Okuti Tyitavela Okukala Nohole Yotyotyili?

1, 2. Ovalie vapondola okupola ouwa Kotyiimbo tya Salomau, iya omokonda yatyi? (Tala olutalatu pefo pahimbikila onthele.)

OMUKUENDYE nomuhikuena velinepa, velitala avamemetela okuyola. Aveho velipo vapondola okutyimona okuti ovalinepi ovo velihole. Omukuatate ukahi nokulinga elongomona liotyinepo, utyimona okuti velihole, elipulu okuti: ‘Okuti ohole yavo maitualako umwe okuliyauisa omanima aeho? Ine maitepuluka katutu-katutu’? Tyina ovalinepi velihole umwe nawa, oupanga wavo upondola okutualako namphila pamoneka ovitateka. Mahi ovalinepi ovanyingi, kavakala nehambu, avelihenge. Ngotyo, upondola okulipula okuti: ‘Okuti ovanthu vapondola umwe okukala nohole itualako?’

² Alo umwe pomuvo Wohamba Salomau, ovanthu ovanyingi ankho vetupu ohole yotyotyili. Omokonda yatyi? Salomau wahangununa okuti: “Povalume vena ovityita ekwi, navasapo omuviuki wike, mahi povakai, havasilepo nawike. Namona vala okuti: Huku yotyotyili walinga ovanthu vaviuka, mahi ovo muene vahanda okulinga ovipuka ovinyingi.” (Eclesiastes 7:26-29, ) Ovakai vovilongo ovikuavo ankho vekahi pokati ko va Isilayeli, ankho vafenda Baale. Mokonda yotyo, ovalume ovanyingi, novakai ova Isilayeli, navo avahimbika okulinga ovivi.a (Tala pokatoi.) Mahi puetyi otyo tyehenemoneke, omanima ehungi po 20 konyima, Ohamba Salomau wahonekeliale otyiimbo tyipopia konthele yomulume umwe, nomukai ankho velihole unene. Tyilinge tuanepa ine katuanepele, Otyiimbo tya Salomau (Cântico de Salomão) tyipondola okutukuatesako okunoñgonoka oityi ohole yotyotyili, noñgeni tupondola okuilekesa.

 3. Omokonda yatyi tyitavelela omulume ine omukai okukala nohole yotyotyili na mukuavo?

³ Tanga Cântico de Salomão 8:6. Ohole yapopiwa okuti “omutemo wa Jah.” Omokonda yatyi? Omokonda, povituwa via Jeova, ohole, oyo ili vali komutwe, iya Jeova wetutunga nepondolo liokukala nohole ngo yae. (Gênesis 1:26, 27) Etyi Jeova atunga omulume wo tete Andau, wemuavelele omukai umwe omuwa. Etyi Andau amona Eva otyikando tyo tete, ahambukwa unene, iya apopi oñgeni elitehelela. Tupu Eva ankho uhole unene omulume wae. Ankho velihole mokonda Jeova wapola Eva mu Andau. (Gênesis 2:21-23) Tunde ponthyimbi, Jeova uhanda omulume nomukai vakale nohole yotyotyili, itualako kese umwe na mukuavo.

4, 5. Oñgeni tyaendele etyi tyipopia Otyiimbo tya Salomau?

⁴ Otyiimbo tya Salomau tyipopia nawa ohole omulume nomukai vapondola okukala nayo kese umwe na mukuavo. Otyiimbo, tyipopia konthele yovanthu vamwe vevali ankho velihole, omufikuena umwe ankho ukala ko Suném ine ko Sulém, nomukuendye umwe ankho omunthita. Tyaendele ñgaa: Omuhikuena ankho ukahi nokuundapa novakulu vae momivinyu popepi na apa Ohamba Salomau, nomafualali ae ankho vaonga onthanda. Ohamba yamona omuhikuena oo, aitumu ovaundapi vayo opo vekemupole. Konyima, Ohamba aipopila omuhikuena oo okuti omuwa unene, iya aimuavela ovipuka ovinyingi oviwa. Mahi, omuhikuena oo, ankho uhole omukuendye umwe omunthita, iya ankho uhanda unene okukala nae. (Cântico de Salomão 1:4-14) Omunthita ankho ukahi nokuovola omuhikuena oo, aende alo ponthanda. Etyi emuvasa, avelipopila onondaka mbumwe onongwa mbulekesa okuti velihole.—Cântico de Salomão 1:15-17.

⁵ Etyi Salomau akondoka ko Jelusalei, aende nomuhikuena oo, iya omunthita emukuame. (Cântico de Salomão 4:1-5, 8, 9) Natyike povipuka Salomau alingile ine apopile, tyapilululile ohole omufikuena ankho ena nomunthita. (Cântico de Salomão 6:4-7; 7:1-10) Moluotyo, Salomau ayeke omuhikuena akondoke keumbo liavo. Konyima, Sulamita apopi okuti omuwa wae ukahi nokumuhatekela “ngombambi.”—Cântico de Salomão 8:14.

 6. Omokonda yatyi tyipuiyila okunoñgonoka ovalie vekahi nokupopiwa Motyiimbo tya Salomau?

⁶ Otyiimbo tya Salomau, otyiwa unene. Otyo tyiihanenwa okuti “otyiimbo tyoviimbo.” (Cântico de Salomão 1:1) Mahi motyiimbo omo, Salomau katumbulile omanyina ovanthu ankho ekahi nokupopia. Ankho uhanda otyiimbo tyae otyiwa tyikale vala ngotyo ahayawisako vali ovipuka ovinyingi. Namphila motyiimbo muhena omanyina ovanthu ankho ekahi nokupopia, mahi tyitavela okunoñgonoka ovalie ankho ekahi nokupopia.b

7, 8. Oñgeni omunthita nomufikuena valekesile okuti velihole? Ava onongeleka.

⁷ Omuhikuena nomunthita, ankho velipopila onondaka mbumwe onongwa mbulekesa okuti velihole. ‘Onondaka mbumwe’ velipopila, hamwe katumbunoñgonoka mokonda apa mbahonekwa, palambale omanima alamba po 3.000. (Cântico de Salomão 1:2) Namphila etyi ankho tyilingwa pomuvo opo tyelikalela netyi tyilingwa hono, tupondola okunoñgonoka oñgeni ankho ovalinepi vakala tyina velihole. Mongeleka, omunthita wapopile okuti omaiho omuhikuena wae ekahi ngo “onopomba,” otyo ankho tyilekesa okuti uhole omaiho omuhikuena wae. (Cântico de Salomão 1:15) Tupu omufikuena wapopile okuti omaiho omukuendye wae omawa ngo onopomba. (Tanga Cântico de Salomão 5:12.) Kwe, omaiho omukuendye wae, ankho atuela vali tyipona onopomba mbuyoa momahini.

⁸ Omunthita ankho uhole unene otyivala tyomuhikuena wae, omuhikuena ankho nae uhole unene otyivala tyomukuendye wae, mahi, otyo hatyo vala. Mongeleka, omunthita ankho uhole onkhalelo omuhikuena apopia novanthu. (Tanga Cântico de Salomão 4:7, 11.) Otyo emupopilile okuti: “Muhikuena wange, omilungu viove vikahi nokumoma owiki. Mombuelo yelaka liove muna owiki nomahini.” Komukuendye oo, onondaka mbomuhikuena wae ankho onongwa unene ngomahini, iya ankho mbuoholola unene ngowiki. Etyi omunthita apopila omuhikuena okuti “ove umuwa unene” iya “utupu otyinthembia,” ankho kekahi vala nokupopia ouwa wae, mahi tupu ankho ukahi nokupopia ovituwa viae oviwa.

 9. (a) Ohole pokati komulume nomukai yakutikinya tyi? (b) Omokonda yatyi tyakolela omulume nomukai valekese okuti velihole?

⁹ Hono, kovalinepi vaumbila Jeova, otyinepo otyipuka tyimwe tyakolela unene. Velihole unene, iya vetyilekesa. Mahi, ohole patyi vena okukala nayo? Okuti ohole yotyotyili Ombimbiliya itulongesa tukale nayo novanthu aveho? (1 João 4:8) Okuti ohole tuna nombunga yetu? Okuti ohole ikala pokati kovanthu vevali omapanga? (João 11:3) Okuti ohole yovanthu velihanda? (Provérbios 5:15-20) Tyotyili, mokonda muelinepa, muna okulesa okuti mulihole mononkhalelo ombo ambuho. Mahi, muetyi mupopia netyi mulinga, mupondola okulekesa okuti mulihole, iya amukala nehambu motyinepo tyenyi. Tyotyili tyakolela okulinga ngotyo, namphila hamwe muna ovilinga ovinyingi. Movilongo vimwe muna ovanthu vaovolelwa no vohe ou mavelinepe nae, omulume nomukai, hamwe ankho kavelinoñgonokele nawa puetyi vehenelinepe. Ngotyo, putyina velinoñgonoka nawa, iya ohole yavo iliyawisa, vesukisa okulipopila ohole kese umwe ena na mukuavo. Otyo matyivekuatesako okukala noupanga omuwa, nokupameka otyinepo tyavo.

10. Oñgeni okulekesa okuti mulihole tyipameka otyinepo?

¹⁰ Tyina ovalinepi valekesa okuti velihole, vapameka otyinepo tyavo monkhalelo onkhuavo. Motyiimbo, Ohamba Salomau waavelele omuhikuena “ovinunga, no nonela mbalingwa noolu nopalata.” Ankho wemupanda, iya emupopila okuti “umuwa ngohanyi yaoya, wasukuka ngonohanya mbekumbi.” (Cântico de Salomão 1:9-11; 6:10) Mahi, omuhikuena ankho unale ou muene ehole. Oityi tyemukuatesileko okuhayekepo omunthita? Oityi tyemupamekele puetyi ankho velikalela kokule? (Tanga Cântico de Salomão 1:2, 3.) Ankho usoka konondaka mbae mbuhambukiswa emupopilile. Ovipuka ankho apopia, nevi alinga, ankho vilekesa okuti umuhole, kwe ankho “vipepa vali tyipona ovinyu,” iya ankho vimupameka ngatyina “omulela wanika nawa” eliwaveka momutwe. (Salmo 23:5; 104:15) Tyakolela unene ovalinepi valekese okuti velihole, mokonda otyo tyivekuatesako okuyawisa ohole yavo. Iya okuhinangela ovipuka ovio, matyikuatesako ohole yavo okutualako tyapama.

11. Oityi tupondola okulilongesila konondaka Sulamita apopilile ovakai ankho vekahi mombala ya Salomau?

¹¹ Inkha uhanda okunepa ine okunepwa, oityi upondola okulilongesila ku Sulamita? Kakalele nohole Nohamba Salomau, iya apopila ovakai ankho vekahi mombala yohamba okuti: “Muhaovolei okunthyindila okukala nohole, alo muene imoneka aike.” (Cântico de Salomão 2:7; 3:5) Okuti otyiwa okulihanda nomunthu wehei nawa? Au, otyiwa okukevelela noumphua-lundo, opo ulinepe nomunthu uhole umwe tyili.

12. Omokonda yatyi omuhikuena Sulamita akalela nohole nomunthita?

¹² Omokonda yatyi omuhikuena Sulamita ankho akalela nohole nomunthita? Ku Sulamita, omunthita ankho omuwa “ngombambi.” Omavoko ae ankho apama ngo no “cilindro mboolu,” iya ovikalo viae ankho oviwa, nokuapama “ngo nomphandyi mbomamanya akolela.” Mahi ankho hamuwa vala, nokuapama. Omuhikuena ankho utyii okuti omunthita uhole Jeova, iya ankho una ovituwa oviwa. Otyo ankho emutalela okuti wakolela unene, “ukahi ngomupelu uli mohika.”—Cântico de Salomão 2:3, 9; 5:14, 15.

13. Omokonda yatyi omunthita akalela nohole nomuhikuena Sulamita?

¹³ Sulamita ankho omuwa unene. Alo umwe Ohamba Salomau wemupandele, namphila ankho enale “ononkhai-hamba 60, novahikuena ovakuavo vena 80, novakuavo vali ovanyingi.” Okuti ankho omunthita uhole omuhikuena oo, mokonda vala omuwa? Au. Omufikuena tupu ankho uhole Jeova, iya ankho una ovituwa oviwa. Mongeleka, omufikuena ankho weliola omutima, iya ankho ulieleka no nonthemo mbumwe ankho mbakaka, wati, “ndyinthemo vala yomoluhandya.” Mahi komunthita, ankho oe vala omuwa, ankho ukahi “ngonthemo ikahi pokati komikete.”—Cântico de Salomão 2:1, 2; 6:8.

14. Inkha tuhanda okunepa ine okunepwa, oityi tupondola okulilongesila komunthita, no ku Sulamita?

¹⁴ Jeova utuma ovaumbili vae opo velinepe “vala mu Tatekulu.” (1 Coríntios 7:39) Otyo tyilekesa okuti tuesukisa okulihanda vala ine okulinepa nomuumbili wa Jeova wambatisalua. Okuti otyo matyikuatesako ovalinepi? Enga, matyivekuatesako okutetulula ovitateka vivemonekela ononthiki ambuho. Tyina ovalinepi vena oupanga omuwa na Jeova, otyinepo tyavo tyipondola okukala nombembwa, nehambu. Ngotyo, inkha uhanda okunepa ine okunepwa, hetekela ongeleka yomunthita, no ya Sulamita. Ovola ou una ovituwa oviwa, iya uhole umwe Jeova.

15. Oityi Ovakristau vahanda okulinepa velilongesila komufikuena Sulamita?

¹⁵ Tanga Cântico de Salomão 4:12. Omokonda yatyi omunthita apopila okuti omufikuena wae Sulamita “ukahi ngotyikunino tyahondyua”? Otyikunino tyahondyua, kamunyingila ovanthu. Omuhikuena ankho ukahi ngotyikunino mokonda ankho uhole vala omunthita. Ankho wapanga okunepwa nomunthita, otyo aanyena ohamba. Iya ankho kapondola okupilulula olusoke lwae. Omufikuena oo, ankho ukahi “ngotyimato,” ankho kekahi “ngepito” lipondola okuyelulwa vala. (Cântico de Salomão 8:8-10) Tupu, Omukristau unale omphunga, kapondola okukala nomaiho omale.

16. Inkha una omphunga, oityi upondola okulilongesila Kotyiimbo tya Salomau?

¹⁶ Etyi omunthita apopila omuhikuena okuti tukaende-ende, ovakulu vae avehemuyeke. Mahi avemutumu akayunge omivinyu viavo. Okuti ankho kavemuyumbu onthumbi? Okuti ankho vasoka okuti omphange yavo, nomunthita vahanda okulinga tyimwe tyapenga? Au. Ovakulu vae ankho vahanda okuyakulila omphange yavo kuetyi tyipondola okumulingisisa okulinga etyi tyapenga. (Cântico de Salomão 1:6; 2:10-15) Inkha una omphunga, oñgeni upondola okulityilika etyi tyipondola okukulingisa oundalelapo? Soka kovipuka mamulityilika opo muhalinge natyike tyapenga. Muhakalei amuike otyo pehena ou umuluete. Popiei, nokulinga ovipuka vilekesa okuti mulihole, mahi tyilingei monkhalelo yaviuka.

17, 18. Etyi tuelilongesa Motyiimbo tya Salomau tyekukuatesako okulinga tyi?

¹⁷ Jeova uhanda ovinepo vitualeko. Uhanda ovalinepi vakale nohole kese umwe na mukuavo. Hatyiviko kese umwe okukala nohole na mukuavo tyina vamelinepe. Mahi opo otyinepo tyavo tyitualeko, vena okutualako okuyawisa ohole yavo, ngotupia tunthiakanwa opo tuahanyime.—Marcos 10:6-9.

¹⁸ Inkha uhanda okunepa ine okunepwa, ovola omunthu mohumbu nomutima auho. Tyina wamemuvasi, uundapelei kumwe opo mutualeko okukala nohole kese umwe na mukuavo. Ngetyi tuelilongesa Motyiimbo tya Salomau, tyitavela okukala nohole yotyotyili, itualako, mokonda ohole “omutemo wa Jah.”—Cântico de Salomão 8:6.