Ohamba Inyingila Mo Selusalei tyavelama Kotyimbuluena

Onthiki yalandula-ko, 9 ya Nisan Motyalumingu, Sesusi novalongwa vae avatundu mo Betania, avaende ko Selusalei. Etyi ankho vekahi nokuhika ko Betefase, Komphunda Yomindyambi, Sesusi apopi novalongwa vae vevali.

Ati: “Endei pomaumbo oo komutwe oko, mamuvasi otyimbulu tyakutwa, notyimbuluena tyatyo. Vikutululei amuvieta kuno. Inkha pena ou umupula, mupopilei okuti: ‘Tatekulu wesuka navio.’ Ngotyo liwa-liwa memuyeke amuvieta.” — Mateusi 21:2, 3.

Ovalongwa ankho kavanoñgonokele okuti etyi Sesusi evetuma tyifuisapo eulo Liombimbiliya. Mahi, konyima avanoñgonoka okuti tyafuisapo eulo lya Sakaliya. Sakaliya waulile okuti omunthu Huku alaa okuti makala Ohamba, ankho makanyingila mo Selusalei “nomapole, tyavelama kotyimbulu, otyimbuluena, otyiketa tyotyimbulu.” — Zacarias 9:9.

Etyi ovalongwa vehika ko Betefase, avakutulula otyimbuluena notyiina tyato iya ovanthu ankho vetai popepi avapulu okuti: “Otyimbuluena mutyikutululila-tyi?” (Maluku 11:5) Etyi veiva okuti o Tatekulu Sesusi wesuka navio, aveveyeke vemutuaile-vio. Ovalongwa avapake ovikutu viavo kotyimbulu no kotyimbuluena, Sesusi avelama kotyimbuluena.

Ovanthu aveliyawisa putyina Sesusi ankho ekahi nokuhika mo Selusalei. Ovanyingi avayale ovikutu viavo vyo kombanda metapalo. Ovakuavo avatenge ovimpha viomiti ine “viovifo konthele yetapalo” otyo veviyala metapalo. Avakuililila okuti: “Tulikuambela ku ove Huku, yovola Omona wa Daviti! Una uya menyina lya Siovaa apandwe! Ouhamba wa tate yetu Daviti upandwe!” (Maluku 11:8-10) Ova Faliseu ankho vekahi povaunyingi avanumana netyi ovanthu vekahi nokupopia. Avapopila Sesusi okuti: “Mulongesi, viyula ovalongwa vove.” Sesusi akumbulula okuti: “Ndyimupopila okuti, inkha vamuta, omamanya maakaluluka.” — Luka 19:39, 40.

Etyi Sesusi atala o Selusalei imoneka, ahimbika okulila ati: “Inkha ove, ove umwe, monthiki ino wapungile ovipuka vieta ombembwa — mahi pahe viaholekwa komaiho ove.” Ovanthu vo mo Selusalei ankho mavahitiswa mokonda yokuhetavela. Sesusi aula okuti: “Onondyale mbove mambuya okutunga ponthele yove ongandyo yovipandyi viatwa avekuhitikinyina-mo kononthele mbatyo ambuho. Mavekekuyumba pohi no ove novana vove iya kamavakayekela ku ove emanya nalike.” (Luka 19:42-44) Onondaka ombo mba Sesusi mbafuiswapo etyi o Selusalei yahanyua-po menima 70 P.K.

Etyi Sesusi anyingila mo Selusalei, ‘ovanthu aveho mepunda-umbo avahangayala, otyo vati: “Ou olie?”’ Ovanthu avatualako okupopia okuti: “Ou omuuli Sesusi wo ko Nasalee yo Ngalileya!” (Mateusi 21:10, 11) Vana ankho vekahi povaunyingi vamuene etyi Sesusi atutilisa Lasalu, avapopila vakuavo konthele yehuviso olio. Ova Faliseu avanumana mokonda ankho kavekahi nokuvila etyi vahanda. Avelipopila poyavo okuti: “Ovanthu aveho vaya no kwe.” — Suau 12:18, 19.

Ngetyi Sesusi alinga-lingale tyina ameya mo Selusalei, aende mondyuo ya Huku opo akalongese. Avelula ovamphoki novilema. Ovanene-nakwa novahoneki vovitumino avanumana etyi vamona ovipuka ankho ekahi nokulinga, netyi veiva ovana vakuilila mondyuo ya Huku okuti: “Tulikuambela ku ove Huku, yovola Omona wa Daviti!” Moluotyo ononkhalamutwe mbonongeleya avemupulu okuti: “Utyiivite etyi vekahi nokupopia?” Ngwe evekumbulula okuti: “Enga. Kamunetange onondaka mbati: ‘Ovana ovatutu no nonkhupula mavekuhilivika’?” — Mateusi 21:15, 16.

Sesusi atale ovipuka vikahi mondyuo ya Huku. Pahe ankho lietaka, moluotyo atundu-mo nono apositolu mbae. Tyina nkhele onthiki 10 ya Nisan ihenehimbike, akondoka ko Betania, ngako akalala Tyalumingu.