Oñgeni Matuhiki Komitima Viombunga Yetu Yehelilongesa

JESUS Kristu wati: “Enda keumbo kombunga yove, ovetolela ovipuka aviho Jeova alinga pala ove, nokankhenda akala nako nove.” Pomuvo opo Jesus ankho ukahi nokupopia nomulume umwe ko Gadara, Kelunga lio Galileia, ankho uhanda okukala omulongwa wae. Onondaka mba Jesus mbalekesa okuti ankho wii nawa ehando ovanthu vena liokupopila onombunga mbavo ovipuka viakolela.​—Mar. 5:19.

Hono tupu tumona okuti ovanthu vena ehando olio, namphila vamwe vetyilinga vali tyipona vakuavo. Ngotyo, tyina omunthu ahimbika okufenda Huku yotyotyili, Jeova, uhanda okupopila ombunga yae ovipuka ovipe ekahi nokulilongesa. Mahi oñgeni ena okutyilinga? Oñgeni apondola okuhika komutima wombunga yae vekahi mongeleya yelikalela ine veheli mongeleya naike? Ombimbiliya yava onondonga mbakolela.

Pomuvo Wovakristau votete, umwe watetekelele okuimbuka okuti Jesus o Mesiya, o Andre. Iya liwa-liwa eketyipopilalie? “Tete [Andre] wavasa omukulu wae Simau, emupopila okuti: ‘Tuavasa Mesiya’ (tyihangununa okuti o ‘Kristu’).” Andre atuala Petulu ku Jesus, ngotyo Petulu apewa omphitilo opo akale umwe povalongwa va Jesus.​—João 1:35-42.

Etyi palamba omanima epandu, etyi Petulu ankho ekahi ko Jope, akongwa opo aye ko Sesareia keumbo lia Korneliu, onkhalamutwe yomafualali. Ovalie Petulu avasile meumbo? “Tyotyili, Korneliu ankho ukevelela [Petulu nava ankho vekahi nae] iya aongiya ombunga yae nomapanga ae.” Korneliu aavela omphitilo ombunga yae vatehelele Petulu putyina apopia nokutokola etyi mavalingi.​—Atos 10:22-33.

Oityi tulilongesila kuetyi Andre na Korneliu valingile onombunga mbavo?

Andre na Korneliu kavatile vala filuu. Andre watuaile Petulu ku Jesus, iya Korneliu waongiyile ombunga yae opo vatehelele etyi Petulu mapopi. Mahi Andre na Korneliu kavakuluminyine onombunga mbavo ine okuvekengelela opo vakale ovalanduli va Kristu. Oityi tulilongesilako? Nonthue otyiwa tulinge ngotyo. Hamwe tupondola okupopila onombunga mbetu etyi tuelilongesa, nokuovola onomphitilo opo vanoñgonoke otyili Tyombimbiliya, nokulinoñgonoka novakuatate vetu. Mahi, tuna okukala nonthilo nepondolo liavo liokuliholovonena, nokulityilika okuvekuluminya. Opo tunoñgonoke oñgeni tupondola okukuatesako onombunga mbetu, tutalei ongeleka ya Jürgen na Petra ovalinepi vamwe voko Alemanha.

Petra ankho ulongeswa Ombimbiliya no Nombangi mba Jeova iya konyima ambatisalwa. Omulume wae, Jürgen, ankho onkhalamutwe yomafualali. Potete, Jürgen kahambukilwe netyi ankho omukai wae ekahi nokulinga. Mahi, mokueenda kuomuvo aimbuka okuti Onombangi vaivisa otyili Tyombimbiliya. Nae apakula omuenyo wae ku Jeova, iya hono omukulu weuaneno. Elondolo patyi pahe aavela konthele yokuhika komutima wombunga ukahi mongeleya yelikalela?

Jürgen wati: “Tuhaovolei okukuluminya onombunga mbetu, nokuvepopila ovipuka ovinyingi konthele ya Huku. Otyo tyipondola okuvelingisa okuhetavela vali. Otyiwa mokueenda kuomuvo okupopia nawa navo katutu-katutu alo vanoñgonoka. Tupu otyiwa tuovole omphitilo opo onombunga mbetu velinoñgonoke novakuatate veti liavo vehole ovipuka navo vehole. Okulinga ngotyo tyipondola okuvekuatesako.”

Apostolu Petulu nombunga ya Korneliu vetavelele liwa otyili Tyombimbiliya. Mahi, ovakuavo vanoñgonokele otyili kotyita tyotete, kavetavelele liwa.

Ovanyingi pombunga ya Jesus vakalele nekolelo mwe mokueenda kuovilinga viae viokuivisa. Mongeleka, tyafuile apostolu Tiagu na João, ankho velikuai na Jesus mokonda me yavo Salome, o ina muhikuena ya Jesus. Hamwe Salome ankho o umwe “povakai ovakuavo ovanyingi, ankho vaundapesa omalumono avo pala okuvetekula [Jesus nono apostolu].”​—Luc. 8:1-3.

Ovanthu ovakuavo vomombunga ya Jesus kavetavelele liwa otyili Tyombimbiliya. Mongeleka, etyi palamba enima tunde etyi Jesus ambatisalwa, ovanthu ovanyingi ankho veliongiya mondyuo imwe opo vemutehelele. “Mahi etyi ombunga yae vetyiiva, avaende opo vekemupoleko, mokonda ankho vapopia okuti: ‘Utupu onondunge.’” Etyi onondenge mba Jesus vemupula konthele yomphango yae yokulinga oungendi, pokuvekumbulula kapopile atyiho malingi. Omokonda yatyi? Mokonda “tyotyili, onondenge mbae ankho vetupu ekolelo mwe.”​—Mar. 3:21; João 7:5.

Etyi Jesus alingile ombunga yae tyitulongesa tyi? Kanumanene etyi vamwe vemupopia okuti utupu onondunge. Etyi atutiliswa, Jesus waavelele ondundo ombunga yae etyi amonekela ondenge yae Tiagu. Emonekelo olio, tyafuile liakuatesileko Tiagu nonondenge ononkhuavo mba Jesus okunoñgonoka okuti tyilityili Jesus o Mesiya. Ngotyo, navo ankho vekahi nono apostolu novanthu ovakuavo mondyuo imwe mo Jelusalei, iya tupu vatambulile ospilitu sandu. Okutundilila opo, Tiagu na Judas, nonondenge ononkhuavo mba Jesus avapewa ovilinga viakolela.​—Atos 1:12-14; 2:1-4; 1 Cor. 15:7.

Ngo potyita tyotete, onombunga ononyingi hono vakala omuvo omunyingi opo vetavele otyili nokupilulula onkhalelo yomuenyo wavo. Tala ongeleka ya Roswitha, mo 1978 etyi omulume wae ambatisalwa akala Ombangi ya Jeova, Roswitha ankho owo Katolika. Mokonda Roswitha ankho uhole unene omatavelo ae, ahimbika okuyala omulume wae. Mahi mokueenda kuomanima, oundyale wae autepuluka iya aimbuka okuti Onombangi vekahi nokulongesa otyili. Mo 2003 Roswitha ambatisalwa. Oityi tyemukuatesako okupiluluka? Omulume wae kanumanene mokonda youndyale wae, mahi wemuavelele omphitilo opo apilulule onkhalelo yae yokusoka. Elondolo patyi Roswitha aava? “Inkha tupua unene elundo tupondola okupolako ouwa.”

Monika wambatisalua mo 1974, mahi ovana vae vevali vakala vala Onombangi etyi palamba omanima 10. Namphila omulume wae Hans, ankho ehemutyilika okuumbila Huku, mahi wambatisalua vala mo 2006. Namphila ouwa vapolako waseta, elondolo patyi ombunga oyo yaava? “Tuna okutualako noukuatyili ku Jeova atuhayekepo ekolelo lietu.” Tyotyili, ankho tyakolela unene vatualeko okukala nohole na Hans. Iya ankho vena ekevelelo liokuti Hans nthiki imwe metavela otyili.

Jesus wapopile okuti otyili tyikahi ngomeva atuala komuenyo wahapu. (João 4:13, 14) Tuhanda onombunga mbetu vanwe omeva otyili atenda nawa nokuasukuka. Tyotyili, katuhande okuvefeneswa mokonda yokuvekuluminya unene omeva omanyingi. Onkhalelo tuvehangununina otyili ipondola okuvepameka ine okuvefeneswa. Ombimbiliya yati: “Omutima womuviuki usokolola nawa opo akumbulule” iya “omutima womunandunge ulongesa omulungu wae okupopia ounongo nokuyawisa komilungu viae onondaka mbuhika komutima.” Oñgeni tupondola okuundapesa omalondolo oo?​—Pro. 15:28; 16:23.

Omukai umwe hamwe uhanda okupopila otyili omulume wae. Inkha “usokolola nawa opo akumbulule,” maholovona nawa onondaka iya ahapopi vala okukuluminya. Omukai kamalekesa okuti omalusoke ae aviuka ine akolela vali tyipona omulume wae. Onondaka mbae mbasokwa nawa mbupondola okupameka nokueta ombembwa. Onalupi omulume wae ahambukwa iya ehepuiya okutomphola nae? Ovipuka patyi ehole vali okupopia ine okutanga? Okuti uhole vali okupopia konthele younongo wouye, opulitika ine ovitalukiso? Oñgeni apondola okukuatesako omulume wae okusuka Nombimbiliya mahi tupu akala nonthilo nomalusoke ae? Inkha omukai usoka nawa komapulo oo matyimukuatesako okupopia nokulinga ovipuka nounongo.

Opo tuhike komutima wombunga yetu nkhele Uhembangi hakumupopila vala etyi tukahi nokulilongesa, mahi tupu tuna okukala novituwa oviwa.

Jürgen wapopiua pombanda wati: “Tualako okuendela monondonga Mbombimbiliya ononthiki ambuho. Oyo onkhalelo ongwa yokukuatesako ombunga okunoñgonoka otyili, namphila yehetyitavela.” Hans, wambatisalua vala etyi palamba omanima 30 tunde etyi omukai wae ambatisalwa, utavela onondaka ombo. “Tyakolela unene Omukristau okukala notyituwa otyiwa, opo ombunga yetu itale etyi otyili tyakalesa nawa omuenyo wetu.” Ombunga yetu ina okutala okuti otyili tyetukuatesako okukala tyelikalela ku vakuetu monkhalelo yaviuka.

Apostolu Petulu waava elondolo limwe liakolela pala ovakai vena ovalume vehelilongesa, wati: “Tavelei kovalume venyi, opo inkha kavetavela kondaka, vakokwe tyihena ndaka novituwa viovakai vavo. Mokonda yokutala ovituwa vienyi viaviuka, kumwe nehumbilo enene. Iya, okufiwa kuenyi, kuhakale kokuvindwa onohuki, nokuvala ovipuka viokufiwisa vioolu ine omivalo. Anthi, kukale komunthu uhamoneka wo mokati momutima, momuvalo uhanyoneka wotyituwa tyahiliya noutendi, tyakolela vali unene komaiho a Huku.”​—1 Ped. 3:1-4.

Petulu wahoneka okuti omulume upondola okukokwa notyituwa otyiwa tyomukai wae. Nolusoke olo, etyi Christa ambatisalwa mo 1972, ankho wovola okukala novituwa oviwa opo akuateseko omulume wae okulilongesa otyili. Namphila ahimbika okulongeswa no Nombangi pomuvo wike nomulume wae, mahi ankho nkhele omulume wae kesukile notyili. Ankho pamwe wenda komaliongiyo, iya ankho una oupanga novakuatate. Mahi ovakuatate ankho vena onthilo nepondolo liae liokulihovonena. Oñgeni Christa aovola okuhika komutima wae?

“Ame natokola okukakatela mu Jeova nokulinga etyi ahanda. Pamwe, ndyiovola okukoka omulume wange ‘tyihena ondaka,’ pokukala notyituwa otyiwa. Tyina ahanda ndyilinge otyipuka tyimwe tyahapengele kovitumino Viombimbiliya, ndyilinga ononkhono mbokutyilinga. Tyotyili, ndyina onthilo nepondolo liae liokuliholovonena, iya ndyipakula otyitateka otyo ku Jeova.”

Ongeleka ya Christa, ilekesa okuti tyakolela okukala nomutima wapepuka. Utualako okupameka oupanga wae na Huku, nokuenda apeho komaliongiyo nomovilinga viokuivisa. Tyotyili, walekesa okuti una onondunge, mokonda waimbuka okuti wesukisa okukala omuvo umwe nomulume wae, nokusuka nae, nokulekesa okuti umuhole. Otyiwa onthue tuna ombunga yehelilongesa tukale nonondunge, nomutima wapepuka. Ombimbiliya yati: “Kuna omuvo wokulinga ovipuka aviho.” Otyo tyakutikinya omuvo tukala nombunga yetu, haunene una tuelinepa nae, mahi wehelilongesa otyili. Omuvo tukala kumwe mautukuatesako okutomphola. Onongeleka mbalekesa okuti okukala netompho ewa tyivekuatesako okuhelitehelela okuti vekahi aveke, nokuhakala nehipa ine onkhuelume.​—Ecl. 3:1.

Holger una he wambatisalua etyi palamba omanima 20 tunde etyi vakuavo mombunga vambatisalwa, wati: “Tyakolela okulekesa okuti tuhole ombunga yetu, nokuveitilako momalikuambelo etu.” Christa wayawisako okuti ‘una ekevelo liokuti nthiki imwe omulume wae metavela otyili afende Jeova.’ Tuesukisa apeho okukala notyituwa otyiwa nombunga yetu vehelilongesa, nokukala nekevelo liokuti nthiki imwe mavelilongesa otyili.

Etyi tuhanda, okutualako noupanga omuwa nombunga yetu nokuveavela omphitilo opo vanoñgonoke otyili, nokuhika komitima viavo nondaka Yombimbiliya. Movipuka aviho tuesukisa okukala “nomutima wapoleya nonthilo onene.”​—1 Ped. 3:15.