Otyili Konthele Yonkhali

OKUTI omunthu upondola okuti ndyitupu elema mokonda yokuateya okavela kokutala elema? Au! Tupu, ovanthu okuhetavela olusoke lwa Huku konthele yonkhali, katyilekesa okuti kutupu onkhali. Ondaka yae Ombimbiliya, ipopia unene konthele oyo. Oityi ilongesa konthele yonkhali?

Atuho Tuponya

Omanima 2000 konyima, apostolu Paulu wapopile otyitateka otyo etyi ati ‘otyiwa ndyihanda okulinga, hityilingi, mahi, otyivi nahahande, otyo ndyilinga.’ (Romanos 7:19) Inkha tuvakuatyili, matutavela okuti nonthue tuna otyitateka otyo. Hamwe tuhanda okulandula Ovitumino Ekwi ine ovitumino ovikuavo vali konthele yovituwa oviwa, mahi, nawike uvila okutyilinga ahaponyo. Onthue katutauluka ovitumino tyawina, anthi omokonda tuvakuankhali. Omokonda yatyi? Paulu wakumbulula okuti: “Inkha etyi nahahande otyo ndyilinga, hame vali ndyikahi nokutyilinga, anthi, onkhali ikahi muame.”—Romanos 7:20.

Nga Paulu, ovanthu aveho vaponya, tyilekesa okuti vapiñgana onkhali. Apostolu Paulu wapopile okuti: “Ovanthu aveho ovakuankhali kavavasi omunkhima wa Huku.” Omokonda yatyi? Paulu watualako okuti: “Mokonda yomunthu wike vala [Andau] onkhali yanyingila mouye, iya onkhali yaeta ononkhia. Moluotyo ononkhia mbeliyandyana movanthu vatyo aveho, mokonda aveho valinga onkhali.”—Romanos 3:23; 5:12.

Namphila ovanyingi kavetavela olusoke luokuti onkhali yo votate yetu votete yetuyapula ku Huku, nokutupumbiswa omuenyo wehena onkhali, mahi otyo, otyo Ombimbiliya ilongesa. Jesus, wapopile nonthumbi onondaka mbuvahiwa movikapitulu viotete via Gênesis, tyilekesa okuti oe ankho utavela okuti Andau na Eva ovanthu vakaleleko.—Gênesis 1:27; 2:24; 5:2; Mateus 19:1-5.

Onthele imwe yakolela mo nondaka Mbombimbiliya, okuti Jesus weile pano pohi opo ayovole vana vakolela mwe. (João 3:16) Ekevelelo lietu liomuenyo komutwe litei kokutavela onkhalelo Jeova ayovola monkhali ovanthu vokupandula. Mahi inkha katuanoñgonokele nawa oñgeni Huku atala onkhali, kamatupande etyi oe alinga opo etuyovolemo.

Otyilikutila tya Jesus no Mokonda Yatyi ankho Tyesukisila

Jeova waavelele omunthu wotete ekevelelo liomuenyo wahapu. Andau ankho upondola vala okupumbwa ekevelelo olio ewa unene, inkha ketavela ku Huku. Andau ketavelele, etyi etyilinga akala omukuankhali. (Gênesis 2:15-17; 3:6) Andau walinga etyi Huku ahahandele, atyimutete komuenyo omuwa, anyono oupanga wae na Huku. Etyi alinga onkhali mokuhetavelele otyitumino tya Huku, wahimbika okukulupa iya ankhi. Aveho ovana va Andau kumwe nonthue, tuatyitilwa monkhali, moluotyo tunkhia. Omokonda yatyi?

Okunoñgonoka ehunga katyipuiya. Ovohe ovakuankhali kavapondola okutyita ovana vehena onkhali. Aveho vatyitwa na Andau ovakuankhali, iya apostolu Paulu wati: “ofeto yonkhali ononkhia.” (Romanos 6:23) Anthi, onthele yavali yo versikulu oyo, ituavela ekevelelo liokuti: “Mahi otyali tuapewa na Huku omuenyo wahapu, menyina lia Kristu Jesus Tatekulu yetu.” Otyo tyilekesa okuti, menyina liononkhia mbotyilikutila tya Jesus, ovanthu vokutavela nokupandula, vapondola okuyovolwa movitateka vionkhali ya Andau.a (Mateus 20:28; 1 Pedro 1:18, 19) Oñgeni otyo tyikukalesa?

Ohole ya Kristu “Itulunda”

Apostolu Paulu watuminue na Huku okuava ekumbululo liepulo likahi pombanda. Oe wahoneka okuti: “Ohole ya Kristu itulunda, mokonda etyi otyo tuanoñgonoka, okuti omunthu wike wankhila aveho; . . . Iya oe wankhila aveho, opo vana vena omuenyo vahakaleko pala avo muene, mahi o pala una wevenkhila iya atutiliswa.” (2 Coríntios 5:14, 15) Inkha omunthu una onthumbi yokuti otyilikutila tya Jesus matyimuyovola monkhali, nokuna ehando liokulekesa okuti upandula otyilikutila otyo, oe una okulinga ononkhono mbokutyinda omuenyo wae ngetyi Huku ahanda. Otyo tyakutikinya okukala nenoñgonoko konthele yetyi Huku ahanda, nokulonga omutima wae ovitumino vio Mbimbiliya, nokutyinda omuenyo welikuata novitumino ovio.—João 17:3, 17.

Okulinga ovipengi tyinyona oupanga wetu na Jeova Huku. Etyi Ohamba David aimbuka onkhali yae onene youndalelapo alinga na Bateseba nokuipaa omulume wae, tyotyili wakalele nohonyi onene. Mahi, ankho tyimusukalalesa vali unene omokonda onkhali yae yanumanesa Huku. Nokuelivela unene, wapopilile Jeova okuti: “Nalinga onkhali komaiho ove, ove vala nalingila onkhali. Iya nalinga otyivi komaiho ove.” (Salmo 51:4) Tupu, etyi Jose ayondyua opo alinge oumbalehi, omutima wae wemuhindila okulipula okuti: “Oñgeni ndyipondola okulinga otyipuka otyo otyivi unene, nokulinga onkhali ku Huku?”—Gênesis 39:9.

Onkhali, hakukala vala nohonyi mokonda tuavasiwa nokulinga otyipuka tyimwe otyivi. Tupu, onkhali hakulitehelela vala omapita tyina tupulwa novanthu mokonda yotyipuka tyimwe hamwe tuehevilile okulinga. Okutauluka ovitumino via Huku konthele yotyihola, noukuatyili, nonthilo, nefendelo, novikuavo vali ovivi tyinyona oupanga wetu na Huku. Inkha tulinga onkhali tyawina, matukala onondyale mba Huku. Otyo otyili, tuna okusokolola nawa.—1 João 3:4, 8.

Ngotyo, oityi tyapita nonkhali? Tyotyili natyike tyapita nayo. Ovanthu ovo vahimbika okuiihana omanyina omakuavo, okusoka okuti ngotyo kaikolo unene. Ovanyingi vatomba omalondolo omutima wavo ine kavasukile nao. Aveho vahanda okupandwa na Huku, vena okulityilika otyituwa otyo. Ngetyi tutyiale, ofeto yonkhali ononkhia, hanonkhumbi vala ine olukundo. Ngotyo okunoñgonoka onkhali tyituala komuenyo ine o kononkhia.

Onondaka onongwa, mbokuti inkha tulivela tyotyili ononkhali mbetu, iya atumbuyekepo, matuevelwa menyina liotyilikutila tyeyovo tya Jesus. Paulu wahoneka okuti: “Ovana-mbembwa ovovana vaevelwa ovivi valinga no nonkhali mbavo mbahikwa. Omuna-mbembwa omunthu una uhakakoyeswa na Jeova mokonda yonkhali yae.”—Romanos 4:7, 8.

[Onondaka Poutoi]

[Okakasa/​Olutalatu pefo 10]

Ongeleya Yapilulula Omalongeso Ayo Aeho

Ova Katolika ovanyingi na lumwe vanoñgonokele nawa oityi o Limbu. Momanima okualamba pahe, olusoke luo Limbu katutu-katutu lukahi nokupolwa momalongeso avo. Menima 2007, Ongeleya yo Katolika yahoneka omukanda wokuti “elongeso lio Limbu liapwa,” nokulekesa okuti “ongeleya ina omahunga okukevelela okuti omalukembe okunkhia ahambatisalelwe, apondola okuyovolwa nokukamona ombembwa ihapu.”—International Theological Commission.

Omokonda yatyi ongeleya yapilululila omalongeso ayo aeho? Ongeleya yalinga ngotyo pala okuliyovola muetyi Henri Tincq omulume umwe ko França aihana okuti, “omulemo wapiñganua, nokuaamenwa, tunde kohale alo motyita 20. Ongeleya ankho yuundapesa elongeso lio Limbu, opo ovohe vatile owoma iya avambatisala ovana vavo liwa-liwa.” Mahi okuyekapo elongeso lio Limbu tupu tyikatula omapulo omakuavo.

Oviso ine Ovihonekwa? Elongeso lio Limbu liatuka meliongiyo liongeleya konthele yo pulukatoliu motyita 12. Ongeleya yo Katolika ankho ilongesa okuti ohande ihupa kononkhia. Moluotyo, ankho vena okuvasa omphangu kuenda onohande mbovana vahapondola okuenda keulu, mokonda kavambatisalelwe, mahi tupu kavatokalele okuenda moifelunu. Oko kuatuka olusoke luo Limbu.

Mahi, Ombimbiliya kailongesa okuti onohande mbuhupa kononkhia. Anthi, ilongesa nokuayandyuluka nawa okuti onohande kambutualako nomuenyo, mahi onohande mbulinga onkhali mbupondola ‘okunyimuako’ “nokunkhia.” (Atos 3:23; Ezequiel 18:4, Versão Ferreira de Almeida, Revista e Corrigida) Mokonda ohande inkhia, kutupu Olimbu. Tupu, Ombimbiliya ipopia okuti ononkhia, onkhalelo omunthu ehei natyike, mbelifwa notumphoki.—Eclesiastes 9:5, 10; João 11:11-14.

Ombimbiliya ilekesa okuti ku Huku ovana vo Vakristau ovasukuki. (1 Coríntios 7:14) Inkha omalukembe esukisile okumbatisalwa pala eyovo liavo, ñgeno onondaka ombo mbutupu esilivilo.

Elongeso lio Limbu tyotyili linumanesa Huku. Kalilekesa okuti Huku o Tate woluembia, anthi ongatyina oe omukalavi uhitisa vana vehena onkhali. (Deuteronômio 32:4; Mateus 5:45; 1 João 4:8) Otyo, tyilekesa nawa omokonda yatyi Ovakristau vo tyotyili vehetavelela elongeso olio liomatutu!

[Olutalatu pefo 9]

Okuendela Mondaka ya Huku tyitukalesa noupanga omuwa na Huku novanthu