Ononkhia, Ondyale Yahulililako, Mambukanyimuako

1, 2. Ponthyimbi, omuenyo wa Andau na Eva ankho ukahi ñgeni, iya omapulo patyi matukumbulula?

ETYI Andau na Eva vatungwa, ankho vetupu onondyale. Ankho vetupu onkhali iya vakala momphangu yombembwa. Ankho vena oupanga omuwa Nomutungi wavo, mokonda ohe. (Gênesis 2:7-9; Lucas 3:38) Huku weveavelele otyilinga tyakolela. (Tanga Gênesis 1:28.) Ankho vesukisa okukala omuvo ulifuepi opo vafuisepo otyilinga tyavo? Ankho kavesukisile okukalako apeho opo “veyulise ohi aiho, nokuitumina,” mahi ankho vesukisa okukalako apeho opo vayunge “ovipuka aviho viokuna omuenyo vienda-enda kombanda yohi.” Ankho vapondola okulinga otyilinga otyo apeho.

² Ovipuka hono vielikalela unene mokonda yatyi? Tuna onondyale ononyingi mbututyilika okukala nehambu, mahi ondyale onene vali ononkhia. Omokonda yatyi tuakalela nonondyale ombo? Oñgeni Huku makahanyako onondyale ombo? Omakumbululo omapulo oo ekahi Mombimbiliya, iya monthele ei, matulilongesa konthele yomapulo oo.

3, 4. (a) Oityi Huku apopilile Andau na Eva? (b) Okuti okutavela otyitumino otyo ankho tyesukisa umwe?

³ Namphila Andau na Eva ankho valingwa opo vakaleko apeho, ankho vapondola okunkhia. Opo vakale nomuenyo ankho vesukisa okunwa, nokulia, nokulangalapo. Mahi ankho otyipuka tyakolela vali, oupanga wavo na Jeova, Ondyivi-ndyivi yomuenyo. (Deuteronômio 8:3) Ankho vapondola vala okutualako nomuenyo inkha vayekele Jeova evehongolele. Etyi Jeova ehenetunge Eva, wapopilile Andau okuti: “Komiti aviho vio motyikunino upondola okulia ngetyi uhanda. Mahi, komuti wenoñgonoko liotyiwa notyivi, wahalieko, mokonda onthiki uliako, tyotyili monkhi.”​—Gênesis 2:16, 17.

⁴ “Omuti wenoñgonoko liotyiwa notyivi,” ankho ulekesa okuti Huku una epondolo liokutokola etyi tyaviuka netyi tyapenga. Andau ankho unale enoñgonoko liotyiwa notyivi, mokonda watungua otyifuika tya Huku iya ankho utyivila okupunga ovipuka. Omuti ankho uhinangelesa Andau na Eva okuti apeho vesukisa okuhongolelwa na Jeova. Okulia komuti kuna, ongatyina ankho vekahi nokupopila Huku okuti: “Katuesukisile okutuminwa nove.” Okuliako, ankho matyietela ononkhia Andau na Eva, novana vavo, ngetyi Huku evepopilile.

 5. Omokonda yatyi Andau na Eva vehetavelele ku Jeova?

⁵ Andau wapopilile Eva konthele yotyitumino tya Jeova. Eva ankho wii nawa otyitumino otyo, iya konyima etyipitulula nawa. (Gênesis 3:1-3) Eva wetyipitulula etyi Satanasi aundapesa onyoka opo apopie nae. Satanasi wayekele ehando liae liokutumina likule. (Tyieleka na Tiago 1:14, 15.) Wapopilile Eva okuti Huku onkhembi, iya inkha ketavela ku Huku, kamankhi mahi makala nga Huku. (Gênesis 3:4, 5) Eva wetavela ku Satanasi, ali otyinyango, iya apopila Andau opo nae alie. (Gênesis 3:6, 17) Satanasi ankho wakemba Eva. (Tanga 1 Timóteo 2:14.) Namphila Andau ankho etyii okuti otyo tyapenga, watehelela komukai wae. Onyoka ankho imoneka ngoti epanga lia Eva, mahi una ankho ukahi konyima yayo, ankho ondyale imwe onkhalavi, ankho utyii okuti ounkhembi wae, maueta ovitateka ovinene.

6, 7. Oñgeni Jeova akoyesa Andau na Eva?

⁶ Andau na Eva vatyitukilapo Jeova weveavelele omuenyo, novipuka aviho oviwa ankho vena. Tyotyili, Jeova ankho weete atyiho tyikahi nokueendapo. (1 Crônicas 28:9; tanga Provérbios 15:3.) Mahi wayekele Andau, na Eva, na Satanasi, valekese oityi ankho tyilityili vasoka konthele yae. Mokonda o Tate yavo, wanumanene unene mokonda yetyi valinga. (Tyieleka na Gênesis 6:6.) Mahi mokonda Jeova Omukoyesi, wevekoyesile mokonda yonkhali valinga.

⁷ Huku wapopilile Andau konthele yomuti wenoñgonoko liotyiwa notyivi okuti: “Onthiki uliako, tyotyili monkhi.” Andau hamwe ankho usoka okuti mankhi monthiki yatyo oyo, tyina nkhele ekumbi liehenenyingile. Mahi, monthiki yatyo oyo kekumbi, Jeova wapopile na Andau na Eva. (Gênesis 3:8) Mokonda Jeova Omukoyesi omuviuki, tete watehelela etyi Andau na Eva vahanda okupopia. (Gênesis 3:9-13) Konyima, evepopila okuti mavankhi. (Gênesis 3:14-19) Inkha weveipaele monthiki yatyo oyo, ñgeno ehando liae kaliafuisilwepo. (Isaías 55:11) Namphila ovitateka viatuka konkhali viahimbikile liwa-liwa, Jeova wayeka Andau na Eva vakale novana. Iya ovana ovo ankho mavapewa omphitilo yokukakala nomuenyo omuwa komutwe. Tunde monthiki Andau na Eva valinga onkhali, Jeova ankho uvetala ngatyina vankhiale. Mokonda ku Jeova omanima ovityita ekwi, ongatyina onthiki ike vala, Andau na Eva vankhia “monthiki” valinga onkhali.​—2 Pedro 3:8.

8, 9. Oñgeni onkhali ya Andau yakalesile ovana vae? (Tala olutalatu pefo pahimbikila onthele ei.)

⁸ Oñgeni etyi Andau na Eva valingile tyakalesile ovana vavo? Romanos 5:12, yati: “Mokonda yomunthu wike vala onkhali yanyingila mouye, iya onkhali yaeta ononkhia. Moluotyo ononkhia mbeliyandyana kovanthu vatyo aveho, mokonda aveho valinga onkhali.” Apostolu Paulu wayawisako okuti: “Mokonda yomunthu wike vala wehetavelele, ovanyingi vakala ovakuankhali.” (Romanos 5:19) Omulume wekolelo Abele oe watetekela okunkhia. (Gênesis 4:8) Iya ovana ovakuavo va Andau, novatekula, vakulupa iya avankhi. Ovanthu vapiñgana onkhali, nononkhia, onondyale onombali tuhapondola okuholama. Namphila katutyii nawa oñgeni ovana va Andau vatambula onkhali, nononkhia, mahi tuete ononkhumbi mbutundililako.

⁹ Otyo Ombimbiliya ipopila okuti onkhali, nononkhia, vikahi “ngotyilihiko tyahika ovanthu aveho” iya “viahika omalongo aeho.” (Isaías 25:7) Petupu nawike upondola okuhupa konkhali, no kononkhia. Otyo Ombimbiliya ipopila okuti “mu Andau aveho vankhia.” (1 Coríntios 15:22) Moluotyo, Paulu wapulile okuti: “Olie mandyovola kononkhia ombu?” (Romanos 7:24) Okuti pena ou ankho upondola okuyovola Paulu?a​—Tala onondaka pokatoi.

10. (a) Onoversikulu patyi Mombimbiliya mbulekesa okuti Jeova makanyimako ononkhia? (b) Oityi onoversikulu ombo mbutulongesa konthele ya Jeova Nomona wae?

¹⁰ Tyotyili, Jeova ankho upondola okuyovola Paulu. Ombimbiliya yati: “[Huku] makamanako ononkhia apeho, iya Ohamba Tatekulu Jeova, makasekuna ononkhuka movipala aviho.” (Isaías 25:8) Ngetyi omunthu apola ovana vae etyi tyiveteela ononkhumbi, nokuvesekuna ononkhuka, Jeova una ehambu enene liokunyimako ononkhia! Jesus ukahi nokuundapa nae. 1 Coríntios 15:22 yati: “Mu Kristu aveho mavakakala nomuenyo.” Etyi Paulu elipula okuti: “Olie mandyovola kononkhia ombu?” muene elikumbulula okuti: “Ndyipandula Huku, menyina lia Jesus Kristu Tatekulu yetu!” (Romanos 7:25) Otyo tyilekesa nawa okuti etyi Andau na Eva valinga onkhali, Jeova kayekelepo oluembia ena novanthu. Iya Jesus nae waundapele na Jeova pala okutunga Andau na Eva, nkhele uhole ovanthu. (Provérbios 8:30, 31) Mahi oñgeni ovanthu vapondola okuyovoka konkhali, no kononkhia?

11. Oityi Jeova alinga opo akuateseko ovanthu?

¹¹ Etyi Andau alinga onkhali, Jeova wemupopila okuti otyo matyimuetela ononkhia. Pahe, ovanthu aveho vapiñgana onkhali, nonokhia. (Romanos 5:12, 16) Romanos 5:18 yati: “Onkhali ike vala yaeta ehitiso liovanthu aveho.” Oityi Jeova ankho apondola okulinga opo akuateseko ovanthu, mahi ahayapuka movitumino viae? Jesus wakumbulula epulo olio etyi apopia okuti weya opo “aave omuenyo wae ngofeto pala okuyovola ovanthu ovanyingi.” (Mateus 20:28) Mokonda Jesus utupu onkhali, ankho watamo pala okuava “ofeto yeyovo.” Oñgeni ofeto oyo ankho ilekesa okuti yatamo?​—1 Timóteo 2:5, 6.

12. Ofeto patyi yeyovo yafuisapo ouviuki?

¹² Mokonda Jesus utupu onkhali, upondola okukalako apeho. Otyo, otyo ankho Jeova ahandela Andau. Mokonda Jesus uhole unene Tate yae, novanthu, waava omuenyo wae, welifua nou Andau avombesa. Konyima, Jeova watutilisa Jesus nolutu luopaspilitu aende keulu. (1 Pedro 3:18) Ofeto yeyovo yafuisapo ouviuki wa Jeova, mokonda omuenyo wa Jesus uhena onkhali wafeta omuenyo wa Andau ankho uhena onkhali. Etyi Jesus alinga, tyaikula ondyila opo ovana va Andau vakale nomuenyo wahapu. Otyo Paulu apopila okuti Jesus “Andau wahulililako,” wakala ospilitu yava omuenyo.​—1 Coríntios 15:45.

13. Oityi “Andau wahulililako” makalingila vana vokuankhia?

¹³ Apa katutu, “Andau wahulililako” makaavela omuenyo ovana va Andau. Ovana ovo, muakutikinya vana vonkhuankhiale kohale. Ovo, mavakatutiliswa opo vakale vali nomuenyo pano pohi.​—João 5:28, 29.

14. Oñgeni ovanthu mavakayovolwa konkhali?

¹⁴ Oñgeni ovanthu mavakayovolwa konkhali? Jeova waholovona outumini keulu opo utyilinge. Mavakakala ovatumini, o Jesus, no vo 144.000 vaholovonwa pano pohi. (Tanga Revelação 5:9, 10.) Vo 144.000, mavetyivili okunoñgonoka nawa ovanthu pano pohi, mokonda navo ankho ovakuankhali. Momanima 1.000, Jesus navana mavakatumina nae, mavakuatesako ovanthu okukala tyehena onkhali.—Revelação 20:6.

15, 16. (a) Oityi Ombimbiliya ikahi nokupopia etyi yati “ononkhia, ondyale yahulililako”? Onalupi ononkhia mambukanyimuako? (b) Ngetyi tyapopia 1 Coríntios 15:28, oityi Jesus makalinga?

¹⁵ Konthyulilo yomanima 1.000, ovanthu ovataveli mavakayovoka konkhali, no kononkhia. Paulu wati: “Ngetyi mu Andau aveho vankhia, tupu mu Kristu aveho mavakakala nomuenyo. Mahi, kese umwe opomphangu yae: Kristu oe tete, akulandula vana vahula ku Kristu [vana mavakatumina nae] tyina ameya. Konyima akuya onthyulilo, tyina amapakula Ouhamba ku Huku, Tate yae, tyina amanyimiko omauhamba nomautumini, nounene auho. Mokonda oe una okutumina alo Huku apaka onondyale ambuho mombuelo yonomphai mbae. Iya ononkhia, ondyale yahulililako mambukanyimuako.” (1 Coríntios 15:22-26) Okuhulililako, ononkhia tuapiñgana ku Andau mambukanyimuako. “Otyilihiko” otyo, ankho tyahika ovanthu, kamatyikakala-kalako vali.​—Isaías 25:7, 8.

¹⁶ Paulu watualako okuti: “Tyina ovipuka aviho viamapakwa metumino liae, konyima Omona nae makakala mombuelo yetumino lia Una wemuavela ovipuka aviho, opo Huku akale ovipuka aviho kovanthu aveho.” (1 Coríntios 15:28) Tyina ehando lia Jeova liamafuisuapo, Jesus kamakatumina vali. Iya Jesus makakala nehambu liokukondola outumini wae ku Jeova, nokumupakulila ovanthu aveho vehena onkhali.

17. Oityi matyikamonekela Satanasi?

¹⁷ Oityi matyikamonekela Satanasi, una waetako ononkhumbi ambuho mbovanthu? Ekumbululo tulivasa mu Revelação 20:7-15. Konthyulilo yomanima 1.000, meheteko liahulililako, Satanasi makayekwa opo aovole okuyapula ovanthu vehena onkhali. Konyima, Satanasi navana vaholovona okumulandula, mavakahanyuako apeho. Otyo tyiihanwa okuti “ononkhia mba vali.” (Revelação 21:8) Okutuka opo, ononkhia ‘kamambukakalako’ vali mokonda vana mavankhi “mononkhia mba vali,” kamavakatutiliswa vali. Inkha tukala nekolelo mu Jeova, kamatukala notyiho tyokuti matunkhi “mononkhia mba vali.”

18. Oñgeni otyilinga Huku apele Andau matyikafuiswapo?

¹⁸ Ovanthu aveho kamavakakala vali nonkhali, maveketavelwa na Jeova opo vakale nomuenyo wahapu. Ovipuka aviho ankho vinyona ehambu liovanthu, mavikanyimuako. Otyilinga Huku apele Andau matyikafuiswapo otyo Andau yatyo ehepo vali. Ovana va Andau mavakayunga ohi novinyama. Tyituhambukiswa unene okunoñgonoka okuti apa katutu Jeova makanyimako ononkhia, ondyale yahulililako!