Omapulo Ovatangi

Paulu wahoneka okuti: “Mokonda yovitumino ame nankhia pala ovitumino ovio opo ndyikale nomuenyo pala Huku.” — Gal. 2:19.

Etyi Paulu ahoneka tyelikuata nawa netyi ankho tyikahi nokumoneka mewaneno lyo Loma mepunda-umbo lyo Galasia. Ovakilisitau vamwe ankho vekahi nokuhongilinyua novalongesi vomatutu. Ovalongesi ovo ankho valongesa okuti, opo omunthu ayovolwe ankho wesukisa okuendela Movitumino Viapelwe Moisesi haunene okupita ekuendye. Mahi Paulu ankho utyi okuti Huku hatyoko aita vali kovanthu. Paulu wahangununina ovanthu ovo okuti olusoke olo luapenga iya apopila ovakuatate opo vakale nekolelo motyilikutila tyeyovo tya Sesusi Kilisitu. — Gal. 2:4; 5:2.

Ombimbiliya ipopia okuti, tyina omunthu amankhi kei vali natyike tyikahi nokumoneka ponthele yae. (Ecl. 9:5) Etyi Paulu apopia okuti: “Nankhia mokonda yovitumino,” ankho Paulu ukahi nokupopia okuti kesukisile vali okuendela Movitumino Viapelwe Moisesi. Tupu, Paulu ankho ukahi nokupopia okuti mokonda yotyilikutila tyeyovo wakala nomuenyo pala Huku.

“Ovitumino” viapilululile onkhalelo ya Paulu. Ñgeni ngotyo? Paulu wapopia okuti “omunthu kakala omuviuki mokonda yokulinga ovipuka viitwa movitumino, mahi omokonda vala yekolelo mu Sesusi Kilisitu.” (Gal. 2:16) Tyili, Ovitumino Viapelwe Moisesi viali umwe notyilinga. Paulu ahangununina ova Galata okuti: “Ankho viayawiswa-ko pala okuhololola oviponyo, alo ombuto ina yapelwe omulao ihika.” (Gal. 3:19) Ovitumino Viapelwe Moisesi viakuatesileko ovanthu ovakuankhali okunoñgonoka okuti kavetyivili okuendela movitumino tyahapengesa mahi ankho vesukisa otyilikutila tyeyovo tyafuapo. Ovitumino viakuatesileko ovanthu “okuhika kombuto” Sesusi Kilisitu. Opo Huku atale omunthu umwe ngomuviuki wesukisa okukala nekolelo mu Sesusi Kilisitu. (Gal. 3:24) Paulu ankho wii otyipuka otyo mokonda pokati Kovitumino Viapelwe Moisesi wetavela iya akala nekolelo mu Sesusi. Paulu ankho wankhia “mokonda yovitumino” mahi akalako “nomuenyo pala Huku.” Paulu ankho kesukisile vali okuendela Movitumino Viapelwe Moisesi.

Paulu wapopia onondaka ngombo etyi ahonekela omukanda ova Loma, wati: “Vakuatate no onwe ankho muakutwa Novitumino. Mahi mokonda yotyilikutila tya Kilisitu . . . “Pahe tuayovolwa Movitumino ovio, mokonda vitupu vali epondolo mu onthue.” (Loma 7:4, 6) Onondaka ombo, no ombu tuvasa momukanda Ova Galata 2:19, Paulu ankho kekahi nokupopia okunkhia mokonda yokuahitiswa Novitumino Viapelwe Moisesi. Mahi ukahi nokupopia konthele yokuyovoka. Paulu novanthu ovakuavo ankho kavesukisile vali okuendela Movitumino Viapelwe Moisesi mahi ankho vayovoka mokonda yokuakala nekolelo motyilikutila tya Sesusi Kilisitu.