Onondonga Mbakolela Konthele Yokunepa Nokuhanepe

“Etyi ame ndyimupopila tyo . . . opo ndyimupe ondundo yokulinga etyi tyaviuka, nokuumbila apeho Tatekulu tyihatalukwa.”—1 CORÍNTIOS 7:35.

1, 2. Oityi tuesukisila okulilongesa etyi Ombimbiliya ipopia konthele yokunepa nokuhanepe?

POKATI kovalume novakai pamwe pakala ehambu, nokulimbililwa, nomasukalalo, novikuavo viyangalalesa. Mokonda tupita movitateka ovio, tuesukisa okuovola onondonga mba Huku. Kuna omahunga omanyingi tuesukisila okuhongolelwa nae. Nkhele soka, Ovakristau vamwe vokuna ehambu liokukala tyihanepele, ombunga ine omapanga vevekuluminya okunepa. Ovakuavo hamwe vahanda okunepa, mahi kavenevase omunthu waviuka pala okunepa. Iya vana vekahi nokulihanda vesukisa ehongolelo opo velipongiye nawa mokueenda kuomuvo oo, pala otyilinga tya vana velinepa. Tupu, tyilinge Ovakristau vahanepele ine o vokuanepa, vesukisa okulityilika oumbalehi.

² Ovipuka ovio vipondola okunyona ehambu lietu. Mahi haunene, vinyona oupanga wetu na Huku. Mokapitulu 7 ka 1 Coríntios apostolu Paulu wavela onondonga vana vahanepele no vokuanepa. Oe wahandele vana ahonekela valinge etyi tyaviuka nokutualako okuumbila Huku nomutima auho, tyihatalukwa. (1 Coríntios 7:35) Onondonga mba Paulu konthele yononkhalelo ombo mbakolela, mbupondola okukukuatesako. Oe ankho uhanda vana vahanepele no vokuanepa, vaundapese nawa onkhalelo yavo pala okuumbila nawa Jeova.

Etokolo Liakolela Kese Umwe Ena Okulinga

3, 4. (a) Tyina ombunga nomapanga vakuluminya umwe okunepa tyihole okueta tyi? (b) Oñgeni onondaka mba Paulu mbutuvatela okukala nolusoke luaviuka konthele yokunepa?

³ Ova Judeu kohale ankho vetavela okuti okunepa tyakolela unene. Ovanyingi hono navo vasoka ngotyo. Tyina omunthu akala ehimbwe tyihanepe, ombunga nomapanga vasukalala nae nokumuavela onondonga konthele yokunepa. Ombunga nomapanga pamwe vemupopila okuti una okulinga atyiho opo avase ou manepe. Ine vemulekesa umwe vasoka okuti waviuka pala okulinepa nae. Iya vamwe vakonga omulume nomukai opo velivase, mokonda vasoka okuti vatokala okulinepa. Tyina ovanthu valinga ngotyo, vaetela vakuavo ovitateka, nokuhanya oupanga, nokuihamesa omitima.

⁴ Paulu kapopilile vakuavo okuti nepei ine muhanepei. (1 Coríntios 7:7) Oe ankho una ehambu liokuumbila Jeova tyihena omukai, mahi kapopile omapita vana vahanda okunepa. Ovakristau hono ovo muene vatokola inkha mavanepe ine kamavanepe. Vakuavo kavapondola okuvepopila etyi vena okuholovona.

Ouwa Wokuhanepe

5, 6. Oityi Paulu apamekelele Ovakristau opo vatualeko tyihanepele?

⁵ Onondaka Paulu apopila ova Korintu, mbulekesa nawa okuti Ovakristau vahanepele vapondola okuumbila nawa Huku. (Tanga 1 Coríntios 7:8.) Ononkhalamutwe mbo Vakristau vouye vahanepe, vasoka okuti vavilapo vali tyipona vokuanepa. Mahi Paulu, namphila ankho kanepele, ankho kasoko okuti wavilapo vokuanepa. Walekesa okuti Ovakristau vahanepele vapondola okuumbila Huku monkhalelo vokuanepa vehevili. Onkhalelo patyi?

⁶ Ovikando ovinyingi Omukristau uhanepele, utavela otyilinga wokuanepa ahapondola okutavela movilinga via Jeova. Paulu wapelue otyilinga tyavilapo, okutumwa akale o “apostolu pala omalongo.” (Romanos 11:13) Mokapitulu 13 alo 20 ka Atos, tuvasamo ovilinga via Paulu. Walingile omaungendi no nomisionaliu ononkhuavo, okukaivisa kovilongo ovikuavo, avaonganeka omawaneno omape omanyingi. Movilinga viae viokuivisa wakoleleya ovitateka viepuiya, ovanyingi puonthue tuhakamona. (2 Coríntios 11:23-27, 32, 33) Anthi, Paulu wakoleleya ovitateka aviho, opo alinge ovalongwa, iya atyimuetela ehambu enene. (1 Tessalonicenses 1:2-7, 9; 2:19) Inkha Paulu anepele, ovipuka aviho alinga, ñgeno kevivilile.

 7. Popia Onombangi vevali vetyivila okukaivisa Ouhamba wa Huku mokonda kavanepele?

⁷ Ovakristau ovanyingi vahanepele, vaundapa unene movilinga viokuivisa. Onomphange Sara na Limbania ko Bolivia, ovakokoli-ndyila vahanepelwe. Vailukila potyilongo, ankho pahaiviswa vali ondaka ya Huku omanima omanyingi. Onomphange vati ovanthu vasuka vali unene nokutanga, mokonda vetupu omalusu, pala okutala otelevisau ine okutehelela olaliu. Ovanthu vamwe ankho nkhele vatanga omikanda viakulupa vio Nombangi mba Jeova vihalingwa vali. Kese umbo onomphange ovo vavasa ovanthu vahanda okulongeswa Ombimbiliya, iya vakala omuvo omunyingi pala okuivisa potyilongo atyiho. Omukulukai umwe wapopila onomphange ombo okuti: “Onombangi mba Jeova vehika ñga kuno, onthyulilo ikahi unene popepi.” Pakala vala katutu, ovanthu potyilongo avahimbika okuenda komaliongiyo.

8, 9. (a) Oityi Paulu atila otyiwa okuumbila Huku tyihanepele? (b) Ouwa patyi utunda kokuumbila Jeova tyihanepele?

⁸ Tyotyili, no Vakristau vanepa vetyivila okuivisa nawa movilongo viokuepuiya. Mahi ovilinga vimwe ovakokoli-ndyila vahanepele vatavela, vipuiya ku vana vanepa no vokuna ovana. Etyi Paulu ahonekela ewaneno, ankho utyii okuti nkhele kuna ovilinga ovinyingi viokuivisa onondaka onongwa. Ngotyo, ankho uhanda kese umwe akale nehambu liokulinga ovalongwa ngeli ankho ena. Otyo Paulu apopila okuti otyiwa okuumbila Jeova tyihanepele.

⁹ Omphange umwe omukokoli-ndyila ko Estados Unidos, wahangununa oñgeni eliivite mokonda yokuhanepele. Oe wati vamwe vasoka okuti vokuhanepele vetupu ehambu. Mahi omphange oo utyii okuti okukala noupanga na Jeova tyieta ehambu liotyotyili. Namphila katyapepukile okukala tyihanepele, oe utavela okuti inkha omunthu aundapesa nawa onkhalelo yae, ikala otyali otyiwa unene. Okuhanepe, katyityilika omunthu okukala nehambu. Anthi, tyikuvatela okukala nehambu. Omphange wati: “Ame ndyityii okuti Jeova kapungulula una uhanepele ine una wanepa.” Pahe omphange oo uumbila Jeova kotyilongo tyesukisa unene ovanthu vaivisa onondaka onongwa. Inkha ove kuanepele, upondola okulinga vali ononkhono mbokulongesa vakuenyi otyili? Inkha upondola, okukala tyihanepele matyikala otyali tyakolela wapeua na Jeova.

O Vokuhanepele Vahanda Okunepa

10, 11. Oñgeni Jeova akuatesako vana vehenevase omunthu waviuka pala okunepa?

¹⁰ Tyina Ombangi ya Jeova amakala ehimbwe tyihanepele, pamwe utokola okunepa. Iya mokonda utyii okuti wesukisa ehongolelo, wiita ku Jeova emukuateseko okuvasa ou waviuka manepe iya avakala nehambu.—Tanga 1 Coríntios 7:36.

¹¹ Inkha uhanda okulinepa na una uumbila Jeova nomutima auho, tualako okuita ku Jeova konthele yotyo. (Filipenses 4:6, 7) Alo umwe tyina ukala ngoti wakevelela ehimbwe, uhasoye. Uyumba onthumbi mo Mukuatesiko wove Huku yetu woluembia, iya oe mekukuatesako okufinda otyitateka otyo.—Hebreus 13:6.

12. Inkha umwe ukuita mulinepe, oityi wesukisa okusoka nawa tyina uhenekumbulule?

¹² Iya inkha umwe uhena oupanga wapama na Huku ine o umwe uhembangi ya Jeova ukuita opo mulinepe? Pamwe ove uhanda unene okunepa. Mahi inkha uholovona omapita, omuihamo komutima mokala nao mauvilipo oulike ankho wiivite etyi uhenenepe. Hinangela okuti una okukala na una waholovona omuenyo wove auho, tyilinge otyinepo tyenyi tyikahi nawa ine tyili omapita. (1 Coríntios 7:27) Uhanepe vala okusoka okuti kumavasi vali, konyima mokelivela.—Tanga 1 Coríntios 7:39.

Lipongiya pala Okunepa

13-15. Ovipuka patyi vana velihanda vena okutomphola tyina vehenenepe?

¹³ Paulu wati otyiwa okuumbila Jeova tyihanepele, mahi katile oe wavilapo vana vahanda okunepa. Oe ankho uhanda okukuatesako vokuanepa, iya onondonga ahoneka mbuvekuatesako okunoñgonoka oityi vena okukevelela tyina vamanepe, no ñgeni mavatualako tyelinepa.

¹⁴ Vamwe vokuelinepa, pamwe vesukisa okupilulula omalusoke avo konthele yo ñgeni otyinepo tyavo matyikakala. Tyina velipola konomphunga, vapondola okusoka okuti ohole yavo yavilapo unene. Vasoka okuti ovo vala vena ohole ngoyo. Iya vahimbika otyinepo tyavo nolusoke ngolo, nokusoka okuti kamavakala nalumwe tyihena ehambu motyinepo tyavo. Mahi tyotyili omuenyo kaukahi ngotyo. Ovanthu kavakala apeho nehambu. Pokuhimbika okulihanda tyili tyieta ehambu. Anthi, kavevili okutetulula kese tyitateka tyitumbuka motyinepo.—Tanga 1 Coríntios 7:28.a

¹⁵ Ovalinepi vamwe, vahuva ine vasoya tyina vatala okuti velikalela unene pokulinga omatokolo akolela. Ngo konthele yoñgeni mavaundapesa onombongo mbavo, novitalukiso mavalingi, naapa mavakala, novikando mavatalailapo onombunga mbavo. Mokonda aveho ovakuankhali pamwe umwe upondola okunumanesa mukuavo. Tyina ovanthu vevali velihanda, pamwe kavasoko okuti otyiwa okupopia konthele yovipuka ovio viakolela. Mahi inkha kavetyilingi tyina vehenenepe, matyikeveetela ovitateka.

16. Oityi ovalinepi vesukisila okulitavela konthele yoñgeni mavatetulula ovitateka viavo?

¹⁶ Opo vokuelinepa vakale nehambu, vena okulitavela oñgeni kese umwe makalinga otyilinga tyae. Vesukisa okulipakelamo oñgeni mavalongo ovana vavo, no ñgeni mavatekula ovohe tyina vamakulupa. Onombunga ambuho mbuna ovitateka. Mahi ovalinepi vesukisa okuhayeke ovitateka ovio viveyapule. Onondonga mbo Mbimbiliya mambuvekuatesako okutetulula ovitateka viavo, nokukoleleya muvina viepuiya okutetulula, nokukala kumwe nehambu.—1 Coríntios 7:10, 11.

17. Oityi vokuelinepa “vasukalalela novipuka viouye”?

¹⁷ Paulu wapopia unene konthele yotyinepo mu 1 Coríntios 7:32-34. (Tanga.) Vokuanepa “vasukalala novipuka viouye,” okulia, nomuvalo, no nondyuo, novikuavo vali viesukisa. Oityi “vasukalalela novipuka viouye”? Nkhele soka, tyina omukuatate ehenenepe pamwe ankho uundapa unene movilinga viokuivisa. Mahi tyina amanepe uundapesa omuwo umwe nononkhono mbae opo atekule omukai wae. Tupu, nomukai ongotyo alinga. Jeova utyii okuti kese umwe po vokuelinepa uhanda okuhambukiswa mukuavo. Oe utyii okuti ovalinepi kamavaundapa movilinga viae omuwo auho ngetyi ankho valinga etyi vehenenepe. Pahe vesukisa omuwo umwe nononkhono opo vapameke otyinepo tyavo.

18. Omapiluluko patyi vokuelinepa vesukisa okulinga konthele yovitalukiso?

¹⁸ Iya omuwo una ankho vakala movitalukiso no movilinga ovikuavo etyi vehenenepe? Inkha vatepulula komuvo nononkhono ankho vaundapa movilinga via Jeova opo vapameke otyinepo tyavo, tupu vesukisa okuteta komuvo ankho vakala movitalukiso etyi vehenenepe. Inkha omulume ukala omuvo omunyingi momawela novinyano ovikuavo, nomapanga ae ngetyi ankho alinga etyi ehenenepe, omukai wae makala ñgeni? Ine oñgeni omulume makala, inkha omukai wae akala omuwo omunyingi nomapanga ae? Vapondola okukala nounye, nokuhena ehambu, nokulitehelela ngoti kaveholwe. Opo ovalinepi velityilike kuotyo, vena okulinga ononkhono mbokupameka otyinepo tyavo.—Efésios 5:31.

Jeova Uhanda Tukale Novituwa Viasukuka

19, 20. (a) Oityi ovalinepi vesukisa okulinga opo vaamene otyinepo tyavo koumbalehi? (b) Otyiponga patyi tyipondola okumonekapo inkha velilalela ehimbwe?

¹⁹ Ovaumbili va Jeova vapondola okulikuatehila okukala novituwa viasukuka. Vamwe vatokola okunepa opo velityilike omaundalelapo. Mahi okunepa katyituuka pala okulityilika oundalelapo. Omunthu wanepa wesukisa okulunguka opo atualeko novituwa viasukuka. Kohale epundaumbo ankho liyakulilwa notyimato otyinene tyapama. Inkha omunthu akala mokati kepundaumbo, uyakulilwa. Mahi, kondye otyiponga mokonda tyina onondyale mbameya maipawa. Onondimbu Jeova aavela ovalinepi, mbukahi ngotyimato tyapama tyeliseta nepundaumbo. Ovalinepi vayakulilwa vala koumbalehi, inkha vetavela ovitumino nonondimbu Jeova aava.

²⁰ Paulu wapopia onondimbu ombo mu 1 Coríntios 7:2-5. Omulume una okulinga vala otyihola nomukai wae. Omukai tupu una okulinga vala otyihola nomulume wae. Huku wati kese umwe po vokuelinepa una okuavela mukuavo etyi “atokala” ine otyihola wokuanepa atokala okupewa. Inkha ovalinepi velikalela kokule omuwo omunyingi, kamavetyivili okulipa kese umwe etyi “atokala.” Vamwe vokuelinepa velilalela opo vapululukuepo. Ovakuavo vakala kokule novakai vavo mokonda yovilinga. Okulinga ngotyo, Satanasi upondola okuendelelamo opo anyone otyinepo tyavo. Inkha vokuelinepa kavasuku kese umwe namukuavo konthele yotyihola, umwe upondola okuhongiliyua okulinga oumbalehi. Jeova mayambe ononkhalamutwe mbo mbunga vatekula ombunga yavo avahapake motyiponga otyinepo tyavo.—Salmo 37:25.

Tavela Onondonga Mbombiliya

21. (a) Oityi tyipuiyila okutokola okuhanepe ine okunepa? (b) Oñgeni elondolo likahi mokapitulu 7 ka 1 Coríntios 7:37, 38 litukuatesako?

²¹ Omatokolo konthele yokuhanepe no yokunepa epuiya unene. Tyilinge watokola okuhanepe ine okunepa mokala novitateka, mokonda atuho tuvakuankhali. Namphila Jeova akanena nawa ovanthu vae, pamwe vanumana mokonda yovipuka vimoneka momuenyo wavo. Inkha ove ulandula elondolo lionondunge livasiwa mokapitulu 7 ka 1 Coríntios, molitepulula ovitateka vimwe. Tyilinge wanepa ine kuanepele, mohambukiswa Jeova. (Tanga 1 Coríntios 7:37, 38.) Tyakolela unene momuenyo wetu, okupandwa na Huku. Tupondola okupandwa na Huku pahe, no komutwe wandyila mouye omupe Huku alaa. Iya ovalume novakai kavakalwa vali novitateka vena hono.

[Onondaka Poutoi]

Oñgeni Mokumbulula?

• Nawike upondola okukuluminya mukuavo okunepa mokonda yatyi?

• Oñgeni omuumbili uhanepele wa Jeova aundapesa nawa onkhalelo yae?

• Oñgeni vana velihanda velipongiya pala ovitateka maviya komutwe?

• Omokonda yatyi vokuelinepa vesukisila okuliyakulila koumbalehi?

[Omalutalatu liolutalatu pefo 16]

Ovakristau vahanepele, vaundapa omuwo omunyingi movilinga via Huku vena ehambu

[Ehangununo liolutalatu pefo 18]

Omapiluluko patyi vamwe vena okulinga tyina vamanepe?