“Ospilitu Yovolola . . . Ovipuka Viokuaya Kohi Via Huku”

“Ospilitu yovolola ovipuka aviho, alo umwe ovipuka viokuaya kohi via Huku.”—1 CORÍNTIOS 2:10.

 1. Otyilinga patyi tyospilitu sandu tyapopiwa unene na Paulu mu 1 Coríntios 2:10? Otyo tyikatula omapulo patyi?

ONTHUE tupandula unene mokonda yetyi ospilitu sandu ya Jeova ikahi nokulinga! Ovihonekwa vipopia okuti ospilitu omukuatesiko, notyiawa, nokuava oumbangi, nokutuitilako. (João 14:16; Atos 2:38; Romanos 8:16, 26, 27) Apostolu Paulu watoneka okupopia otyilinga otyikuavo tyakolela, ospilitu sandu ilinga, etyi ati: “Ospilitu yovolola ovipuka aviho, alo umwe ovipuka viokuaya kohi via Huku.” (1 Coríntios 2:10) Tyotyili, Jeova uundapesa ospilitu sandu opo ahololole otyili tyaya kohi. Inkha hambatelo oyo, okuti ñgeno tuanoñgonoka ehando lia Jeova? (Tanga 1 Coríntios 2:9-12.) Anthi, otyo tyikatula omapulo amwe: Oñgeni ‘ospilitu yovolola ovipuka viokuaya kohi via Huku’? Pomuvo wo Vakristau votete Jeova waholololele ovipuka ovio menyina lia valie? Oñgeni ospilitu yovolola ovipuka ovio viokuaya kohi hono, iya ovalie yaundapesa?

 2. Omononkhalelo patyi onombali ospilitu yundapa?

² Jesus walekesa ononkhalelo onombali ospilitu yundapa. Etyi kuakamba katutu opo aipawe, oe apopila ono apostolu mbae okuti: “Omukuatesiko, ospilitu sandu, Tate matumikisa menyina liange, maimulongesa ovipuka aviho, nokumuhinangelesa ovipuka aviho nemulongesa.” (João 14:26) Ngotyo, ospilitu sandu yundapa ngomulongesi nomuhinangelesi. Ngomulongesi, maivatela Ovakristau okunoñgonoka ovipuka ankho vahanoñgonokele. Ngomuhinangelesi, maivevatela okuhinangela ovipuka vihole okuhangununwa, nokuendelamo nawa.

Pomuvo wo Vakristau Votete

 3. Onondaka patyi mba Jesus mbulekesa okuti “ovipuka viokuaya kohi via Huku” mavikaholololwa katutu-katutu?

³ Jesus walongesile ovalongwa vae ovipuka ovinyingi ankho ovipe kuvo. Anthi, nkhele ankho kuna ovipuka ovinyingi vena okunoñgonoka. Jesus wapopila ono apostolu okuti: “Ame ndyina ovipuka ovinyingi pala okumupopila, mahi pahe kamutyivili okuvinoñgonoka. Anthi, tyina ospilitu yotyotyili yameya, maimuhongolela kotyili atyiho.” (João 16:12, 13) Ngotyo, Jesus walekesa okuti ovipuka viokuaya kohi viopaspilitu, mavikaholololwa katutu-katutu menyina liospilitu sandu.

 4. Monthiki yo Pendekoste yo 33 P.K., oñgeni ospilitu sandu yaundapele ngomulongesi nomuhinangelesi?

⁴ “Ospilitu yotyili” yehika monthiki yo Pendekoste yo 33 P.K., etyi yauyulilwa ko Vakristau 120 ankho veliongiya mo Jelusalei. Ovanthu vamona, nokueiva elekeso liayo. (Atos 1:4, 5, 15; 2:1-4) Ovalongwa avapopi momalaka omanyingi, “konthele yovilinga ovinene via Huku.” (Atos 2:5-11) Ankho pahe omuwo wokuholololelua otyipuka tyimwe otyipe. Omuuli Joele wapopile konthele yokuuyulwa kuospilitu sandu. (Joel 2:28-32) Ovanthu ankho vekahipo vamuene etyi onondaka ombo mbafuisuapo monkhalelo ankho vahakevelela. Iya apostolu Petulu apiti komutwe okutyihangununa. (Tanga Atos 2:14-18.) Ngotyo, ospilitu sandu yaundapele ngomulongesi mokuavatela Petulu okunoñgonoka okuti etyi ovalongwa vamona, ankho eulo olio liokohale likahi nokufuisuapo. Tupu, ospilitu yaundapele ngomuhinangelesi, mokonda Petulu kapopile vala onondaka mba Joele, mahi tupu wapopile ono Salmu onombali mba David. (Salmo 16:8-11; 110:1; Atos 2:25-28, 34, 35) Ovipuka ovio aviho vana veliongiya vamuene nokueiva, ankho ovipuka viokuaya kohi via Huku.

5, 6. (a) Konyima yo Pendekoste yo 33 P.K., omapulo patyi akolela konthele yomphango omphe ankho esukisa okukumbululwa? (b) Ovalie vaundapeswa pala okulinga omapulo oo, iya oñgeni valingile omatokolo?

⁵ Ovakristau votete ankho vesukisa okuyandyululilwa ovipuka ovinyingi. Mongeleka, ankho pena omapulo konthele yomphango omphe yafuiswapo monthiki yo Pendekoste. Okuti ankho omphango omphe o pala vala ova Judeu no vokuetavela efendelo lio va Judeu? Okuti Onosendiyu tupu ankho vapondola okutavelwa okunyingila momphango oyo nokulembulwa nospilitu sandu? (Atos 10:45) Okuti ovalume Onosendiyu ankho mavesukisa okupita ekuendye nokutavela Ovitumino viapelwe Moisesi? (Atos 15:1, 5) Oo, ankho omapulo akolela unene. Ankho tyesukisa ospilitu ya Jeova pala okuovolola ovipuka ovio viokuaya kohi. Ngotyo, ankho mayundapesa valie?

⁶ Yaundapesile ovakuatate vokuaholovonwa, valingile kese limwe pomapulo oo ankho esukisa okukumbululwa. Petulu, na Paulu, na Mbarnabe ankho vali peliongiyo olio lio nonkhalamutwe mbo Vakristau kohale, iya avapopi oñgeni Jeova ekahi nokutavela Onosendiyu vahapitile ekuendye. (Atos 15:7-12) Etyi ononkhalamutwe vamana okuovolola etyi tyapopia Ovihonekwa vio Hebreu konthele yotyo nombatelo yospilitu sandu, avalingi etokolo. Iya avahonekela omawaneno omikanda pala okuvepopila etokolo olio.—Tanga Atos 15:25-30; 16:4, 5; Efésios 3:5, 6.

 7. Ovalie vaundapeswa pala okuhololola otyili tyokuaya kohi?

⁷ Ovipuka ovikuavo ovinyingi viayandyululwa nomikanda João, na Petulu, na Tiagu, na Paulu, vatumwa okuhoneka. Mahi, etyi Ovihonekwa vio Vakristau viapwa okuhonekwa, oviavelwa viokuula nokuhololola enoñgonoko kehuviso, navio viapwa. (1 Coríntios 13:8) Okuti ospilitu maitualako okuundapa ngatyina omulongesi nomuhinangelesi? Okuti maitualako okuvatela Ovakristau okuovolola ovipuka viokuaya kohi via Huku? Omaulo alekesa okuti maitualako.

Mokueenda Kuomuwo Wahulililako

8, 9. Ovalie ankho “mavakaliaima” nenoñgonoko liopaspilitu mokueenda kuomuvo wonthyulilo?

⁸ Oandyu imwe yapopia konthele yomuvo wonthyulilo okuti: “Vokuna enoñgonoko mavakaliaima ngetyi eulu liliaima. Iya vana vatuala ovanthu ovanyingi kouviuki, mavakaliaima ngononthugululu omuvo wahapu apeho . . . Iya enoñgonoko lio tyotyili malikakala enyingi.” (Daniel 12:3, 4) Ovalie ankho mavakakala nenoñgonoko, iya ankho ovalie mavakaliaima? Jesus waava enyingilikilo mongeleka yae yotiliku nevu. Oe wapopia konthele “yonthyulilo youye” uno okuti: “Kononthiki ombo, ovaviuki mavakaliaima ngekumbi, mouhamba wa Tate yavo.” (Mateus 13:39, 43) Mehangununo liae, Jesus walekesa okuti “ovaviuki” Ovakristau ovalembulwa, “ovana vouhamba.”—Mateus 13:38.

⁹ Okuti Ovakristau ovalembulwa ankho aveho ‘mavakaliaima’? Monkhalelo imwe aveho mavaliaima, mokonda Ovakristau aveho mavaundapa movilinga viokuivisa, nokulinga ovalongwa, nokulipameka kese umwe na mukuavo momaliongiyo. Ovalembulwa, ovo vena okuava ongeleka konthele oyo. (Zacarias 8:23) Anthi, okuyawisa kuotyo, ovipuka viokuaya kohi, ankho vikaholololwa vala mokueenda kuomuvo wonthyulilo. Eulo Daniele ahoneka ankho ‘liapatwa’ alo komuvo wonthyulilo. Oñgeni ospilitu ankho maikaovolola ovipuka ovio viaya kohi, iya ovalie mayundapesa?

10. (a) Ovalie hono ospilitu yundapesa pala okuhololola otyili tyaya kohi? (b) Hangununa oñgeni otyili konthele yondyuo ononene yopaspilitu ya Jeova tyayandyululwa.

¹⁰ Etyi omuvo wehikapo pala okuyandyulula ovipuka viopaspilitu mononthiki mbetu, ospilitu sandu yavatela ononkhalamutwe ovakalelipo “vomupika wekolelo nokualunguka,” kombala yo Nombangi mba Jeova ouye auho, okunoñgonoka otyili tyokuaya kohi ankho nkhele vahanoñgonokele. (Mateus 24:45; 1 Coríntios 2:13) Ononkhalamutwe mbo Nombangi mba Jeova aveho kumwe, avelipakelamo konthele yovipuka ovio vanoñgonoka. (Atos 15:6) Iya atyiho vanoñgonoka nawa, vetyihoneka opo aveho vapoleko esilivilo. (Mateus 10:27) Mokueenda kuomuvo, ankho kuna ovipuka ovikuavo viesukisa okuyandyululwa nawa. Iya navio vikahi nokuhangununwa nawa. Tala okakasa kati, “Oñgeni Ospilitu Yahololola Oityi Ondyuo ya Huku Yopaspilitu.”

Pola Ouwa Kotyilinga Tyospilitu Hono

11. Oityi Ovakristau aveho hono valinga opo vapole ouwa kotyilinga tyospilitu sandu tyokuhololola ovipuka viokuaya kohi via Huku?

¹¹ Ovakristau aveho vekolelo vapola ouwa kotyilinga tyospilitu sandu tyokuhololola ovipuka viokuaya kohi via Huku. Ngetyi ankho tyilinga Ovakristau votete, nonthue hono tulilongesa iya konyima atuhinangela nokuendela monondonga ospilitu sandu itukuatesako okunoñgonoka. (Lucas 12:11, 12) Katyisukisa okulongeswa unene monosikola opo tunoñgonoke otyili tyaya kohi tyikahi nokuivisa nomikanda viomupika. (Atos 4:13) Oñgeni matutualako okuyawisa enoñgonoko lietu konthele yovipuka viokuaya kohi via Huku? Tala onondonga mbumwe.

12. Onalupi tuesukisa okuita ospilitu sandu?

¹² Likuambela okuita ospilitu sandu. Tyina tuhimbika okulilongesa kese tyimwe Movihonekwa, tete tuesukisa okuita melikuambelo ospilitu sandu opo ituhongolele. Tuesukisa okutyilinga alo umwe tyina tukahi atuike ine tuna omuvo uhehi. Omalikuambelo atyo oo alingwa nomutima weliola, tyotyili maahambuikiswa omutima wa Tate yetu keulu. Ngetyi Jesus etyilekesa, Jeova metuavela ospilitu sandu yae otyali, inkha tumuita nomutima auho.—Lucas 11:13.

13, 14. Oñgeni okulipongiya pala omaliongiyo tyakolela opo tunoñgonoke ovipuka viokuaya kohi via Huku?

¹³ Lipongiya pala omaliongiyo. Onthue tutambula ‘okulia momuvo wanakua’ menyina lionthumbo yomupika. “Omupika” ufuisapo otyilinga tyae, mokuava omikanda viapolwa Movihonekwa no mokuonganeka ono programa mbokulilongesa no mbomaliongiyo. Moluotyo, tyina aita ‘ovakuatate mouye auho” opo velilongese konthele yotyipuka tyimwe, una omahunga asokwa nawa. (1 Pedro 2:17; Colossenses 4:16; Judas 3) Ngotyo, tuundapela kumwe nospilitu sandu, tyina tulinga ononkhono mbokulandula onondonga tupewa.—Revelação 2:29.

¹⁴ Tyina tulipongiya pala omaliongiyo Ovakristau, otyiwa tutange Onotestu onondaka mbatyo mbahahonekeluemo, nokusoka oñgeni kese imwe yelikuata nonthele tulilongesa. Okulinga ngotyo, matyiyawisa katutu-katutu enoñgonoko lietu lio Mbimbiliya. (Atos 17:11, 12) Okutanga onotestu ombo matumbupake momutima iya ospilitu sandu ipondola okutukuatesako okumbuhinangela. Tupu, okutanga onotestu Mombimbiliya, matyituvatela okumbukoneka nokumbuvasa tyina tuamasuku nambo komutwe.

15. Oityi tuesukisila okutualako okutanga omikanda aviho omipe? Oñgeni tupondola okutyilinga?

¹⁵ Tualako okutanga omikanda aviho omipe. Omikanda vimwe katulilongesa vio momaliongiyo etu, mahi viapongiyua pala ouwa wetu. Alo umwe omikanda vietu vilingwa pala okuavela ounyingi, navio viapongiyua opo vituvatele. Mouye uno wokuepuiya, ovikando ovinyingi pamwe tukala nokukevelela otyipuka tyimwe ine omunthu. Inkha tutyinda omukanda wetu tuhenetange ine tuhamanene okutanga, tupondola okuutanga tyina tukevelela. Vamwe vetyilinga mokutehelela ovikasete viomikanda vietu tyina vaendela pohi ine ometukutuku. Alo umwe ononthele mbaovololwa nawa, pala ovakuendye novahikuena, ambuho mbuyawisa esuko tuna Nondaka ya Huku.—Habacuque 2:2.

16. Esilivilo patyi tupola kokuhoneka nokuovolola nawa omapulo eya momutima?

¹⁶ Okusokolola nawa. Tyina utanga Ombimbiliya ine omikanda viomupika, ovola omuvo wokusokolola nawa. Putyina utanga oñgeni omalusoke elilandula, tyipondola okukuetela omapulo. Upondola okuhoneka omapulo oo, opo ulilongese vali konthele yao komutwe. Ovikando vimwe, tyina tuovolola otyipuka tyimwe tuhanoñgonokele nawa, opo tuenda vali kohi melilongeso lietu. Enoñgonoko tupolako likala olumono luetu lupondola okutuvatela tyina tuamesuku.—Mateus 13:52.

17. Oprograma patyi una pala elilongeso liove lioulike ine onombunga?

¹⁷ Linga oprograma yelilongeso Liombimbiliya mombunga. Ononkhalamutwe mbo Nombangi mba Jeova vetuavela ondundo atuho yokukala nonthiki kese simano pala elilongeso lioulike ine elilongeso liombunga. Eonganeko lialingwa konthele yo programa yomaliongiyo etu, lituavela omuvo wokulandula onondonga ombo. Oityi mulilongesa Melilongeso Liombimbiliya Mombunga? Vamwe vatanga Ombimbiliya, avaovolola onoversikulu mbukatula omapulo momutima wavo, nokuhoneka omahangununo ehehi Mombimbiliya yavo. Onombunga ononyingi vaovola omuvo wokutala oñgeni mavaundapesa etyi velilongesa. Ononkhalamutwe mbumwe mbombunga vaholovona etyi ombunga yesukisa okulilongesa ine onthele ipopia konthele yomapulo alingwa no vombunga. Mokueenda kuomuvo ove upondola okusoka ononthele ononkhuavo mamulilongesa.a

18. Omokonda yatyi tuhesukisa okulityilikila okulilongesa otyili tyokuaya kohi tyo Ndaka ya Huku?

¹⁸ Jesus wapopile okuti ospilitu maikaundapa ngomukuatesiko. Moluotyo, tuhelityilikei okulilongesa otyili tyaya kohi tyo Ndaka ya Huku. Otyili tyatyo otyo, onthele yakolela ‘yenoñgonoko lia Huku,’ iya onthue tukahi nokukongwa opo tutyovolole. (Tanga Provérbios 2:1-5.) Otyili otyo, tyihololola unene “ovipuka Huku ekahi nokupongiya pala vana vemuhole.” Putyina tulinga ononkhono mbokulilongesa vali konthele Yondaka ya Jeova, ospilitu sandu maitukuatesako, mokonda “ospilitu yovolola ovipuka aviho, alo umwe ovipuka viokuaya kohi via Huku.”—1 Coríntios 2:9, 10.

[Onondaka Poutoi]

Oñgeni Ove Mokumbulula?

• Omononkhalelo patyi onombali ospilitu ituvatela okuovolola “ovipuka viokuaya kohi via Huku”?

• Ovalie ospilitu sandu yaundapesile pala okuhololola otyili tyokuaya kohi Pomuvo wo Vakristau votete?

• Oñgeni ospilitu sandu yundapa pala okuyandyulula ovipuka hono?

• Oityi una okulinga opo upole esilivilo kotyilinga tyospilitu?

[Okakasa Olutalatu pefo 30]

Oñgeni Ospilitu Yahololola Oityi Ondyuo ya Huku Yopaspilitu

Pokati ‘kovipuka viokuaya kohi via Huku’ viaholololwa mokueenda kuomuvo wo Vakristau votete, ekaka liefendelo iya konyima onondyuo mba Huku, ankho mbulekesa otyili tyavilapo tyopaspilitu. Paulu waihana otyili otyo okuti ‘ekaka lio tyotyili, liatungwa na Jeova, ha nomunthu.’ (Hebreus 8:2) Ekaka olio lio tyotyili, ankho ondyuo onene ya Huku yopaspilitu, ondyila yokufuena ku Huku menyina liotyilikutila tya Jesus Kristu notyilinga tyae tyounakwa.

“Ekaka lio tyotyili,” lieyako menima 29 P.K. etyi Jesus ambatisalwa iya Jeova etavela otyilikutila otyo tyafuapo nawa. (Hebreus 10:5-10) Konyima yononkhia mbae nokututiliswa, Jesus wanyingila Mondyuo Ikola Unene ikahi mokati kondyuo ya Huku yopaspilitu, iya akapakula esilivilo liotyilikutila tyae “kolupala lwa Huku mokonda yetu.”—Hebreus 9:11, 12, 24.

Monthele onkhuavo, apostolu Paulu wahoneka konthele Yovakristau ovalembulwa okuti ‘vekahi nokukula, okukala ondyuo ikola pala Jeova.’ (Efésios 2:20-22) Okuti ondyuo oyo ya Huku otyipuka tyike “nekaka lio tyotyili,” lina apopia momukanda wae ahonekela ova Hebreu? Mokueenda kuomanima, ovaumbili va Jeova ankho vasoka okuti otyipuka tyike. Ankho tyimoneka ngoti Ovakristau ovalembulwa vekahi nokupongiyua pano pohi opo vakakale “omamanya” ondyuo ya Jeova keulu.—1 Ped. 2:5.

Mahi, menima 1971, ononkhalamutwe pokati konthumbo yomupika, vahimbika okunoñgonoka okuti ondyuo ya Huku yapopiwa na Paulu mu Efesu, handyuo ko onene yopaspilitu ya Jeova. Inkha Ovakristau ovalembulwa vokuatutiliswa ovo “ekaka lio tyotyili,” tete ñgeno lieyako vala etyi etutilo liavo liahimbika, mokueenda ‘kuomuvo wa Tatekulu.’ (1 Tessalonicenses 4:15-17) Mahi, Paulu wahoneka konthele yekaka liefendelo okuti: “Ekaka liatyo olio, otyilekeso tyomuvo wanakua, uno tukahi pahe.”—Hebreus 9:9.

Mokuaeleka nawa-nawa onotestu ombo no vihonekwa ovikuavo, tyayandyuluka nawa okuti ondyuo yopaspilitu ya Huku hamphangu ikahi nokutungwa, nokuti Ovakristau ovalembulwa ‘hamamanya’ ekahi nokupongiyua pano pohi opo akawanekwe kondyuo oyo. Anthi, Ovakristau ovalembulwa vekahi nokuumbila mepata lio mokati no Mondyuo Ikola yo ondyuo yopaspilitu ya Huku, okulingila Huku kese nthiki “ovilikutila viehiviliko.”—Hebreus 13:15.

[Olutalatu pefo 31]

Oñgeni matuyawisa enoñgonoko lietu konthele “yovipuka viokuaya kohi via Huku”?