Okuti Wesukisa Okulikuambela?

Hamwe upondola okulipula okuti ‘inkha Huku wii ovipuka aviho, alo umwe omalusoke ange, omokonda yatyi nesukisila okulikuambela?’ Epulo olio liakolela. Jesus kapopile okuti Huku “wii ovipuka onwe muesukisa, tyina nkhele muhenemuite”? (Mateus 6:8) Ohamba David yo Isilayeli kohale otyo wetyiimbukile ahoneka okuti: “Elaka liange kalinepopie ondaka naike, mahi ove Jeova atyiho utyiiale.” (Salmo 139:4) Omokonda yatyi, tuesukisila okulikuambela ku Huku? Opo tukumbulule epulo olio, matutale etyi Ombimbiliya yapopia konthele yomalikuambelo.a

Namphila Ombimbiliya yapopia okuti Jeovab Huku wii ovipuka aviho, tupu ilekesa okuti kafuanyeka etyi ovafendeli vae vesukisa. (Salmo 139:6; Romanos 11:33) Okuhinangela kwa Huku kuhena apa kuaoyela kakukahi ngo kombutador ipaka nawa atyiho konthele ya kese munthu. Tyotyili, Huku wesuka netyi tyikahi momutima wetu mokonda uhanda tufuene kwe. (Salmo 139:23, 24; Tiago 4:8) Otyo Jesus alundila ovalongwa vae okulikuambela namphila Tate yae wii nawa atyiho tuesukisa. (Mateus 6:6-8) Tyina tulinga ononkhono mbokuwaneka omalusoke etu nomalusoke Omutungi wetu, tukala vali tyafuena kwe.

Pamwe, tyipondola okutupuiya okunoñgonoka etyi tuhanda okuita ku Huku melikuambelo. Inkha ongotyo, Huku upondola okutala omalusoke etu aundapesa enoñgonoko liae liafuapo, opo akumbulule etyi tuesukisa. (Romanos 8:26, 27; Efésios 3:20) Tyina tuamaimbuka okuti Huku wetukuatesako, alo umwe monkhalelo yepuiya, tulitehela okuti tuafuena vali kwe.

Ombimbiliya itupopila okuti Huku Wepondolo aliho, ukumbulula omalikuambelo ovaumbili vae ovakuatyili, mahi tupu ipopia omokonda yatyi ahakumbululila omalikuambelo amwe. Mongeleka, etyi ovivi mo Isilayeli kohale ankho vieliyawisa, Huku watumine omuuli wae Isaia apopile ovanthu okuti “Namphila mulinga omalikuambelo omanyingi, ame himutehelela.” (Isaías 1:15) Tyimoneka nawa okuti vana valinga ovivi ku Huku ine okulinga omalikuambelo monkhalelo ihaviukile, Huku katehelela omalikuambelo avo.​—Provérbios 28:9; Tiago 4:3.

Tupu, Ombimbiliya ipopia okuti: “Kese etyi tuita inkha tyelikuata nehando liae, oe metutehelela.” (1 João 5:14) Otyo tyilekesa okuti Huku wevela vala ovafendeli vae atyiho vemuita? Au. Tala ongeleka ya apostolu Paulu, waita ovikando vitatu opo Huku emupole “ekete mohitu.” (2 Coríntios 12:7, 8) Tyipondola Paulu ankho una otyitateka tyokuvela omaiho. Tyotyili, otyo tyemunumanesile unene! Paulu ankho wapewa otyiawa tyokuhakula nokututilisa ovanthu, mahi ngwe otyo akoleleya nomauvela ae. (Atos 19:11, 12; 20:9, 10) Namphila ekumbululo lietyi aita kalieile ngetyi ankho ahanda, Paulu wapandulile ombatelo ya Huku.​—2 Coríntios 12:9, 10.

Tyotyili, ovanthu vamwe vapopiwa Mombimbiliya, omalikuambelo avo akumbululilwe komahuviso. (2 Reis 20:1-7) Mahi omakumbululo oo hapeho ankho amoneka, alo umwe kohale. Vamwe ankho vanguanguana tyina tyimoneka okuti Huku ketavelele omalikuambelo avo. Ohamba David waita okuti: “Ove Jeova, alo nalupi mondimbwa? Apeho?” (Salmo 13:1) Mahi etyi omulume oo wekolelo aimbuka okuti Jeova kakumbulula omalikuambelo aeho, atualako nonthumbi yae mu Huku. Melikuambelo olio, David wayawisako okuti: “Mahi ame, ndyiyumba onthumbi moluembia luove olunene.” (Salmo 13:5) Nga David, ovafendeli va Huku hono vakolela momalikuambelo okukevelela Huku akumbulule omalikuambelo avo.​—Romanos 12:12.

Huku ukumbulula etyi tuesukisa umwe tyilityili.

Nehunga ewa, haapeho ovohe vaavela ovana vavo etyi vaita, monthiki vetyiita. Tupu, na Huku kakumbulula omalikuambelo etu monkhalelo tusoka ine momuvo tukevela. Mahi tupondola okukala nonthumbi yokuti Omutungi wetu, mokonda una oluembia ngatyina o tate, metukuatesako movipuka aviho tuesukisa momuvo watyo, nomonkhalelo yaviuka.​—Lucas 11:11-13.

Pamwe Huku ukumbulula omalikuambelo etu atuhetyimono.

Iya inkha tuaita ku Huku melikuambelo opo etutepulule otyitateka tyimwe tyikahi nokuliyauisa? Mokonda Jeova kakumbulula omalikuambelo komahuviso, tyilekesa okuti tuna okusoka okuti kakumbulula omalikuambelo aeho? Katupondola okusoka ngotyo, mahi tuna okutala inkha Huku wetukuatesako mononkhalelo tuhamuene. Mongeleka, alo umwe epanga usuka unene nove upondola okuhekukuatesako pomuvo ove uhanda. (Provérbios 17:17) Okuti Jeova upondola okulunda omapanga oo esuka nonthue opo vetuovole? Tupu, Huku upondola okutukuatesako no notestu Mbombimbiliya. Mombimbiliya tupondola okuvasamo etyi tuesukisa opo tutetulule otyitateka tyimwe.​—2 Timóteo 3:16, 17.

Huku ketupolo ovitateka vietu, mahi ututuma ovanthu vae opo vetukuateseko. (2 Coríntios 4:7) Mongeleka, etyi Jesus aita opo Tate yae emupole mononkhumbi ankho mamono, mokonda Huku ankho utyii okuti otyo tyipondola okuetela omupenyo enyina liae, Jeova atumu oandyu opo ipameke Omona wae. (Lucas 22:42, 43) Tupu Huku upondola okututuma epanga lietu opo litupopile onondaka mbupameka tyina tuesukisa. (Provérbios 12:25) Mokonda omakumbululo oo eya monkhalelo tuhei, otyiwa tutale nawa oñgeni Huku akumbulula omalikuambelo etu.

Omakumbululo amwe esukisa okukevela omuvo Huku atala okuti waviuka.

Ombimbiliya ipopia okuti Huku Wepondolo aliho upanda vana veliola omutima “momuvo wanakua.” (1 Pedro 5:6) Ngotyo inkha tutala okuti ekumbululo lietyi tuaita nomutima auho likahi nokuseta, katupondola okusoka okuti Jeova kesukile nonthwe. Mahi, mokonda ngwe utyii vali tyipona onthwe, Omutungi wetu woluembia utala nawa etyi tuaita, okusoka kuetyi tuesukisa.

Mongeleka, soka ñgeno una omona omukuendye ekuiti omusikaleta. Okuti momuavela vala etyi aita? Inkha ove utala okuti omona nkhele omututu pala okuendela komusikaleta, upondola okutokola nkhele okuhemulandela. Mahi, mokueenda kuomuvo tyina wamatale okuti pahe wekula upondola okumulandela. Tyelifwa notyo, Huku upondola okukumbulula “omahando omutima [wetu]” tyina tutualako okulikuambela.​—Salmo 37:4.

Ombimbiliya ilunda Ovakristau votyotyili vayumbe onthumbi momalikuambelo. Hamwe upondola okuti ‘otyo tyapepuka vala okutyipopia tyipona okutyilinga’. Tyotyili, inkha tukahi nokulwa notyitateka tyimwe tyepuiya ine tumoneswa ononkhumbi, tyipondola okutupuiya okukevela ekumbululo lia Huku. Mahi, otyiwa tuhinangele okuti Jesus wetulongesa tutualeko nomalikuambelo.

Jesus wapopia onthengele-popia yomuhepe wenda komukoyesi uhesukile novanthu opo alingilwe okankhenda. (Lucas 18:1-3) Namphila potete omukoyesi kahandele okumukuatesako, konyima wapopia okuti: “Netyimona okuti omuhepe alingilwe okankhenda, opo eheye vali kuame, atualako nokundyita.”(Lucas 18:4, 5) Ngetyi tyapopia otestu oyo melaka liotete, omukoyesi wavela vala omuhepe etyi aita “opo ehemupume keiho” ine tyilekesa okuti “opo ahapenyese enyina liae.”c Inkha alo umwe omukoyesi omukalavi, una owoma wetyi ovanthu mavasoko konthele yae, akuatesako omuhepe, iya Huku wesuka unene nokutulingila ouviuki, makuatesako vana “vatualako tyinthiki na tyitenya nokumuihana”! Ngetyi Jesus apopia, Huku “makalinga atyiho opo valingilwe liwa-liwa ouviuki.”​—Lucas 18:6-8.

Namphila pamwe tupondola okusoya okuita ombatelo ine okukuatesuako, mahi katupondola okuyekako. Mokutualako nomalikuambelo, tupondola okulekesa okuti tyilityili tuhanda Huku etukuatesako. Tupu tupondola okuimbuka omakumbululo a Huku muetyi tuaita, iya otyo atyituhikiya vali kwe. Tyotyili, tupondola okukala nonthumbi yokuti Jeova makumbulula omalikuambelo etu inkha tuita nekolelo.​—Lucas 11:9.