Ovanthu va Jeova “Vayekapo Etyi Tyihaviukile”

 1. Oityi tyakolela vali unene mefendelo lietu?

OKUTI onthiki imwe wamueneale enyina lia Jeova liahonekwa konondyuo mbumwe ine okovipuka vivasiwa monondyuo mupakwa ovipuka viehinangeleso (museu)? Inkha wetyimuene, tyotyili wahambukilwe. Kuonthue Onombangi mba Jeova, enyina lia Huku liakolela unene mefendelo lietu. Mouye auho, mutupu vali ovanthu ovakuavo vaundapesa enyina lia Huku ngonthue. Tutyii okuti okukala Ombangi ya Jeova elao limwe enene, mahi tupu tuna otyilinga tyokulinga ovipuka vinkhimaneka enyina olio.

 2. Mokonda Tunombangi mba Jeova, oityi tuna okulinga?

² Opo tupandwe na Jeova, katuesukisile vala okuundapesa enyina liae, mahi tupu tuna okulandula ovitumino viae konthele yovituwa. Mokonda yotyo, Ombimbiliya ituhinangelesa okuti ovanthu va Jeova vena “okulityilika ovivi.” (Sal. 34:14) Apostolu Paulu wapopile nawa konthele yotyitumino otyo, etyi ati: “Kese una utumbula enyina lia Jeova, ayekepo etyi tyihaviukile.” (Tanga 2 Timóteo 2:19.) Mokonda Tunombangi mbae, tyotyili tuhambukwa okuihanwa nenyina lia Jeova. Mahi oñgeni matuyekepo etyi tyihaviukile?

3, 4. Onondaka patyi vamwe vehevili okunoñgonoka, iya omokonda yatyi?

³ Mu 2 Timóteo 2:19, Paulu wapopia “elisesu liapama lia Huku.” Melisesu olio, muna ononthele onombali. Onthele yotete yati, “Jeova wii ovanthu vae,” onondaka ombo mbapolwa mu Números 16:5. (Tala onthele yokualamba.) Iya onthele yavali yati, “kese una utumbula enyina lia Jeova, ayekepo etyi tyihaviukile.” Mahi vamwe tyivepuiya okunoñgonoka onondaka ombo. Omokonda yatyi?

⁴ Onondaka mba Paulu mbulekesa okuti mbapolwa motestu onkhuavo Yovihonekwa vio Hebreu. Mahi, ngoti petupu oversikulu naike yelikuata nonondaka ombo. Naina, oityi apostolu Paulu ankho ekahi nokupopia etyi ati: “Kese una utumbula enyina lia Jeova, ayekepo etyi tyihaviukile”? Onondaka mbotete mba Paulu mbapolwa mu Números okapitulu 16, iya mbupopia konthele youmphuki wa Koraa. Okuti onthele yavali nayo ipopia konthele yotyo?

5-7. Oityi Paulu ankho ekahi nokupopia mu 2 Timóteo 2:19 tyamonekele pononthiki mba Moisesi? (Tala olutalatu pefo pahimbikila onthele ei.)

⁵ Ombimbiliya ipopia okuti Dataa na Abirau, ovana va Eliabe, veliwanekele na Koraa avahimbika oumphuki okutyitukilapo Moisesi na Arau. (Números 16:1-5) Kavakalele nonthilo na Moisesi iya avaanye outumini ankho apewa na Huku. Mahi, ankho vapondola okunyona ova Isilayeli mokonda ankho nkhele vekahi pokati kavo. Etyi onthiki ya Jeova yokulekesa ovalie ovafendi vae votyotyili no valie onomphuki yehikapo, aave otyitumino tyimwe tyayandyuluka nawa.

⁶ Ombimbiliya yati: “Jeova apopila Moisesi okuti: ‘Popila ovanthu aveho okuti, “Tundei ponthele yomakaka a Koraa, na Dataa, na Abirau!”’ Iya Moisesi aende povo Dataa na Abirau, iya ovakulu vo Isilayeli avaende kumwe nae. Moisesi apopila ovanthu aveho okuti: ‘Mbambavo, tundei pomakaka ovalume ava iya muahayamei kotyipuka natyike tyavo, opo muhahanyueko kumwe navo, mokonda yonkhali yavo.’ Liwa-liwa, avatundu kononthele ambuho mbomakaka ovo Koraa na Dataa, na Abirau.” (Numeros 16:23-27) Konyima, Jeova ahanyeko onomphuki ambuho. Mahi ovakuatyili ku Huku vahupile. Ñgeni? Ankho ‘vayekapo etyi tyihaviukile’ etyi vatunda ponthele yonomphuki.

⁷ Jeova utala momitima! Utyivila okumona oukuatyili wovanthu vae. Mahi, ovakuatyili kwe ankho vesukisa okuhondovoka kuvana valinga ovivi. Tyafuile Paulu ankho ukahi nokupopia ehipululo likahi mu Números 16:5, 23-27, etyi ahoneka okuti: “Kese una utumbula enyina lia Jeova, ayekepo etyi tyihaviukile.” Otyo tyelikuata netyi Paulu apopia, etyi ati: “Jeova wii ovanthu vae.”​—2 Tim. 2:19.

 8. Omokonda yatyi okuundapesa vala enyina lia Huku nokukala mewaneno katyituuka?

⁸ Etyi Paulu apopia etyi tyamonekele pononthiki mba Moisesi, ankho ukahi nokuhinangelesa Timoteo okuti wesukisa okulunguka opo ayakulile oupanga wae omuwa na Jeova. Okukala vala mewaneno Liovakristau ankho katyatuukile, ngetyi okuihanwa vala nenyina lia Jeova ankho katyatuukile pononthiki mba Moisesi. Ovafendi vekolelo vena okulinga ononkhono “mbokuyekapo etyi tyihaviukile.” Oityi otyo ankho tyihangununa ku Timoteo? Iya oityi tupondola okulilongesila kelondolo lia Paulu?

 9. Oñgeni “onondaka mbowova nomutomba” mbakalesile ewaneno Liovakristau pomuvo wono apostolu?

⁹ Momukanda Paulu ahonekelele Timoteo, waavele onondonga onongwa konthele yoñgeni ena okuanya etyi tyihaviukile. Mongeleka, Paulu wapopila Timoteo okuti: “Muhaluilei onondaka,” iya “anya onondaka mbowova.” (Tanga 2 Timóteo 2:14, 16, 23.) Onondaka ombo ankho mbuhangununa tyi? Ovanthu vamwe mewaneno ankho valongesa omalongeso avana vatyitukilapo otyili. Ovakuavo ankho vayandyanesa omalongeso aeta onondyaya. Vimwe povipuka ovio ankho valongesa, kavilekesa okuti vaanya etyi Ombimbiliya ilongesa, mahi ankho kavikuatesako okukala newaneko mewaneno. Otyo Paulu apamekela Timoteo “aanye onondaka mbowova nomutomba.”

10. Oityi tuesukisa okulinga tyina tuiva omalongeso avana vatyitukilapo otyili?

¹⁰ Hono, katyakakele okuvasa ovanthu vatyitukilapo otyili mewaneno. Mahi, nkhele tupondola okuiva ovipuka vihelikuatele netyi Ombimbiliya ilongesa. Katyisukisa olie upopia ovipuka ovio, tuesukisa okuvianya liwa-liwa. Hatyiwako okutomphola na vana vatyitukilapo otyili, tyilinge mo Internete, ine omonkhalelo onkhuavo. Namphila hamwe tuhanda okumukuatesako, inkha tutomphola nae matulekesa okuti katukahi nokutavela Huku. Mokonda tuvanthu va Jeova, tyotyili tuesukisa okuanya omalongeso aeho avana vatyitukilapo otyili.

11. Oityi tyipondola okueta ‘onondaka mbowova,’ iya oñgeni ovakulu vewaneno vapondola okuava ongeleka ongwa?

¹¹ Omalongeso avana vatyitukilapo otyili hao vala apondola okunyona ombembwa mewaneno, kuna vali ovipuka ovikuavo. Mongeleka, ovanthu vapondola okukala nomalusoke elikalaila konthele yovitalukiso viaviuka pala Ovakristau. Okuovola okukuluminya vakuetu vetavele omalusoke oo tyipondola okueta onondyaya konthele “yonondaka mbowova nomutomba.” Iya inkha umwe mewaneno ulinga ovitalukiso viehelikuatele novitumino via Jeova konthele yovituwa? Ovakulu vewaneno kavapondola okuyekelela otyituwa otyo opo vala velityilike onondyaya. (Sal. 11:5; Efé. 5:3-5) Tyotyili, ovakulu vewaneno veliyunga opo vahapopie omalusoke avo muene. Mahi valandula elondolo Liombimbiliya liati: “Nthitei otyunda tya Huku muatumwa okuyunga, . . . amuhatumina epingo lia Huku, anthi avelei otyunda ongeleka ongwa.”​—1 Ped. 5:2, 3; tanga 2 Coríntios 1:24.

12, 13. (a) Oñgeni Onombangi mba Jeova vaholovona ovitalukiso, iya ovitumino patyi Viombimbiliya valandula? (b) Oñgeni kese omunthu apondola okulandula ovitumino viapopiwa mo palagrafu 12?

¹² Eongano lietu kalipopi onosinema patyi no novideo, nomikanda, ine oviimbo tuna okulityilika. Omokonda yatyi? Omokonda Ombimbiliya ituavela ondundo opo kese omunthu alongese onondunge mbae “mbokupunga etyi tyaviuka netyi tyapenga.” (Heb. 5:14) Tupondola okuundapesa Ombimbiliya opo itukuateseko okulinga omatokolo aviuka konthele yovitalukiso. Momatokolo aeho tulinga, tuesukisa “okutualako okunoñgonoka oityi tyihambukiswa Tatekulu.” (Efé. 5:10) Ombimbiliya ilongesa okuti ononkhalamutwe mbo nombunga vena outumini, moluotyo vena okukoya ovitalukiso patyi vihapondola okulingwa novo meumbo liavo.​—1 Cor. 11:3; Efé. 6:1-4.

¹³ Ovitumino Viombimbiliya viapopiwa pombanda, kavitukuatesako vala tyina tulinga omatokolo konthele yovitalukiso. Mongeleka, ovanthu vena omalusoke elikalaila konthele yomuvalo, nokulifiwisa, nekongoko, novikulia, novipuka ovikuavo omunthu ehole. Vamwe vapondola okukuluminya vakuavo okutavela etyi vasoka konthele yotyo, iya otyo tyipondola okueta onondyaya. Mahi, inkha petupu otyitumino natyike Tyombimbiliya tyilekesa okuti otyipuka otyo tyapenga, hatyiwako okuyaya konthele yetyi Omukristau esukisa okulinga. Ombimbiliya yati: “Omupika wa Huku kesukisa okulwa, anthi, wesukisa okukala ondalawa [okuliola omutima, pokatoi] novanthu aveho.”​—2 Tim. 2:24.

14. Onthengele-popia patyi Paulu aundapesa ilekesa okuti tuesukisa okulityilika omapanga omavi?

¹⁴ Omonkhalelo patyi onkhuavo “una utumbula enyina lia Jeova, ayekapo etyi tyihaviukile”? Omokulityilika okukala noupanga na vana vokulinga etyi tyihaviukile. Oñgeni Paulu etyipopia monthengele-popia? Etyi apopia “elisesu liapama lia Huku,” wapopile konthele “yondyuo onene.” Mondyuo omo ankho muna “ovityuma,” mahi ankho “kamuna vala onombiya mboolu no mbo palata, mahi tupu, muna mboluma, nomaholo, mbumue opala ehiviliko, mahi ononkhuavo hapalako ehiviliko.” (2 Tim. 2:20, 21) Konyima, Paulu aavela ondundo Ovakristau opo vahondovoke “kovityuma” vihasilivila.

15, 16. Oityi tupondola okulilongesila konthengele-popia “yondyuo onene”?

¹⁵ Onthengele-popia oyo ihangununa tyi? “Ondyuo onene” ipondola okuelekwa newaneno Liovakristau. Iya “Ovityuma” mondyuo oyo, vipondola okuelekwa na kese omunthu ukahi mewaneno. Ovityuma vimwe mondyuo vipondola okunyonwa inkha vihonya nevi viasila. Inkha otyo tyimoneka, muene weumbo una okuyapulako ovityuma viasukuka, nevi aundapesa pokuteleka.

¹⁶ Tupu hono otyo ovanthu va Jeova valinga. Inkha tuhanda okukala tyasukuka mononkhalelo ambuho mbomuenyo wetu, tuna okuliyapula ku vana vekahi mewaneno mahi vahalandula ovitumino via Jeova. (Tanga 1 Coríntios 15:33.) Inkha tuna okulityilika omapanga omavi ekahi mewaneno, tupu tuna okulityilika okukala noupanga na nava vekahi kondye yewaneno. Tulinga ngotyo mokonda ovanthu ovanyingi vekahi kondye yewaneno, vehole onombongo, kavetavela kovohe, havakuatyili, ononkhembi, ovakalavi, vetupu onthilo na Huku, ovayondyi, iya vehole vali omalia-alia tyipona Huku.​—2 Tim. 3:1-5.

17. Oñgeni ova Isilayeli ovakuatyili “vayekelepo etyi tyihaviukile”?

¹⁷ Etyi Jeova aava otyitumino tyokuti “tundei ponthele yomakaka a Koraa, na Dataa, na Abirau,” ova Isilayeli vekolelo ‘vatundilepo liwa-liwa.’ (Núm. 16:24, 27) Kavasetele vali okuhondovoka konomphuki ine okulipula inkha vena umwe okutyilinga. “Vahondovokele kononthele ambuho.” Ovakuatyili ankho vafuapo pala okutavela nomutima wavo auho. Valekesile umwe nawa okuti vahula ku Jeova iya veyele etyi tyihaviukile. Oityi tupondola okulilongesila kongeleka oyo?

18. Oityi Paulu ankho ahanda okupopia etyi apopila Timoteo okuti “tila omapeleyo oukuendye”?

¹⁸ Oupanga wetu na Jeova wakolela unene kuonthue. Tuna okuyakulila liwa-liwa oupanga oo. Otyo Paulu ankho ahanda okupopia etyi apopila Timoteo opo “atile omapeleyo oukuendye.” (2 Tim. 2:22) Pomuvo opo, tyafuile Timoteo ankho unale omanima 30. Mahi namphila ankho omukuluale, upondola okukala “nomapeleyo oukuendye.” Tyina Timoteo amavasiwa nomahando oo, ankho una “okuetila.” Ankho wesukisa “okuyekapo etyi tyihaviukile.” Jesus wapopile tyimwe tyelifwa notyo, etyi ati: “Inkha eiho liove likupundukisa, litongolamo oliyumbu kokule nove.” (Mat. 18:9) Hono, Ovakristau vahanda okutavela elondolo olio, nokuyakulila oupanga wavo na Huku, vena okulinga liwa etokolo olio, avehelipulu vali.

19. Oñgeni vamwe vayakulila oupanga wavo na Jeova?

¹⁹ Oñgeni Ovakristau vamwe vayakulila oupanga wavo na Jeova? Vamwe ankho vena otyitateka tyokunwa unene, vatokola okuhanu vali natyike. Ovakuavo velityilika ovitalukiso aviho vipondola okuvehongiliya okukala nomahando omavi. (Sal. 101:3) Mongeleka, omukuatate umwe, etyi nkhele ehenekale Ombangi, ankho uhole okuenda movipito omu onkhalelo yokunyana ihongiliya ovanthu okulinga oundalelapo. Etyi elilongesa otyili, atokola okuahanyane vali, alo umwe povipito vio Nombangi. Kahande vali okuhinangela omahando nomalusoke ana omavi. Tyotyili, otyo katyilekesa okuti Ovakristau aveho vesukisa okulityilika ovikunwa vikoleswa, nokunyana, ine ovipuka ovikuavo viahapengele. Mahi, atuho tuesukisa okulunguka, nokuyakulila oupanga wetu na Jeova.

20. Namphila katyapepukile “okuyekapo etyi tyihaviukile,” oityi tyitupameka?

²⁰ Okukala Ombangi ya Jeova, elao limwe enene, mahi tupu tuna otyilinga tyokulinga ovipuka vinkhimaneka enyina olio. Tuna “okuyekapo etyi tyihaviukile” “nokulityilika ovivi.” (Sal. 34:14) Tyotyili, otyo pamwe katyapepukile. Mahi, tyitupameka unene okunoñgonoka okuti Jeova apeho makala nohole “novanthu vae” vokumutavela.​—2 Tim. 2:19; tanga 2 Crônicas 16:9a.