Ohole Yove Iliyawise!

 1. Ovalie vakuatesileko okuhimbika ewaneno liova Filipu?

ETYI Paulu na Sila na Luka na Timotiu vehika mepunda-umbo lyo Filipu, avavasi ovanthu ovanyingi vahanda okutehelela onondaka onongwa Mbouhamba. Ovakuatate ovo vekuana, avakuatesako okuhimbika ewaneno iya ovakuatate ovape nonomphange avahimbika okuliongiya; tyafuile ankho veliongiyila meumbo liomphange umwe ankho utambula nawa ovaenda utiwa o Lidia. — Ovil. 16:40.

 2. Ovitateka patyi ewaneno olio liakalele navio ponthyimbi?

² Pakala vala katutu, ewaneno olio alihimbika okulambela movitateka. Satanasi ahongiliya ovanthu vokuyele otyili opo vatalameke ovilinga viokuivisa. Paulu na Sila avavetwa iya avapakwa mokaleya. Etyi vatunda mokaleya, avakatalelapo ovakuatate ovape opo vevepameke. Konyima Paulu na Sila na Timotiu avatundu mepunda-umbo, mahi tyafuile vasilepo Luka. Pahe oityi ovakuatate nonomphange ankho mavalingi? Nekuateso liononkhono mba Huku, ovakuatate ovo ovape vatuaileko okumufenda nombili. (Fili. 2:12) Paulu naina ankho una ehunga liokuhambukwa navo!

 3. Ngetyi tyipopia Ova Filipu 1:9-11, oityi Paulu ankho aita momalikuambelo ae?

³ Etyi palamba omanima ehungi pekwi, Paulu ahonekela omukanda ewaneno liova Filipu. Iya tyina utanga omukanda oo, wimbuka liwa okuti Paulu ankho uhole unene ovakuatate vae. Wahoneka okuti: “Ame nemuivaluka unene amuho noluembia olunene ngo olu Kilisitu Sesusi ena.” (Fili. 1:8) Tupu wahoneka okuti ankho uveitila-ko momalikuambelo. Waitile ku Siovaa opo evekuateseko okuyawisa kohole yavo, nokutala kovipuka viesukisa vali, nokuhavelwa onombei, nokuhapundukisa vakuavo, nokutualako okuava ovinyango oviwa. Tyayandyuluka nawa okuti nonthue hono tupondola okulilongesila ovipuka ovinyingi konondaka mba Paulu. Ngotyo, tutangei etyi Paulu ahonekela ewaneno lyo Filipu. (Tanga Ova Filipu 1:9-11.) Konyima atulilongesa nawa etyi evepopila no ñgeni tupondola okuendela monondonga aava.

 4. (a) Ngetyi tyipopia 1 Suau 4:9, 10, oñgeni Siovaa alekesa okuti utuhole? (b) Oñgeni ohole yetu na Huku ina okukala?

⁴ Siovaa walekesa okuti utuhole unene etyi atuma Omona wae opo ankhile ononkhali mbetu. (Tanga 1 Suau 4:9, 10.) Ohole Siovaa ena nonthue itulunda okukala nohole nae. (Loma 5:8) Oñgeni ohole yetu na Huku ina okukala? Sesusi wakumbulula epulo olio etyi apopila omu Faliseu okuti: “Una okukala nohole na Siovaa Huku yove nomutima wove auho, nomuenyo wove auho, nonondunge mbove ambuho.” (Mat. 22:36, 37) Onthue tuna okukala nohole na Siovaa nomutima wetu auho. Iya tuhanda ohole yetu nae itualeko okukula ononthiki mbatyo ambuho. Paulu wapopilile ovakuatate mo Filipu okuti oluembia luavo ankho luna vali okukala olunene. Oityi tupondola okulinga opo tuyawise kohole tuna na Siovaa Huku?

 5. Oñgeni tupondola okuyawisa kohole tuna na Siovaa?

⁵ Opo tukale nohole na Siovaa, tete tuesukisa okumunoñgonoka. Ombimbiliya yati: “Una uhena oluembia, kanoñgonokele Huku, mokonda Huku oluembia.” (1 Suau 4:8) Apositolu Paulu wahangununa okuti ohole yetu na Siovaa iliyawisa tyina tukala nenoñgonoko liaviuka konthele yae atuovola okutala ovipuka ngetyi evitala. (Fili. 1:9) Etyi tuahimbika okulilongesa Ombimbiliya, tuakala nohole na Huku namphila ankho tuhei ovipuka ovinyingi konthele yae. Mahi etyi tuatualako okulilongesa konthele yae, ohole yetu nae aihimbika okuliyawisa. Otyo tupopila okuti okulilongesa Ombimbiliya nokusokolola ku etyi tulilongesa, o vimwe povipuka viakolela vali momuenyo wetu! — Fili. 2:16.

 6. Oityi omukanda wa 1 Suau 4:11, 20, 21 utulongesa konthele yokukala nohole na vakuetu?

⁶ Ohole Huku ena nonthue maitulundu okukala nohole novakuatate vetu. (Tanga 1 Suau 4:11, 20, 21.) Hamwe tupondola okusoka okuti matyitupepukila okukala nohole novakuatate vetu. Omokonda yatyi? Omokonda navo vaumbila Siovaa iya vekahi nokulinga ononkhono mbokuhetekela ovituwa viae. Onthue atuho tuhetekela ongeleka ya Sesusi, waavele omuenyo wae opo etuyovole mokonda yohole ena nonthue. Mahi pamwe tyipondola okupuiya unene okuendela motyitumino tyokukala nohole na vakuetu. Tala etyi tyaendele mewaneno lyo Filipu.

 7. Oityi tulilongesila konondonga Paulu aavelele Ivodia na Sindike?

⁷ Ivodia na Sindike ankho onomphange vena ombili vaundapele kumwe na apositolu Paulu. Mahi konyima tyafuile avahimbika okulitala komulungu. Ivodia na Sindike ankho o vomewaneno lyo Filipu iya momukanda Paulu ahonekela ewaneno olio, evepopila opo “vakale nonkhalelo ike yokusoka.” (Fili. 4:2, 3) Tupu Paulu apopila ewaneno aliho okuti: “Tualeiko okulinga ovipuka aviho tyihañgoñgo nokuhalondovola.” (Fili. 2:14) Tuna onthumbi yokuti elondolo olio kaliakuatesileko vala Ivodia na Sindike, mahi tupu liakuatesileko aveho mewaneno okupameka ohole pokati kavo.

 8. Omokonda yatyi pamwe tyipondola okupuiya okukala nohole novakuatate vetu, iya oñgeni tupondola okufinda otyitateka otyo?

⁸ Pamwe tyitupuiya okukala nohole novakuatate vetu mokonda tulinga ngetyi tyalingile Ivodia na Sindike: okutala vala koviponyo viavo. Ononthiki ambuho atuho tupengesa. Inkha tutala vala koviponyo vya vakuetu, ohole tuna navo maitende. Mongeleka, tupondola okunumanena omukuatate umwe inkha ketukuatesako okukomba Mondyuo Yomaliongiyo. Pahe inkha tuhimbika okusoka unene koviponyo vimwe alingile, matumunumanena vali iya ohole tuna nae ahimbika okutenda. Inkha ongotyo utala omukuatate umwe mewaneno lienyi, otyiwa uhinangele okuti Siovaa weete oviponyo vietu noviponyo vyo vakuatate vetu. Mahi no ngotyo, utuhole tupu uhole unene ovakuatate vetu. Mokonda yotyo, onthue tuesukisa okuhetekela ohole ya Siovaa iya atuovola okutala ovituwa oviwa vyo vakuatate vetu. Tyina tulinga ononkhono mbokukala nohole novakuatate vetu, tulikuata vali okapandi. — Fili. 2:1, 2.

 9. Ovipi vimwe ‘povipuka viesukisa vali’ Paulu ahonekelele ovakuatate mo Filipu?

⁹ Ononkhono mba Huku mbakuatesileko apositolu Paulu okupopila ovakuatate mo Filipu opo ‘vatale ovipuka viesukisa vali.’ Nonthue otyo tuesukisa okulinga. (Fili. 1:10) Movipuka viesukisa vali muakutikinya okusukukisa enyina lya Siovaa, nokufuiswapo kuomilao viae, nombembwa newaneko mewaneno. (Mat. 6:9, 10; Suau 13:35) Inkha tyotyili tuhole umwe Siovaa, matupake ovipuka ovio pomphangu yo tete momuenyo wetu.

10. Oityi tuesukisa okulinga opo tuhavelwe onombei?

¹⁰ Tupu Paulu wapopile okuti katupondola ‘okuvelwa onombei.’ Otyo katyilekesa okuti kamatupengesa vali, mokonda katutyivili okukala tyasukuka ngetyi Siovaa ekahi. Mahi inkha tulinga ononkhono mbokuyawisa kohole yetu, atutale kovipuka viesukisa vali, Siovaa kemetuvele onombei. Iya onkhalelo imwe yokulekesa okuti tuna ohole, oputyina tulinga atyiho tuvila opo tuhapundukise vakuetu.

11. Omokonda yatyi tuesukisa okulityilika okupundukisa vakuetu?

¹¹ Elondolo liokulityilika okupundukisa vakuetu liakolela unene. Oñgeni tupondola okupundukisa vakuetu? Tupondola okutyilinga novitalukiso tuholovona, novikutu tuvala, iya alo umwe ovilinga tulinga. Pamwe etyi tulinga katyapengele komaiho a Siovaa. Mahi inkha omatokolo etu apundukisa vakuetu, otyo otyipuka tuna okutala nawa. Sesusi wapopile okuti hahe vali okukutilwa emanya enene momunyino atuyumbwa melunga, tyipona okupundukisa umwe ponongi mbae! — Mat. 18:6.

12. Oityi tulilongesila ku etyi tyalingile ovalinepi vamwe ovakokoli-ndyila?

¹² Tala oñgeni ovalinepi vamwe ovakokoli-ndyila vaendelele monondonga mba Sesusi. Ankho veli mewaneno muna ovalinepi vambatisalwa pahe. Mokonda yonkhalelo vatekulwa, ovalinepi ovo vokuambatisalwa pahe, ankho vasoka okuti omuumbili wa Siovaa kapondola okutala osinema, alo umwe osinema ihalekesa ovipuka ovivi. Avelitehelela omapita etyi veiva okuti ovalinepi ovakokoli-ndyila ankho vekahi nokutala osinema. Pahe, ovakuatate ovakokoli-ndyila vayekapo okutala osinema, alo onthiki imwe ovalinepi ovo vaimbuka okuti katyapengele okutala osinema ihalekesa ovipuka ovivi. (Heb. 5:14) Mokualinga ngotyo, ovalinepi ovakokoli-ndyila valekesa okuti vehole ovakuatate vavo, ha monondaka vala mahi no muetyi valinga. — Loma 14:19-21; 1 Suau 3:18.

13. Oñgeni tupondola okulingisisa mukuetu onkhali?

¹³ Onkhalelo onkhuavo yokupundukisa vakuetu, okuvelingisisa onkhali. Oñgeni tupondola okutyilinga? Soka ku etyi: Omulongwa umwe wo Mbimbiliya ulinga ononkhono mokueenda kuomanima omanyingi opo elityilike okunwa unene. Pahe atokola umwe okuyekapo okunwa. Apilulula ovituwa viae iya ambatisalwa. Konyima, omukuatate umwe emukongo akalie meumbo liae iya emuavela okunwa. Emupopila okuti: “Ove pahe umuumbili wa Huku iya una ononkhono mbae. Ononkhono ombo, mambukukuatesako okuliyunga. Inkha utyivila okulikondola omutima, kumalambesa-le.” Pahe soka vala etyi tyipondola okumonekapo inkha omukuatate oo utavela!

14. Oñgeni omaliongiyo etukuatesako okuendela monondonga tuvasa mu Ova Filipu 1:10?

¹⁴ Omaliongiyo etukuatesako okueendela monondonga tuvasa mu Ova Filipu 1:10. Tete, ovipuka tulongeswa momaliongiyo vituhinangelesa etyi tyakolela vali ku Siovaa. Vali, tupopilwa oñgeni matuendela monondonga tupewa opo tuhavelwe onombei. Tatu, tulundwa “okukala nohole nokulinga ovilinga oviwa.” (Heb. 10:24, 25) Tyina tupamekwa na vakuetu, ohole yetu na Huku novakuatate vetu iliyawisa. Iya tyina ohole yetu na Siovaa novakuatate vetu yameliyawisa, matulingi atyiho tuvila opo tuhapundukise vakuetu.

15. Oityi tyihangununa okukala “tyeyula ovinyango oviwa”?

¹⁵ Paulu waitilileko ovakuatate vae mo Filipu opo vakale “tyeyula ovinyango oviwa.” (Fili. 1:11) “Ovinyango [ovio] oviwa” viakutikinya okukala nohole na Siovaa novaumbili vae. Tupu ankho vena okupopila vakuavo konthele yekolelo liavo mu Sesusi netyi ankho vakevelela komutwe wandyila. Mu Ova Filipu 2:15 tuvasamo onondaka mbati “okuliaima ngotyimimi mouye.” Onondaka ombo mbupopia otyili mokonda mbutuhinangelesa etyi Sesusi apopilile ovalongwa vae okuti: “Mutyimimi tyouye.” (Mat. 5:14-16) Tupu Sesusi wapopilile ovalanduli vae opo valinge ovalongwa, iya apopi vali okuti mavakala “onombangi . . . alo kononthele mbokokule-kule mbohi.” (Mat. 28:18-20; Ovil. 1:8) Onthue tuava “ovinyango oviwa” tyina tulinga atyiho tuvila motyilinga otyo tyakolela unene.

16. Oñgeni Ova Filipu 1:12-14, ilekesa okuti tupondola okuliaima ngotyimimi alo umwe tyina tulambela movitateka? (Tala olutalatu luo kondye.)

¹⁶ Namphila tuna onkhalelo yomuenyo yelikalaila, mahi atuho tupondola okuliaima ngotyimimi. Pamwe ovipuka vimoneka ngatyina mavitutalameka, naina omphitilo yokuivisa onondaka onongwa. Mongeleka, etyi apositolu Paulu ahonekela omukanda ewaneno lyo Filipu, ankho uli mokaleya mo Loma. Mahi omalienge akutwa nao, kaemutyilikile okuava oumbangi kovayungi vo mokaleya no ku vana ankho veya okumutalelapo. Paulu waivisile nombili momuvo oo wepuiya, iya otyo tyalundile ovakuatate mo Filipu okukola omutima opo ‘vapopie ondaka ya Huku tyihena owoma.’ — Tanga Ova Filipu 1:12-14; 4:22.

17. Popia ongeleka yovakuatate vamwe vaavele ovinyango oviwa namphila tyihapepukile.

¹⁷ Ovakuatate ovanyingi nonomphange vahetekela ongeleka ya Paulu yokukola omutima. Ovakuatate ovo vakala kovilongo oku ovilinga viokuivisa viailikwa, mahi vataindya onomphitilo ononkhuavo mbokuivisa onondaka onongwa. (Mat. 10:16-20) Motyilongo tyimwe omu ovilinga viokuivisa viailikwa, omutalelipo umwe womawaneno waavela ondundo ovaivisi opo vaave oumbangi kombunga yavo, no vomunthele yavo, no kosikola, no kovilinga. Iya mokueenda kuomanima evali, omawaneno aeliyawisa unene mo sirkuitu oyo. Tyipondola hamwe apa ukala ovilinga viokuivisa kaviailikilwe. Mahi no ngotyo, tupondola okulilongesila otyipuka tyakolela kovakuatate ovo: Inkha apeho utaindya onomphitilo mbokuivisa, upondola okukala nonthumbi yokuti Siovaa mekuavela ononkhono wesukisa opo utualeko okuivisa, alo umwe tyina tyihapepukile. — Fili. 2:13.

18. Etokolo patyi tuesukisa okulinga pahetyino?

¹⁸ Ou omuvo wokuendela monondonga Paulu apopile momukanda ahonekelele ewaneno liova Filipu: Tutalei kovipuka viesukisa vali, atuhavelwa onombei, atulityilika okupundukisa vakuetu iya atuave ovinyango oviwa. Inkha tulinga ngotyo, ohole yetu mailiyawisa iya matunkhimaneka Tate yetu woluembia Siovaa.