Vakuendye Oñgeni Mamukala Tyafuapo Opo Mumbatisalwe?

1, 2. (a) Hangununa omokonda yatyi ombatisimu onthambo imwe yakolela unene. (b) Oityi omunthu ena okulinga tyina nkhele ehenembatisalwe, iya omokonda yatyi?

OKUTI umukuendye pahe uhanda okumbatisalwa? Inkha ongotyo, olio elao limwe enene upondola okukala nalio. Ngetyi onthele yokualamba yapopia, okumbatisalwa onthambo imwe yakolela unene. Ombatisimu ilekesa vakuenyi okuti ove welipakula ku Jeova, tyilekesa okuti walaa okumuumbila apeho, tupu ilekesa okuti okulinga ehando liae, otyipuka tyakolela vali momuenyo wove. Mokonda omulao umwe wakolela unene ulinga ku Huku, ove una vala okumbatisalwa tyina pahe ulinga ovipuka vionondunge, tyina ove muene uhanda okumbatisalwa, tupu una wii nawa etyi tyihangununa okulipakula ku Huku.

² Mahi, hamwe ulitehelela okuti kuafuilepo opo umbatisalwe. Ine hamwe usoka okuti wafuapoale, mahi nkhele ovo tate yove vahanda ukevele opo ukule, onoñgonoka vali ovipuka. Oityi una okulinga? Wahasoye. Mahi, undapesa omuvo oo opo ukule motyili, ngotyo upondola okukala tyafuapo opo umbatisalwe. Ngotyo, upondola okutyilinga mo nonkhalelo ononthatu: (1) Onthumbi una, (2) evi ulinga, iya (3) olupandu luove.

3, 4. Oityi tulilongesila ku Timoteo?

³ Soka oñgeni upondola okukumbulula omapulo aa: Oityi tyinkhalesa nonthumbi yokuti Huku oko ekahi? Oityi tyinkhalesa nonthumbi yokuti Ombimbiliya o ya Huku? Omokonda yatyi ndyitavelela ovitumino via Huku, tyipona okulandula ovituwa viouye? Omapulo oo apondola okukukuatesako okulandula elondolo lia apostolu Paulu, liati: “Talei onwe muene okuti ehando lia Huku ewa, liafuapo iya liaviuka.” (Romanos 12:2) Oityi wesukisila okulinga ngotyo?

⁴ Ongeleka ya Timoteo ipondola okukukuatesako. Timoteo ankho wii nawa onoversikulu Mbombimbiliya mokonda me yae na inakulu Loide vemulongesile. Mahi, Paulu wapopilile Timoteo okuti: “Tualako okuendela movipuka welilongesa iya opewa onthumbi yokukvitavela.” (2 Timóteo 3:​14, 15) Onondaka “oviyumbu onthumbi” mbahangununa “okunoñgonoka otyipuka tyimwe, otavela okuti otyili.” Ngotyo Timoteo ankho wanoñgonoka nawa okuti otyili tyivasiwa Mombimbiliya. Wetyitavela, hamokonda me yae na inakulu vemupopila opo etyilinge, mahi omokonda wasokolola kuetyi elilongesa iya akala nonthumbi.​—Tanga Romanos 12:1.

5, 6. Omokonda yatyi tyakolela okulilongesa okuundapesa ‘onondunge mbove mbokupunga’?

⁵ Ove molingi ñgeni? Tyipondola wanoñgonokale otyili kohale. Inkha ongotyo, ovola okusoka konthele yomahunga omatavelo ove. Otyo matyikukuatesako okupameka ekolelo liove nokulityilika okulinga omatokolo apenga mokonda yavakuenyi, yomalusoke ouye, ine hamwe omahando ove muene.

⁶ Inkha ulilongesa okuundapesa “onondunge mbove mbokupunga” namphila nkhele umukuendye, mokala tyafuapo pala okukumbulula omapulo avakuenyi ngaa: “Oñgeni ove utyii okuti kouye kuna Huku? Inkha Huku utuhole, omokonda yatyi ayekelelako ovipuka ovivi? Okuti kouye kuna Huku tunde kohale?” Tyina wafuapo, omapulo oo kaekukalesa nondima, mahi ekulunda olilongesa vali nawa Ombimbiliya.

7-9. Hangununa oñgeni ononthele mo Internet mbokuati, “O Que A Bíblia Ensina?,” mbupondola okukukuatesako okupameka onthumbi yove.

⁷ Okulinga nawa elilongeso liove matyikukuatesako okukumbulula omapulo, ohakala nondima, mahi opameka othumbi yove. (Atos 17:11) Tuna omikanda ominyingi vipondola okukukuatesako okulinga ngotyo. Ovanyingi vehole okuvasa ekuateso olio tyina velilongesa ombrochula A Origem da Vida​—⁠Cinco Perguntas Que Merecem Resposta nomukanda Existe um Criador Que Se Importa com Você? Tupu, ovakuendye ovanyingi vapola ouwa ko nonthele mbati “O Que A Bíblia Ensina?” mo jw.org, mbukahi pana pati ENSINOS BÍBLICOS. Ononthele ombo ambuho mbalingwa opo mbukukuateseko okupameka onthumbi yove konthele Yombimbiliya.

⁸ Inkha umulongwa Wombimbiliya, upondola hamwe wiyale omakumbululo amwe omapulo avasiwa monthele oyo. Mahi omakumbululo ove wetavela? Ononthele ombo mambukukuatesako okusoka nawa konthele yono testu ononyingi Mbombimbiliya nokukuavela ondundo yokuhoneka omahunga omatavelo ove. Otyo matyikukuatesako okuhangununina vakuenyi omatavelo ove. Inkha wenda po nonthele mbokuati “O Que A Bíblia Ensina?” mo Internet upondola okumbuundapesa melilongeso liove opo tyikukuateseko okupameka onthumbi yove.

⁹ Una yokutavela ove muene okuti etyi otyili. Otyo matyikukuatesako okulipongiya opo umbatisalwe. Omphange umwe omukainthu wati: “Etyi nehenetokole opo ndyimbatisalwe, nelilongesa Ombimbiliya, andyinoñgonoka okuti ndyikahi mongeleya yotyotyili. Kese nthiki, onthumbi ange ipama vali.”

10. Omokonda yatyi tyaviuka okukevela Omukristau wambatisalua alinge etyi tyelikuata nekolelo liae?

¹⁰ Ombimbiliya yati: “Ekolelo lihena ovilinga, liankhia.” (Tiago 2:17) Inkha onthumbi yove yapama, motyilekesa muevi ulinga. Mokala netyi Ombimbiliya iihana okuti “ovituwa viasukuka novilinga vilekesa onthilo na Huku.”​—Tanga 2 Pedro 3:11.

11. Hangununa ondaka “ovituwa viasukuka.”

¹¹ “Ovituwa viasukuka” oityi? Inkha ovituwa viove viasukuka, nevi ulinga mavisukuka. Mongeleka, soka konohanyi epandu mbokualamba. Etyi walolwa opo ulinge etyi tyapenga, okuti wasokele nawa oityi tyapenga netyi tyaviuka? (Hebreus 5:14) Okuti uhinangela onthiki imwe vana mulongeswa navo kosikola vekuhindilile ine okukuhongiliya okulinga etyi tyapenga? Kosikola waava ongeleka ongwa ku vakuenyi? Utualako nekolelo mu Jeova, ine uhanda okukala nga vana ulongeswa navo opo vehekulinge omukuele? (1 Pedro 4:3, 4) Petupu omunthu na wike omuviuki. Pamwe alo umwe vana vaumbilale Jeova omanima omanyingi vakala nohonyi iya atyivepuiya okupopila vakuavo ondaka ya Huku. Mahi omunthu welipakula ku Huku, uhambukilwa okukala Ombangi ya Jeova, etyilekesa novituwa viae oviwa.

12. Ovilinga patyi vilekesa okuti “una onthilo na Huku,” iya oñgeni uvitala?

¹² “Ovilinga patyi vilekesa okuti una onthilo na Huku”? Ovilinga ovio muakutikinya vina ulinga mewaneno, okuenda komaliongiyo, nomovilinga viokuivisa. Tupu muakutikinya ovilinga vakuetu vahamono, ngetyi omalikuambelo tulinga atuike ku Jeova nelilongeso lietu lioulike. Omunthu wapakula omuenyo wae ku Jeova kasoko okuti ovilinga ovio vialema. Ulitehela ngo Hamba David, wapopia okuti: “Huku yange, ame ndyihambukilwa okulinga ehando liove. Iya ovitumino viove vikahi mokati kange.”​—Salmo 40:8.

13, 14. Otyiti patyi tyipondola okukukuatesako okulinga “ovilinga vilekesa onthilo na Huku,” iya oñgeni ovakuendye vamwe vavatelwa notyiti otyo?

¹³ Opo utyivile okulinga omphango yetyi uhanda, omukanda Os Jovens Perguntam​—⁠Respostas Práticas, Volume 2, pomafo 308-309, pana upondola okuhoneka omakumbululo omapulo aa: “Okuti momalikuambelo ove upopia umwe etyi wesuka natyo, tupu alekesa okuti uhole Jeova?” “Oityi ukutikinya melilongeso liove?” “Okuti wenda apeho okukaivisa alo umwe tyina ovo tate yove vahaende?” Pomafo opo tupu pena apa upondola okuhoneka etyi uhanda okulinga konthele yomalikuambelo ove, nelilongeso liove, novilinga viokuivisa.

¹⁴ Ovakuendye vahanda okumbatisalwa vetyimona okuti omafo oo otyiti tyakolela unene. Omphange umwe omuhikuena utiwa o Tilita wati: “Naundapesa omafo oo opo ndyihoneke etyi nahanda okulinga. Andyilingi ovipuka aviho ankho nahoneka, iya andyikala tyafuapo pala okumbatisalwa etyi palamba enima.” Omukuatate umwe omukuendye utiwa o Patrick nae wafuisilepo etyi ankho ahanda okulinga. Wati: “Etyi ankho nahanda okulinga ndyityiale, mahi andyihoneka opo ndyilinge ononkhono mbokutyifuisapo.”

15. Hangununa omokonda yatyi okulipakula, etokolo liove muene.

¹⁵ Epulo limwe likahi pomafo 308-309 momukanda oo liati: “Upondola okuumbila Jeova alo umwe inkha ovo tate yove nomapanga ove vayekako?” Tyina wapakula omuenyo wove ku Jeova,ombatisalwa, ukala noupanga na Jeova. Ngotyo, etyi ulingila Jeova katyitei vali ko voho ine o komunthu omukuavo. Ovituwa viove oviwa, nonthilo na Huku vilekesa okuti ove utavela okuti wavasa otyili iya uhanda okulandula ovitumino via Huku. Ngotyo mokala tyafuapo opo umbatisalwe.

16, 17. (a) Oityi tyipondola okulunda omunthu okukala Omukristau? (b) Ongeleka patyi ilekesa okuti tuesukisa okupandula otyilikutila tyeyovo?

¹⁶ Nthiki imwe, omulume umwe ankho wii nawa Ovitumino viapelwe Moisesi wapulile Jesus okuti: “Otyipi otyitumino otyinene vali?” Jesus akumbulula okuti: “Una okukala nohole na Jeova Huku yove nomutima wove auho, nomuenyo wove auho no nondunge mbove ambuho.” (Mateus 22:35-37) Jesus walekesa okuti ohole omunthu ena na Jeova oyo imulunda ambatisalwa iya akala Omukristau. Onkhalelo imwe ikahi nawa yokupameka ohole yove mu Jeova okusoka nawa konthele yotyilikutila tyeyovo, otyiawa otyinene Huku avela ovanthu. (Tanga 2 Coríntios 5:14, 15; 1 João 4:9, 19.) Tyina ulinga ngotyo, molekesa okuti wapandula otyiawa otyo otyiwa unene.

¹⁷ Onkhalelo imwe tupondola okuhangununa oñgeni una okupandula otyilikutila tyeyovo oyei: Soka ñgeno ukahi nokuenda nomaande, pahe apamoneka omunthu umwe ekuyaulamo. Okuti moyaulwamo vala oende nokeumbo, etyi omunthu oo alinga otyilimbwa? Au! Mopandula omunthu oo mokonda wekuhupisa! Tyelifwa notyo, onthue tuesukisa okupandula unene Jeova na Jesus mokonda yotyilikutila tyeyovo. Omuenyo wetu utei kuvo! Vetuyovola kononkhali no nonkhia. Mokonda vakala noluembia nonthue, pahe tuna ekevelelo liokukakala apeho Momphangu Yombembwa pano pohi!

18, 19. (a) Omokonda yatyi okukala omunthu wa Jeova katyikutilisa owoma? (b) Oñgeni okuumbila Jeova tyipondola okukukalesa nomuenyo ukahi vali nawa?

¹⁸ Okuti ove upandula etyi Jeova ekahi nokukulingila? Inkha o ngotyo, okulipakula nokumbatisalwa otyipuka otyiwa upondola okulinga. Okulipakula okupopila Huku okuti uhanda okulinga ehando liae apeho. Okuti upondola okutila owoma wokupopila ngotyo Huku? Au! Jeova ukuhandela otyiwa, iya mayambe vana valinga ehando liae. (Hebreus 11:6) Tyina upakula omuenyo wove ku Huku ombatisalwa, omuenyo wove kamaukala omapita, mahi maukala vali nawa! Omukuatate umwe womanima 24 wambatisalua etyi ankho nkhele omututu, wati, “Ankho nakevelele alo ndyikala omukulu, tyafuile ñgeno nanoñgonoka ovipuka ovinyingi, mahi okulipakula ku Jeova tyandyakulila komahongaiyo ouye.”

¹⁹ Jeova ukuhandela otyiwa. Mahi, Satanasi una elungavi iya kesukile noove. Inkha umulandula kekuavela natyike otyiwa. Oñgeni apondola okukuavela etyi ehena? Satanasi utupu onondaka onongwa, utupu ekevelelo nalike. Upondola okukuavela ekevelo likahi omapita mokonda olio ena!​—Revelação 20:⁠10.

20. Oityi omukuendye apondola okulinga opo elipakule iya ambatisalwa? (Tupu tala okakasa kati “Matyikukuatesako Okukula.”)

²⁰  Okupakula omuenyo wove ku Jeova etokolo limwe ewa ove upondola okulinga. Okuti wafuapo opo utyilinge? Inkha wafuapo uhatile owoma wokulinga omulao oo. Mahi inkha ulitehela okuti kuafuilepo, undapesa onondonga mbukahi monthele ei opo utualeko okukula. Paulu wapopilile ovakuatate ko Filipu opo vatualeko okukula. (Filipenses 3:16) Inkha ulandula elondolo olio, apa katutu mohande okupakula omuenyo wove ku Jeova ombatisalwa.