“Lungukei Opo Pahamoneke Nawike Umukalesa Ovapika”!

 1. Ngetyi tyipopia Ova Kolosu 2:4, 8, oñgeni Satanasi aovola okunyona omalusoke etu?

SATANASI uhanda tuyekepo okuumbila Siovaa. Opo etyivile okutuyapula ku Siovaa, wovola okupilulula onkhalelo yetu yokusoka opo tukale ovapika vae iya atusoko monkhalelo ahanda. Ulinga atyiho opo etuyondye novipuka tuhole vali. — Tanga Ova Kolosu 2:4, 8.

2-3. (a) Omokonda yatyi tuesukisila okutavela elondolo livasiwa mu Ova Kolosu 2:8? (b) Oityi matulilongesa monthele mailandulako?

² Okuti nonthue tupondola okuyapulwa na Satanasi? Enga! Hinangela okuti onondaka mbuvasiwa mu Ova Kolosu 2:8, apositolu Paulu kembuhonekelele ovanthu vahaumbila Huku. Mahi wembuhonekelele Ovakilisitau ovalembulwa. (Kolo. 1:2, 5) Pomuvo opo Ovakuatate ovo ankho veli-ale motyiponga. Iya onthue hono tuli motyiponga otyinene vali. (1 Kol. 10:12) Omokonda yatyi? Omokonda Satanasi watahelua pano pohi iya ukahi nokulinga atyiho opo ayondye ovaumbili ovakuatyili va Huku. (Ehol. 12:9, 12, 17) Tupu, tukahi momuvo ovanthu onondingavivi vekahi ‘nokuvilapo okulinga ovivi.’ — 2 Tim. 3:1, 13.

³ Monthele ei, matulilongesa oñgeni Satanasi aundapesa “omalusoke omatutu” opo anyone onkhalelo yetu yokusoka. Tupu matuimbuka “omaliva” etatu Satanasi aundapesa. (Efe. 6:11.) Iya inkha tuahongiliyua-le nomalusoke a Satanasi? Monthele mailandulako matutale oñgeni tupondola okulipola omalusoke oo. Mahi nkhele tutalei etyi tupondola okulilongesila konkhalelo Satanasi ayondyele ova Isilayeli etyi vanyingila Motyilongo Valaelwe.

4-6. Ngetyi tyipopia Deuteronômio 11:10-15, ononkhalelo patyi mbokulima ova Isilayeli ankho vesukisa okulilongesa etyi vanyingila Motyilongo Valaelwe?

⁴ Satanasi wayondyele ova Isilayeli opo vafende ovilolo. Oñgeni etyilingile? Ankho utyii nawa okuti ova Isilayeli vesukisa okulia. Etyi ova Isilayeli vanyingila Motyilongo Valaelwe, ankho vesukisa okupilulula onkhalelo yavo yokulima. Ko Isitu ova Isilayeli ankho vatapelela ovikuna viavo nomaande o mondongi Nilu. Mahi Motyilongo Valaelwe, ova Isilayeli ankho vetupu vali ondongi onene opo vatapelele ovikuna viavo. Pahe ankho vakevelela vala kombila no keyombo. (Tanga Deuteronômio 11:10-15; Isa. 18:4, 5) Ngotyo, ova Isilayeli ankho vesukisa okulilongesa ononkhalelo ononkhuavo mbokulima. Otyo ankho katyapepukile mokonda ovanyingi vokutyivila okulima, ankho vankhila-le moluhandya.

⁵ Siovaa wapopilile ovanthu vae okuti omuenyo wavo pahe ankho wapiluluka unene. Konyima eveavela elondolo limwe limoneka ngoti kalielikuatele-ale nokulima. Wevepopilile okuti: “Lungukei opo omutima wenyi wahahongiliyue, amuyapuka iya amukafenda ko no huku ononkhuavo, nokuliyongamena kumbo.” (Deut. 11:16, 17) Omokonda yatyi Siovaa alondolele ova Isilayeli konthele yokufenda ovilolo mahi ngwe ankho ukahi nokupopia konthele yokulima?

⁶ Siovaa ankho utyii okuti ova Isilayeli mavahande okulinga oupanga novanthu vafenda ovilolo opo velilongese okulima. Ovanthu ovo, ankho veii nawa oñgeni tyilimwa motyilongo tyina iya ova Isilayeli ankho vapondola okulilongesila ovipuka ovinyingi kuvo. Mahi ankho pena otyiponga! Ova Kanaa ankho vafenda otyikahuku tyimwe tyitiwa o Baale, iya onkhalelo vasoka ankho yelikuata nefendelo liavo. Mongeleka, ankho vetavela okuti eulu o lya Baale. Tupu ankho vetavela okuti o Baale ulokesa ombila. Siovaa ankho kahande ovaumbili vae vayondyue nomatutu oo. Mahi no ngotyo, ovikando ovinyingi, ova Isilayeli vatokolele okufenda Baale. (Núm. 25:3, 5; Juí. 2:13; 1 Reis 18:18) Pahe tala oñgeni Satanasi etyivilile okuyondya ova Isilayeli opo vakale ovapika vae.

 7. Oityi tyalolele oukuatyili wova Isilayeli etyi vanyingila Motyilongo Valaelwe?

⁷ Ova Isilayeli ankho vahanda ombila iloke, iya otyo ankho katyapengele. Mahi Satanasi ngamo akuatelela. Olio eliva lyo tete aundapesa. Motyilongo Valaelwe, okuhimbikila mohanyi ya Abril alo Setembro ombila ankho iloka vala katutu. Opo vamone etyi valia ovanthu ankho vetei kombila ihimbika okuloka mu Outubro. Satanasi watuaile ova Isilayeli kokusoka okuti opo vamone etyi valia, ankho vesukisa okuhetekela ovituwa viovanthu vahaumbila Huku. Ovanthu ovo ankho vasoka okuti vesukisa okulinga oviso vimwe opo ovikahuku viavo vilokese ombila. Iya ova Isilayeli ankho vehena ekolelo mu Siovaa, navo ankho vasoka okuti okulinga oviso ovio, onkhalelo yokueta ombila. Ngotyo, avelipake moviso vinkhimaneka otyikahuku Baale.

 8. Eliva patyi lya vali Satanasi aundapesile? Hangununa.

⁸ Eliva lya vali Satanasi aundapesile, ovinepo viasila. Mefendelo liova Kanaa ankho muakutikinya ovinepo viasila. Tupu ankho valingila ovinepo viasila monondyuo mbavo mbokufendela. Ankho kavayeke vala ovalume ine ovahikuena okulala poyavo, nokulinga ovipuka ovikuavo viasila, mahi tupu ankho vasoka okuti ongotyo ovipuka vina okuenda! (Deut. 23:17, 18; 1 Reis 14:24) Ankho vasoka okuti oviso viavo ankho vininisa eheke. Ova Isilayeli ovanyingi navo avahimbika okulipaka movinepo viasila, iya otyo atyivetuala kokufenda ovilolo. Avakala ovapika va Satanasi.

 9. Ngetyi tyipopia Oséias 2:16, 17, oñgeni Satanasi anyonene onkhalelo ova Isilayeli ankho vatala Siovaa?

⁹ Eliva lya tatu Satanasi aundapesile, okunyona onkhalelo ova Isilayeli ankho vatala Siovaa. Pononthiki mbomuuli Selemiya, Siovaa wapopile okuti ovauli vomatutu ankho vahanda ovanthu valimbwe enyina liae “mokonda ya Baale.” (Jer. 23:27) Tyafuile mokueenda kuomuvo, ovaumbili va Siovaa vayekelepo okuundapesa enyina liae iya avapingiyapo enyina lya Baale. Enyina olio lihangununa okuti “Ohekulu” ine “Omuhona.” Ankho pahe tyipuiya kova Isilayeli okuimbuka oñgeni Siovaa na Baale velikalela. Tupu pahe ankho tyivepepukila okuhonyeka efendelo lya Baale nefendelo lya Siovaa. — Tanga Oséias 2:16, 17 nokatoi.

10. Omaliva patyi Satanasi aundapesa hono?

¹⁰ No hono Satanasi uundapesa omaliva oo. Ukalesa ovanthu ovapika vae mokuvelunda okuundapesa omapita ovipuka viahapengele, nokulipaka movinepo viasila, nokunyona onkhalelo vatala Siovaa. Tete matutale oñgeni Satanasi angwangwanesa ovanthu konthele ya Siovaa.

11. Oñgeni Satanasi anyona onkhalelo ovanthu vatala Siovaa?

¹¹ Satanasi unyona onkhalelo ovanthu vatala Siovaa. Konyima yetyi ono apositolu mba Sesusi mbankhia, vamwe ankho veliti Ovakilisitau avahimbika okulongesa omatutu mewaneno. (Ovil. 20:29, 30; 2 Tes. 2:3) Pahe ovanthu ankho kavetyivili vali okuimbuka Huku yotyotyili. Mongeleka, vapola enyina lya Huku mono Mbimbiliya mbavo iya avapingiya-mo omanyina omunkhima, ngetyi “Tatekulu.” Mokonda yotyo, pahe ankho tyipuiya kovanthu vatanga Ombimbiliya okuimbuka oñgeni Siovaa elikalela novanthu ovakuavo vaihanwa mo Mbimbiliya okuti “tatekulu.” (1 Kol. 8:5) Vaihana Siovaa na Sesusi okuti “Tatekulu.” Otyo tyingwangwanesa ovanthu mokonda tyivepuiya okunoñgonoka okuti Siovaa na Sesusi velikalela iya vena ovilinga vielikalela. (Suau 17:3) Otyo tyatuala ovanthu kokuhinda elongeso liehelikuatele netyi Ondaka ya Huku ipopia: Outatu Ukola. Mokonda yovipuka ovio, ovanthu ovanyingi vasoka okuti katyitavela okunoñgonoka Huku. Iya otyo omatutu! — Ovil. 17:27.

12. Oityi onongeleya mbuhole okuyandyanesa? Iya ngetyi tyipopia Ova Loma 1:28-31, oityi otyo tyihole okueta?

¹² Satanasi ulunda ovanthu okulinga ovinepo viasila. Pononthiki mbova Isilayeli, Satanasi waundapesile efendelo liomatutu opo ayandyanese ovinepo viasila. No hono otyo alinga. Onongeleya mbomatutu mbuyeka ovanthu valinge ovinepo viasila iya mbulunda ovanthu okusoka okuti ovipuka ovio vitupu-ale etyi vilinga. Mokonda yotyo, ovanyingi ankho vapopia okuti vaumbila Huku, vayekapo okutavela ovitumino viae. Momukanda apositolu Paulu ahonekelele ova Loma wapopia ovitateka vihole okutundililako. (Tanga Ova Loma 1:28-31.) ‘Ovipuka vihapondola okulingwa’ ovinepo viasila, okukutikinyamo ovalume ine ovahikuena valala poyavo. (Loma 1:24-27, 32; Ehol. 2:20) Tyakolela unene onthue tulandule onondonga mbayandyuluka mbo Mbimbiliya!

13. Olipi eliva ekuavo Satanasi aundapesa?

¹³ Satanasi ulunda ovanthu okuundapesa omapita ovipuka viahapengele. Onthue tuesukisa ovilinga opo tulitekule, nokutekula ombunga yetu. Iya opo tuvase ovilinga, tuesukisa okulilongesa ovipuka vimwe viakolela. (1 Tim. 5:8) Ovikando ovinyingi, ovipuka ovio tulilongesa-vyo kosikola. Mahi tuesukisa okulunguka! Movilongo ovinyingi, ovalongwa kavalongeswa vala etyi vesukisa mahi tupu valongeswa omalusoke ovanthu. Ovalongwa valongeswa okuanya okuti kouye kuna Huku, nokuhetavela ku etyi Ombimbiliya ilongesa. Vapopilwa okuti ovanthu vokualunguka kavetavela okuti ovipuka viatungwa na Huku. (Loma 1:21-23) Omalongeso oo, apatana “ounongo wa Huku.” — 1 Kol. 1:19-21; 3:18-20.

14. Oityi ounongo wovanthu uhole okueta?

¹⁴ Ounongo wovanthu kawelikuatele novitumino vya Siovaa. Kaulundu ovanthu okukala novinyango viononkhono mba Huku, mahi uvelunda okulinga “ovilinga violutu.” (Gal. 5:19-23) Ulunda vala ovanthu okukala nelungavi nokusuka vala navo muene. Iya mokonda yotyo, “ovanthu velihole ovo muene.” (2 Tim. 3:2-4) Ovituwa ovio, vielikalela unene novituwa Siovaa ahandela ovaumbili vae, ngetyi oundalawa, nokuliola omutima. (2 Sam. 22:28) Ovakuatate vamwe vaile kosikola onene, vahimbika okusoka ngovanthu vo mouye, avayekepo okusoka nga Huku. Tala ongeleka imwe ilekesa ovitateka vipondola okutundililako.

15-16. Oityi welilongesila kongeleka yomphange wapopiwa mo no palagrafu ombu?

¹⁵ Omphange umwe ukahi movilinga viomuvo auho omanima alamba po 15, wati: “Ame ankho ndyitanga konthele yoviponga vipondola okutundililako inkha ndyenda mosikola onene. Tupu ovanthu ankho vamphopila konthele yoviponga ovio. Mahi anehesuku. Andyisoko okuti ankho hesukisile onondonga ombo.” Mahi ovitateka patyi avasa? Wati: “Mokonda ankho ndyililongesa unene, pahe ankho ndyitupu vali omuvo wokulikuambela ku Siovaa ngetyi ankho ndyilinga. Tupu ankho ndyitupu vali omuvo wokupopia nomapanga ange konthele yo Mbimbiliya, nokupongiya nawa omaliongiyo. Etyi naimbuka okuti osikola onene ankho ikahi nokunyona oupanga wange na Siovaa, andyiiyeke-po.”

¹⁶ Oñgeni okuenda mosikola onene tyakalesa onkhalelo ankho atala vakuavo? Wati: “Ndyina ohonyi yokupopia okuti ovipuka nalongeswa kosikola onene, vianthyongilinya vala okutala koviponyo vya vakuetu, haunene ovakuatate vange no nomphange. Ankho ndyikevelela vaviukise atyiho iya oupanga pokati ketu autepuluka. Tyesukisile omuvo omuyungi opo ndyiyekepo okusoka monkhalelo oyo. Ovipuka ovio viaendele momuenyo wange, viandongesa okuti okuhetavela onondonga Tate yetu wokeulu etuavela pokati keongano liae, tyituetela vala ovitateka. Siovaa undyi vali nawa tyipona ame muene. Ñgeno ankho nemutavelele vala!”

17. (a) Oityi tuna okutokola okulinga? (b) Oityi matulilongesa monthele mailandulako?

¹⁷ Tuhayekei “ondongeso nomalusoke omatutu” ouye wa Satanasi etuhongiliye. Tualako tyalunguka opo ehekunyone. (1 Cor. 3:18; 2 Cor. 2:11) Uhayeke Satanasi anyone onkhalelo utala Siovaa. Endela movitumino vya Siovaa. Uhayeke Satanasi ekuhongiliye okuhetavela onondonga mba Siovaa. Mahi oityi upondola okulinga inkha waimbuka okuti wahongiliyua-le nomalusoke a Satanasi? Onthele mailandulako mailekesa oñgeni Ombimbiliya ipondola okutukuatesako okulipola omalusoke, novituwa viaika unene momutima wetu. — 2 Kol. 10:4, 5.