• Oityi Tulilongesila Kondenge ya Sesusi?
    Omutala Womulavi (Wokulilongesua)—2022 | Kupupu

    • TUALAKO OKULIOLA OMUTIMA NGA TIAKU

      O Tiaku etyi omona, ukahi nokutala Suse una nokulongesa Sesusi apa vahongela omavai.

      Etyi Sesusi emumonekela, Tiaku etavela nomutima weliola, okutuka opo akala omulanduli wa Kilisitu. (Tala opalangalafu 5-7)

       5. Oityi Tiaku alingile etyi Sesusi atutiliswa emumonekela?

      5 Onalupi Tiaku akala omulanduli wa Sesusi? Etyi Sesusi atutiliswa ‘aende ku Tiaku, konyima pahe aende kono apositolu ambuho.’ (1 Kol. 15:7) Okutuka apa Sesusi emumonekela, Tiaku akala omulanduli wae. Etyi ono apositolu vekahi nokukevelela vanengulilwe ononkhono mba Huku mo Selusalei, na Tiaku ankho opo eli. (Ovil. 1:13, 14) Konyima, Tiaku nae akala umwe pononkhalamutwe Mbovakilisitau potyita tyo tete. (Ovil. 15:6, 13-22; Gal. 2:9) Etyi enima 62 P.K. lihungi popepi, kononkhono mba Huku, Tiaku ahonekela omukanda Ovakilisitau ovalembulwa. Omukanda oo utukuatesako atuho hono, tyilinge matuende keulu, tyilinge matukakala pano pohi. (Tia. 1:1) Omuhipululi umwe wo potyita tyo tete utiwa o Josefo, wapopia okuti omunene-nakwa omu Sundeu utiwa o Anania oe watumine okuipaa Tiaku. Etyi aipawa ankho kenekulupe-ale. Tiaku watuaileko okukala omukuatyili ku Siovaa atee amanuhula ovilinga viae pano pohi.