Oñgeni Siovaa Mekuyakulila?

 1. Omokonda yatyi Sesusi aitila ku Siovaa opo ayunge ovalongwa vae?

MOTYINTHIKI tyahulililako etyi Sesusi eli pano pohi, ankho ukahi nokusoka kovitateka ovalongwa vae mavakala navio. Mokonda ankho uhole omapanga ae, Sesusi aiti ku Tate yae ‘opo eveyunge mokonda yondingavivi.’ (Suau 17:14, 15) Sesusi ankho utyii okuti tyina amakondoka keulu, Satanasi Eliapu matualako okuluisa ovanthu vahanda okuumbila Siovaa. Tyayandyuluka umwe nawa okuti, ovanthu va Siovaa vesukisa okuyakulilwa.

 2. Oityi tyitukalesa nonthumbi yokuti Siovaa makumbulula omalikuambelo etu?

² Siovaa wakumbululile elikuambelo lya Sesusi mokonda omona Wae iya Umuhole. Inkha tulinga ononkhono mbokuhambukiswa Siovaa makala nohole nonthue. Tupu matehelela omalikuambelo etu, tyina tumuita etukuateseko nokutuyakulila. Ngetyi tyilinga Onkhalamutwe yombunga, Siovaa matualako okutekula nawa ovana vae. Mokonda inkha ketyilingi masilisa enyina liae!

 3. Omokonda yatyi tuesukisila okuyakulilwa na Siovaa hono?

³ Hono onthue tuesukisa umwe okuyakulilwa na Siovaa. Mokonda tunde apa Satanasi liatewa keulu lina “onyengo onene.” (Ehol. 12:12) Lihongailiya ovanthu vetumonese ononkhumbi nokuvepaka olusoke luokuti tyina vetumonesa ononkhumbi “vekahi nokuumbila Huku.” (Suau 16:2) Vamwe kavetavela ku Huku, iya vetumonesa ononkhumbi mokonda katulingi onthele youye uno. Omokonda yatyi tuehesukisile okutila owoma tyina vetumonesa ononkhumbi? Omokonda Ondaka ya Huku yati: “Tatekulu omukuatyili iya memupameka, nokumuyakulila kondingavivi.” (2 Tes. 3:3) Oñgeni Siovaa etuyakulila? Matutale ononkhalelo onombali etyilinga.

 4. Ngetyi tyipopia Ova Efesu 6:13-17, oityi Siovaa etuavela opo tuliyakulile?

⁴ Opo tutyivile okuliyakulila komaliva a Satanasi, Siovaa wetuavela onondyakulilo. (Tanga Ova Efesu 6:13-17.) Onondyakulilo ombo, mbapama iya mbutuyakulila! Mahi mambutuyakulila vala tyina tumbuundapesa. Oityi kese nthele yondyakulilo ilekesa? Matulilongesa oityi kese ike ilekesa.

 5. Epoha liotyili oityi, iya omokonda yatyi tuesukisila okulivala?

⁵ Epoha liotyili, lilekesa otyili tuvasa Mondaka ya Huku Ombimbiliya. Omokonda yatyi tuesukisila okuvala epoha liotyili? Omokonda Satanasi utuluisa “o he younkhembi.” (Suau 8:44) Ukahi-ale nokuyapula ovanthu nomatutu ae tunde kohale! (Ehol. 12:9) Mahi otyili tuvasa Mondaka ya Huku Ombimbiliya tyitukuatesako okuhatokela momatutu ae. Oñgeni tupondola okulivaleka epoha olio movilwa na Satanasi? Omokulilongesa otyili konthele ya Siovaa, “nokumufenda tyihongolelwa nononkhono mbae notyili” iya nokukala ovakuatyili movipuka viatyo aviho tulinga. — Suau 4:24; Efe. 4:25; Heb. 13:18.

 6. Oityi ondyakulilo youviuki, iya omokonda yatyi tuesukisila okulivaleka-yo movilwa vietu na Satanasi?

⁶ Ondyakulilo youviuki, ilekesa ovitumino via Siovaa. Omokonda yatyi efualali liesukisila ondyakulilo? Mokonda ngetyi ondyakulilo iyakulila omutima wefualali, nondyakulilo youviuki iyakulila omutima wetu komahongalinyo ouye wa Satanasi. (Pro. 4:23) Siovaa uhanda tukale nohole nae iya atumuumbila nomutima auho. (Mat. 22:36, 37) Ngwe Satanasi uhanda okuyapula omutima wetu atukala nohole novipuka viomouye — ovipuka Siovaa eyele. (Tia. 4:4; 1 Suau 2:15, 16) Mahi inkha katulikuatehila Satanasi malituhongiliya opo tutyitukilepo Siovaa.

 7. Omokonda yatyi tuesukisila okulivaleka ondyakulilo youviuki?

⁷ Onthue tulivaleka ondyakulilo youviuki, tyina tulityilika okulinga etyi tyapenga, atulingi etyi tyaviuka okutalela kuetyi tyelikuata netyi Siovaa apopia. (Sal. 97:10) Ovanthu ovanyingi vasoka okuti ovitumino vya Siovaa vivetyika okulinga ovipuka ovinyingi. Mahi inkha tuyekapo okuendela movitumino vya Siovaa, matukala ngefualali lili movilwa aliyumbuhi ondyakulilo yalio mokonda lisoka okuti yalema, efualali lilinga ngotyo litupu onondunge. Mahi inkha nonthue tukala nohole na Siovaa matunoñgonoka okuti ovitumino vya Siovaa “kavialemene” mahi viapepuka. — 1 Suau 5:3.

 8. Oityi tyihangununa okuvala ononkhaku opo tuivise onondaka onongwa?

⁸ Paulu tupu wapopia okuti, tuna okulivaleka ononkhaku mbapongiwa nawa pala okuivisa onondaka onongwa mbombembwa. Otyo tyilekesa okuti apeho tuna okukala tyafuapo opo tuivise onondaka onongwa Mbouhamba. Tyina tulongesa vakuetu Ombimbiliya otyo tyipameka vali ekolelo lietu. Iya okutala onkhalelo ovanthu va Siovaa vekahi nokuivisa mouye auho, tyihambukiswa unene. Mongeleka, vaivisa tyina veli kovilinga, nokosikola, natyina valinga ononiñgoso mbavo, tupu vaivisa umbo-na-umbo, no komunthele yavo, nokuivisa pana palandesilwa, no momaumbo avo muene. Inkha tukala nowoma atuyekepo okuivisa matukala ngefualali lili movilwa alilipolo ononkhaku, mokonda lisoka okuti okulipola ononkhaku matyilikuatesako okuhaipawa. Inkha lilinga ngotyo matyilipwilisa tyina liluiswa. Tupu inkha lilinga ngotyo kalikahi nokutavela ovitumino vya una ukahi nokulihongolela.

 9. Omokonda yatyi tuesukisila ondyakulilo onene yekolelo?

⁹ Ondyakulilo onene yekolelo ilekesa ekolelo tuna mu Siovaa liokuti mafuisipo omilao viae. Ekolelo litukuatesako “okunyima omihongo aviho viatema viondingavivi.” Omokonda yatyi tuesukisila ondyakulilo onene yekolelo? Omokonda ituyakulila komalongeso avana vatyitukilapo otyili nokuvana vetukuela mokonda yomatavelo etu. Inkha katukala nekolelo kamatutyivili okukoleleya tyina ovanthu vetuhongiliya okuhetavela ovitumino vya Siovaa. Mahi apeho tyina tulinga ovipuka vihambukiswa Siovaa kovilinga no kosikola tukahi nokuliyakulila. (1 Pet. 3:15) Iya apeho tyina tuanya ovilinga vifeta onombongo ononyingi iya vitepulula komuvo wetu wokuumbila Siovaa tukahi nokuyakulila ekolelo lietu. (Heb. 13:5, 6) Tupu apeho tyina tutualako okuumbila Siovaa namphila tuyelwe tukahi nokuyakulila ekolelo lietu. — 1 Tes. 2:2.

10. Oityi okapasete keyovo iya mokonda yatyi tuesukisa okukevala?

¹⁰ Okapasete keyovo, ekevelelo tuna mu Siovaa. Ekevelelo liokuti meketuyovola kononkhia akayamba aveho vana valinga etyi ahanda. (1 Tes. 5:8; 1 Tim. 4:10; Titu 1:1, 2) Ngetyi okapasete kayakulila omutwe wefualali, tupu ekevelelo lietu, liyakulila omalusoke etu. Ñgeni ngotyo? Ekevelelo litukuatesako okutualako okusoka komilao vya Siovaa, tupu litukuatesako okuhasoyo tyina tuna ovitateka atukala nonthumbi yokuti mavilambe. Oñgeni tupondola okulivaleka okapasete? Oputyina tusoka ngetyi Huku asoka. Mongeleka, ekevelelo lietu hakuyumba onthumbi momalumono apwa, mahi omu Huku. — Sal. 26:2; 104:34; 1 Tim. 6:17.

11. Oityi omutunga wononkhono mba Huku, iya omokonda yatyi tuesukisila okuundapesa?

¹¹ Omutunga wononkhono mba Huku, Ondaka ya Huku Ombimbiliya. Omutunga oo, utukuatesako okulityilika omalongeso ouye, novituwa ovivi viomouye. Eongano lya Huku litulongesa oñgeni tupondola ukuundapesa omutunga wononkhono mba Huku. (2 Kol. 10:4, 5; 2 Tim. 3:16, 17; Heb. 4:12) Mahi tupu tulilongesa ukuundapesa omutunga wononkhono mba Huku tyina tulinga elilongeso lioulike. (2 Tim. 2:15) Tyihe-onondyakulilo vala, Siovaa una vali ovipuka ovikuavo etuavela opo tuliyakulile. Ovipi?

12. Oityi tuesukisa iya omokonda yatyi?

¹² Efualali enongo lityii okuti opo lityivile okufinda kalitei vala kounongo walio no konondyakulilo mbalio. Mahi wesukisa okukuatesuako nomafualali omakuavo. Tyelifwa notyo, tupu nonthue opo tutyivile okulwisa Satanasi novilulu viae, tuesukisa okukuatesuako novakuatate nonomphange. Siovaa wetuavela ovakuakatate opo vetukuateseko. — 1 Pet. 2:17.

13. Ngetyi tyipopia Ova Hebeleu 10:24, 25, oñgeni omaliongiyo etukuatesako?

¹³ Onkhalelo onkhuavo tukuatesuako, oputyina tuenda komaliongiyo. (Tanga Ova Hebeleu 10:24, 25.) Pamwe-pamwe tusoya mahi omaliongiyo apondola okutupameka. Onthue tupamekwa tyina tutehelela omakumbululo ovakuatate nonomphange. Omalongomona nomalekeso etukuatesako nokutuavela ondundo yokuumbila Siovaa. Iya okutomphola nonomphange, pokuhimbika no pokumanuhula eliongiyo tyitupameka. (1 Tes. 5:14) Tupu omaliongiyo etukuatesako okutala okuti, okukuatesako vakuetu tyituhambukiswa. (Ovil. 20:35; Loma 1:11, 12) Tupu omaliongiyo etukuatesako mononkhalelo ononkhuavo. Omaliongiyo etukuatesako okulongesa nawa movilinga viokuivisa. Mongeleka, etulongesa oñgeni tuna okulongesa noviti vietu viokulongesa. Mokonda yotyo, tanga etyi mamukelilongesa meliongiyo. Tyina uli meliongiyo tehelela nawa. Iya movilinga viokuivisa linga ngetyi walongeswa meliongiyo. Inkha ulinga ngotyo mokala ‘efualali likahi nawa lya Kilisitu.’ — 2 Tim. 2:3.

14. Ovalie vali vetukuatesako? Hangununa.

¹⁴ Tupu onthue tukuatesuako no noandyu ononyingi mba Huku. Nkhele soka vala kuetyi oandyu ike ivila okulinga! (Isa. 37:36) Ine oandyu ike etyivila okulinga ovipuka ovinyingi, pahe soka konoandyu ononyingi. Etyi mbuvila okulinga nokutyisoka katyitavelale, petupu omunthu nii otyilulu tyivila okulwisa onoandyu ononyingi-nyingi mba Siovaa. Tyina omunthu umwe ena ekolelo liapama mu Siovaa, pahe akuateswako na Siovaa utupu etyi tyimutilisa owoma. (Juíz. 6:16) Inkha usoka kuotyo, tyina ava ulongeswa navo nava uundapa navo, vekulinga omukuele matyikukuatesako okuhatili owoma. Apeho hinangela okuti kukahi nokulwa awike, Siovaa ukahi nokukukuatesako.

15. Ngetyi tyipopia Isaías 54:15, 17, omokonda yatyi tupopila okuti Satanasi kemetyivili okutalameka ovilinga viokuivisa?

¹⁵ Ouye wa Satanasi utuyele mokonda yovipuka ovinyingi. Mongeleka vetuyele mokonda katuholovona ovatumini, katukuatela omauta vakuetu. Tuivisa enyina lya Huku. Tuivisa okuti Ouhamba wa Huku oo vala maweetela ombembwa ovanthu. Ku onthue onkhali, onkhali umwe, katutei kuetyi ovanthu vomouye vapopia. Iya tupopila ovanthu okuti Satanasi una onya omuipai. (Suau 8:44) Tupopia umwe tyeheliseta-seta okuti ouye wa Satanasi mauhanyuako. Satanasi novanthu vayemba kwe kavetyihande. Mahi kavetyivili okututalameka. Onthue tutualako okulinga ononkhono mbokuhambukiswa Siovaa! Tyili Satanasi una umwe ononkhono mahi ketyivili okutalameka onondaka onongwa Mbouhamba mbuiviswa mouye auho. Tutyivila tupu omokonda Siovaa ukahi nokutuyakulila. — Tanga Isaías 54:15, 17.

16. Oñgeni Siovaa makayovola ovanthu vae mokueenda kuononkhumbi ononene?

¹⁶ Oityi tukevelela komutwe wandyila? Mononkhumbi ononene Siovaa metuamena mononkhalelo onombali. Tete, Siovaa matumu ovatumini opo vahanyeko onongeleya ambuho mbomatutu. (Ehol. 17:16-18; 18:2, 4) Konyima aetako o Alumagedom ahanyeko ouye auho wa Satanasi. Tyina amalingi ovipuka ovio vivali onthue ovanthu vae metuamena. — Ehol. 7:9, 10; 16:14, 16.

17. Ouwa patyi matupoloko inkha tutualako okukala omapanga a Siovaa?

¹⁷ Inkha tutualako okupameka oupanga wetu na Siovaa Satanasi kemetyivili okutuyapula. Satanasi apa katutu makahanyuako. (Loma 16:20) Mokonda yotyo livaleka onondyakullio ambuho opo utyivile okuluisa Satanasi nouye wae! Kuatesako ovakuatate no nomphange. Landula ehongolelo lya Siovaa. Inkha ulinga ovipuka ovio, kala tyityi okuti, Tate yove Siovaa mekupameka nokukuyakulila. — Isa. 41:10.