Jeova Uyamba Vana Vemuovola

1, 2. (a) Oñgeni ohole nekolelo vielikuata kumwe? (b) Omapulo patyi matulilongesa?

TATE yetu Jeova, ulaa ukuyamba ovaumbili vae ovakuatyili. Oyo onkhalelo imwe Jeova alekesa okuti utuhole, iya onthue tumuhole “mokonda oe walekesa tete okuti utuhole.” (1 João 4:19) Tyina ohole tuna na Jeova iliyawisa, ekolelo lietu mwe lipama vali iya otyo tyitulunda okuimbuka okuti Jeova uyamba vana vemuhole.​—Tanga Hebreus 11:6.

² Jeova omuyambi! Otyo otyituwa tyimwe tyakolela tyilekesa olie Jeova iya oityi ahanda okulinga. Ngotyo ekolelo lietu mu Huku lipama vali mokonda tuna onthumbi yokuti Jeova uyamba vana vemuovola nomutima auho. Omokonda yatyi? Mokonda “ekolelo onthumbi yotyotyili yovipuka vikevelelwa.” (Hebreus 11:1) Ekolelo tyihangununa okukala nonthumbi yotyotyili yokuti Huku makayamba ovanthu vae ovakuatyili. Okuti okukevelela ononkhano onongwa tyituetela ouwa? Oñgeni Jeova ayambele ovanthu vae kohale no mo nonthiki mbetu? Tutalei.

 3. Omulao patyi tutanga mu Malaquias 3:10?

³ Jeova Huku ulaa okuyamba ovaumbili vae vekolelo. Utupopila tumuumbile nomutima auho nokukala nonthumbi yokuti metuyambe. Jeova wati: “Mbambavo lolei ame.” Apopi vali okuti: “Talei inkha himaikula onombundi mbo keulu iya tyili-tyili himemuuyulila ononkhano onongwa alo muhakala vali nesuko.” (Malaquias 3:10) Onthue tulekesa okuti tumupandula tyina tutavela etyi etupopila.

 4. Omokonda yatyi tupondola okuyumba onthumbi mo nondaka mba Jesus mbukahi mu Mateus 6:33?

⁴ Jesus walaele ovalongwa vae okuti inkha vapaka tete momuenyo wavo Ouhamba, Huku mevekuatesako. (Tanga Mateus 6:33.) Jesus ankho upondola okupopia ngotyo mokonda utyii nawa okuti Huku apeho ufuisapo omilao viae. (Isaías 55:11) Nonthue tupondola okukala nonthumbi yokuti inkha tukala nekolelo mu Jeova, nae mafuisipo omulao wae wokuati: “Himekuyeke nalumwe, himekusipo nalumwe.” (Hebreus 13:5) Omulao oo wa Jeova utukuatesako okuyumba onthumbi mo nondaka mba Jesus mbukahi mu Mateus 6:33.

 5. Omokonda yatyi ekumbululo Jesus avela Petulu litupameka?

⁵ Otyikando tyimwe apostolu Petulu wapula Jesus okuti: “Onthue tuasapo ovipuka aviho atukulandula. Oityi matukapewa?” (Mateus 19:27) Jesus kaviyulile Petulu mokonda yepulo olio emulinga. Mahi, Jesus atolela ovalongwa vae okuti mavayambwa mokonda yononkhono valinga. Ovalongwa novanthu ovakuavo vekolelo, komutwe wandyila mavakatumina na Jesus keulu. Mahi Jesus wapopia vali okuti pehepano vayambwa etyi ati: “Kese munthu wasapo onondyuo, ine ovakuatate, ine onomphange, ine ohe, ine oina, ine ovana, ine onohika, mokonda yenyina liange, makatambula vali unene tyipona evi asapo, nokukapiñgana omuenyo uhapu.” (Mateus 19:29) Ovalanduli aveho va Jesus hono vavasa ovohe, no voina, novakuatate, no nomphange novana mewaneno. Otyo tyakolela vali tyipona ovipuka aviho tuasapo mokonda Youhamba wa Huku.

 6. Omokonda yatyi Jeova alaela okuyamba ovaumbili vae?

⁶ Pehepano Jeova ukahi nokutuyamba mahi komutwe wandyila meketuyamba vali unene. (1 Timóteo 4:8) Jeova walaa okuyamba ovaumbili vae vekolelo, iya okunoñgonoka otyipuka otyo tyitukuatesako okukoleleya mononkhumbi. Mokonda tuna onthumbi yokuti Jeova tyotyili “uyamba vana vemuovola,” onthue tutualako nekolelo.​—Hebreus 11:6.

 7. Oñgeni ekevelelo lielekwa nomphandyi?

⁷ Melongomona liae lio Komphunda, Jesus wati: “Hambukwei amulombauka nehambu, mokonda ondyambi yenyi keulu onene.” (Mateus 5:12) Vamwe povaumbili va Huku mavayambwa opo vakakale keulu. Mahi vakuavo mavayambwa no muenyo uhapu pano pohi. Otyo otyipuka tyimwe “tyieta ehambu.” (Salmo 37:11; Lucas 18:30) Mahi onthue atuho, ekevelelo lietu lipondola okukala “ngomphandyi yapama yomuenyo.” (Hebreus 6:17-20) Ngetyi omphandyi iyaka omuti putyina kuna ovipepe, nekevelelo lietu lipondola okutukuatesako okutualako tyapama. Otyo tyipondola okutuavela ononkhono mbokukoleleya momuvo uno wokuepuiya.

 8. Oñgeni ekevelelo litukuatesako okutepulula otyiho?

⁸ Ekevelelo lietu lipondola okutukuatesako okutepulula otyiho. Ngetyi omulela ulaimisa olutu, omilao via Huku vipondola okutupola otyiho. Tyitupameka okunoñgonoka okuti Jeova utukuatesako tyina tuna otyiho. (Salmo 55:22) Onthue tuna onthumbi yokuti Huku upondola “okulinga etyi tyavilapo vali unene tyipona ovipuka aviho tuita ine tusoka.” (Efésios 3:20) Jeova utukuatesako monkhalelo “imwe yapona puetyi tusoka”!

 9. Oñgeni tupondola okukala nonthumbi yokuti Jeova metuyambe?

⁹ Opo tuavelwe onokhano onongwa, tuesukisa okukala nekolelo mu Jeova nokutavela ehongolelo liae. Moisesi wapopilile ova Isilayeli okuti: “Jeova tyotyili mekuavela ononkhano onongwa motyilongo Jeova Huku yenyi emuavela epingo, opo mutyipiñgane. Mahi una okutavela ondaka ya Jeova Huku yove nokutavela ovitumino aviho ndyikuavela hono. Jeova Huku yove mekuyambe ngetyi ekulaa.” (Deuteronômio 15:4-6) Okuti una onthumbi yokuti Jeova metuyambe inkha utualako okumuumbila nekolelo? Una omahunga omawa opo ukale nonthumbi oyo.

10, 11. Oñgeni Jeova ayamba Jose?

¹⁰ Ombimbiliya yahonekwa pala okutukuatesako. Tuvasamo onongeleka ononyingi mbulekesa oñgeni Huku ayambele ovaumbili vae vokohale. (Romanos 15:4) Ongeleka ya Jose yetyilekesa nawa. Tete, ovakulu vae vemuladesile akakale omupika. Konyima, omukai womuhona yae emutendeleya apakwa mokaleya mo Egitu. Etyi Jose eli mokaleya, okuti Jeova wemuyekelepo? Au! Ombimbiliya ipopia okuti: “Jeova watuaileko okukala na Jose iya emulekesa oukuatyili noluembia lwae.” “Jeova ankho ukahi na Jose iya emukuatesako movipuka aviho alinga.” (Gênesis 39:21, 23) Namphila ankho ekahi momuvo wovitateka, Jose wakevelele noumphwa-lundo mu Huku yae.

¹¹ Etyi kualamba omanima amwe, Farao apolo Jose mokaleya, mokonda ankho weliola omutima iya akala omutumini wavali mo Egitu. (Gênesis 41:1, 37-43) Etyi Jose nomukai wae vakala novana, “Jose aluku omona wotete okuti Manases, iya apopi okuti: ‘Huku wandimbuisako ovitateka viange aviho neumbo lia Tate.’ Omona wavali emuluku okuti Efraim apopi okuti, ‘Huku wampha olutyito kotyilongo tyo nonkhumbi.’” (Gênesis 41:51, 52) Jeova wayambele oukuatyili wa Jose, iya wakuatesileko ova Isilayeli aveho nova Egitu etyi valambela momanima ondyala. Iya Jose ankho utyii okuti ukahi nokuyambwa na Jeova.​—Gênesis 45:5-9.

12. Oityi tyakuatesileko Jesus okutualako okukoleleya etyi ekahi movitateka?

¹² Jesus Kristu nae watuaileko okutavela ku Huku namphila ankho ekahi movitateka ovinyingi, iya Jeova emuyambe. Oityi tyakuatesileko Jesus okukoleleya? Ondaka ya Huku yati: “Mokonda yehambu ankho apakelwa, wakoleleya omuti wononkhumbi, ahasuku nohonyi.” (Hebreus 12:2) Jesus ankho una ehambu liokunkhimaneka enyina lia Huku. Jesus wayambelue na Tate yae apewa ovilinga ovinyingi. Ombimbiliya ipopia okuti “wapumphama kokulio kuotyipundi tya Huku tyoutumini.” Tupu tutangamo okuti: “Huku wemunkhimaneka, emuavela enyina liankhimana komanyina atyo aeho.”​—Filipenses 2:9.

13, 14. Oñgeni Jeova atala ovipuka tumulingila?

¹³ Tuna okukala nonthumbi yokuti Jeova upanda ononkhono tulinga opo tumufende. Utyii okuti ovipuka vimwe katuvivili ine pamwe tulitehelela okuti tutupu ounongo wokufuisapo etyi tuhanda okulinga. Ututekula tyina tuna otyiho konthele yovilinga ine ombunga yetu. Tupu utyii okuti tyina tuvela ine tuasoya katutyivili okulinga atyiho ankho tulinga kohale. Onthue tupondola kukala nonthumbi yokuti Jeova upanda ekolelo lietu namphila tuna ovitateka.​—Tanga Hebreus 6:10, 11

¹⁴ Hinangela okuti Jeova “Omuteheleli wo malikuambelo.” Tupondola okukala nonthumbi yokuti tyina tulikuambela kwe, ututehelela. (Salmo 65:2) “Tate yetu wokankhenda tupu o Huku upanda aveho,” metuavela ovipuka aviho tuesukisa opo tufuene kwe. Pamwe undapesa ovakuatate vetu nonomphange opo vetukuateseko. (2 Coríntios 1:3) Jeova uhambukwa tyina tukala nokankhenda navakuetu. “Una wokuna okankhenda no vokuahepa, ukahi nokuundika Jeova, iya Oe mekemuavela ondyambi yae.” (Provérbios 19:17; Mateus 6:3, 4) Tyina tuna otyali nokukuatesako ovakuatate vetu, Jeova utyitala ngatyina tukahi nokumulevalesa. Iya oe walaa okuti metuyambe mokonda yotyali otyo.

15. Ondyambi patyi ukevelela okupewa? (Tala olutalatu pefo pahimbikila onthele.)

¹⁵ Ovakristau Ovalembulwa vena ekevelelo lio kukapakwa “ekolowa liouviuki,” na Jesus. (2 Timóteo 4:7, 8) Mahi, otyo katyilekesa okuti kuapandelwe na Huku inkha utupu ekevelelo olio. “Onongi ononkhuavo” ononyingi mba Jesus, vakevelela okukapewa ondyambi yomuenyo uhapu pano pohi. Ovo “mavakapiñgana ohi, iya avakakala nombembwa onene.”​—João 10:16; Salmo 37:11.

16. Omokonda yatyi onondaka tuvasa mu 1 João 3:19, 20 mbutupameka?

¹⁶ Pamwe tulitehelela okuti katukahi nokulinga unene pala Jeova, ine tupondola okulipula inkha Jeova uhambukilwa etyi tukahi nokulinga. Tupondola okulitehelela okuti katuafuilepo opo tutambule onokhano onongwa. Mahi katupondola okulimbuako okuti “Huku omunene vali tyipona omitima vietu iya wii ovipuka aviho.” (Tanga 1 João 3:19, 20.) Tyina tuumbila Jeova mokonda yekolelo nohole tuna nae, tupondola okukala nonthumbi yokuti metuyambe, namphila hamwe tusoka okuti katukahi nokulinga unene.​—Marcos 12:41-44.

17. Ononkhano patyi onongwa tuna pehepano?

¹⁷ Namphila tuli mononthiki mbuno mbonthyulilo mbouye wa Satanasi, Jeova ukahi nokuyamba ovanthu vae. Jeova ulinga atyiho opo tukala nenoñgonoko enyingi nokukala nehambu liokulinga onthele yovakuatate vetu mouye auho. (Isaías 54:13) Ngetyi Jesus alaa, Jeova utuyamba pehepano nombunga imwe ina oluembia yovakuatate no nomphange mouye auho. (Marcos 10:29, 30) Tupu, vana vaovola Huku vena ombembwa, nehambu.​—Filipenses 4:4-7.

18, 19. Oñgeni ovaumbili vamwe va Jeova velitehelela mokonda yononkhano onongwa vapewa?

¹⁸ Ovaumbili va Jeova mouye auho vaimbuka okuti Tate yetu ukahi nokuveyamba. Mongeleka, Bianca ukala ko Alemanya wati: “Jeova apeho ukahi ponthele yange opo ankhuateseko kese nthiki tyina ndyina otyiho. Ovanthu vekahi mouye kavetyii. Mahi putyina oupanga wange na Jeova upama vali, tupu ndyilitehelela okuti ukahi nokundyamena. Ongatyina anthyinda pekolo. Ononkhano onongwa andyavela mbapona pononkhono ndyilinga pala okumuumbila.”

¹⁹ Ine tutalei ongeleka ya Paula ukala ko Canada una omanima 70, una ovitateka viekongoko. Wapopia okuti mokonda yovitateka viekongoko ketyivili okuenda, mahi no ngotyo wiivisa. Wapopia vali okuti: “Ame ndyiivisa no telefone tupu ndyiivisa kovanthu veya okunthala. Otyipuka tyimphameka okuhoneka ono testu no nondonga mbumwe ndyivasa momikanda vietu opo ndyitale-talepo. Omukanda wange omu ndyihoneka neuluka okuti ‘Omukanda Wange Womuenyo.’ Tyina ndyisoka komilao via Jeova tyimpha ondundo. Jeova apeho wafuapo opo etukuateseko, tyahatale konkhalelo yetu yomuenyo.” Onkhalelo yove yomuenyo hamwe yelikalela noya Bianca ine noya Paula. No ngotyo, upondola okusoka onkhalelo Jeova ekahi nokukuyamba nokuyamba ovanthu ovakuavo wii. Tyipameka tyina tusoka oñgeni Jeova ekahi nokutuyamba pehepano noñgeni meketuyamba komutwe wandyila!

20. Oityi tupondola okukevela inkha tulinga ononkhono movilinga via Jeova?

²⁰ Uhalimbueko okuti “moyambwa unene” mokonda yomalikuambelo ulinga nomutima auho. Upondola okukala nonthumbi yokuti “tyina wamalingi ehando lia Huku” ove “mokapewa etyi walawa.” (Hebreus 10:35, 36) Ngotyo tutualeiko okupameka ekolelo lietu nokulinga atyiho tuvila movilinga via Jeova. Onthue tuna onthumbi yokuti Jeova metuyambe!​—Tanga Colossenses 3:23, 24.