‘Omona Wange mu Tatekulu, Onthyolwe Nayumba Onthumbi’

PTYINA Timoteo aenda metapalo limutuala kokule neumbo liae, omaiho ae apanena nombili kuetyi tyikahi komutwe. Ovo mundyila yae vahongola ondyila putyina valamba momapia Timoteo ei nawa. Epundaumbo lio Listra, liokupumphi kombanda yokamphunda okasupi mevota, katutu-katutu lisala konyima. Iya Timoteo uliyolela tyina asoka ku me yae na ina kulu, vahitikinya ononkhuka mbavo nehambu enene, otyo vemutala putyina ekahi nokuenda. Okuti matale konyima opo evevivile okuvoko, okuvelekela otyikando tyahulilila-ko?

Pahe, apostolu Paulu upiluluka vali atale Timoteo iya ayolo monkhalelo ipameka. Utyii okuti Timoteo nkhele una ohonyi onyingi esukisa okufinda. Mahi ankho Paulu wahambukua okutala ombili yae. Timoteo ankho omukuendye vala, tyafuile ankho una omanima ehungi po 19 ine 20. Mahi ankho una onthilo, nohole na Paulu. Pahe Timoteo ankho ukahi nokulandula omulume oo wekolelo, nokuna ononkhono unene, moungendi maumutuala kokule unene neumbo liavo. Ankho mavaende konomphai, nokuendela mowato. Tupu ankho mavavasi ovitateka ovinyingi mondyila. Timoteo ankho ketyii inkha onthiki imwe makondoka vali keumbo liavo.

Oityi tyalundile omukuendye ngoo okulandula onkhalelo oyo yomuenyo? Mokonda yononkhono ekahi nokulinga ankho watokala ondyambi patyi? Iya oñgeni ekolelo lia Timoteo lipameka ekolelo lietu?

Pahe tukondokei konyima omanima evali ine etatu, iya atusoko oñgeni o Listra epundaumbo lia Timoteo ankho likahi. Ankho epundaumbo etutu likala kokule nomakuavo, mevota liomaande omanyingi. Ovanthu vamo, ankho vei eleka lio Gregu, mahi ankho vapopia vali o Likaonia elaka lio potyilongo. Onthiki imwe, epundaumbo olio liokuati filuu, amuivala okuyuela. Ovakristau vevali onomisionaliu, apostolu Paulu na mundyila yae Barnabe, ankho vehika mo Ikoniu, epundaumbo enene ankho likala popepi. Putyina ankho vaivisa mounyingi, Paulu amono omulume umwe otyilema, ulekesa okuti una ekolelo liotyotyili. Moluotyo, Paulu avelula omulume oo kehuviso!—Atos 14:5-10.

Ovanthu ovanyingi mo Listra, ankho vetavela onoñgano mbo potyilongo mbokuti kohale ono huku ankho mbulipilulula ovanthu. Ngotyo, avasoko okuti Paulu o huku itiwa Herme iya Barnabe o huku Zeu! Ovakristau ovo vevali vokueliola omutima, avakanyauka okutyilika ovanthu ankho vahanda okuvelingila otyilikutila.—Atos 14:11-18.

Mahi, kovanthu vehehi mo Listra, ovaenda ovo, ankho ha no huku ko. Ankho tyotyili ovaenda vakolela unene. Mongeleka, Eunise, omukai umwe omu Judeu wanepua nomulume omu Gregu,a na me yae Loide, avatehelela Paulu na Barnabe nombili onene nehambu. Ankho vapopia onondaka onongwa kese mu Judeu wekolelo ahanda okutehelela, mbokuti Mesiya weile iya afuisapo omaulo omanyingi ahonekwa konthele yae Movihonekwa!

Soka oñgeni etyi Paulu ankho alongesa tyakalesile Timoteo. “Tunde pouna,” Timoteo ankho walongesua okukala nohole novihonekwa vikola, Ovihonekwa vio Hebreu. (2 Timóteo 3:15) Nga me yae na ina kulu, nae aimbuka okuti Paulu na Barnabe, ankho vekahi nokupopia otyili konthele ya Mesiya. Pahe soka komulume una otyilema Paulu ankho avelula. Timoteo tyafuile ankho uhole okumumona-mona momatapalo o Listra. Pahe Timoteo weete omulume oo, weenda otyikando tyotete! Moluotyo, Eunise na Loide na Timoteo avakala Ovakristau. Hono ovo he, novo inakulu vapondola okulilongesila unene ku Loide na Eunise. Okuti ove upondola okuavela ovakuendye ondundo ongwa?

Vana vakala ovalongwa Ovakristau mo Listra, vanoñgonoka ekevelelo lihuvisa ankho ovalanduli va Kristu vena. Mahi, tupu ankho vanoñgonoka okuti okukala omulongwa wa Kristu, katyapepukile. Ova Judeu vamwe onondyale ankho vatunda ko Ikoniu no ko Antiokia, vanyingila mepundaumbo opo vahongiliye ovanthu okutyitukila-po Paulu na Barnabe. Kapakalele ehimbwe, ovanthu ovanyingi aveya nokuanumana ku Paulu, avemutyopo nomamanya. Vatualako nokumutyopa, alo aambuka. Iya avemukokela kondye yepundaumbo avemusi-ko okusoka okuti wankhia.—Atos 14:19.

Mahi, ovalongwa mo Listra avakaovola Paulu, avemuvasi. Iya avahambukwa etyi ahimbika okuliminya apinduka-po, nomutima wakola avakondoka mo Listra! Etyi kuatya, oe na Barnabe avaende kepundaumbo lio Derbe, opo vatualeko novilinga viavo viokuivisa. Etyi valongesa ovalongwa ovape, avelipake vali motyiponga okukondoka ko Listra. Omokonda yatyi? Ehipululo litupopila okuti, ‘vapameka ovalongwa nokuveavela ondundo vatualeko nekolelo.’ Pahe soka omukuandye Timoteo wapana-mo, utehelela etyi Paulu na Barnabe valongesa Ovakristau ovo, okuti valambela movitateka ovio aviho mokonda yekevelelo liavo ewa komutwe. Iya avati: “Tuna okunyingila Mouhamba wa Huku nononkhumbi ononyingi.”—Atos 14:20-22.

Timoteo wamona etyi Paulu akuata mononkhumbi ombo, opo apopile vakuavo onondaka onongwa. Moluotyo, Timoteo ankho utyii okuti inkha ulandula ongeleka ya Paulu, ovanthu vomo Listra nae mavemuyale. Tupu, na tate yae memuyale. Mahi Timoteo kayekele otyo atyiho tyimutyilike okutualako netokolo liae liokuumbila Huku. Hono, kuna ovakuendye ovanyingi novahikuena vekahi nga Timoteo. Nounongo, vaovola omapanga apameka ekolelo liavo, vana mavevepe ondundo nokuvepameka. Iya kavayeke okuyalwa kuveyekese-po okuumbila Huku yotyotyili!

Ngetyi tyapopiwa konthyimbi, tyafuile Paulu akatalela-po vali epundaumbo olio, konyima yomanima evali ine etatu. Soka kehambu ombunga ya Timoteo yakala nalio etyi Paulu ehika, iya pahe ankho mundyila yae o Sila. Tupu ankho omuvo umwe wehambu pala Paulu. Ankho weete ovinyango viombuto yotyili akuna mo Listra. Pahe ankho muna Loide nomona wae Eunise, ovakai Ovakristau ovakuatyili, ‘vena ekolelo liotyotyili,’ liahuvisile unene Paulu. (2 Timóteo 1:5) Iya omukuendye Timoteo?

Paulu waimbuka okuti omukuendye oo, ankho walongoka nawa tunde etyi evetalela-po otyikando tyotete. Timoteo ankho ‘upopiwa nawa novakuatate’ mo Listra no mo Ikoniu epundaumbo ankho likala onokilometu 32. (Atos 16:2) Oñgeni etyivila okukala nenyina ewa ngotyo?

“Ovihonekwa vikola” Timoteo alongeswa na ina na ina kulu “tunde pouna,” muakutikinya omalondolo, no nondonga pala ovakuendye. (2 Timóteo 3:15) Ongeleka imwe yati: “Hinangela Omupakeko wove Omunene tyina nkhele umukuendye.” (Eclesiastes 12:1) Onondaka ombo, mbehikile unene komutima wa Timoteo etyi akala Omukristau. Waimbukile okuti onkhalelo ongwa yokuhinangela Omupakeko wae Omunene, yakutikinya okuivisa onondaka onongwa konthele ya Kristu, Omona wa Huku. Katutu-katutu, Timoteo elilongesa okufinda ohonyi yae, novipuka ovikuavo, ankho vimutyilika okupopila vakuavo onondaka onongwa konthele ya Jesus Kristu, tyihena owoma.

Ovakuatate ankho vekahi komutwe momawaneno avaimbuka okuti Timoteo ukahi nokulongoka. Tyotyili, ankho vahambukwa unene okutala etyi omukuendye oo, ekahi nokulongoka nokupameka vakuavo. Haunene, ankho weete nawa Timoteo o Jeova. Kononkhono mba Huku, ovanthu vamwe avahoneka omaulo apopia konthele yae. Omaulo oo apopia konthele yovilinga ankho makalinga nthiki imwe momawaneno omanyingi. Etyi Paulu evetalela-po, aimbuka okuti Timoteo upondola okumukuatesako momaungendi ae ovilinga vioumisionaliu. Ovakuatate mo Listra avetavela. Iya avapake omavoko avo komukuendye oo, okulekesa okuti waholovonua pala ovilinga viavilapo via Jeova Huku.—1 Timóteo 1:18; 4:14.

Tupondola okusoka okuti, nomutima weliola Timoteo wahuvile, okuyumbwa ngotyo onthumbi, notyilinga apewa. Ankho wafuapo pala okuenda.b Otyilinga otyipe tyokukaivisa kovilongo ovikuavo Timoteo apelwe, oñgeni tyakalesile tate yae ankho uhafende Jeova? Tyafuile ankho usoka ovilinga vielikalela unene pala omona wae. Iya ina ya Timoteo na ina kulu vakalele ñgeni? Okuti vahambukilwe, putyina vaovola okuholeka omasukalalo avo, opo vakuateseko omona wavo? Kese umwe otyo ahandela omona wae.

Timoteo aende umwe. Komuhuka wonthiki yapopiwa konthyimbi yonthele ei, ahimbika ovilinga viokulinga omaungendi no apostolu Paulu. Putyina ankho asapo o Listra, kese muyuelo womamanya ine omuyuelo weholi wivala tyina aenda, ankho ulekesa okuti ukahi nokuenda kumwe ehei, kokule neumbo liavo. Etyi ovalume ovo vetatu vaenda onthiki aiho, iya avehiki mo Ikoniu. Timoteo ahimbika okutala etyi Paulu na Sila vaavela omawaneno omikanda vio nondonga mbatunda ko nonkhalamutwe mo Jelusalei, nokupameka ekolelo liovakuatate mo Ikoniu. (Atos 16:4, 5) Mahi, otyo ankho onthyimbi vala.

Etyi vatalela-po omawaneno omo Galasia, avasipo omatapalo o Roma, avaende onokilometu ononyingi avakuate mohika yonomphunda mo Frigia, okuenda nokokulio kuekumbi iya avakaya no koutakelo. Putyina valandula ehongolelo liospilitu sandu ya Huku, vakuata mo Troade, avalondo mowato ankho wenda ko Masedonia. (Atos 16:6-12) Iya Paulu aimbuka okuti Timoteo wakolela unene. Moluotyo, Paulu asi Timoteo na Sila mo Bereia. (Atos 17:14) Alo umwe watumine omukuendye oo aike ko Tesalonika. Oko, Timoteo ahetekela nawa etyi amona ku Paulu, iya apameka ekolelo lio Vakristau vekolelo.—1 Tessalonicenses 3:1-3.

Konyima Paulu ahoneka konthele ya Timoteo okuti: ‘Ndyitupu nawike vali una ombili ngo yae, memukuatesako tyotyili.’ (Filipenses 2:20) Ovituwa ovio oviwa, kavieile vala avike. Timoteo waundapele nononkhono ovilinga viesukisa okuliola omutima, iya nekolelo, akoleleya ovitateka viepuiya. Oyo, ongeleka ongwa unene pala ovakuendye hono! Muhalimbuei-ko okuti okukala nenyina ewa, tyikahi pomavoko enyi muene. Inkha ove umukuendye, una onomphitilo onongwa opo ukale nenyina ewa, mokupaka tete Jeova Huku momuenyo wove, nokutekula vakuenyi nohole nehumbilo.

Mokueenda kuomanima ehungi po 14, Timoteo waundapele omuvo omunyingi nepanga liae, apostolu Paulu. Timoteo wamuene ononkhumbi ononyingi na Paulu movilinga viae, tupu vahambukilwe aveho movipuka ovinyingi. (2 Coríntios 11:24-27) Timoteo alo umwe wapakelue mokaleya mokonda yekolelo liae. (Hebreus 13:23) Tupu walekesile okuti una ohole onene novakuatate no nomphange Ovakristau, nokuesuka navo nga Paulu. Moluotyo, Paulu emuhonekela okuti: “Ame ndyihinangela ononkhuka mbove.” (2 Timóteo 1:4) Nga Paulu, tyafuile Timoteo nae welilongesile “okulila na vana valila.” Otyo, ankho tyilekesa nawa okuti upondola okuveungumanesa nokuvepameka. (Romanos 12:15) Kese umwe puonthue, elilongese okulinga ngotyo!

Moluotyo, mokueenda kuomuvo Timoteo akala omukulu wewaneno, Omukristau ondalawa. Paulu wapele Timoteo otyilinga tyokutalela-po omawaneno pala okuepameka nokuepa ondundo. Tupu, nokuholovona ovalume vafuapo, opo vakale ovakulu vomawaneno, novakuatesiko vavo.—1 Timóteo 5:22.

Paulu ankho una unene oluembia na Timoteo, iya emuavela onondonga nomalondolo opo emukuateseko. Wemupele ondundo opo apameke oupanga wae na Jeova, nokutualako okulongoka. (1 Timóteo 4:15, 16) Wapele Timoteo ondundo opo ahakale nowoma ine ohonyi yokuviukisa etyi tyapenga mewaneno, mokonda muna ovakulu. (1 Timóteo 1:3; 4:6, 7, 11, 12) Paulu alo wemupele onondonga konthele youvela womutima tyafuile ankho ena.—1 Timóteo 5:23.

Mokueenda kuomuvo, Paulu aimbuka okuti ononkhia mbae mbuli popepi. Ankho wetyimona okuti maipawa. Moluotyo, kononkhono mba Huku, ahonekela Timoteo omukanda wahulilila-ko. Ankho muakutikinya onondaka mbuhika komutima mbati: “Kanyauka liwa okuya kuame.” (2 Timóteo 4:9) Paulu ankho uhole unene Timoteo. Moluotyo, emuihana okuti, “omona wange mu Tatekulu, onthyolwe nayumba onthumbi.” (1 Coríntios 4:17) Otyo ankho ahandela epanga liae, akale ponthele yae putyina ononkhia mbae ankho mbufuena popepi! Otyiwa kese umwe puonthue elipule okuti: ‘Ovanthu vanthala umwe okuti ndyiava epameko tyina vavasiwa novitateka?’

Okuti Timoteo wetyivilile umwe okuhika liwa ku Paulu? Katutyii. Mahi, tutyii okuti oe ankho ulinga ononkhono pala okuungumanesa nokupameka Paulu, na vakuavo vali. Ankho ulinga ngetyi enyina liae Timoteo lihangununa, “Una Uhivilika Huku.” Moluotyo, wasa-po ongeleka ongwa unene yekolelo opo onthue atuho, ovakuendye novakulu tuilandule.