Sesusi — Ondyila, Otyili, Omuenyo

Etyi nkhele ankho vekahi mondyuo kosapalalo nono apositolu mbae, etyi vamana ehinangelo liononkhia mbae, Sesusi evepameka ati: “Omitima vienyi vihasukalale. Kalei nekolelo mu Huku, tupu kalei nekolelo mu ame.” — Suau 13:36; 14:1.

Sesusi apopila ono apositolu mbae okuti namphila maende, kavesukisa okusukalala, ati: “Meumbo lya Tate muna onomphangu ononyingi. . . . Tyina namaende andyimupongiyila omphangu, mandyikondoka, andyiya okumupola, opo no onwe mukakale apa ndyikala. Iya ondyila yoku ame ndyenda nako onwe mwii.” Mahi ono apositolu avahanoñgonoka okuti ankho ukahi nokupopia okuenda keulu. Moluotyo, Tomee apulu okuti: “Tatekulu, oku moende onthue katwii-ko. Oñgeni twii ondyila?” — Suau 14:2-5.

Sesusi akumbulula okuti: “Ame, ame ndyila, ame tyili, ame muenyo.” Omunthu upondola vala okunyingila meumbo lya Tate yae keulu inkha utavela Sesusi, aendela muetyi alongesa, ahetekela onkhalelo yae yomuenyo. Sesusi ati: “Nawike uya ku Tate ahakuate pu ame.” — Suau 14:6.

Filipe ankho ukahi nokutehelela nawa, aiti okuti: “Tatekulu, tulekese Tate, otyo tyituuka ku onthue.” Mokutala Filipe ankho uhanda Huku evemonekele, ngetyi amonekelele Moisesi, na Eliya na Isaiya. Mahi, ono apositolu ankho vena otyipuka tyikahi vali nawa tyipona emonekelo. Sesusi etyilekesa nawa, ati: “Filipe, ndyikahi no onwe omuvo omunyingi, nkhele kundyi? Una weete ame, tupu weete Tate.” Sesusi walekesa nawa ovituwa vya He; ngotyo, okukala na Sesusi nokumutala ongatyina omunthu eete Tate yae. Tyotyili, He omunene vali tyipona Omona. Moluotyo, Sesusi apopi okuti: “Ovipuka ndyimupopila hikahi nokupopia etyi ame muene nasoka.” (Suau 14:8-10) Ngotyo, ono apositolu ankho vapondola okunoñgonoka okuti Sesusi ukahi nokulongesa etyi atumwa na He.

Ono apositolu mba Sesusi ankho vehole okumona omahuviso alinga, nokuiva etyi apopia konthele yonondaka onongwa Mbouhamba wa Huku. Pahe, Sesusi evepopila okuti: “Una ukala nekolelo mu ame, nae makalinga ovilinga ndyikahi nokulinga. Iya makalinga ovilinga ovinene vali tyipona evi.” (Suau 14:12) Sesusi ankho kekahi nokuti ono apositolu mavakalinga omahuviso omanene vali tyipona pu ana alinga. Mahi, ankho mavaivisa momuvo omunyingi vali, movilongo ovinyingi vali, no kovanthu ovanyingi vali.

Ono apositolu ankho kamavesala aveke tyina Sesusi maende keulu, mokonda wati: “Inkha muiita tyimwe menyina liange, ame mandyityilingi.” Tupu ati: “Ame mandyiiti ku Tate na emuavele omukuatesiko omukuavo makala no onwe apeho, ononkhono mba Huku mbotyili.” (Suau 14:14, 16, 17) Sesusi wevelaa okuti ankho mavatambula omukuatesiko omukuavo, ononkhono mba Huku. Otyo tyamoneka monthiki yo Pendekosite.

Sesusi ati: “Apa katutu vouye uno kamavamono vali, mahi onwe mamumono, mokonda ame ndyina omuenyo iya onwe mamukala nomuenyo.” (Suau 14:19) Sesusi ankho mevemonekela konyima yetutilo liae, iya mokueenda kuomuvo evetutilisa opo vakakale onoandyu keulu kumwe nae.

Pahe Sesusi etyiyandyulula umwe nawa, ati: “Una utavela ovitumino viange aendela-mo, unthyole. Moluotyo, una unthyole na Tate makala nohole nae, na ame mandyikala nohole nae, iya andyililekesa umwe nawa kwe.” Moluotyo, apositolu Sunda, tupu utiwa o Tandeu, apulu okuti: “Tatekulu omokonda yatyi uhandela okulilekesa vala nawa ku onthue, ohelilekesa kouye?” Sesusi akumbulula okuti: “Inkha omunthu umwe unthyole, metavela ondaka yange, iya Tate yange makala noluembia nae. . . . Mahi una uhenthyole, ketavela onondaka mbange.” (Suau 14:21-24) Tyelikalela novalanduli va Sesusi, ovanthu vomouye ankho kavanoñgonoka okuti Sesusi ondyila, otyili, tupu omuenyo.

Sesusi ankho maende keulu. Okuti ovalongwa vae ankho mavetyivili okuhinangela ovipuka aviho evelongesa? Sesusi wahangununa okuti: “Omukuatesiko, ononkhono mba Huku, mbuna Tate matumikisa menyina liange, mambumulongesa ovipuka aviho, nokumuhinangelesa ovipuka aviho nemupopila.” Ono apositolu ankho vehole okumona etyi ononkhono mba Huku mbukuatesako Sesusi, moluotyo onondaka ombo mbevepamekele. Sesusi ayawisako okuti: “Ame ndyimusila ombembwa; ame ndyimuavela ombembwa yange. . . . Omitima vienyi vihatokotelwe, nii vihakale nowoma.” (Suau 14:26, 27) Ovalongwa ankho kavesukisa okusukalala mokonda ankho mavahongolelwa na Tate ya Sesusi iya eveamena.

Ankho mavamono okuti Huku ukahi nokuveamena. Sesusi wati: “Omutumini wouye uno ukahi nokuya, mahi utupu epondolo liokundinga natyike.” (Suau 14:30) Eliapu lietyivilile okuhongiliya Sunda. Mahi ankho kalityivili okuhongiliya Sesusi opo atyitukilepo Huku mokonda Sesusi utupu onkhali. Eliapu tupu ankho kamalityivili okulinga natyike opo Sesusi ahatutiliswe. Omokonda yatyi? Sesusi wati: “Ame ndyilinga ngetyi Tate anthuma.” Sesusi ankho una onthumbi yokuti He memututilisa. — Suau 14:31.