Okuava Ovinyango Nokukala Omapanga A Sesusi

Sesusi ankho ukahi nokupameka ono apositolu mbae ovakuatyili monkhalelo ihika komutima, tyipala na tyipala. Ankho pahe lietaka, mokutala omokati kovinthiki. Sesusi apopi ongeleka yeveavela ondundo.

Ahimbika okupopia ati: “Ame, ame muti womuvinyu wotyotyili iya Tate omulimi.” (Suau 15:1) Ongeleka oyo yevehinangelesa etyi tyapopiwa-le omanima omanyingi konyima konthele yelongo lyo Isilayeli, ankho liihanwa okuti omuvinyu wa Siovaa. (Jeremias 2:21; Oséias 10:1, 2) Mahi, Siovaa ankho ukahi nokuyekapo ovanthu velongo olio. (Mateusi 23:37, 38) Ngotyo, Sesusi apopi otyipuka otyikuavo. Sesusi ankho omuti womuvinyu Tate yae atuika tunde etyi alembulwa nononkhono mba Huku menima 29 P.K. Mahi Sesusi apopi okuti omuti womuvinyu hae-ko vala ulekesa.

Wati: “Onompha ambuho mbukahi kwa ame mbuhaave ovinyango Tate umbutyoka-ko iya mbuna mbuava ovinyango, umbusukukisa opo mbuave vali ovinyango ovinyingi. . . . Ngetyi ompha ihaave ovinyango aike, yava vala tyina ikahi komuvinyu, no onwe mamuave vala ovinyango inkha mukala kumwe na ame. Ame, ame muti womuvinyu, onwe munompha.” —Suau 15:2-5.

Sesusi alae ovalongwa vae ovakuatyili okuti tyina amaende, mevetumikisa omukuatesiko, ononkhono mba Huku. Etyi ono apositolu novanthu ovakuavo vatambula ononkhono mba Huku, avakala onompha mbomuti womuvinyu. “Onompha” ambuho ankho mbuna okutualako okukala kumwe na Sesusi. Omokonda yatyi?

Sesusi wahangununa okuti: “Una utualako okukala kumwe na ame iya ame andyikala kumwe nae, oo oe maave ovinyango ovinyingi. Mokonda tyihekahi kumwe na ame onwe kamupondola okulinga natyike.” “Onompha” ombo — ovalanduli vae ovakuatyili — ankho mavaave ovinyango ovinyingi mokuhetekela ovituwa vya Sesusi, avapopila vakuavo konthele Youhamba wa Huku nombili, nokulinga ovalongwa. Oityi tyimoneka-po inkha omunthu katualako okukala kumwe na Sesusi, ahaave ovinyango? Sesusi wahangununa okuti: “Inkha umwe katualako okukala kumwe na ame, uyumbuahi.” Tupu, Sesusi ati: “Inkha mutualako okukala kumwe na ame, etyi ndyipopia atyitualako mu onwe, tyina muiita etyi muhanda mamutyipewa.” — Suau 15:5-7.

Pahe, Sesusi apopi vali etyi apopile-ale ovikando vivali — okutavela ovitumino viae. (Suau 14:15, 21) Wapopia etyi ovalongwa vae vena okulinga opo valekese okuti vekahi nokumutavela, wati: “Inkha muendela movitumino viange, mamutualako okukala mohole yange, ngetyi ame netavela ovitumino vya Tate iya andyitualako okukala mohole yae.” Mahi, etyi tyesukisa hakukala vala nohole na Siovaa Huku, Nomona wae. Sesusi wati: “Otyitumino tyange otyetyi, kalei nohole pokati kenyi, ngetyi ame nakala nohole no onwe. Nawike una ohole tyipona una waava omuenyo wae mokonda yomapanga ae. Inkha mulinga etyi ndyimutuma, onwe mamukala omapanga ange.” — Suau 15:10-14.

Ankho kuakamba vala katutu opo Sesusi alekese ohole yae, mokuava omuenyo wae na ayovole ovanthu aveho vena ekolelo mwe. Ongeleka yae ankho ina okulunda ovalanduli vae okukala nohole onene na vakuavo. Ohole oyo ankho maiveimbukisa ngetyi Sesusi evepopilile-ale, etyi ati: “Ovanthu aveho mavaimbuka okuti muvalongwa vange inkha mukala nohole pokati kenyi.” — Suau 13:35.

Ono apositolu ankho vena okusuka netyi Sesusi eveihana okuti “mapanga ange.” Apopi omokonda yatyi eveihanena ngotyo, ati: “Ame ndyikahi nokumuihana okuti mapanga ange, mokonda nemupopila ovipuka aviho neiva ku Tate.” Okukala omapanga a Sesusi nokunoñgonoka etyi He emulongesa otyipuka otyiwa unene ngatyi! Opo vakale noupanga oo, ankho vena “okutualako okuava ovinyango.” Inkha valinga ngotyo, Sesusi wapopia okuti: ‘Atyiho muiita ku Tate menyina liange, memupe-tyo.’ —Suau 15:15, 16.

“Onompha” ombo ovalongwa vae, ohole ankho vena pokati kavo maivekuatesako okukoleleya movipuka ankho maviya. Sesusi evelondola okuti mavayalwa nouye, mahi tupu evepameka ati: “Inkha ouye umuyele, noñgonokei okuti tete ame wayala. Inkha mualingile onthele youye, ñgeno ouye umuhole, mokonda muahula kuo. Pahe, mokonda kamulingi onthele youye, . . . otyo ouye umuyelele.” — Suau 15:18, 19.

Sesusi ahangununa vali etyi ankho mavayalelwa nouye, ati: “Mavemulingi ovipuka ovio aviho mokonda yenyina liange, mokonda Una wanthuma kavemwii.” Sesusi apopi okuti omahuviso ae ankho maavele onombei vana vemuyele, ati: “Inkha halingile omahuviso pokati kavo, ehenelingwe vali nomunthu nawike, ñgeno kavavelelwe onombei mokonda yonkhali. Mahi pahe vamona ame, avandyale tupu avayale Tate.” Oundyale wavo ankho ufuisapo eulo. — Suau 15:21, 24, 25; Salmo 35:19; 69:4.

Sesusi apopi vali okuti matumu omukuatesiko, ononkhono mba Huku. Ovalanduli vae aveho ankho vapondola okutambula ononkhono ombo, avakuateswako okuava ovinyango, ine ‘okuava oumbangi.’ — Suau 15:27.