Wahupile Komutunga Womaluihamo

MALIYA waikila konongolo, waihamenua unene nonondaka ekahi nokuiva. Ankho ukahi nokutehela omona wae ukahi nokuliyavela momuwo wahulililako wononkhia mbae. Akuya enthiki enene, ngwe ekumbi ankho likahi pokati nakati keulu. Ohi aihimbika okuteketa unene. (Mateus 27:45, 51) Otyo tyipondola tyalekesa Maliya okuti Jeova nae ankho weihamenua unene tyina atala omona wae Jesus Kristu ukahi nokunkhia monkhalelo imwe yaihama.

Ankho okomakumbi, ekumbi likahi nokunyingila etyi vatula Jesus pohika imwe patiwa Golgota, ine Omphangu Yekola liomutwe, Maliya ankho waihamenwa mokonda yomona wae. (João 19:17, 25) Ahimbika okusoka ovipuka ovinyingi. Etyi apondola okuhinangela otyetyi tyamonekele konthyimbi yomanima 33. Etyi Maliya na Jose ankho vatuala olukembe mondyuo ya Huku mo Jelusalei, ombuale Simau aipopi eulo limwe kononkhono mba Huku. Wapopile ovipuka ovinene konthele ya Jesus, mahi monthiki oyo ayawisako okuti nthiki imwe Maliya makeiva oluihamo olunene ngatyina ekahi nokutomwa nomutunga. (Lucas 2:25-35) Pahe pomuwo oo wepuiya onondaka ombo ankho mbukahi nokufuiswapo.

Tyihole okupopiwa okuti, ononkhia mbomona wove, mbuihama vali, komaluihamo aeho omunthu apondola okumona. Ononkhia ondyale onene, iya ikahi nokutuovola atuho mononkhalelo mbelikalaila. (Romanos 5:12; 1 Coríntios 15:26) Okuti tyivilwa okuhupa kondyale oyo? Tyina tulilongesa omuenyo wa Maliya okupolela apa pahimbika ovilinga via Jesus viokuivisa alo pomuwo wononkhia mbae, alo komutwe, matulilongesa unene konthele yekolelo liakuatesileko Maliya okuhupa komutunga womaluihamo.

Tukondokei komanima etatu notyihupe konyima: Maliya wiivite ovipuka mavipiluluka. Alo umwe mo Nasalee epundaumbo etutu, ovanthu vekahi nokupopia konthele iya João Batista nonondaka mbae ononene mbelivelo. Maliya tyipondola wamuene enyingilikilo lilekesa okuti omuwo wehikapo womona wae wotete ehimbike ovilinga viae. (Mateus 3:1, 13) Ku Maliya nombunga yae, omunthu vasoka vali unene o Jesus. Omokonda yatyi?

Mokutala Jose omulume wa Maliya ankho wankhiale. Inkha ongotyo, Maliya ankho omulike.a Jesus ankho kaihanwa vali okuti omona womuhongi womavai mahi nae ankho pahe omuhongi womavai. Tyimoneka nawa okuti, Jesus oe pahe ukahi nokuundapa movilinga via tate yae nokuna otyilinga tyokutekula ombunga, okukutikinyamo ovana epandu va Maliya vatyitwa konyima yae. (Mateus 13:55, 56; Marcos 6:3) Alo umwe inkha Jesus walongesile Tiagu, ondenge yae okutualako notyilinga otyo, Jesus okutunda mombunga ankho katyapepukile. Mahi okuti Maliya ankho wasukalala unene mokonda yotyo tyikahi nokupitapo? Tyipondola. Mahi kuna epulo liakolela vali: Oñgeni akala etyi Jesus woko Nasalee akala Jesus Kristu, Mesiya wokualaelwe? Ombimbiliya ihololola otyipuka tyimwe konthele yotyo.​—João 2:1-12.

Jesus wapita ku João opo ambatisalwe, akala Omulembulwa wa Huku, ine Mesiya. (Lucas 3:21, 22) Konyima ahimbika okuholovona ovalongwa vae. Namphila ankho ena ombili novilinga viae, mahi ankho utaindya omuwo opo akale nombunga yae nomapanga. Nthiki imwe Jesus na me yae, novalongwa nonondenge mbae, vapita kotyipito tyotyinepo ko Kanaa, epundaumbo ankho likahi kombanda yotyipunda paendwa onokilometu 13 okutunda ko Nasalee. Mokueenda kuotyipito, Maliya amono otyitateka ankho tyikahipo. Tyafuile ankho wamona ombunga yovalinepi ikahi nokulitala otyo velipopila. Ankho ovinyu yapuapo! Pomuvo opo ombunga ankho okuhayakula nawa ovanthu tyikundisa, ankho otyitateka otyinene motyipito. Maliya atyimusukalalesa unene, eketyipopila Jesus.

Apopila omona wae okuti “vetupu ovinyu”. Oityi ankho akevela Jesus alinge? Onthwe tupondola okusoka vala, mahi Maliya ankho utyii okuti omona wae wakolela ankho upondola okulinga ovipuka ovinene. Tyafuile ankho ukevela ahimbike. Tyotyili wapopia okuti “mona wange, linga tyimwe konthele yotyo!” Etyi Jesus akumbulula atyihuvisa Maliya, etyi ati: “Mukai, omokonda yatyi ame nove tusukalalela notyo?” Onondaka mba Jesus kambulekesa okuti ankho utupu onthilo, namphila ovanthu otyo vehole okusoka. Onondaka mbae mbulekesa okuti ankho wapola omutima. Jesus ahinangelesa ina okuti tyotyili haeko una okumupopila oñgeni ena okulinga ovilinga viae, otyo ankho tyitei ku Tate yae Jeova.

Maliya etavela etyi aviyulwa nomona wae, tyilekesa okuti ankho omukai omutaveli nokueliola omutima. Maliya aende akapopila vana ankho vekahi nokuava motyipito okuti: “Etyi ememupopila tyilingei.” Maliya wetyimona okuti ankho kapondola okupita komutwe omona wae; mahi oe na vakuavo ankho vena okulandula ehongolelo lia Jesus. Monthele oyo, Jesus walekesa okuti wasukalala nokankhenda me yae ena novalinepi. Alingi ehuviso liae liotete, okutyitula omaande ovinyu. Otyo atyieta tyi? “Ovalongwa vae avakala nekolelo mwe.” Na Maliya akala nekolelo mu Jesus. Ankho katale vali Jesus ngatyina omona wae mahi umutala ngatyina o Tatekulu, Nomuyovoli.

Ovohe hono vapondola okulilongesila unene kekolelo lia Maliya. Tyotyili nawike una omona wahiliya nga Jesus. Mahi kese omona omukuankhali, tyina ekula ulambela movitateka ovinene. Ovohe ovanyingi pamwe vatualako okupopia novana vavo, ngatyina nkhele ovatutu, mahi okulinga ngotyo katyaviukile. (1 Coríntios 13:11) Oñgeni ovohe vapondola okukuatesako ovana vavo tyina vekula? Onkhalelo imwe okulekesa okuti vena onthumbi yokuti ovana vavo mavatualako okulandula etyi Ombimbiliya ilongesa nokutambula ononkhano mba Jeova onongwa mbutuka kuotyo. Ovohe veliola omutima vena ekolelo nonthumbi, vapondola okukuatesako ovana vavo okukala nawa. Jesus tyotyili watuaileko okupanda ombatelo ya Maliya momanina o komutwe etyi ekula.

O Evandyeliu itupopila vala katutu konthele ya Maliya mokueenda kuomanima etatu notyihupe ovilinga viokuivisa via Jesus. Mahi kala tyityi okuti ankho omuhepe ina yovana uhena omulume, tyafuile ankho wesala vala novana ovatutu meumbo. Otyo tyimoneka nawa mokonda ankho ketyivili okulandula Jesus movilinga viokuivisa motyilongo tyavo. (1 Timoteo 5:8) Ngotyo, watuaileko okusokolola kovipuka viopamphepo ankho elilongesa konthele ya Mesiya nokuenda komaliongiyo mondyuo yokufendela ankho ikahi potyilongo ngetyi ankho apeho ombunga ilinga.​—Lucas 2:19, 51; 4:16.

Okuti tyina Jesus ankho alongesa mondyuo yokufendela mo Nasalee Maliya ankho kepumphi okutehelela? Tyafuile ankho tyimuetela omatuenyonga tyina atehelela omona wae upopiwa momaulo apopia omanima omanyingi kohale okuti makuya Mesiya, pahe elifuilapo mwe! Mahi tyipondola tyemunumanesa unene tyina atala ovanthu mo Nasalee vehetavela omona wae. Alo umwe ankho vahanda okumuipaa!—Lucas 4:17-30.

Tupu tyafuile tyimunumanesa tyina ovana vae ovakuavo ankho vehetavela ku Jesus. Tulilongesa mu João 7:5 okuti onondenge mba Jesus vekuana ankho vetupu ekolelo nga me yavo. Tutangamo okuti: “Onondenge mbae ankho . . . vetupu ekolelo mwe.” Ombimbiliya kaipopi natyike konthele yonomphange mba Jesus vevali vahulililako.b Tyotyili, Maliya wamuene ononkhumbi mbokukala meumbo novanthu veliyapuka konthele yokuumbila Huku. Mahi Maliya walingile ononkhono mbokutualako noukuatyili mu Huku mbokuundapa opo apilulule omitima viombunga yae tyihasoyo ine okuyekako.

Nthiki imwe ombunga ya Jesus okukutikinyamo onondenge mbae vatokola “okukakuata” Jesus. Ankho vati “walinga otyova”. (Marcos 3:21, 31) Tyotyili, Maliya wevelandula mahi ankho kasoko kotyipuka otyikuavo, ankho ukevela okuti hamwe vena etyi vapondola okulilongesa matyivekuatesako okukala nekolelo. Okuti ongotyo tyaendele? Namphila Jesus atuaileko nokufuisapo ovilinga viae viokuivisa nokulongesa otyili otyiwa, ovana ovakuavo va Maliya kavetavelele. Ankho ulipula nokuanumana okusoka oityi ena okulinga opo ehike komitima viavo?

Okuti nove ukahi mombunga yovanthu vekahi monongeleya mbelikalela? Ekolelo lia Maliya lipondola okukukuatesako. Kayekelepo ombunga ihetavela Huku. Mahi, ankho ulekesa okuti ekolelo ena liemuetela ehambu nombembwa komutima. Tupu, watualako okukuatesako omona wae wekolelo. Okuti ankho wivaluka Jesus? Okuti pamwe ankho uhanda akale nae meumbo kumwe nombunga? Inkha ongotyo, ankho ukahi nokulikuatehila unene. Ankho utala okuti okukuatesako nokupameka Jesus elao. Okuti nove upondola okukuatesako ovana vove okupaka komutwe Huku momuenyo wavo?

Okuti ekolelo lia Maliya mu Jesus liayambelwe? Jeova nalumwe ayekapo okuyamba vana vena ekolelo, iya Maliya nae wayambelwe. (Hebreus 11:6) Soka oñgeni akala tyina eiva omona wae upopia ine utehela, ovanthu vekahi nokumuhilivika mokonda yomalongomona ae veiva.

Mononthengele-popia mbomona wae, okuti Maliya wahinangelele Jesus poututu etyi ekahi nokukula mo Nasalee? Etyi Jesus apopia omukai ukomba mondyuo yae opo avase ombongo yotyivela avombesa, na una ukunkha ohinde yonombolo, ine utemesa otyimimi nokutyipaka pana payeluka, okuti Maliya wasokele komona tyina omututu wapumphama ponthele yae tyina alinga ovilinga ovio? (Lucas 11:33; 15:8, 9; 17:35) Etyi Jesus apopia okuti okanga yae ongwa omutyindo wae wapepuka, okuti Maliya wahinangelele tyina nthiki imwe kekumbi ankho Jose ekahi nokulongesa Jesus oñgeni tyihongwa nokulinga onokanga mbukahi nawa mbahatosola otyipako? (Mateus 11:30) Tyotyili Maliya wakalele nehambu enene okutala elao Jeova emupa liokukuatesako omona wae okukula nokulongesa una makala Mesiya. Wakalele nehambu enene liokutehelela Jesus, omulongesi walamba po ovalongesi vatyo aveho, ankho upopia ovipuka viiwe nawa nokuvihangununa monkhalelo ipondola okulongesa unene ovanthu!

Maliya watuaileko nokueliola omutima. Omona wae nalumwe ahandele okupakwa kounene ine okufendwa. Mokueenda kuovilinga viae viokuivisa, ovakai vahivilikile okuti ina ya Jesus una ehambu enene mokonda yokuatyita omona oo. Ngwe akumbulula okuti: “Au, mahi, vena ehambu ovovana vatehelela ondaka ya Huku nokuendelamo! “(Lucas 11:27, 28) Iya nthiki imwe etyi ovanthu vapopila Jesus okuti me yove nonondenge mbove vekahi nokukuovola, Jesus ati vana vetavela, ovo, ovo me nonondenge mbange. Mahi Maliya kanumanene wanoñgokele etyi ankho Jesus ekahi nokupopia, okuti oupanga wopamphepo wakolela vali tyipona wopahitu.​—Marcos 3:32-35.

Anthi, onondaka patyi ankho mbupondola okutepulula oluihamo Maliya akalele nalo etyi omona wae ekahi nokumona ononkhumbi mbokuipawa momuti wemone? Apostolu João nae wamuene etyi Jesus ekahi nokuipawa, konyima wahoneka etyi tyaendelepo okuti: Etyi ekahi nokumona ononkhumbi, Maliya ankho utai “pomuti wemone wa Jesus.” Natyike ankho tyipondola okutyilika ina woluembia nomukuatyili okukala ponthele yomona wae monthiki yahulililako yomuenyo wae. Jesus watala ku Maliya, nokutepaula omuenyo mokonda yokueihamenua iya kese ondaka ankho apopia imuihama unene, mahi wapopile. Jesus watulisile omutima wa me yae etyi aita opo akatekulwe na apostolu João. Namphila ankho onondenge mba Jesus nkhele ankho vahaumbila Huku, Jesus wapopila Maliya opo eheveyeke mahi atualeko okuvekuatesako. Jesus walekesa oñgeni tyakolela omulume wekolelo atekule ombunga yae, haunene mopamphepo.​—João 19:25-27.

Etyi ononkhia mba Jesus mbukahi nokuhikapo, Maliya weivile omaluihamo omanene ngatyina ekahi nokutomwa nomutunga. Inkha tusoka okuti ankho waihamenwa unene, pahe soka ehambu enene akalele nalio ononthiki ononthatu konyima! Maliya wamuene ehuviso liavilapo komahuviso aeho​—Jesus watutila! Iya ehambu liae lieliyawisile unene, etyi Jesus ekelivasa nondenge yae Tiagu, pokamphengi. (1 Coríntios 15:7) Etyi velivasa tyakuatesileko unene Tiagu nonondenge mba Jesus ovakuavo. Konyima tuetyimona okuti navo vetavelele okuti Jesus o Kristu. Etyi pakala katutu navo avakala peliongiyo lio Vakristau na me yavo, “okutualako nokulikuambela.” (Atos 1:14) Vevali puvo, ovo Tiagu na Juda, konyima vahoneka omikanda Viombimbiliya.

Maliya wahulilila okupopiwa etyi ankho vekahi meliongiyo novana vae velikuambela. Oyo ombitukilo ongwa yehipululo lia Maliya, no nongeleka onongwa asapo! Mokonda yekolelo liae wahupile komutunga womaluihamo iya konyima atambula ondyambi imwe ongwa. Inkha tuhetekela ekolelo liae, tupu matutyivili okukoleleya kese tyitateka tuvasa mouye uno wononkhumbi atukatambula ondyambi imwe onene tuhevili okusoka.