Kala Nonduvia Notyilinga Una-tyo!

OKUTI nthiki imwe wapelue-ale omukanda wahonekwa ovipuka oviwa nepanga liove? Timotiu wahonekelwa omukanda umwe ankho ahoneka ovipuka oviwa nomu apositolu Paulu. Omukanda oo oyou pehepano wiiwe okuti o 2 Timotiu. Tyafuile puetyi Timotiu apewa omukanda oo wataindyile omphangu opo apumphame eutange umwe nawa, atale etyi epanga liae ahoneka. Mokutala Timotiu welipulile okuti: ‘Pahe oityi Paulu ahonekela omukanda ou? Okuti momukanda omu muna ovipuka oviwa mavinkhuatesako motyilinga tyange etyi? Okuti omukanda ou maunkhuatesako movilinga viokuivisa nokukuatesako vakuetu?’ Etyi Timotiu atanga omukanda oo, avasi omakumbululo omapulo oo elilinga, atee umwe avasimo vali ovipuka ovikuavo. Pahe onthele ei maipopi ovipuka vimwe oviwa Paulu ahonekele momukanda oo.

Timotiu etyi aikula omukanda atange ononthele mbotete, etyimone okuti Paulu emuhole unene. Paulu emuihana okuti “omona wange onthyolwe.” (2 Tim. 1:2) Timotiu wapewa omukanda oo menima 65, etyi tyafwa ankho ena-ale omanima 30. Timotiu ankho omukulu wewaneno-ale. Timotiu ankho welilongesila-ale ovipuka ovinyingi ku Paulu mokonda tunde apa vahimbika okuundapa aveho ankho palamba-ale omanima alamba pekwii.

Tyafuile omukanda oo wapamekele unene Timotiu etyi atanga okuti Paulu ukahi nokukoleleya noukuatyili movitateka viae. Paulu ankho uli ko Loma tyakuatwa. Iya ankho kuakambela vala katutu opo aipawe. (2 Tim. 1:15, 16; 4:6-8) Etyi Timotiu atanga omukanda oo amona okuti Paulu wakola omutima. Paulu ahoneka-po okuti: “Ndyitualako okukoleleya movipuka aviho.” (2 Tim. 2:8-13) Tupu, omukanda oo Paulu ahonekele nonthue upondola okutukuatesako ngetyi akuatesileko Timotiu.

Omu Apositolu Paulu wapopilile Timotiu opo ahumbe otyilinga apewa na Huku. Paulu ankho uhanda Timotiu anthiakane ngotupia ounongo apewa na Huku. (2 Tim. 1:6) Paulu apopia okuti khaʹri·sma tyihangununa okuti otyiawa. Mo Geleku ondaka oyo ipopia otyipuka omunthu apewa ankho ahatokalele. Timotiu wapewa otyiawa otyo puetyi apewa otyilinga tyokukuatesako omawaneno. — 1 Tim. 4:14.

Paulu ankho uhanda Timotiu alinge-tyi? Etyi Timotiu atanga onondaka ombo mbokuati “nthiakana ngotupia” tyafwa ankho wasokele kovanthu vokunthiakana otupia momaumbo avo. Opo otupia tuhanyime, onthue tusukisa okuhohiya-po. O Dicionário imwe yapopia okuti ondaka yo Geleku yokuati a·na·zo·py·reʹo, Paulu apopia, ihangununa okuhohiya, nokunthiakana, nokutemesa. Tyilekesa okuti, okukala nombili motyilinga tyimwe. Ngotyo, Paulu ankho ukahi nokupopila Timotiu okuti, una okukala nonduvia notyilinga tyae. Nonthue hono, otyo tuesukisa okulinga ngotyo. Tuesukisa okuundapa nonduvia movilinga vietu.

Etyi Timotiu atualako okutanga omukanda atumwa nepanga liae, avasi-mo onondaka mbumwe ankho mbumukuatesako movilinga viokuivisa. Paulu wahoneka okuti: “Holeka nawa ovipuka ovio vina esilivilo enene watambula kononkhono mba Huku mbukahi mu onthue.” (2 Tim. 1:14) Ovipuka patyi vina esilivilo enene Timotiu apewa? Movelesikulu yotete Paulu wapopia okuti onondaka “mbueta ouwa”, otyili tyivasiwa Mombimbiliya. (2 Tim. 1:13) Mokonda Timotiu ankho umuivisi, ankho wesukisa okulongesa nawa otyili kovanthu aveho, tyilinge ovo mewaneno tyilinge vehe womewaneno. (2 Tim. 4:1-5) Tupu, Timotiu ankho wapewa otyilinga tyokunthita otyiunda tya Huku. (1 Pet. 5:2) Etyi Paulu apopila Timotiu okuti holeka nawa ovipuka ovio, ankho tyilekesa okuti tyina alongesa wesukisa okuyumba onthumbi mononkhono mba Huku no Mondaka yae. — 2 Tim. 3:14-17.

Nonthue tuapewa otyilinga tyokuivisa onondaka onongwa. (Mat. 28:19, 20) Mahi, matulekesa okuti tuapandula otyilinga etyi tuapewa, tyina tutualako okulikuambela natyina tutanga Ondaka ya Huku ononthiki ambuho. (Loma 12:11, 12; 1 Tim. 4:13, 15, 16) Tyipondola hamwe wapewa otyilinga tyimwe otyinene mewaneno, ngetyi okukala omukulu mewaneno ine okuundapa movilinga viomuvo auho. Ankho tuapewa otyilinga otyo, tuesukisa okuliola omutima, atunoñgonoka okuti tutei ku Huku. Okulinga ngotyo matyitukuatesako okuholeka nawa ovipuka tuapewa, atukala neyumbwa-nthumbi liokuti Siovaa metukuatesako.

Tupu, Timotiu wapewa otyilinga tyokulongesa nawa vakuavo. Otyo Paulu emupopilila okuti: “Ovipuka weiva ku ame . . .  vilongesa ovalume ovakuatyili, opo navo vakale tyafuapo pala okulongesa vakuavo.” (2 Tim. 2:2) Paulu wahinangelesile Timotiu okulongesa vakuavo ovipuka aviho emulongesa. Tupu, ovakulu vewaneno vena otyilinga tyesukisa unene, tyokulongesa vakuavo. Omukulu wewaneno ukahi nawa kaomena kenoñgonoko liae. Mahi ulongesa nawa-nawa vakuavo opo vetyivile okulinga nawa otyilinga vapewa. Kasoko okuti; ‘Ankho ndyimulongesa nawa anoñgonoka upondola ha andambe-po akala vali omunongo ku ame.’ Ngotyo, omukulu wewaneno ukahi nawa kalongesa vala vakuavo oupuka oututu, mahi uvelongesa nawa-nawa ovipuka viaya kohi, iya otyo atyivekuatesako okukala ovanthu vapama motyili. Tyina ovakulu vewaneno vakuatesako nawa-nawa ovalume vakuatyili, navo mavetyivili okukuatesako nawa ewaneno.

Tyotyili Timotiu wapandele unene omukanda ankho atumwa na Paulu. Ove kusoko okuti weutangele ehimbwe okuwanawana-po? Enga, tyafwa otyo umwe alingile ngotyo. Weutangele ehimbwe opo atale oñgeni maumukuatesako motyilinga tyae.

Nonthue tuesukisa okuendela monondongwa Paulu avelele Timotiu. Mahi oñgeni matuendela-mo? Tuendela-mo putyina tunthiakana ngotupia natyina tutyiholeka nawa, natyina tulongesa vakuetu. Okulinga ngotyo matutyivili okuundapela nawa Huku, ngetyi Paulu apopilile Timotiu. — 2 Tim. 4:5.