Huku Uhanda Tusukuke

Ovo ina yovana meumbo, tyina ovana venda kosikola, nkhele vevetala umwe nawa ine vasukuka. Vahanda ñgeno tyina ovana vavo venda povanthu, velikoha nawa, vavala ovikutu viasukuka nawa. Valinga ngotyo mokonda vetyii okuti omona tyina asukuka, kavela-vela vala, tupu kapopisisa omapita ovohe. Tate yetu Siovaa, nae uhanda tusukuke; okusukuka umwe molutu lwetu no movipuka tulinga. Uhanda tusukuke mokonda utyii okuti ngotyo kamatumupopisa omapita, no onthwe muene matukala nawa.

1. Oityi omunthu wonthate alinga?

Siovaa wati: “Muna okukala ovasukuki.” (1 Petulu 1:16) Ku Siovaa omunthu wokuasukuka, omunthu una wati umwe, oe onthate, oe ulinga etyi tyili Mondaka yae Ombimbiliya. Omunthu wonthate, ulikoha apeho, ukoha ovikutu viae, no meumbo liae ovipuka visukuka vala nawa. Wati umwe ine una etuku-tuku meumbo liae, hamwe omota, apeho uvisukula nawa. Tupu omunthu wonthate usukula Mondyuo Yomaliongiyo. Tyina onthwe tunonthate, ovanthu vapopia nawa Siovaa Huku yetu. — 2 Ova Kolindu 6:3, 4.

2. Opo tusukuke ku Huku, ovipuka patyi tuahapondola okulinga?

Ombimbiliya yati: “Tulisukulei onkhako aiho mohitu no momalusoke.” (2 Ova Kolindu 7:1) Onondaka ombo mbahanda okupopia okuti katupondola okulinga otyipuka natyike tyipondola okunyona olutu lwetu muene. Novipuka tusoka mokati ketu, tuhanda ñgeno navio vihambukiswa Siovaa. Naina tuna okulunguka tuahasoke kovipuka ovivi, viasila. (Salmo 104:34) Tupu tuna umwe okulikuatehila tuahapopie ovipuka viasila, vitukana ovanthu. — Tanga Ova Kolosu 3:8.

Oityi vali Siovaa ahahande tulinge? Ovipuka vimwe ovanthu valinga, vinyona ekongoko liavo. Onthwe katupondola okufenya; katupondola okusipa, tyilinge omakaya, tyilinge ovipuka ovikwavo. Omunthu tyina alinga ovipuka ovio, ulietela onombela, tupu kesukile-ale nokuti omwenyo ukola. Onthwe tupu tuna okututumba umwe tulinge evi viasukuka, katuhande okulinga evi viasila: okulikwata-kwata komapita, nokutala hamwe okutanga evi vihongilinya ovanthu okulinga ovipengi! (Salmo 119:37; Ova Efesu 5:5) Ine hamwe tualingaile ovipuka ovio, pahe pamwe tyina tuti tuviyeka-po, pakala ovilinga. Mahi Siovaa una onthwe, utukuatesako. — Tanga Isaías 41:13.

KUHANDE OKUNOÑGONOKA VALI?

3. Tyina tunonthate, enyina lya Huku lipopiwa nawa

Siovaa wapopilile ovanthu vae ova Isilayeli etyi ankho vena okulinga vasukuke. Movipuka ovio apopilile ova Isilayeli, omo tutalela okuti Siovaa uhanda onthwe vanthu vae tusukuke. Tangei Êxodo 19:10; 30:17-19, amutomphola omapulo aa:

• Ono velesikulu ombu tuatanga, wamona okuti Siovaa ukala ñgeni tyina amona omunthu onthate?

• Pahe, oityi upondola okulinga utualeko okulinga onthate?

Atuho tupondola okukala ononthate, tyilinge tukala kositati, tyilinge tukala komaumbo, tyilinge tuahepa, tyilinge tuamona. Tyili apa, okusuka umwe vala natyo, atupu-elundo. Talei OVIDIU, amutomphola epulo eli:

OVIDIU: Huku Uhole Ovanthu Ovasukuki (4:10)

• Ine apeho tusukula nawa ovipuka vietu, ovanthu tulongesa Ombimbiliya matyivekalesa ñgeni?

4. Yekapo ovipuka viasila

Okuti upwena? Tutyii okuti katyapepukile okutyiyekapo. Mahi otyipuka matyikupe umwe ononkhono utyiyekepo, okusoka nawa oñgeni okupwena (okusipa) tyikukalesa ove muene na vakwenyi muhimama navo. Tangei Mateusi 22:37-39, amutomphola omapulo aa:

• Omunthu wokupwena, tyitavela alinge epanga lya Siovaa Huku?

• Ine omunthu upwena, vomeumbo liavo na ava ehimama navo, vakala ñgeni?

Soka etyi upondola okulinga utyiyeke-po tyokupwena.a Talei OVIDIU.

OVIDIU: Likondola Omutima (2:47)

Tangei Ova Filipu 4:13, amutomphola epulo eli:

• Oñgeni okulikuambela apeho, nokutanga Ombimbiliya, nokuenda komaliongiyo tyipa omunthu ononkhono etyivile okuyekapo okulinga otyipuka tyimwe Siovaa ahahande?

5. Tutumba umwe wahasoke kovipuka viasila, tupu wehevilinge

Tangei Ova Kolosu 3:5, amutomphola omapulo aa:

• Ovipuka vimwe viakaka unene ovievi: okulikwata-kwata komapita, okutala nokutanga evi vihindila ovanthu okulinga ovipengi, okulituma onomesasi mbupopia umwe vala ovipuka viasila. Mahi pahe okusoka ko tesitu tuatanga, Siovaa ovipuka ovio uvitala-vo ñgeni?

• Okuti ñgaa tyitavela umwe tukale ovanthu vasukuka, atuahalingi ovipuka evi Siovaa apopia okuti viasila? Oityi wapopila ngotyo?

Tala oñgeni motyivili okuyekapo ovipuka Huku ati viasila. Talei OVIDIU.

OVIDIU: Weheliyekele Ovipuka Viasila (1:51)

Nthiki imwe, Sesusi wapopile onondaka mbumwe, okumbusoka nawa, ankho uhanda vala okupopia okuti tuna okututumba tukale ovanthu vasukuka ku Huku. Tangei Mateusi 5:29, 30, amutomphola epulo eli:

• Sesusi ankho keli-ko nokupopia okuti tuna okulityoka-tyoka. Ankho uli vala nokupopia okuti tuna okulipola ovipuka aviho vipondola okutulingisisa onkhali ku Huku. Ku ove, ovipuka patyi omunthu ena okulinga ahasoke kovipuka viasila vipondola okumulingisisa okulinga onkhali?b

Ine uli nokulikuatehila wahasoke kovipuka viasila, Siovaa Huku upandula unene ononkhono uli nokulinga. Tangei Salmo 103:13, 14, amutomphola epulo eli:

• Ine una nokulikuatehila uyekepo okulinga ovipuka viasila, oñgeni okuhinangela onondaka mbo tesitu ei matyikukuatesako?

Wahaponwe!

Pamwe tulikuatehila umwe tuyekepo okulinga otyipuka tyimwe tyinumanesa Siovaa, mahi tukati vala ñgaa, tuetyipaleka vali. Otyipuka otyo tyipondola okutuponeswa, atusoyo umwe! Otyo tyikahi vala ngovanthu vokuhateka opo vafetwe. Pamwe pokuhateka, umwe upondola okulifondoka atoko. Okuti nga apindukapo, una vali okukahimbikila oku vatundilila-le? Okuti pahe ngotyo kesilivila umwe vali? Au! Tyina uhanda okuyekapo otyipuka tyimwe, ukati ñgaa wetyilinga vali, hakuti ngotyo kusilivila vali. Omunthu ongotyo umwe! Vimwe tuetyiliya-le viapenga, kavipuiya-le okuviyekapo, mahi vimwe tuna okututumba ehimbwe. Tyihanda vala okupindukapo, atutualako ngovanthu vokuhateka! Siovaa mekukuatesako, otyivili umwe okuyekapo ovipuka ovio ovivi, viasila.

ETYI WELILONGESA

Wamona okuti opo tuhambukiswe Siovaa, tuna okukala ononthate. Welilongesa okuti Siovaa kahande tusoke kovipuka viasila. Tupu wamona okuti uhambukwa tyina tulinga ovipuka oviwa, viasukuka.

Okupitulula

• Oityi tuesukisila okukala ononthate?

• Oityi tuna okulinga tukale ononthate?

• Oityi tuna okulinga opo tuahalinge ovipuka viasila, nokuvisoka atuehevisoko-ale?

KUHANDE OKUOVOLA VALI?

Ovipuka patyi upondola okulinga ukale onthate, namphila wahepa umwe?

Ekongoko — Komba Apa Ukala: Okulikoha Pomavoko (3:01)

Tala ovipuka vimwe una yokulinga opo uyekepo okupwena.

“Etyi Una Okulinga Utyivile Okuyekapo Okupwena” (Pahukei!, Maio yo 2010)

Vamwe vasoka okuti okutala, nokutanga evi vihinda okulinga ovipengi, tyitupu-ale etyi tyilinga. Mahi okuti otyo otyili umwe?

“Okuti o Pornografia Inyona Ine Kainyono?” (Omutala Womulavi 1 ya Agosto yo 2013)

Tala etyi omulume umwe alinga ayekepo okutala ovipuka viasila.

“Nalingaile Ovivi Etyi Nehenekale Nomuenyo Omuwa” (Omutala Womulavi No. 4 2016)