Oñgeni Upondola Okukala Nehambu Tyina Wakulupa

OÑGENI ulitehelela tyina usoka okuti mokulupa? Ovanyingi tyivesukalalesa, nokuvekalesa notyiho, alo umwe tyivetilisa owoma. Tyina omunthu akulupa, olutu lulionya-onya, ononkhono mbutepuluka, ukala nomauvela ahaveluka, tupu kasoko vali nawa.

Mahi, ovanthu vakulupa mononkhalelo mbelikalaila. Vamwe vakulupa otyo vena katutu ekongoko. Ovakuavo vakuatesuako novihemba pala okuhakula ine okutepulula omauvela avo. Moluotyo, movilongo vimwe ovanthu vakulupa unene otyo vena ekongoko.

Ngotyo, tyilinge ovanthu vena ovitateka vietwa nokukulupa tyilinge vetupu, mahi ovanyingi vahanda okukulupa otyo vena ehambu. Oñgeni vapondola okukala nehambu olio? Otyo, tyitei oñgeni tutala okukulupa, nomahando etu, nokutavela onkhalelo oyo yomuenyo. Tutalei onondonga mbumwe mbo Mbimbiliya mambutukuatesako konthele yotyo.

LIKONDOLA KOUTUTU: “Ounongo ukahi na vana veliola omutima.” (Provérbios 11:2) Monkhalelo ei, “vokueliola omutima” vapopiwa, o vokuakulupa, vetavela okuti pena ovipuka vehevili vali okulinga. Charles ukala ko Brasil, una omanima 93, wapopia otyili etyi ati: “Inkha ukala nomuenyo omanima omanyingi, mokulupa. Katyitavela okulityilika okukulupa.”

Mahi, okuliola omutima, katyilekesa okuti omunthu una olusoke luapenga luokuti: “Ame nakulupa, hisilivila vali.” Okusoka ngotyo, tyitepulula ehambu liomunthu. Provérbios 24:10 yati: “Inkha usoya monthiki yononkhumbi, ononkhono mbove mambutepuluka.” Mahi omunthu wokueliola omutima una olusoke luaviuka, wovola okulinga atyiho evila.

Corrado ukala ko Italia, una omanima 77, wati: “Tyina wamakulupa, pokulinga ovipuka wesukisa okulipulukwa opo uhasoye.” Tyotyili, tyina omunthu amakulupa, wesukisa okulinga omapiluluko amwe. Corrado nomukai wae, vakala nolusoke luapola pokati pokulinga ovilinga vio meumbo, vaomba-omba-po opo vehepuile unene. Marian ukala ko Brasil, una omanima 81, wati: “Nelilongesa okuundapa katutu-katutu. Ndyiti andyuundapa, andyipululukua-po. Ndyipumphama pohi ine ndyilangala-po otyo ndyitanga ine ndyitehelela otyiimbo. Naimbuka okuti hityivili vali okulinga ovipuka ankho ndyivila okulinga.”

KALA NOLUSOKE LUAPOLA POKATI: “Ovakai vesukisa okuvala ovikutu vikahi nawa no nondunge, nokuapola pokati.” (1 Timóteo 2:9) Onondaka “ovikutu vikahi nawa,” mbulekesa okupola pokati, nokupanda ovipuka vikahi nawa. Barbara ukala ko Canada, una omanima 74, wati: “Ndyivala nawa, nokulikoha. Hihande okuvala omapita mokonda vala yokuakulupa. Hisuku nonkhalelo ndyisoka.” Fern ukala ko Brasil, una omanima 91, wati: “Pamwe ndyilanda ovikutu ovipe, opo ndyilitehelele nawa.” Iya onombuale? Antônio ukala ko Brasil, una omanima 73, wati: “Ndyilinga ononkhono mbokuvala nawa, nokuvala ovikutu vikahi nawa opo tyina ovanthu vanthala vatie nkhele nalunguka. Konthele younthate, Antônio wati: “Ndyilikoha, nokulikulula onondyeli ononthiki ambuho.”

Tupu, tyakolela okulityilika okusukalala unene nolutu luove, alo uyekapo okukala “no nondunge.” Bok-im ukala ko Coreia do Sul, una omanima 69, una olusoke luapola pokati konthele yomuvalo. Wati: “Ame ndyityii nawa okuti hipondola vali okuvala omivalo vimwe ankho ndyivala puetyi ndyimuhikuena.”

KALA NOLUSOKE LUAVIUKA: “Ononthiki ambuho mba una umona ononkhumbi, onombi, mahi womutima una ehambu apeho una otyipito.” (Provérbios 15:15) Putyina ukulupa, upondola okunumana tyina uhinangela ovipuka ovinyingi ankho uvila okulinga puetyi umukuendye, nokuna nonkhono. Okuhinangela ovipuka ovio, katyapengele. Mahi, linga ononkhono opo uhakale nomalusoke oo apenga. Okusoka unene kuetyi ankho ulinga kohale, tyipondola okukusoyesa, ohetyivili vali okulinga etyi nkhele uvila. Joseph, ukala ko Canada una omanima 79, wati: “Ndyiovola okuhambukilwa okulinga etyi ndyivila. Hiliyave mokonda yovipuka ankho ndyivila okulinga pahe nehevili vali.”

Okutanga, nokulilongesa ovipuka ovipe, tupu tyipondola okukukuatesako okukala nolusoke luaviuka. Moluotyo, linga etyi uvila, tala nawa onomphitilo mbokutanga, nokulilongesa ovipuka ovipe. Ernesto ukala ko Filipina, una omanima 74, uhole okuenda mondyuo yokupaka omikanda, aovola omikanda vipopia ovipuka ahanda okunoñgonoka, atange. Ernesto wati: “Nkhele nesukisa okukala nehambu lituka kokutanga omahipululo, novipuka ovikuavo vipita mouye.” Lennart ukala ko Suecia, una omanima 75, alo umwe welipaka motyilinga tyalema tyokulilongesa elaka ekuavo.

KALA OMUKUATYALI: “Kalei ovakuatyali opo nonwe mupewe.” (Lucas 6:38) Kala notyituwa tyokuavela vakuenyi etyi una, nokutomphola navo. Okulinga ngotyo, matyikukalesa nehambu. Omphange utiwa Hosa ukala ko Brasil, una omanima 85, ulinga ononkhono mbokukuatesako vakuavo namphila ehena vali ononkhono. Wati: “Ame ndyikatala omapanga ange vokuavela ine vokuasoya, nokuvehonekela omikanda. Pamwe ndyivetumikisa ovipuka. Tupu, ndyityihole tyokuteleka, ine okulinga oumbolu pala vana vavela.”

Pa upewe. Jan, una omanima 66, ukala ko Suecia, wati: “Tyina ulekesa okuti una oluembia na vakuenyi, navo vakala noluembia nove.” Tyotyili, omunthu omukuatyali upandwa novanthu aveho.

KALA EPANGA LIOVANTHU: “Una uhanda okukala vala aike, wovola omahando ae muene elungavi, nokunyona onondunge ambuho onongwa.” (Provérbios 18:1) Namphila pena omuvo pamwe uhanda okukala vala awike, mahi lityilika okukala awike apeho. Innocent, una omanima 72, ukala ko Nigeria, una omapanga omanyingi. Wati: “Ndyina omapanga omanyingi, ovakulu, novana.” Börje, una omanima 85, ukala ko Suecia, wati: “Ndyilinga ononkhono mbokukala povakuendye. Ovipuka valinga nondyanga, vinkhalesa ngatyina na ame ndyimukuendye.” Ovola okukala epanga liovanthu apeho. Han-sik, una omanima 72, ukala kokumbili kwo Korea, wati: “Ame nomukai wange, tuhole okukonga omapanga, ovakulu novana, opo tulie navo.”

Ovanthu vokuhanda okukala omapanga avakuavo, onondyandyi. Okutomphola, okuti ou apopi-ko, ou apopi-ko. Moluotyo, ove wesukisa okupopia na vakuenyi, nokuvetehelela. Suka na vakuenyi. Helena, una omanima 71, ukala ko Moçambique, wati: “Ndyipanga liovanthu aveho, nokuna onthilo na vakuetu. Tyina vapopia, ame ndyivetehelela, opo ndyinoñgonoke etyi vasoka, netyi vahanda.” José, una omanima 73, ukala ko Brasil, wati: “Ovanthu vahanda tyina vapopia na vakuavo​—ñgeno vatehelelwa nawa. Vahanda ovanthu vena okankhenda navo, nesuko, vevepandula, nokuyola-yola navo.”

Tyina uhanda okupopia etyi usoka, tala nawa opo ‘onondaka mbove mbukale ngatyina mbahingwa nawa omongwa.’ (Colossenses 4:6) Kala noluembia, iya popia onondaka mbupameka vakuenyi.

KALA OMUNTHU WOKUPANDULA: “Kalei ovanthu vokupandula.” (Colossenses 3:15) Tyina ukuateswako, pandula. Okupandula, tyikuatesako ovanthu okukala noupanga omuwa. Marie-Paule, una omanima 74, ukala ko Canada, wati: “Ame nomulume wange, tuailuka mondyuo onene, pahe tukala mondyuo onthutu. Tuna omapanga omanyingi ekahi nokutukuatesako. Katutyivilia-le okuvepandula. Pamwe tuvetumikisa omikanda viokuvepandula, vamwe tuvekonga opo tulie navo.” Jae-won, una omanima 76, ukala ko Coreia do Sul, upandula ovakuatate vemutyinda netuku-tuku pokuenda Kondyuo Yomaliongiyo. Wati: “Ndyipandula unene mokonda vankhuatesako, iya pamwe ndyivepa oumbongo wokukalanda ongasolina. Tupu pamwe ndyivepa oupuka, andyihoneka-ko okuti napandula.”

Haunene, pandula omuenyo una. Ohamba omunongo Salomau, utuhinangelesa okuti: “Hahe vali otyimbwa tyina omuenyo, tyipona onkhulika yankhia.” (Eclesiastes 9:4) Tyotyili, okukala nolusoke luaviuka, nokutavela onkhalelo oyo yomuenyo, tyikuatesako okukala nehambu na tyina wakulupa.