Lasalu Watutiliswa

Etyi Sesusi elivasa na Malata na Maliya popepi no Betania, avaende keendo lya Lasalu. Ankho wapakua meleva apapatwa nemanya. Sesusi ati: “Polei-ko emanya.” Malata asukalala mokonda kanoñgonokele etyi Sesusi ankho ahanda okulinga. Ati: “Tatekulu, tyafwa wanika-le, mokonda pakala-le ononthiki ononkhuana.” Mahi Sesusi emupulu okuti: “Ame hekupopilile okuti inkha utavela momono omunkhima wa Huku?” — Suau 11:39, 40.

Moluotyo, avapolo-ko emanya. Sesusi atale peulu, elikuambela ati: “Tate ame ndyikupandula etyi wanthehelela. Tyotyili, ame ndyityii okuti apeho unthehelela. Mahi, ame napopia ngotyo mokonda yovanthu vetai pano, opo vetavele okuti ove wanthuma.” Elikuambelo Sesusi alingila povanthu ankho lievelekesa okuti etyi ankho malingi, metyilingi kepondolo lya Huku. Konyima Sesusi apopila peulu ati: “Lasalu, tunda-mo!” Lasalu atundu-mo tyawingwa novinyanga komavoko, alo konomphai, iya ankho wahikwa motyipala. Sesusi ati: “Muiitululei-vio, amumuyeke aye.” — Suau 11:41-44.

Ova Sundeu ovanyingi ankho veya okupameka Malata na Maliya vamuene ehuviso olio, avakala nekolelo mu Sesusi. Mahi ovakuavo avaende, avakapopila ova Faliseu etyi Sesusi alinga. Ova Faliseu novahoneki vovitumino avalingi eliongiyo Liombonge onene yova Sundeu. Povanthu ovo ankho pena omunene-nakwa wavilapo, Kaifaa. Vamwe puvo avati: “Oityi matulingi omulume ou ukahi nokulinga omahuviso omanyingi? Inkha tumuyeka atualako okulinga ngotyo, ovanthu aveho mavakala nekolelo mwe iya ova Loma aveya okutupola Ondyuo yetu yokufendela notyilongo tyetu.” (Suau 11:47, 48) Namphila ankho veiva konombangi vamwene etyi Sesusi ‘alinga omahuviso omanyingi,’ ovalume ovo kavahambukilwe netyi Sesusi alinga kononkhono mba Huku. Etyi ankho vesuka vali natyo ovilinga viomunkhima nokutumina.

Etyi Lasalu apindulwa-po kononkhia, otyo atyinyimi-ko olusoke luova Sanduseu luokuti kutupu etutilo. Kaifaa omu Sanduseu, pahe apopi okuti: “Onwe kamwii natyike, kamutyiete okuti tyimuetela ouwa inkha omulume wike unkhila ovanthu, tyipona elongo aliho okuhanyua-ko?” —Suau 11:49, 50; Ovilinga 5:17; 23:8.

Mokonda Kaifaa ankho omunene-nakwa wavilapo, wapopile onondaka ombo kononkhono mba Huku, “kelihindile vala apopi ngotyo.” Kaifaa ankho uhanda Sesusi aipawe mokonda ankho una owoma wokuti ovanthu mavayeke-po okulandula ononkhalamutwe mbonongeleya mbova Sundeu. Mahi, eulo lya Kaifaa lialekesa okuti, ononkhia mba Sesusi ankho mambuave otyilikutila tyeyovo, ha tyokuyovola vala ova Sundeu, mahi o tyokuyovola ‘ovana aveho va Huku velityandyana.’ — Suau 11:51, 52.

Kaifaa etyivili okuhongiliya Vombonge onene yova Sundeu opo vaipae Sesusi. Okuti Nikondemu, Wombonge onene yova Sundeu wokuapanda Sesusi, ankho mapopila Sesusi etyi vahanda okulinga? Katutyii, mahi Sesusi liwa-liwa atundu mo Selusalei, opo ahaipawe tyina omuvo Huku anaka nkhele uhenehike-po.