VOHE Kuateseiko Ovana Venyi Okukala no “Nondunge pala Eyovo”

1, 2. Omokonda yatyi ovohe vamwe vasukalala unene tyina ovana vavo vahanda okulipakula ku Jeova nokumbatisalwa?

OVALONGWA ovanyingi vo Mbimbiliya velipakula ku Jeova avambatisalwa. Ovanyingi puvo ovana vekulila motyili iya vaholovona okuumbila Huku. (Salmo 1:1-3) Inkha Umukristau una ovana, ove hamwe ukevelela onthiki omona wove mambatisalwa.—Tala 3 João 4.

² No ngotyo, hamwe wasukalala unene. Tyafuile wamona ovakuendye ovanyingi vambatisalwa iya konyima avahimbika okulipula inkha okuendela mo nondonga mba Huku tyina umwe esilivilo. Alo umwe vamwe vayekapo okuumbila Jeova. Moluotyo, pamwe upondola okusukalala inkha ovana vove vahimbika okuumbila Jeova, mahi konyima avayekepo ohole ankho vena notyili. Omona wove hamwe upondola okukala ngo Vakristau mo Efesu potyita tyotete. Jesus wevepopilile okuti: “Wayekapo ohole ankho una ponthyimbi.” (Apocalipse 2:4) Oñgeni upondola okukuatesako ovana vove okutualako nohole vena notyili, “avakulu pala eyovo”? (1 Pedro 2:2) Tupondola okulilongesila kongeleka ya Timoteo.

 3. (a) Oñgeni Timoteo akala Omukristau iya oityi alinga novipuka elilongesa? (b) Ovipuka patyi vitatu Paulu apopilile Timoteo?

³ Apostolu Paulu watalelapo o Listra otyikando tyo tete menima 47. Tyafuile o pomuvo opo omukuendye Timoteo elilongesa konthele ya Jesus. Waendela muetyi elilongesa iya etyi palamba omanima evali ahimbika okutalelapo omawaneno na Paulu. Etyi palamba omanima 16, apostolu Paulu wahonekela Timoteo okuti: “Tualako movipuka welilongesa nokuevitavela, nokuhinangela ovanthu vekulongesa-vio iya nokuti tunde pouna wanoñgonoka ovihonekwa vikola [Ovihonekwa vio Hebreu], vipondola okukukalesa no nondunge pala eyovo, mokonda yekolelo mu Kristu Jesus.” (2 Timóteo 3:14, 15) Tala okuti Paulu wapopile okuti Timoteo (1) wanoñgonoka ovihonekwa vikola, (2) wetavela ovipuka elilongesa iya (3) wakala no nondunge pala eyovo, mokonda yekolelo mu Kristu Jesus.

 4. Oityi ove uhole okuundapesa pala okukuatesako ovana vove? (Tala olutalatu pefo pahimbikila onthele.)

⁴ Inkha ove una ovana, tyotyili uhanda ovana vove vanoñgonoke Ovihonekwa. Alo umwe ovana ovatutu vapondola okunoñgonoka ovanthu nomahipululo apopiwa mo Mbimbiliya. Eongano lia Jeova likahi nokulinga omikanda ominyingi, no nombulusula, no novidiu ovohe vapondola okuundapesa pala okukuatesako ovana vavo. Povipuka ovio, ovipi vikahi melaka liove? Ovana vove vesukisa okunoñgonoka etyi tyikahi mo Mbimbiliya opo vakale noupanga wapama na Jeova.

 5. (a) Oityi ondaka “okuvitavela” ihangununa? (b) Oñgeni tutyii okuti Timoteo wakuatesilueko okutavela onondaka onongwa konthele ya Jesus?

⁵ Katyituuka okulongesa vala ovana konthele yovanthu nomahipululo Ombimbiliya. Hinangela okuti Timoteo nae wakuatesilueko opo “evitavele.” Onondaka mbo Gregu Paulu apopia mbuhangununa “okukala nonthumbi” ine “okutavela okuti otyipuka tyimwe otyili.” “Tunde pouna”, Timoteo ankho wii Ovihonekwa vio Hebreu. Konyima, akala nonthumbi yokuti Jesus o Mesia. Timoteo akala nekolelo liapama, ambatisalwa konyima aundapa na Paulu movilinga vioumisionaliu.

 6. Oñgeni ove upondola okukuatesako ovana vove okukala nekolelo Mondaka ya Huku?

⁶ Oñgeni upondola okukuatesako ovana vove okukala nekolelo nga Timoteo, opo navo “vetavele etyi velilongesa”? Tete, pwa-elundo. Opo omunthu akale nekolelo liapama, tyesukisa omuvo. Wahasoke okuti mokonda ove utavela otyipuka tyimwe, novana wove mavetyitavela. Kese mona una okuundapesa “onondunge mbae ambuho” opo akale nekolelo liapama mo Mbimbiliya. (Tanga Romanos 12:1.) Inkha una ovana, upondola okuvekuatesako okupameka ekolelo liavo, haunene tyina valinga omapulo. Tutalei oityi tupondola okulilongesila kongeleka ya tate umwe.

7, 8. (a) Oñgeni he umwe alekesa oumphua-lundo tyina alongesa omona wae? (b) Onalupi ove wesukisa okupwa elundo nomona wove?

⁷ Tomas, una omona omukainthu una omanima 11, wapopia okuti pamwe omona wae umupula okuti: “Okuti onthue tuatuka kovinyama?” ine “omokonda yatyi onthue tuhaholovonena ovatumini votyilongo, opo ouye ukale vali nawa?” Pamwe, Tomas una okulityilika otyituwa tyokupopila omona wae etyi ena okutavela. Tomas utyii okuti katyesukisile okupopila omona wae ovipuka ovinene opo etavele otyili.

⁸ Tupu, Tomas utyii okuti wesukisa okupwa elundo opo akuateseko omona wae. Tyotyili, Ovakristau aveho vesukisa okupwa elundo. (Colossenses 3:12) Tomas waimbuka okuti ankho wesukisa omuvo, nokutomphola unene no mona wae opo emukuateseko okukala nekolelo. Ankho wesukisa okumukuatesako okusokolola konthele yetyi elilongesa mo Mbimbiliya. Wati: “Mononthele mbakolela unene, ame nomukai wange tuhanda okuimbuka inkha tyili omona wetu utavela umwe etyi ekahi nokulilongesa. Tyina alinga omapulo onthue tutyihole unene. Tyotyili, ame ndyisukalala unene tyina omona wetu ehetulingi omapulo.”

 9. Oñgeni upondola okukuatesako ovana vove okuyumba onthumbi Mondaka ya Huku?

⁹ Tyina ovohe valongesa noumphua-lundo, mokueenda kuomuvo ovana vavo mavanoñgonoka inkha ekolelo liavo likahi nokukula. (Efésios 3:18) Tyina tuvelongesa, tuna okutalela keti liavo nonkhalelo vanoñgonoka ovipuka. Putyina ekolelo liavo kuetyi velilongesa lipama, mavetyivili okuyakulila omatavelo avo. (1 Pedro 3:15) Mongeleka, okuti ovana vove vetyivila okuhangununa no Mbimbiliya oityi tyimoneka-po tyina omunthu amankhi? Okuti vetavela kuetyi Ombimbiliya ipopia konthele yononkhia?a (Tala onondaka pokatoi.) Hinangela okuti okupwa elundo opo ukuateseko ovana vove okuyumba onthumbi Mondaka ya Huku, matyikuhambukiswa.—Deuteronômio 6:6, 7.

10. Onkhalelo patyi onkhuavo yokulongesa ovana yakolela unene?

¹⁰ Ongeleka yove yakolela unene opo ukuateseko ovana vove okukala nekolelo. Estefania, una ovana vetatu ovahikuena wati: “Alo umwe tyina ovana vange ankho ovatutu, ame ankho ndyilipula okuti: ‘Okuti ndyipopila ovana vange omokonda yatyi ndyitavelela okuti Huku oko ekahi, nohole ena nonthue iya nouviuki wae? Okuti ovana vange vetyimona umwe okuti ame ndyihole Jeova?’ Ame hipondola okukevelela okuti ovana vange mavetavela Kondaka ya Huku inkha ame hityilingi.”

11, 12. Onondunge oityi iya oñgeni tutyii okuti otyo katyitei keti liomunthu?

¹¹ Tuelilongesa okuti Timoteo ankho una (1) enoñgonoko Liovihonekwa, iya (2) utavela ovipuka elilongesa. Mahi oityi Paulu ankho ahanda okupopia etyi ati, ovihonekwa vikola ankho vipondola okukalesa Timoteo “no nondunge pala eyovo”?

¹² Omukanda Estudo Perspicaz das Escrituras Volume 3, wahangununa okuti mo Mbimbiliya ondaka onondunge yakutikinya “ounongo wokutetulula ovitateka iya nokulityilika-vio, ounongo wokulinga ovipuka tuapanga iya nokuavela onondonga. Okukala no nondunge tyelikalela noutyova.” Ombimbiliya ipopia okuti “momutima womona muna oumphuki.” (Provérbios 22:15, okatoi) Mokonda onondunge tyelikalela nowova, ngotyo okukala no nondunge otyilekeso tyokuti omunthu ukahi nokukula motyili. Omunthu ukahi nokukula motyili una onthilo na Jeova iya uhanda okumutavela, ketyilingi vala mokonda pahe omukulu.—Tanga Salmo 111:10.

13. Oñgeni ovakuendye vapondola okulekesa okuti vena onondunge pala eyovo?

¹³ Ovakuendye vokualongoka nawa “kavatahua-tahua ngomanyonda elunga,” nomahando avo muene ine nomahongiliyo ovakuendye vakuavo. (Efésios 4:14) Mahi, vena “onondunge mbokupunga etyi tyaviuka netyi tyapenga”. (Hebreus 5:14) Ngotyo, valinga omatokolo aviuka, alo umwe tyina ovohe ine omukulu umwe eheli popepi. (Filipenses 2:12) Onondunge ombo, mbesukisa pala okuyovoka. (Tanga Provérbios 24:14.) Oñgeni ove upondola okukuatesako ovana vove okukala no nondunge ombo? Ove una okukala nonthumbi yokuti ovana vove vetyii etyi tyakolela vali kuove. Ovana vove vena okunoñgonoka okuti ove ukahi nokulinga ononkhono mbokuendela movitumino vio Mbimbiliya muetyi upopia netyi ulinga.—Romanos 2:21-23.

14, 15. (a) Oityi omukuendye uhanda okumbatisalwa ena okusoka? (b) Oñgeni ove upondola okukuatesako ovana vove okusokolola kouwa utundilila kokutavela ovitumino via Huku?

¹⁴ Mahi, opo ukuateseko ovana vove okukala nekolelo, katyituuka vala okuvepopila etyi tyaviuka netyi tyapenga. Ove wesukisa okuvekuatesako okusoka komapulo aa: ‘Omokonda yatyi Ombimbiliya iilika ovipuka vikahi ngoti oviwa unene? Oñgeni ndyipondola okukala nonthumbi yokuti ovitumino vio Mbimbiliya apeho vindyetela ouwa?’—Isaías 48:17, 18.

¹⁵ Inkha omona wove uhanda okumbatisalwa, mukuatesako okusoka kovilinga otyo matyimuetela. Oñgeni elitehelela konthele yovilinga ovio? Ouwa patyi utundilila-ko? Ovitateka patyi makala navio? Omokonda yatyi ononkhano onongwa mbakolela vali unene tyipona ovitateka? (Marcos 10:29, 30) Tyakolela unene omona asoke komapulo oo tyina nkhele ehenembatisalwe. Kuatesako omona wove okusokolola kouwa utundilila kokutavela iya nokovitateka vitundilila kokuhetavela ku Jeova. Ngotyo, metavela okuti okuendela monondonga mbo Mbimbiliya apeho matyimuetela ouwa.—Deuteronômio 30:19, 20.

16. Oityi ovohe vapondola okulinga inkha ekolelo liomona wavo wambatisalua likahi nokutepuluka?

¹⁶ Oityi ove upondola okulinga inkha omona wove wambatisalua uhimbika okukala nondima konthele yotyili? Mongeleka, omona wove upondola okuhimbika okuhanda okulinga ovipuka vio mouye. Ine omona wove upondola okuhimbika okusoka inkha tyilityili okuendela movitumino via Jeova tyipondola umwe okumuetela ouwa. (Salmo 73:1-3, 12, 13) Onkhalelo mokumbulula omona wove ipondola okumukuatesako okutualako okuumbila Jeova ine okuhatualako. Tyilinge omona omututu ine wekula-le uhemuyayese mokonda yotyo. Mahi, mulekesa okuti umuhole iya uhanda okumukuatesako.

17, 18. Inkha omukuendye umwe una ondima konthele yotyili, oñgeni ovohe vapondola okumukuatesako?

¹⁷ Omukuendye wambatisalua wapakula omuenyo ku Jeova. Elipakulo olio omulao wokukala nohole iya nokuumbila Jeova nomutima wae auho. (Tanga Marcos 12:30.) Ku Jeova, omulao welipakulo wakolela unene iya nonthue ongotyo tuutala. (Eclesiastes 5:4, 5) Hinangelesa omona wove konthele yotyo. Mahi tete, tanga nokulilongesa omikanda eongano lia Jeova lialinga pala ovohe. Konyima, nokankhenda iya momuvo ukahi nawa, lekesa komona wove okuti etokolo alinga liokulipakula ku Jeova ambatisalwa liakolela unene iya matyimuetela ononkhano onongwa.

¹⁸ Mongeleka, ove upondola okuvasa onondonga onongwa mo apendise yati “Os Pais Perguntam” momukanda Os Jovens Perguntam—Respostas Práticas, Volume 1. O apendise oyo ipopila ovohe okuti kavapondola okusoka liwa-liwa okuti omona wavo kahande vali otyili, mahi vena okuovola okunoñgonoka omokonda yatyi asokela ngotyo. Hamwe ukahi nokuhindilwa vala na vakuavo ine hamwe waliwa nounye. Ine hamwe ulitehelela okuti kekahi nokuundapela nawa Jeova nga vakuavo. Tupu, o apendise yahangununa okuti ovitateka ovio kavilekesa okuti omona wove ketavela etyi ove utavela. Otyo tyimoneka mokonda yovitateka vimwe ena. O apendise ilekesa oñgeni ovohe vapondola okukuatesako omona wangwangwana konthele yotyili.

19. Oñgeni ovohe vapondola okukuatesako ovana vavo okukala no “nondunge pala eyovo”?

¹⁹ Mokonda una ovana, una otyilinga otyinene “tyokuvetekula, nokuveviyula nokuvelongesa ovitumino via Jeova.” (Efésios 6:4) Ngetyi tuelilongesa, otyo tyilekesa okuti ove una okulongesa ovana vove etyi Ombimbiliya ipopia iya nokuvekuatesako okutavela etyi velilongesa. Tyina ekolelo liavo liamapame, mavakala nehando liokulipakula ku Jeova iya nokumuavela atyiho vena. Ondaka ya Jeova, nospilitu yae iya no nonkhono ulinga vipondola okukuatesako ovana vove okukala no “nondunge pala eyovo.”