Uhayekepo “Onondunge Mbove Onongwa”!

1, 2. Omokonda yatyi ovanthu vakembela unene, iya oñgeni vetyilinga? (Tala olutalatu pefo pahimbikila onthele ei.)

HONO ovanthu vakemba unene. Otyo katyituhuvisa, mokonda Ombimbiliya ipopia nokuayandyuluka okuti Satanasi Eliapu omunongo kokukemba ovanthu iya oe ukahi nokutumina ouye uno. (1 Timóteo 2:14; 1 João 5:19) Mokonda onthyulilo youye ikahi popepi, onyengo ya Satanasi ikahi nokuliyawisa mokonda utyii ‘okuti omuwo wae kauhi.’ (Revelação 12:12) Ngotyo, tupondola okukevelela okuti vana vahongiliyua Neliapu mavatualako okukemba vali unene, haunene, mavaovola okukemba vana vaumbila Jeova.

² Ono jornale, no televisau, no Internete, mbukahi nokuundapeswa opo vayandyanese omatutu konthele Yonombangi mba Jeova, nomatavelo avo. Pamwe kavapopi otyili atyiho ine vakemba umwe. Ovanthu vamwe vetavela komatutu oo avanumana, avahaovola vali okutala inkha otyili umwe.

 3. Oityi tyipondola okutukuatesako okuhayondua?

³ Tupandula unene mokonda tuna Ondaka ya Huku itukuatesako okuliyakulila komatutu a Satanasi, mokonda “ina esilivilo . . . pala okuviukisa ovipuka.” (2 Timóteo 3:16) Etyi apostolu Paulu ahonekele tyitulekesa okuti Ovakristau vamwe mo Tesalonika ankho vekahi nokuyondyua nomatutu. Wevehonekelele okuti: “Muhayekeipo onondunge mbenyi onongwa.” (2 Tessalonicenses 2:1, 2) Oityi tupondola okulilongesila kelondolo olio Paulu aavele noluembia, iya oñgeni tupondola okuendelamo?

 4. Oñgeni Ovakristau mo Tesalonika valondolelwe konthele “yonthiki ya Jeova”? Oñgeni tukahi nokulondolwa hono?

⁴ Momukanda wae wotete ahonekela ewaneno mo Tesalonika, Paulu walondolele konthele “yonthiki ya Jeova” ikahi popepi. Ankho kahande ovakuatate vae vanguanguane ine okukala tyehei etyi mavalingi. Mahi, wevepopilile okuti “ovana votyitei,” iya ayauisako okuti “tukalei tyipahi nokutualako tyalunguka.” (Tanga 1 Tessalonicenses 5:1-6.) Hono tukahi nokukevelela ehanyauno lio Mbambilonia Onene, onongeleya mbomatutu ouye auho. Ehanyauno olio, olio malilekesa okuti onthiki onene ya Jeova yahimbika. Tyotyili, tuanoñgonoka oñgeni Jeova mafuisapo evangelo liae. Tupu mewaneno tupewa apeho omahinangeleso omawa maetukuatesako okukala tyafuapo pala onthiki ya Jeova. Inkha tutehelela omalondolo oo tupewa apeho, matupameka etokolo lietu liokuumbila Huku ‘nonondunge mbetu ambuho.’​—Romanos 12:1.

5, 6. (a) Oityi Paulu apopile momukanda wae wavali ahonekelele ova Tesalonika? (b) Oityi Jesus makalinga apa katutu, iya oityi tuesukisa okulipula?

⁵ Paulu wahonekelele ova Tesalonika omukanda wavali. Momukanda oo, wahoneka konthele yononkhumbi mbukahi nokuya, tyina Tatekulu Jesus ameya okukoyesa “vana vehei Huku, na vana vehetavela onondaka onongwa.” (2 Tessalonicenses 1:6-8) Mokapitulu 2 komukanda oo, Paulu wahoneka okuti vamwe mewaneno ‘vatumphulukile’ mokonda ankho vasoka okuti onthiki ya Jeova ikahi unene popepi. (Tanga 2 Tessalonicenses 2:1, 2.) Ovakristau votete ankho kavanoñgonokele nawa oñgeni evangelo lia Jeova malifuisuapo. Otyo Paulu apopile etyi ahoneka konthele yeulo eli. Wati: “Tuna enoñgonoko liahafuilepo, nokuula monkhalelo yahafuilepo, mahi tyina tuamakala nenoñgonoko liokuafuapo nokuula monkhalelo yafuapo, viokuahafuilepo kamavikalako vali.” (1 Coríntios 13:9, 10) Mahi, ankho vapondola okutualako nekolelo mokutehelela omalondolo a Jeova ahonekelwe na Paulu, na apostolu Petulu, novakuatate ovakuavo ovalembulwa vekolelo.

⁶ Opo vaviukise onkhalelo yavo yokusoka, Huku watumine Paulu okupopia okuti tyina nkhele onthiki ya Jeova yeheneye, ovanthu ovanyingi mavatyitukilapo otyili ‘nokutomba ovitumino’.a Konyima yotyo, momuvo Huku aholovona, Jesus “makanyimako” aveho vokuayondyua. Paulu wapopile okuti mavakoyeswa mokonda ‘kavetavelele tupu ankho kavehole otyili.’ (2 Tessalonicenses 2:3, 8-10) Tuesukisa okulipula: ‘Okuti ndyihole umwe otyili? Okuti ndyililongesa Omutala ou Womulavi nomikanda omikuavo Huku aavela ovanthu vae ouye auho opo ndyinoñgonoke nawa omalongeso Ombimbiliya?’

7, 8. (a) Ovipuka patyi vimwe Ovakristau votete ankho vesukisa okulityilika? (b) Hono, oityi tyipondola okunyona Ovakristau?

⁷ Etyi tyilongeswa no vokuatyitukilapo otyili, hatyoko vala tyipondola okunyona Ovakristau. Paulu wahonekelele Timoteo okuti “okukala nohole nonombongo, omwii wovipuka aviho ovivi.” Tupu wapopile okuti “vamwe mokuovola ohole oyo, vayapulwa mekolelo, avelivange aveihamenua unene.” (1 Timóteo 6:10) “Ovilinga violutu” navio vipondola okutuetela ovitateka.​—Gálatas 5:19-21.

⁸ Paulu walondolele nononkhono ova Tesalonika konthele yavana aihanene okuti “ono apostolu mbomatutu.” Vamwe puvo ankho vapopia “ovipuka viahaviukile opo vakokele ovalongwa kuvo.” (2 Coríntios 11:4, 13; Atos 20:30) Jesus wapandele ewaneno mo Efesu mokonda ankho kavayekela mewaneno “ovanthu valinga ovivi.” Valekesile okuti ovalume ovo, ono apostolu mbomatutu, ononkhembi. (Revelação 2:2) Momukanda wavali ahonekelele ova Tesalonika, Paulu waava elondolo eli: “Vakuatate onthue tumutuma okuti, menyina lia Tatekulu Jesus Kristu, yapukei kovakuatate vahaende monkhalelo yaviuka.” Tupu apopi konthele Yovakristau ankho ‘vahahande okuundapa.’ (2 Tessalonicenses 3:6, 10) Ngotyo, inkha ankho vesukisa okuyapuka ko vokuananga ine vokuna ondende, ankho tyakolela vali unene okulityilika vana vahimbika okutyitukilapo otyili! Ovakuatate ovo, ankho vena okulityilika okulinga oupanga novanthu ovo opo vahanyonwe. Nonthue hono otyo tuna okulinga.​—Provérbios 13:20.

 9. Omokonda yatyi tuesukisila okulunguka inkha umwe utulingisa okufuanyeka ovipuka viahapopilwe Mombimbiliya ine okupopia omapita eongano lia Jeova?

⁹ Tuhungi mononkhumbi ononene, no konthyulilo youye uno wovivi, moluotyo, omalondolo Jeova aavelele Ovakristau votete, hono akolela vali unene. Tyotyili katuhande “okutavela okankhenda ka Huku tuahatokalele, konyima atukepesela.” Inkha tulinga ngotyo, matupumbwa omuenyo wahapu. (2 Coríntios 6:1) Tuesukisa okulunguka inkha umwe wenda komaliongiyo etu otyo aovola okutuhongiliya okufuanyeka ovipuka viahapopilwe Mombimbiliya ine okupopia omapita ovakulu vewaneno novaumbili ovakuavo va Huku.​—2 Tessalonicenses 3:13-15.

10. Ovakristau mo Tesalonika vapopililwe valandule tyi?

¹⁰ Paulu walondolele ovakuatate vae mo Tesalonika opo “vatualeko tyapama” nokutualako okuendela muetyi velilongesa. (Tanga 2 Tessalonicenses 2:15.) Omalongeso patyi Paulu ankho ekahi nokupopia? Otyetyi valongesilwe na Jesus, netyi Huku atumine Paulu novakuavo okuhoneka. Ankho hatyetyi ko valongesilwe monongeleya mbomatutu. Paulu wapandele ovakuatate vae mewaneno lio Korintu, mokonda ngetyi ahonekele, ‘movipuka aviho vemuhinangelele iya avakakatela muetyi evelongesile.’ (1 Coríntios 11:2) Omalongeso oo, atunda Mondaka ya Huku iya apondola okuyumbwa onthumbi.

11. Oñgeni ovanthu vamwe vapondola okukala tyina vayondyua?

¹¹ Etyi ahonekela ova Hebreu, Paulu wapopile ononkhalelo onombali mbupondola okulingisa Ovakristau okuhatualako nekolelo noukuatyili ku Jeova. (Tanga Hebreus 2:1; 3:12.) Wahonekele konthele ‘yokuyapuka,’ ‘nokuhondovoka’ ku Jeova. Mongeleka, omunthu upondola okuehetyimono tyina owato ukahi nokuhondovoka konthele yelunga, iya katutu-katutu otyo wenda vali nokokule. Mahi, tupu upondola okuumona liwa eukokela konthele. Onongeleka ombo onombali, mbulekesa etyi tyipondola okumoneka inkha omunthu uyeka okuyondyua nokuyeka onthumbi yae motyili itepuluke.

12. Oityi tyipondola okunyona oupanga wetu na Jeova?

¹² Vamwe mo Tesalonika tyafuile vayekele vayondyue. Okuti otyo tyipondola okumoneka hono? Ovipuka ovinyingi vipondola okutuyapula hono. Soka konthele yo noola ononyingi ovanthu vapeselela mo Internete, nokutala otelevisau, no momawela, no mokutyinga, nokuyumba ombola novikuavo vali. Kese tyimwe povipuka ovio tyipondola okutalula Omukristau atepulula ombili yae movilinga via Jeova. Oityi tyipondola okutundililako? Upondola okuyekapo okulikuambela nomutima auho, nokulilongesa Ondaka ya Huku, nokuenda komaliongiyo, nomovilinga viokuivisa. Oityi tupondola okulinga opo tuhayekepo onondunge mbetu onongwa?

13. Ngetyi tyaulilwe Mombimbiliya, otyituwa patyi ovanthu ovanyingi vena, iya oityi tyipondola okuyakulila ekolelo lietu?

¹³ Tuesukisa okuhinangela okuti ouye wa Satanasi ukahi konthyulilo, iya okupesela omuvo novanthu vehetavela okuti tukahi “mononthiki mbonthyulilo” tyipondola okutunyona. Apostolu Petulu wahonekele konthele yomuvo wetu okuti: “Makukeya ovanthu vomukuele nomikuele viavo, avakalinga ngetyi ovo muene vahanda. Iya avapopi okuti: ‘Tatekulu watilue meya ulipi? Tunde etyi ovakuaukulu vetu vankhia ovipuka vikahi nokutualako ngetyi ankho vikahiale konthyimbi yovipuka aviho.’” (2 Pedro 3:3, 4) Okutanga Ondaka ya Huku ononthiki ambuho, nokulilongesayo apeho matyitukuatesako okuhinangela okuti tukahi “kononthiki mbonthyulilo.” Ngetyi tyaulilwe Mombimbiliya, ovanthu vokutyitukilapo otyili vahimbika kohale iya alo hono okovekahi. “Omunthu watomba ovitumino” nkhele okuekahi iya uyele ovaumbili va Huku. Mokonda yomahunga oo aeho, tuesukisa okuahalimbuako okuti onthiki ya Jeova ikahi popepi.​—Sofonias 1:7.

14. Oñgeni okuundapa nombili movilinga via Huku tyituyakulila?

¹⁴ Onkhalelo onkhuavo maitukuatesako okuhayekepo onondunge mbetu onongwa, okuivisa apeho onondaka onongwa Mbouhamba. Ngotyo, etyi Jesus Kristu atumine ovalanduli vae valongese ovanthu movilongo aviho opo vakale ovalongwa nokuvelongesa valinge etyi alongesile, ankho ukahi nokupopia okuti mayakulila ovalanduli vae. (Mateus 28:19, 20) Opo tulinge etyi atuma, tuesukisa okuundapa nombili movilinga viokuivisa. Okuti ovakuatate mo Tesalonika ñgeno vaivisile nehambu inkha vetyilingile vala mokonda vetyitumwa? Hinangela etyi Paulu evehonekelele, wati: “Muahanyimei otupia tuospilitu. Muhatombei ovilinga viokuula.” (1 Tessalonicenses 5:19, 20) Omaulo tulilongesa, nokupopila vakuetu, tyotyili ahambukiswa!

15. Ovipuka patyi tupondola okupopia mefendelo liombunga?

¹⁵ Tyotyili, atuho tuhanda okukuatesako onombunga mbetu okuyawisa ounongo wavo movilinga viokuivisa. Ovakuatate ovanyingi nonomphange, mefendelo liombunga vapolapo omuvo opo velilongese etyi mavakapopia movilinga viokuivisa. Hamwe mupondola okulipongiya oñgeni mamukatalelapo ovanthu. Mamukapopia konthele yatyi? Oityi mupondola okupopia matyikuatesako omunthu okukala nesuko liokulilongesa vali? Omuvo patyi waviuka wokukemutalelapo? Tupu, ovanyingi vapola omuvo mefendelo liombunga opo velipongiye pala omaliongiyo. Okuti ombunga yove ipondola okulinga ngotyo? Okuava omakumbululo momaliongiyo, matyipameka ekolelo liove, nokukukuatesako okuhayekepo onondunge mbove onongwa. (Salmo 35:18) Efendelo liombunga malituyakulila kokufuanyeka ovipuka viahapopilwe Mombimbiliya no kokukala nondima.

16. Oityi tyiavela ondundo Ovakristau ovalembulwa opo vahayekepo onondunge mbavo onongwa?

¹⁶ Momanima omanyingi Jeova ukahi nokukuatesako ovanthu vae okunoñgonoka vali nawa omaulo Ombimbiliya. Otyo tyitukalesa nonthumbi yokuti matukapewa ononkhano onongwa komutwe. Ovalembulwa vena ekevelelo liokukakala na Kristu keulu. Tyotyili ekevelelo olio, liveavela ondundo yokuhayekepo onondunge mbavo onongwa! Tupondola okulandula onondaka Paulu ahonekelele ova Tesalonika okuti: “Vakuatate muholwe na Jeova, tumupandulilako apeho ku Huku mokonda Huku wemuholovona . . . mokumusukukisa nospilitu, nekolelo lienyi motyili.”​—2 Tessalonicenses 2:13.

17. 2 Tessalonicenses 3:1-5 ituavela ondundo patyi?

¹⁷ Vana vakevelela okupewa omuenyo wahapu pano pohi navo vesukisa okulinga ononkhono mbokuhayekepo onondunge mbavo onongwa. Inkha una ekevelelo liokukakala pano pohi apeho, tavela apeho onondonga onongwa Paulu ahonekelele ova Tesalonika. (Tanga 2 Tessalonicenses 3:1-5.) Tuesukisa okupandula unene onondaka ombo onongwa. Omikanda viahonekelelwe ova Tesalonika vitulondola kokufuanyeka ovipuka viahapopilwe Mombimbiliya, nokuhetavela onondaka mbahaviukile. Mokonda tukahi nokuhika konthyulilo, tupandulei unene omalondolo oo tupewa.