Muayovolwa Mokonda Yokankhenda Okanene Muhatokalele

1, 2. HOñgeni Romanos 5:12 itukuatesako?

ROMANOS 5:12 ipopia okuti: “Mokonda yomunthu wike vala onkhali yanyingila mouye, iya onkhali yaeta ononkhia. Moluotyo ononkhia mbeliyandyana kovanthu vatyo aveho, mokonda aveho valinga onkhali.” Ei o imwe pono versikulu twii nawa tupu tuiundapesa unene tyina tulongesa ovanthu Ombimbiliya.

² Oversikulu ei ivasiwa unene momukanda Oityi Ombimbiliya tyilityili ilongesa? No momukanda Oityi Ombimbiliya Itulongesa? Tyina tulilongesa novana vetu ine novanthu ovakuavo okapitulu 3, 5, no 6 tutanga omukanda wa Romanos 5:12. Onthue tupondola okutanga oversikulu oyo opo tunoñgonoke omokonda yatyi ohi hono hamphangu yombembwa, omokonda yatyi tuesukisa otyilikutila tyeyovo, tupu omokonda yatyi tunkhila. Mahi oversikulu ei, tupu itukuatesako okupanda unene oupanga tuna na Jeova. Tupu ituavela ondundo yokuhambukiswa Jeova nokutualako okusoka kovipuka etulaa.

 3. Oityi tuna okuhinangela konthele yetu?

³ Onthue atuho tuvakuankhali. Tulinga oviponyo ononthiki ambuho. Mahi Jeova omuna-kankhenda. Utyii okuti tuvakuankhali, iya wafuapo opo etuevele. (Salmo 103:13, 14) Jesus wetupopila okuti tuna okuita ku Huku opo etuevele ononkhali mbetu. (Lucas 11:2-4) Tyina Jeova amaevela ononkhali mbetu tualingile kohale, katusukisa okutualako okumbusoka. Tutalei oñgeni Jeova aevela ononkhali mbetu.

4, 5. (a) Oityi tyitukuatesako okunoñgonoka Romanos 5:12? (b) Oityi ondaka “okankhenda okanene” ihangununa?

⁴ Omukanda wa Romanos, haunene okapitulu 6, ketukuatesako okunoñgonoka oñgeni Jeova aevela ononkhali mbetu. Mokapitulu 3, tulilongesa mo okuti “ovanthu aveho vena onkhali.” Konyima Paulu ahangununa okuti: “Ovanthu aveho ovakuankhali kavavasi omunkhima wa Huku. Vaihanwa okuti ovaviuki mokonda yotyali vapewa moluembia lwa Huku vahatokalele, menyina liotyilikutila tyeyovo tyafetwa na Kristu Jesus.” (Romanos 3:23, 24) Ondaka yo Gregu yapitiyua okuti “okankhenda okanene” ilekesa okulinga otyipuka tyimwe ohakevelela okufetwa, otyipuka omunthu ahatokalele.

⁵ Omunongo umwe wapopia okuti ondaka yo Gregu, ovikando ovinyingi ipopia okankhenda okanene Huku na Kristu valekesa etyi vayovola ovanthu konkhali no kononkhia. Otyo Ombimbiliya Tradução do Novo Mundo ipitiyila ondaka oyo yo Gregu okuti “okankhenda okanene.” Tutalei oityi Huku ekahi nokutulingila, noñgeni okankhenda kae okanene ketuetela ouwa pehepano, nokutuavela ekevelelo komutwe wandyila.

 6. Olie upola ouwa kokankhenda okanene ka Huku iya oñgeni?

⁶ Mokonda Andau walinga onkhali, onkhali no nonkhia ailiyandyana movanthu aveho. Otyo Ombimbiliya ipopila okuti “mokonda yomunthu wike vala ononkhia mbukahi nokutumina ngo hamba.” Mahi Jeova walekesa okankhenda kae okanene mokualinga atyiho opo ayovole ovanthu aveho, “nomunthu wike vala, Jesus Kristu.” (Romanos 5:12, 15, 17) “Mokonda yomunthu wike vala uhetavelele, ovanyingi vakala ovakuankhali.” Tupu vapondola okuyambwa “nomuenyo uhapu menyina lia Jesus Kristu.”​—Romanos 5:19, 21.

 7. Omokonda yatyi Huku etuavelela ofeto yeyovo nokutulekesa okankhenda tuhatokalele?

⁷ Soka kuetyi: Jeova kalingile vala Omona wae otyilikutila tyeyovo. Mahi walekesa okankhenda okanene opo etuyovole konkhali no kononkhia. Petupu omunthu nawike utyivila okuhangununa etyi Huku na Jesus vetulingila. Onthue tupandula unene mokonda tyetuavela omphitilo yokuevelwa ononkhali mbetu nokukakala nomuenyo uhapu! Tulekesa okuti tupandula Huku nonkhalelo tutyinda omuenyo wetu.

 8. Otyituwa patyi tuesukisa okulityilika?

⁸ Onthue tutyii okuti Huku uhanda unene okutuevela, namphila tulinga ononkhali onene. Mahi katupondola okusoka okuti mokonda Jeova una okankhenda okanene tupondola ‘okulinga onkhali Jeova metuevela.’ Potyita tyotete, namphila ono apostolu vamwe nkhele ankho vena omuenyo, Ovakristau vamwe ankho vasoka ngotyo. (Tanga Judas 4.) Hono, nonthue tuesukisa okulunguka opo tuhahongiliyue navakuetu iya katutu-katutu atuhimbika okusoka ngotyo.

9, 10. Oñgeni Paulu novanthu ovakuavo vayovoka konkhali no kononkhia?

⁹ Paulu walondola Ovakristau okuti katyaviukile vasoke okuti vapondola okutualako okulinga onkhali mokonda Huku meveevela. Paulu wati vapondola okulityilika okusoka ngotyo mokonda ‘vaipawa nonkhali.’ (Tanga Romanos 6:1, 2.) Oityi ankho ahanda okupopia?

¹⁰ Mokonda yotyilikutila tyeyovo, Huku waevelele ononkhali mba Paulu no mbo Vakristau ovakuavo vo potyita tyotete. Jeova evelembula nospilitu sandu opo vakale ovana vae. Inkha vatuaileko nekolelo, mavakala keulu nokukatumina na Kristu. Putyina nkhele vekahi pano pohi, oñgeni “vankhia mokonda yonkhali”? Paulu waeleka ononkhia nonkhali opo alekese okuti omuenyo wavo wapiluluka unene. Wapopia okuti etyi Jesus ankhia atutiliswa nomuenyo wokeulu uhankhi vali. Otyo Jesus “ahatumininwa vali no nonkhia.” Tyelifwa notyo, Ovakristau navo ongatyina vankhia. Omuenyo wavo wapiluluka unene mokonda ankho kavayeke omahando onkhali evetumine. Nongotyo, valinga atyiho vevila opo vahambukiswe Huku. “Vankhia mokonda yonkhali mahi vena omuenyo mokonda ya Huku menyina lia Kristu Jesus.”​—Romanos 6:9, 11.

11. Oñgeni Ovakristau hono “vankhia mokonda yonkhali”?

¹¹ Iya onthue? Oñgeni “tuankhia mokonda yonkhali”? Kohale, hamwe ankho tualingile ononkhali ononyingi otyo tuhetyii oñgeni Jeova atala ovituwa vietu. Onthue ankho tukahi “ngovapika vonkhali netyi tyehelikuatele novitumino.” (Romanos 6:19, 20) Mahi etyi tuelilongesa Mombimbiliya oñgeni Huku ahanda tutyinde omuenyo, atulingi omapiluluko, atupakula omuenyo wetu kwe iya atumbatisalwa. Onthue tuna ehando enene liokutavela ku Jeova nokutyinda omuenyo umuhambukiswa. “Tuayovoka konkhali,” iya “tuakala ovapika vouviuki.”​—Romanos 6:17, 18.

12. Oityi kese umwe puonthue ena okuholovona?

¹² Onthue nkhele tuna okuholovona. Paulu wapopia okuti: “Muhayekei onkhali itualeko okutumina momalutu enyi ankhia, opo mutavele komahando enyi.” (Romanos 6:12) Otyo tyilekesa okuti tuna okuholovona inkha matuliyungu komalusoke apenga ine matuyeke tukale ovapika ao. Lipula okuti: ‘Okuti ndyisoka unene kovipuka ovivi konyima andyivilingi? Ine ndyieanya liwa-liwa?’ Inkha tupandula unene okankhenda okanene ka Huku tuhatokalele, matulingi atyiho tuvila opo tumuhambukiswe.

13. Omokonda yatyi tuna onthumbi yokuti tupondola okulinga etyi tyaviuka?

¹³ Potyita tyotete, ovanthu vamwe mo Korintu ankho ovimphulu, valala poyavo, valinga oundalelapo, vafenda ovilolo, nokunwa unene. Etyi vanoñgonoka Jeova nokukala nohole nae avapiluluka. Ovipuka ankho valinga avivekundisa. (Romanos 6:21; 1 Coríntios 6:9-11) Ovakristau mo Roma navo ankho vesukisa okulinga omapiluluko ngoo. Paulu evepopila okuti: “Muhatualeiko okupakula omalutu enyi monkhali, ngoviti vietyi tyihaviukile. Mahi, lipakulei ku Huku ngovanthu vokuna omuenyo pokati ka vana vankhia. Tupu, pakulei omalutu enyi ku Huku, ngatyina oviti vietyi tyaviuka.” (Romanos 6:13) Paulu ankho una onthumbi yokuti mavalingi etyi tyaviuka nokutualako okupola ouwa kokankhenda okanene ka Huku tuahatokalele.

14, 15. Omapulo patyi tupondola okulilinga?

¹⁴ Hono tupu ongotyo. Vamwe povakuatate vetu no nomphange ankho vatyinda omuenyo ngo va Korintu. Mahi etyi vanoñgonoka Jeova, avapilulula omuenyo wavo, “avakala tyasukuka.” Opo tuhambukiswe Jeova tuna okulinga omapiluluko. Onthue tuhanda okulekesa okuti tupandula okankhenda okanene ka Huku tuhatokalele. Ngotyo tuna okutokola okulwa nomahando omavi nokuundapesa omuenyo wetu movilinga via Jeova.

¹⁵ Tyotyili, katuhande okulinga ononkhali ononene ngombu mbalingile ova Korintu vamwe. Onthue katuhande okulinga ovipuka atukevelela Huku alekese okankhenda kae okanene nokutuevela. Mahi oñgeni tutala ononkhali mbuna tusoka okuti ha nonene unene? Okuti tulinga atyiho tuvila opo tutavele Jeova movipuka aviho?​—Romanos 6:14, 17.

16. Oñgeni tutyii okuti tupu tuna okulityilika ononkhali mba hapopilwe mu 1 Coríntios 6:​9-11?

¹⁶ Soka ku apostolu Paulu. Wahoneka okuti: “Ame ndyihitu, nalandeswa konkhali. Ame hityii etyi ndyikahi nokulinga. Mokonda etyi nahanda okulinga hityilingi, mahi ndyilinga etyi ndyiyele.” (Romanos 7:14, 15) Namphila ankho ahalingi ovipuka viapopiwa mu 1 Coríntios 6:9-11, Paulu waimbuka okuti nkhele omukuankhali. Ankho uhanda okuhambukiswa Jeova, mahi nkhele ankho ulwa nomahando omavi. (Tanga Romanos 7:21-23.) Nonthue tupondola okuhetekela ongeleka yae, okulinga atyiho tuvila opo tutavele ku Jeova.

17. Omokonda yatyi tuhandela okukala ovakuatyili?

¹⁷ Mongeleka, onthue tutyii okuti opo tuumbile Jeova tuna okukala ovakuatyili. (Tanga Provérbios 14:5; Efésios 4:25.) Onthue katuhande okukala nga Satanasi, “tate yomatutu.” Iya onthue tutyii okuti Anania nomukai wae vankhile mokonda yokukemba. Otyo tuhakembela. (João 8:44; Atos 5:1-11) Mahi okukala ovakuatyili ha kuhapopi vala omatutu. Inkha tupandula okankhenda okanene ka Huku tuhatokalele, tupu matukala ovakuatyili mononkhalelo ononkhuavo.

18, 19. Oityi tyihangununa okukala omukuatyili?

¹⁸ Omunthu upondola okuhakembe mahi nongotyo hamukuatyili. Mongeleka, Jeova wapopilile ova Isilayeli okuti: “Kupondola okuvaka, kupondola okuyondya, tupu kupondola okulinga vakuenyi emphinia.” Omokonda yatyi ankho vesukisa okulinga ngotyo? Jeova wati: “Muna okusukuka, mokonda ame Jeova, Huku yenyi ndyimusukuki.” (Levítico 19:2, 11) Namphila katupopi omatutu, mahi inkha tulinga otyipuka opo vakuetu vetyitavele mahi hatyili, ngotyo katuvakuatyili.

¹⁹ Mongeleka, omunthu umwe upopila omuhona wae ine omunthu omukuavo aundapa nae okuti wesukisa okupetuka omutenya mokonda maende kosipitali. Mahi tyili-tyili hatyoko apetukila omutenya. “Kosipitali” kamakalako ehimbwe. Okuti wakala umwe omukuatyili? Omulume oo wapopia otyipuka opo vasoke okuti otyili. Ovanthu vamwe kavapopi otyili opo vapolemo otyipuka tyimwe ine opo vahakoyeswe. Mahi onthue tuhanda okutavela oku Jeova upopia okuti: “Kupondola okuyondya.” Tuhanda okulinga etyi apopia okuti otyo tyaviuka nokuasukuka.—Romanos 6:19.

20, 21. Inkha tupandula okankhenda okanene ka Huku, oityi tuna okulityilika?

²⁰ Tyotyili, onthue tulityilika oundalelapo, nokunwa unene no nonkhali ononkhuavo ononene. Haunene, onthue tuhanda okulityilika ovipuka aviho vinumanesa Jeova. Mongeleka, onthue katulityilika vala oundalelapo, mahi tupu tulityilika ovitalukiso vituhindila okulinga oundalelapo. Onthue katulityilika vala okunwa unene, mahi tupu tulityilika okukala ononkholwa. Tuesukisa okulinga ononkhono opo tulityilike omahongiliyo oo, mahi tyitavela okutyilinga.

²¹ Onthue tuatokola okulinga nga Paulu wati: “Muhayekei onkhali itualeko okutumina momalutu enyi ankhia, opo mutavele komahando enyi.” (Romanos 6:12; 7:18-20) Tyotyili katutyivili okulityilika ononkhali ambuho. Mahi tyina tulinga ononkhono mbokuluisa ononkhali ambuho, tulekesa okuti tyili-tyili tupandula okankhenda okanene Huku na Kristu vetulekesa.

22. Ouwa patyi tupolako inkha tyilityili tupandula okankhenda okanene ka Jeova?

²² Jeova waevela ononkhali mbetu tupu utualako okutuevela. Onthue tupandula unene okankhenda kae okanene! Ngotyo tulinga ononkhono mbokulityilika okulinga ovipuka Huku apopia okuti viapenga, namphila vakuetu vasoka okuti hankhali. Ouwa patyi tupolako inkha tulinga ngotyo? Paulu wati: “Mokonda muayovolwa konkhali, pahe muakala ovapika va Huku, mukahi nokuava ovinyango viousukuki, komutwe wandyila mamukapewa omuenyo uhapu.”​—Romanos 6:22.