi ndyilongesa, otyo muhanoñgonokela ondaka yange.” — Suau 8:41-43.

Sesusi ankho ukahi nokulekesa ovitateka vitundilila kokuhemutavela. Mahi pahe, apopi umwe nawa okuti: “Onwe muatuka mu tate yenyi Eliapu, muhanda okulinga ehando liae.” Oñgeni tate yavo ekahi? Sesusi alekesa nawa oñgeni tate yavo ekahi, ati: “Tate yenyi omuipai tunde konthyimbi, katuaileko okukala motyili.” Ayawisako okuti: “Omunthu wa Huku, utehelela onondaka mba Huku. Onwe kamutehelela, mokonda kamuvanthu va Huku.” — Suau 8:44, 47.

Onondaka ombo ambunumanesa ova Sundeu, avati: “Katuapopile otyili, etyi tuati, ‘Ove umu Samaliya, iya una otyilulu’?” Etyi vapopia okuti Sesusi ‘omu Samaliya,’ ankho vekahi nokumulinga omukuele. Mahi Sesusi ehesuku netyi vapopia, ati: “Ame ndyitupu otyilulu, ame ndyinkhimaneka Tate yange iya onwe mumphenya.” Otyipuka otyo ankho tyakolela unene iya tutyiimbukila monondaka mba Sesusi etyi ati: “Inkha pena umwe utavela ondaka yange, nalumwe vali makankhia.” Ankho kekahi nokupopia okuti ono apositolu novanthu vakuavo vekahi nokumulandula nalumwe mavankhi. Mahi, kamavakamona ehanyauno lya apeho, ‘ononkhia mba vali,’ mbuhena ekevelelo liokukatutiliswa. — Suau 8:48-51; Eholololo 21:8.

Mahi ova Sundeu avahanoñgonoka onondaka mba Sesusi, avati: “Pahe tutyii umwe nawa okuti una otyilulu. Ambalaiau wankhia, ovauli navo vankhia-le, mahi ove uti: ‘Inkha umwe utavela ondaka yange, nalumwe vali makankhia.’ Okuti ove umunene vali tyipona tate yetu Ambalaiau wokuankhia? . . . Ove ñgaa ovelie?” — Suau 8:52, 53.

Tyimoneka nawa okuti Sesusi ankho ukahi nokulekesa okuti oe o Mesiya. Mahi ahakumbulula epulo liavo apopi vala okuti: “Inkha ame ndyilinkhimaneka muene andyike, opo omunkhima wange kausilivila. Unkhimaneka ame o Tate yange, una onwe muti o Huku yenyi. No ngotyo, kamumwii mahi ame ndyimwii. Inkha ame natile himwii ñgeno ndyikahi ngo onwe, vokukemba.” — Suau 8:54, 55.

Sesusi pahe apopi vali ongeleka yomukuaukulu wavo omukuatyili, ati: “Ambalaiau tate yenyi wakalele nehambu enene, liokukevela onthiki yange iya eimono iya ahambukwa.” Ambalaiau ankho utavela komulao wa Huku, akevelela okuya kwa Mesiya. Ova Sundeu avehetavela, avakumbulula okuti: “Ove nii utupu omanima 50, no ngotyo Ambalaiau wemumona-le?” Sesusi ati: “Tyotyili ame ndyimupopila okuti: Etyi nkhele Ambalaiau ehenetyitwe, ame ankho oko ndyili-ale.” Ankho ukahi nokupopia etyi ankho oandyu keulu. — Suau 8:56-58.

Ova Sundeu avanumana etyi Sesusi apopia okuti ankho oko ekahi-ale etyi nkhele Ambalaiau ehenetyitwe, avahande okumuveta nomamanya. Mahi Sesusi atundu-po, tyihalingilwe natyike.