Okuti Pahe Upondola Okumbatisalwa?

Apa wahimbika okulilongesa Ombimbiliya, mokutala pahe wanoñgonoka umwe Siovaa. Hamwe wayekapo-ale okulinga ovipuka Siovaa ahahande. Mahi hamwe tyina usoka okulipakula ku Siovaa ombatisalwa, uponwa, mokonda nkhele hamwe una tyimwe tyili nokukutyika. Hamwe usoka okuti nkhele kwafuilepo. Elongeso eli, malipopi ovipuka vimwe vihole okutyika ovanthu tyina vasoka okumbatisalwa, netyi ove upondola okulinga viehekutyike.

1. Okuti una okunoñgonoka Ombimbiliya aiho opo umbatisalwe?

Opo umbatisalwe, una okukala “nenoñgonoko liaviuka liotyili.” (1 Timotiu 2:4) Okuti ngotyo pahe una umwe okunoñgonoka Ombimbiliya aiho? Au, mokonda novanthu vokuambatisalwa-le kohale, na hono velilongesa Ombimbiliya. (Ova Kolosu 1:9, 10) Mahi opo umbatisalwe, una okunoñgonoka ovipuka vimwe Ombimbiliya ilongesa. Ine nkhele wangwangwana, kwetyikolele ankho evi wanoñgonoka-le vituuka umbatisalwe, upondola okukapula ovakulu vewaneno.

2. Oityi una okulinga tyina nkhele wehenembatisalwe?

Tyina nkhele wehenembatisalwe, una ‘okulivela, okondoka ku Huku.’ (Tanga Ovilinga 3:19.) Onondaka ombo mbahanda okutiwi? Ovipuka vina ovivi ankho ulinga, tyina uvisoka, tyina okukuihama komutima. Pahe tyina tyamekuihama ngotyo, una okuita Siovaa ekuevele. Tupu onondaka ombo mbahanda okuti, una okuyekapo ovipuka ovivi, olikuatehila ulinge apeho etyi tyihambukiswa Siovaa. Una okuenda apeho komaliongiyo, olikuatehila ukale omuivisi. Omuivisi omunthu ulongesa Ombimbiliya na vakuavo vo mewaneno.

3. Kupondola okutila owoma okumbatisalwa mokonda yatyi?

Ovanthu vamwe vena owoma, kavahande okumbatisalwa mokonda vasoka okuti hamwe ha kamavetyivili okulinga atyiho vapopila Siovaa. Mahi atuho tupengesa. Novanthu vamwe vapopiwa mo Mbimbiliya, ankho valingila Huku, navo vaponyaunine. Siovaa kakevelela okuti ovanthu vae apeho mavalingi vala evi viaviuka. Utyii umwe okuti pamwe matupengesa. (Tanga Salmo 103:13, 14.) Tyina amekumono okuti uli nokulikuatehila, nae uhambukwa, ekukuatesako mononkhono uli nokulinga. Ondaka yae Ombimbiliya yati ‘natyike matyituyapula koluembia lwa Huku.’ — Tanga Ova Loma 8:38, 39.

KUHANDE OKUNOÑGONOKA VALI?

4. Noñgonoka nawa Siovaa

Una okunoñgonoka nawa Siovaa. Una okumunoñgonoka umwe nawa etyi ekahi, omuhumbu, olikuatehila ulinge apeho ovipuka vimuhambukiswa. Talei OVIDIU mutale etyi vakwenyi valinga vahumbe vali Siovaa. Pahe amutomphola epulo eli:

OVIDIU: Etyi Una Okulinga Opo Umbatisalwe (3:56)

• Ovanthu ava tuatala movidiu, oityi valinga opo vambatisalwe?

Tangei Ova Loma 12:2, amutomphola omapulo aa:

• Ku ove, etyi uli nokulilongesa mo Mbimbiliya otyili umwe? Okuti Onombangi mba Siovaa valongesa otyili?

• Ine nkhele una vimwe wahanoñgonokele nawa, oityi una okulinga?

5. Motyivili okulipola atyiho tyili nokukutyika okumbatisalwa

Pamwe tyina tuti matumbatisalwa, tuna ovipuka vimwe tuna okuyekapo. Otyo vimwe okuviyekapo, katyapepukile! Talei OVIDIU, mutale etyi omuhikuena umwe esukisile okuyekapo. Pahe amutomphola omapulo aa:

OVIDIU: Nelipola Atyiho Ankho Tyili Nokunthyika Okulingila Siovaa (5:22)

• Ovipuka patyi Narangerel esukisile okuyekapo alingile umwe nawa Siovaa?

• Oñgeni okuhumba Siovaa tyemukuatesako?

Tangei Provérbios 29:25 na 2 Timotiu 1:7, amutomphola epulo eli:

• Oityi una okulinga wahatile owoma okuyekapo ovipuka vili nokukutyika okumbatisalwa?

6. Yumba-ko onthumbi, Siovaa mekukuatesako

Siovaa mekukuatesako utyivile okulinga etyi tyimuhambukiswa. Talei OVIDIU, amutomphola omapulo aa:

OVIDIU: Siovaa Huku Mekukuatesako (2:50)

• Oityi omukulu ou tuamona movidiu ankho atilila owoma okumbatisalwa?

• Oityi apopilwa tyemupa okuyumba vali onthumbi mu Siovaa?

Tangei Isaías 41:10, 13, amutomphola epulo eli:

• Oityi wayumbila-ko umwe onthumbi yokuti Siovaa mekukuatesako okulinga atyiho wemupopila etyi welipakula kwe?

7. Pandula Siovaa tyetyi ekuhole unene

Ine usoka umwe nawa otyipuka Siovaa ekuhole, apeho mohande okulinga-vo tyimwe umupandule. Tyina momutima wove upandula atyiho Siovaa ekulingila, mohande ñgeno umulingila apeho. Tangei Salmo 40:5, amutomphola epulo eli:

• Povipuka aviho Siovaa ekuavela, nevi ekulingila, ovipi uhole vali?

Selemiya ankho uhole unene Siovaa, nondaka yae. Apeho ankho upandula Siovaa etyi emuyeka emufende. Wapopilile Siovaa okuti: “Ondaka yove yalinga ondolo yehambu momutima wange, mokonda ame natyinda enyina liove, Siovaa Huku.” (Jeremias 15:16) Tompholei omapulo aa:

• Tyina usoka, okuti otyiwa okukala Ombangi ya Siovaa? Oityi wapopila ngotyo?

• Uhanda umbatisalwe olingi Ombangi ya Siovaa?

• Okuti una tyimwe tyili nokukutyika umbatisalwe?

• Pahe oityi molingi ulipole-tyo umbatisalwe?

ETYI WELILONGESA

Welilongesa okuti Siovaa mekukuatesako okulipola ovipuka aviho vili nokukutyika okumbatisalwa.

Okupitulula

• Okuti una okunoñgonoka Ombimbiliya aiho opo umbatisalwe?

• Ovipuka patyi hamwe mosukisa okuyekapo tyina nkhele wehenembatisalwe?

• Kupondola okutila owoma okumbatisalwa mokonda yatyi?

KUHANDE OKUOVOLA VALI?

Oityi tyina okutuavela ondundo tumbatisalwe? Onthele ei ityipopia nawa.

“Okuti Ove Wafuapo Opo Umbatisalwe?” (Omutala Womulavi wa Março yo 2020)

Tala etyi una okulinga ulipole ovipuka vikutyika okumbatisalwa.

“Oityi Tyinthyilika Okumbatisalwa?” (Omutala Womulavi wa Março yo 2019)

Tala ovipuka vimwe omukulu ou esukisile okuyekapo ambatisalwe.

‘Omokonda Yatyi Uhambatisalelwa?’ (1:10)

Ponthyimbi Ataa ankho kahande okumbatisalwa, mahi pahe ambatisalwa. Oityi akasokela nawa ambatisalwa?

Ñgaa Ame Umwe Siovaa Alingila Ovipuka Evi Aviho (7:21)