Okuti Kuna Umue Omunthu Wesuka Naame?

Okuti pamue ulitehelela ukahi oulike nokuhena ekevelelo, ngoti nawike wii ovitateka una? Ine pamue namphila vevii, ulitehelela ngoti kavasukile?

TYINA tutumbukilwa novitateka, pamue omuenyo wetu ukala ngotyipepe otyinene tyihatulu. Pamue tupondola okusoka okuti kamatutyivili okukoleleya mokonda ovitateka vietu ovinene unene kavietutokalele. Ovikando ovinyingi tyieta onongembia ononyingi molutu, no momutima, nokuliunga, nokunamesa, nomauvela ahaveluka ine omakuavo vali. Pamue tulitehelela okuti tutupu ombatelo nekevelelo, atulipulu opi matuvasi ombatelo. Okuti kuna umue tyili omunthu wesuka naame?

“Huku Weungumaneso Aliho” Wesuka Nove

Mombimbiliya Huku upopiwa okuti, “o Tate wonkhenda onene, Huku weungumaneso aliho.” (2 Coríntios 1:3) Huku, utiwa o Jeova, utyii okuti tuesukisa okuungumaneswa. Ombimbiliya ipopia ondaka “okuungumanesa” ovikando ovinyingi unene mononkhalelo ononyingi. Ituavela onthumbi yokuti Huku kei vala ovitateka vietu, mahi tupu uhanda okutuvatela. Otyo tyituavela onthumbi yokuti namphila vakuetu ngoti kaveete ovitateka vietu ine kavasukile, mahi Jeova Huku wasuka nonthue.

Ovihonekwa vilekesa nawa okuti Jeova wesuka na kese munthu. Ombimbiliya yati: “Omaiho a Jeova atala ponomphangu ambuho, okulava onondingavivi, novaviuki.” (Provérbios 15:3) Tupu, mu Jó 34:21 tutangamo okuti: “Omaiho ae atala onondyila mbovanthu. Oe utala onomphai mbavo ambuho.” Jeova utala etyi tulinga, otyiwa ine otyivi. Tupu oe utala nawa ononkhalelo mbetu, opo etuvatele monkhalelo yaviuka. Otyo, tyalekeswa nawa monondaka mba Hanani omuuli, apopilile Ohamba yo Judaa Asa, mbati: “Omaiho a Jeova, ekahi nokutala kombanda yoohi aiho, opo alekese ononkhono mbae ku vana vemuumbila nomutima auho.”—2 Crônicas 16:7, 9.

Jeova utualako nokututala mokonda yehunga ekuavo. Jesus wati: “Naumue upondola okuya kuame, tyina ahakokelwe Tate wanthuma.” (João 6:44) Jeova wasuka unene, utala momutima womunthu inkha uhanda umue okunoñgonoka nawa Huku. Inkha amona okuti uhanda, umuvatela mononkhalelo onongwa unene. Tala omukai umue ko Republica Dominicana, ankho ukahi mosipitali opo atandwe ouvela utiwa cancer. Ankho ulikuambela ku Huku opo emuvatele okuvasa ongeleya yotyotyili. Etyi papita okamuvo kehehi, omulume wae emuetela ombrosula yati Oityi Huku Ahanda Kwonthwe?a apewa komuhuka Nombangi ya Jeova yaile pondyuo yavo. Omukai watanga ombrosula oyo, aimbuka okuti Huku wakumbulula elikuambelo liae. Etavela okulilongesa Ombimbiliya Nombangi, konyima yonohanyi epandu, elipakula ku Huku ambatisalwa.

Mombimbiliya momukanda wo no Salmu, tuvasamo onondaka ononyingi mbuhambukiswa mbo va Hebreu vahoneka ono salmu kohale, ngombo Hamba David, mbulekesa okuti Jeova utekula ovaumbili vae noluembia. Mo Salmo 56:8 Ohamba David wiita ku Huku okuti: “Paka ononkhuka mbange monthenda yove. Kambukahi momukanda wove?” Ngetyi etyilekesa monondaka mbae, David ankho utyii okuti Jeova wanoñgonoka nawa ononkhumbi mbae no ñgeni mbumukalesa. Jeova ankho wanoñgonoka nawa onongembia mba David netyi ankho eivite tyimulilisa. Tyotyili, Omupakeko wetu utala nawa aveho valinga ononkhono mbokulinga ehando liae, “opo alekese ononkhono mbae ku vana vemuumbila nomutima auho.”

Onthele onkhuavo yo Mbimbiliya ipopia okuti Huku omutekuli woluembia, o Salmu 23 yankhimana. Onondaka mbokuhimbika mbueleka Huku nomunthita woluembia. Mbati: “Jeova oe omunthita wange. Natyike matyinkhambela.” Koutundilo wekumbi omunthita, usuka na kese ongi motyunda tyae, nokumbuihana alo umue kenyina. Kese nthiki wihanena ike ponthele yae, eitale nawa inkha ina apa yeliveta. Inkha ina otyipute, upakapo omulela opo tyiveluke. Inkha imue ivela, omunthita winuisa ovihemba opo iveluke. Oyo, ongeleka ongwa pala okulekesa oñgeni Jeova atekula vana vemuumbila.

Elikuambelo Netutilo, Vilekesa Okuti Huku Wesuka Nonthue

Ono salmu ombo no nonkhuavo onongwa, kambahonekelwe vala mo Mbimbiliya opo tumbutange iya atuhambukwa. Mbutulekesa oñgeni ovaumbili va Huku vekolelo kohale, vaitile ku Jeova nomutima auho opo evevatele momasukasuka avo. Tupu, mbulekesa olupandu luavo mokonda yehongolelo lia Huku nononkhano onongwa evepele. Onondaka ombo, mbulekesa nawa okuti ovaumbili va Huku kohale, ankho vetyii okuti Huku tyotyili wasuka navo. Okutanga onondaka ombo mbatunda komitima viavo nokusokolola nawa, matyituvatela okukala nonthumbi mu Huku ngo yavo. Elekeso ekuavo liokuti Huku wasuka nonthue, elikuambelo etuavela opo tupopie nae.

Anthi, pamue tukala tyalemenwa novitateka, atukala tyihetyii oityi matuiti. Okuti otyo, tyityilika Jeova okunoñgonoka ovitateka vietu? Romanos 8:26 ikumbulula okuti: “Ospilitu iiya okutuvatela menamo lietu, mokonda katutyii okonthele yotyitateka patyi matuiti ngetyi tuesukisa. Mahi, ospilitu muene ituitilako nonkhemo ihena ondaka.” Ovihonekwa ovio vitupopila okuti omalikuambelo ahonekwa novaumbili va Huku kohale, pamue elikuata netyi tuesukisa. Moluotyo, Jeova “Omuteheleli womalikuambelo,” utavela omalikuambelo oo ngatyina oetu.—Salmo 65:2.

Ekevelelo lietutilo, elekeso ekuavo lilekesa okuti Huku wasuka na kese munthu. Jesus Kristu wati: “Mokonda makuya ola imue aveho vekahi momalangalo mavekeiva ondaka yae [Jesus] iya avatundumo.” (João 5:28, 29) Ondaka yo Gregu yaundapeswa apa, kaipopi vala “omalangalo” anthi ipitiyua nawa okuti ovokukahi ‘mehinangelo lia Huku.’ Ilekesa okuti Huku uhinangela oñgeni omunthu wokuankhia ankho atuwa.

Nkhele soka, opo Huku akondole omunthu komuenyo, una okunoñgonoka ovipuka aviho konthele yomunthu oo. Una okuhinangela olupe luae, etyi ankho atuwa nevi elilongesile, natyiho ankho ei nomalusoke ae! (Marcos 10:27) Ehinangelo lia Huku konthele yomunthu oo, kalitepuluka namphila palamba omanima omanyingi unene. (Jó 14:13-15; Lucas 20:38) Ngotyo, otyinyingi tyovanthu vokuankhia, Jeova nkhele uvehinangela nawa-nawa atyiho ankho vatuwa. Otyo, tyilekesa okuti Huku wasuka nakese umue puonthue!

Jeova Uyamba Ovanthu Vae

Oityi tuna okulinga opo tutambule ombetelo Huku etuavela noluembia? Tete, tuna okulekesa okuti tutavela ku Huku, nokuna ekolelo mwe. Apostolu Paulu walekesa okuti tuna okukala nekolelo mu Huku opo etuyambe. Oe wahoneka okuti: “Tyihena ekolelo tyipuiya okuhambukiswa Huku. Mokonda una wahanda okufuena ku Huku, una yokutavela okuti kuna Huku, nokuti oe makaavela ondyambi vana vemuovola tyotyili.”—Hebreus 11:6.

Noñgonoka okuti ekolelo lihambukiswa Huku liakutikinya ovipuka vivali. Tete, tuna okutavela okuti “kuna Huku,” oe Omutumini wetu Omukulami, tuatokala okutavela nokufenda. Vali, tuna okutavela okuti “oe makaavela ondyambi vana vemuovola tyotyili.” Ekolelo liotyotyili liakutikinya okutavela okuti Huku uhanda aveho vaovola nononkhono okulinga ehando liae vakale nomuenyo omuwa, nokuti mekeveyamba. Mokulilongesa Ondaka ya Huku nokuliwaneka na vana vemutavela, nove upondola okukala nekolelo liatokala okuyambwa na Huku, nokutekulwa noluembia.

Ovanyingi hono, vetavela okuti Huku kasukile nevi ovanthu valinga. Mahi, ngetyi tuetyimona, Ombimbiliya ilekesa nawa okuti Huku wasuka unene na vana vena ekolelo liotyotyili mwe. Namphila omuenyo hono weyula ovitateka, nomasukalalo, nononkhumbi, onthue katusukisa okukala tyihena ekevelo. Jeova Huku wasuka nonthue. Tyotyili, oe utukonga noluembia opo tumuite ombatelo. Omuhoneki wono salmu wati: “Pakula omulemo wove ku Jeova, iya oe mekuvatela. Kamayeke omuviuki atengaulwe.”—Salmo 55:22.

[Onondaka Poutoi]

[Olutalatu pefo 27]

Ovihonekwa Vipameka Ekolelo Liove Moluembia Huku Ena Nove

“Omaiho a Jeova, ekahi nokutala kombanda yoohi aiho, opo alekese ononkhono mbae ku vana vemuumbila nomutima auho.”​—2 CRÔNICAS 16:9

“Paka ononkhuka mbange monthenda yove. Kambukahi momukanda wove?”​—SALMO 56:8

“Jeova oe omunthita wange. Natyike matyinkhambela.”​—SALMO 23:1

“Ove Muteheleli womalikuambelo, ovanthu aveho mavehiki kuove.”​—SALMO 65:2

“Ove moihana, iya ame andyikutavela. Moivaluka ovilinga waundapa nomaoko ove.”​—JÓ 14:15

“Una wahanda okufuena ku Huku, una okutavela okuti kuna Huku, nokuti oe makaavela ondyambi vana vemuovola tyotyili.”—HEBREUS 11:6

“Pakula omulemo wove ku Jeova, iya oe mekuvatela. Kamayeke omuviuki atengaulwe.”​—SALMO 55:22