Umbila Huku Tyehelivele

1-3. (a) Oñgeni vamwe velitehelela konthele yovipuka valingaile ine vahalingile? Oñgeni ovivi tualingile kohale vipondola okutukalesa? (b) Oityi tupondola okulilongesila ku Paulu?

OMUNONGO umwe utiwa J. G. Whittier wahoneka okuti: “Onondaka mbo munthu wanumana tyilinge wembuhoneka ine wembupopia, ‘apeho mbulekesa okuti wanumana!’” Ovanthu vapopia onondaka ombo tyina vasoka okuti omuenyo wavo ñgeno wakalele vali nawa inkha valingile ovipuka vimwe monkhalelo yelikalela. Atuho tupondola okusoka kovipuka tuhanda ñgeno tuevilingile monkhalelo yelikalela. Mahi, vamwe apeho velivela ine vanumana unene mokonda yovipuka valingaile ine vahalingile. Nove ulitehela ngotyo mokonda yatyimwe walingile?

² Ovanthu vamwe valingile ovipengi, alo umwe ononkhali onene. Ovakuavo kavalingile natyike otyivi, mahi velipula inkha omatokolo amwe valinga aviuka umwe. Ovanthu vamwe kavasoko vali unene kuetyi valingile kohale iya vatualako nomuenyo wavo. Ovakuavo vatualako okulivela onombei mokonda yetyi valingile kohale. (Salmo 51:3) Iya ove? Uhanda okuumbila Huku, ohasoko vali unene kovivi walingile? Okuti Mombimbiliya muna ongeleka ya umwe walingile ngotyo? Eenga, ongeleka ya apostolu Paulu.

³ Mokueenda kuomuenyo wae, Paulu walingile ovipuka ovinyingi ovivi, tupu walingile omaholovono aviuka. Oe welivelele unene konthele yovivi alingile kohale, mahi tupu welilongesile okulinga ovilinga via Huku nombili. Tutalei oityi tupondola okulilongesila kongeleka yae.

 4. Ovipuka patyi ovivi apostolu Paulu alingile kohale?

⁴ Etyi Paulu ankho nkhele omukuendye omu Faliseu utiwa Saulu, walingile ovipuka ovivi iya konyima elivele. Mongeleka, ankho umonesa ononkhumbi ovalongwa va Kristu. Ombimbiliya ipopia okuti etyi Estevau aipawa, “Saulu ahimbika okumonesa ononkhumbi ewaneno, okuenda umbo na umbo, akokololamo aveho tyilinge ovalume ine ovakai evepake mokaleya.” (Atos 8:3) Omunongo Albert Barnes wati, onondaka “okumonesa ononkhumbi,” mbuhangununa okuti Saulu ankho umonesa emone ewaneno lio Vakristau nonyengo onene, ngatyina enyama liomohika.” Mokonda Saulu ankho o mu Judeu wombili, ankho usoka okuti o Huku wemuavela otyilinga tyokumonesa emone Ovakristau. Moluotyo, wamonesile emone Ovakristau, nokuovola okuipaa “aveho ovalume novakai.”—Atos 9:1, 2; 22:4.a

 5. Hangununa oñgeni Saulu ayekelepo okumonesa emone ovalanduli va Jesus, ahimbika okuivisa konthele ya Kristu.

⁵ Saulu ankho uhanda okuenda ko Damasku, okukapola Ovakristau momaumbo avo, eveeta mo Jelusalei Mombonge Onene yova Judeu opo vamoneswe ononkhumbi. Mahi, ketyivilile mokonda Jesus, Omutwe weuaneno lio Vakristau wemutyilikile. (Efésios 5:23) Moungendi wa Saulu wokuenda ko Damasku, Jesus wemumonekelele iya emukalesa omumphoki notyimimi tyimwe tyatunda keulu. Iya Jesus atumu Saulu ko Damasku opo ekemupopile ovipuka ovikuavo ankho esukisa okulinga. Ovikuavo vialandulako onthwe tuvii.—Atos 9:3-22.

6, 7. Oityi tyilekesa okuti Paulu ankho utyii okuti walingile ovivi?

⁶ Etyi Paulu aimbuka okuti wapengesa, ayekepo okumonesa ononkhumbi ovalongwa va Kristu, iya ahimbika okuivisa nombili konthele ya Kristu. Nongotyo, konyima wahoneka konthele yae muene okuti: “Onwe mueiva ovituwa viange nali navio kohale mongeleya yo va Judeu. Namonesa ewaneno lia Huku ononkhumbi ononene, tyokuhanda okulinyimako.” (Gálatas 1:13) Konyima, apopi vali konthele yovivi alingile, etyi ahonekela ova Korintu, nova Filipu na Timoteo. (Tanga 1 Coríntios 15:9; Filipenses 3:6; 1 Timóteo 1:13) Paulu ankho wakalele tyakunda mokonda yovipuka alingaile, tupu ankho kakalele ngatyina ahalingile natyike otyivi. Oe ankho waimbukile okuti etyi alingile otyivi.—Atos 26:9-11.

⁷ Omunongo umwe konthele yo Mbimbiliya utiwa Frederic W. Farrar, wahoneka okuti tyina tusoka konthele yoñgeni Paulu amonesile ononkhumbi Ovakristau, tupondola okunoñgonoka okuti welivelele unene, tupu ovanthu vemupopile omapita. Tyina Paulu ankho akatalelapo omawaneno, hamwe ovakuatate ankho velivasa nae otyikando tyotete, ankho vapopia okuti: ‘Ove yatyo Paulu. Ove ankho utumonesa ononkhumbi!’—Atos 9:21.

 8. Oñgeni Paulu ankho elitehelela konthele yokankhenda nohole ya Jeova na Jesus? Otyo tyitulongesa tyi?

⁸ Paulu wanoñgonokele okuti wakala vala o apostolu mokonda yokankhenda okanene ka Huku. Momikanda 14 ahoneka, wapopia konthele yokankhenda okanene ka Huku ovikando 90, tyipona ovahoneki ovakuavo vo Mbimbiliya. (Tanga 1 Coríntios 15:10.) Paulu wapandulile okankhenda ka Huku, iya ankho uhanda okulekesa okuti wapandula. Moluotyo, “waundapele vali unene” movilinga via Huku tyipona ono apostolu ononkhuavo. Oityi tulilongesila ku Paulu? Tulilongesa okuti, inkha tupopia ononkhali mbetu ku Jeova, iya atupilulula onkhalelo yetu yomuenyo, oe maevela alo umwe ononkhali mbetu ononene pokati kofeto yeyovo yotyilikutila tya Jesus. Moluotyo, inkha usoka okuti ononkhali mbove ononene unene iya kambupondola okuevelwa pokati kotyilikutila tya Kristu, hinangela ongeleka ya Paulu! (Tanga 1 Timóteo 1:15, 16.) Namphila Paulu amonesile ononkhumbi ovalanduli va Jesus, wahoneka okuti: “Omona wa Huku . . . unthyole iya welipakula pala me.” (Gálatas 2:20; Atos 9:5) Tyotyili, Paulu wanoñgonokele okuti wesukisa okuundapa nombili movilinga via Huku namphila kohale alingile ovivi, opo komutwe ehekelivele vali. Okuti noove welilongesa okulinga ngotyo?

9, 10. (a) Omokonda yatyi ovanthu vamwe va Jeova velivelela? (b) Omokonda yatyi hatyiwako okusukalala unene novivi tualingile kohale?

⁹ Okuti hono ulivela mokonda yatyimwe walingile kohale? Wahandele ñgeno waundapesile omuvo wove nononkhono movipuka viakolela vali? Okuti walinga otyipuka tyimwe tyanumanesa vakuenyi? Ine hamwe ulivela mokonda yotyipuka otyikuavo. Oityi upondola okulinga konthele yotyo?

¹⁰ Ovanthu ovanyingi vasukalala unene, nokukala notyiho mokonda yokusoka apeho kovivi valingile. Okuti okusukalala tyitetulula ovitateka? Au! Soka ñgeno una oku uhanda okuenda, mahi pahe opumphama kotyipundi tyikupikaitisa otyo ulinga ngoti ulihaka. Upondola okutyilinga nononkhono, momuvo omunyingi, mahi kumatundu apa ukahi! Tupu, tyina una ovitateka, wahakale vala notyiho, mahi linga ononkhono opo uvitetulule. Kaite otyiponyo una wanumanesa, oovola okulinga vali oupanga nae. Soka omokonda yatyi wetyilingilile opo wehetyipaleke vali. Pamwe katyitavela okulityilika ovitateka vitundilila kovivi walingile. Mahi, okusoka unene kovivi ovio, kamatyikukuatesako. Tyotyili tyipondola okukutyilika okulinga atyiho uvila movilinga via Huku!

11. (a) Inkha tuhanda Jeova akale nokankhenda nonthue oityi tuesukisa okulinga? (b) Ngetyi tyipopia Ombimbiliya, oityi tuesukisa okulinga opo tuahatualeko okulivela onombei mokonda yovivi tualingile kohale?

¹¹ Vamwe vasoka okuti kavesilivila vali komaiho Huku mokonda yovivi valingile kohale. Vasoka okuti kavatokalele okankhenda ka Huku mokonda valingile ononkhali ononene ine valingile ononkhali ononyingi. Tyotyili, katyisukisa ononkhali patyi valingile kohale, vapondola okulivela, nokupilulula onkhalelo yavo, nokuita ku Huku opo eveevele. (Atos 3:19) Jeova upondola okuveevela nokankhenda, noluembia, ngetyi ehole okuevela ovanthu ovakuavo ovanyingi. Jeova maevela nokankhenda una wokueliola omutima, omukuatyili, nokuelivela nomutima auho. Huku walingile ngotyo Job, watile: “Ndyilivela tyokulipaka eheke netwe.” (Jó 42:6) Ombimbiliya itupopila etyi tuesukisa okulinga opo tuyekepo okulivela onombei iya atukala nombembwa komutima, yati: “Una uholeka ononkhali mbae, kamakamona ouwa. Mahi, una ukembupopia no kumbuyekapo, malingilwa okankhenda.” (Provérbios 28:13; Tiago 5:14-16) Moluotyo, tuna okulikuambela ku Huku okupopia ononkhali mbetu nokumuita opo etuevele,nokulekesa okuti tyilityili tuelivela umwe. (2 Coríntios 7:10, 11) Inkha tulinga ngotyo, Una ‘wevela unene’ makala nokankhenda nonthue.—Isaías 55:7.

12. (a) Oñgeni tupondola okuhetekela ongeleka ya David tyina tueihamenua komutima? (b) Omonkhalelo patyi Jeova elivela, iya oñgeni okutyinoñgonoka tyitukuatesako? (Tala okakasa.)

¹² Elikuambelo lina ononkhono. Inkha tulikuambela, Huku upondola okutukuatesako. Mono Salmu, muahonekwa elikuambelo limwe ewa David alingile, omu apopile onthumbi ankho ena yokuti Jeova wakumbulula omalikuambelo ae. (Tanga Salmo 32:1-5.) Etyi David nkhele ehenepopie ononkhali mbae ku Huku, ankho weihamenenue unene komutima! Wakalele notyiho, avele. Waveluka vala etyi apopia onkhali yae ku Huku. Jeova wakumbululile elikuambelo lia David emupameka atualeko okulinga etyi tyaviuka. Tupu, inkha ulikuambela nomutima auho, upondola okukala nonthumbi yokuti Jeova mekutehelela ekuavela etyi waita. Tupu, inkha ovivi walingile kohale vikusukalalesa, pilulula onkhalelo yove, okala nonthumbi yokuti Jeova wekuevela!—Salmo 86:5.

13, 14. (a) Oityi tuna yokusukalala vali natyo hono? (b) Omapulo patyi maetukuatesako okutala nawa etyi tukahi nokulinga hono?

¹³ Tyotyili, tupondola okulilongesila kuetyi tyalambale, mahi katuesukisile okutualako nokusukalala. Tusukei netyi tukahi nokulinga hono, netyi matukalinga komutwe. Lipula: ‘Okuti komutwe mandyikelivela mokonda yomaholovono ndyikahi nokulinga hono? Okuti mandyikapopia okuti, ñgeno hetyilingile ine ñgeno netyilingile monkhalelo onkhuavo? Okuti ndyikahi nokuumbila Huku noukuatyili, unkhalesa nonthumbi yokuti komutwe wandyila himekelivela?

¹⁴ Ononkhumbi onene mbukahi popepi, moluotyo, otyiwa okulilinga omapulo ngaa: ‘Okuti ndyipondola okuundapa vali movilinga via Huku? Ndyipondola okukala omukokoli-ndyila? Oityi tyikahi nokunthyilika okukala omukuatesiko wovakulu vewaneno? Ndyikahi umwe nokulinga ononkhono mbokukala omunthu omupe? Ame ndyimunthu umwe Jeova ahandela mouye wae omupe?’ Wahasukalale netyi wahalingile, mahi soka kuetyi ukahi nokulinga hono, nokulinga ononkhono mbokulinga ovilinga via Jeova nombili. Linga omaholovono aviuka, opo komutwe wandyila wehekelivele.—2 Timóteo 2:15.

15, 16. (a) Oityi ovanyingi valinga opo vapake ovilinga via Huku tete momuenyo wavo? (b) Omokonda yatyi tuehesukisile okulivela inkha tuapaka Ouhamba tete momuenyo wetu?

¹⁵ Okuti ukahi movilinga viomuvo auho? Hamwe wasapo ovilinga ankho vikuavela onombongo ononyingi ine onondando opo uundapele vali Jeova. Ine hamwe watokola okukala tyahanepele ine okuhakala novana opo utyivile okuundapa mo Mbetele, no movilinga viokutunga, no viokutalelapo omawaneno, ine okukala omisionaliu. Mokonda pahe ukahi nokukulupa, okuti wesukisa okulivela mokonda yomatokolo oo? Okuti wesukisa okusoka okuti omatokolo walingile ankho kaesilivila ine kueelingile momuvo waviuka? Au!

¹⁶ Walingile omatokolo oo mokonda uhole unene Jeova iya ankho uhanda unene okukuatesako vana vahanda okumuumbila. Wahasoke okuti omuenyo wove ñgeno wakalele vali nawa inkha walingile ovipuka ovikuavo. Upondola okukala nehambu enene liokunoñgonoka okuti walinga etyi tyaviuka. Waholovona onkhalelo ongwa yokuumbila Jeova. Jeova kamakalimbwa ononkhono walinga movilinga viae. Momuenyo wotyotyili ukahi nokuya, mekekuyamba nononkhano onongwa vali unene noove ankho wahasokuale!—Salmo 145:16; 1 Timóteo 6:19.

17, 18. (a) Oityi Paulu alingile opo komutwe ehekelivele vali? (b) Oñgeni upondola okuhetekela ongeleka ya Paulu?

¹⁷ Oityi Paulu alingile opo komutwe ehekelivele vali? Paulu wapopile okuti wayekapo okusukalala nevi alingile kohale, aundapela unene ondyambi yae. (Tanga Filipenses 3:13, 14.) Paulu katuaileko okusoka kovipuka ovivi alingile etyi ankho ekahi mongeleya yova Judeu. Mahi, walingile ononkhono ononene mbokutualako nekolelo opo akapewe ondyambi yomuenyo wahapu.

¹⁸ Atuho tupondola okulilongesila ku Paulu. Tuahatalei vali kovipuka viokohale, okusoka kovipuka tuahapondola vali okupilulula, mahi tusukalalei netyi tupondola okulinga hono opo tukapewe ononkhano onongwa komutwe. Hamwe kamatutyivili okulimbwa ovipuka aviho ovivi tualingile kohale, mahi katuesukisile okulivela apeho onombei. Tupondola okuyekapo okusukalala netyi tualingile kohale, atuumbila Huku nombili, nokusoka vala kovipuka oviwa matukapewa komutwe!