Hateka Nekoleleyo

“Tuhatekei nekoleleyo movilinga tuapewa.”—HEBREUS 12:1.

1, 2. Oityi Ombimbiliya yapopia tyelifwa nomuenyo wo Vakristau votyotyili?

KESE nima ovanthu ovanyingi vahateka okulilola. Vamwe puovo, vahateka unene, mokonda vahanda okufinda. Mahi, ovakuavo vetyii okuti kavapondola okufinda. Kuvo, tyakolela okuhateka vala alo konthyulilo.

² Ombimbiliya tupu ipopia konthele yokuhateka. Ilekesa okuti Ovakristau votyotyili vekahi ngo vahateki vahanda okuvasa ondyambi. Vana valinga ononkhono mbokutyinda omuenyo wo Vakristau, nokutualako nekolelo mu Jeova, vekahi nga vana vahanda okuhika konthyulilo. Apostolu Paulu wapopia okuhateka oko, momukanda wotete ahonekela Ovakristau mo Korintu. Oe wati: “Onwe kamutyii okuti pokuhateka ovahateki aveho vahateka, mahi utambula ondyambi wike vala? Hatekei monkhalelo oyo, na mukavase ondyambi oyo.”—1 Coríntios 9:24.

 3. Oityi Paulu ahandele okupopia etyi ati wike vala utambula ondyambi?

³ Okuti etyi Paulu ati, wike vala utambula ondyambi, ankho uhanda okuti Omukristau wike vala mapewa ondyambi yomuenyo? Au. Ankho upopia etyi ovahateki vokulilola vahatekela. Ovakristau mo Korintu ankho vetyii okuti ovahateki aveho vatokola okufinda, namphila wike vala mapewa ondyambi. Otyo ovahateki aveho velilongesila nawa opo vahateke unene. Aveho valinga ononkhono ononene opo vafinde. Paulu ankho uhanda ovakuatate vae valinge ononkhono mbokutualako nekolelo mu Jeova alo konthyulilo. Ovakristau aveho valinga ngotyo, mavapewa ondyambi yomuenyo uhapu.

 4. Oityi tuna okunoñgonoka konthele yokuhateka kwo Vakristau?

⁴ Onondaka ombo mbutupameka, mahi tupu mbutulunda okusoka nawa oñgeni tutyinda omuenyo wetu. Inkha tuutyinda monkhalelo ihambukiswa Jeova, tuna ekevelo ewa unene liomuenyo uhapu tyilinge keulu ine o Momphangu Yombembwa pano pohi. Mahi omuenyo wo Vakristau ukahi ngo kuhateka mondyila onde unene, ina omaliva omanyingi. Muna ovipuka ovinyingi vipondola okutusoyesa ine okuyekapo ovilinga via Jeova. (Mateus 7:13, 14) Otyo tyihole okupita novaumbili vamwe va Jeova. Omaliva patyi noviponga vikahi mondyila yokuhatekela komuenyo? Oñgeni molityilika vio? Oityi molingi opo uhateke alo ufinda?

Tuna Okukoleleya opo Tufinde

 5. Oityi Paulu apopia mu Hebreus 12:1?

⁵ Etyi papita omuvo, Paulu ahonekela Ovakristau ova Hebreu mo Jelusalei no Judeia. Tupu apopi konthele yovahateki. (Tanga Hebreus 12:1.) Oe wapopia oityi Ovakristau vahatekela, netyi vena okulinga opo vafinde. Tete matutale oityi Paulu ahonekelela ova Hebreu, netyi ahandele valinge. Konyima atutale oityi omukanda oo utulongesa.

 6. Oityi ononkhalamutwe mbonongeleya vahandele okulinga Ovakristau?

⁶ Ovakristau kohale, ankho vali momuvo wepuiya unene. Haunene Ovakristau mo Jelusalei no Judeia, mokonda ononkhalamutwe mbonongeleya mbo va Judeu ankho vakuluminya ovanthu okutavela kuvo. Tete, vahandele ovanthu vetavele okuti Jesus Kristu ankho ondingavivi, uyele ovatumini otyo aipaelwa. Ononkhalamutwe ombo vaipaa Jesus Kristu, pahe ankho vahanda vana vaivisa konthele yae vetyiyekepo. Mu Atos, tutangamo etyi tyaendeleko konyima yo Pendekoste menima 33. Ononkhalamutwe ombo vahataikisa Ovakristau ovikando ovinyingi, opo vayekepo okuivisa. Moluotyo, Ovakristau vekolelo vakala novitateka ovinyingi.—Atos 4:1-3; 5:17, 18; 6:8-12; 7:59; 8:1, 3.

 7. Ovakristau Paulu ahonekela vakalele momuvo wepuiya mokonda yatyi ?

⁷ Tupu, Ovakristau ovo vali momuvo wepuiya, mokonda ankho ehanyu lio Jelusalei likahi popepi. Jesus wevelondola okuti Huku mahanyeko o Jelusalei. Oe wevepopila etyi matyiendeko tyina ehanyu olio liheneye, netyi vena okulinga opo vahupe. (Tanga Lucas 21:20-22.) Jesus wevelondola okuti: “Liyungei nawa opo omitima vienyi vihakale nelelele liokulia unene, nokunwa unene, no kusukalala novipuka viomuenyo, iya onthiki oyo aimuhupula.”—Lucas 21:34.

 8. Oityi tyasoyesile Ovakristau vamwe ine okuyekapo okuumbila Jeova?

⁸ Paulu wahonekela Ovakristau ova Hebreu etyi palamba omanima 30 tunde etyi Jesus apopia onondaka ombo. Oityi tyapita no Vakristau ovo momanima oo 30? Mokonda yovitateka, notyiho tyomasuka-suka avo a kese nthiki, vamwe kavatuaileko okulilongesa konthele ya Jeova nokupameka oupanga wavo nae. (Hebreus 5:11-14) Ovakristau vamwe tyafuile ankho vasoka okuti matyipepuka vali inkha vakala ngo Judeu vakuavo. Nokuti otyo katyapengele, mokonda ova Judeu nkhele ankho vatavela ku Huku Novitumino apele Moisesi. Tupu, mewaneno ankho muna vamwe vakuluminya vakuavo okulandula Ovitumino via Moisesi noviso vio va Judeu. Ovakristau vamwe ankho vevetavela, ovakuavo ankho vevetehelela vala mokonda yowoma. Oityi Paulu apopila ovakuatate vae Ovakristau, okuvepameka opo vatualeko novituwa oviwa nokukolela mu Jeova?

9, 10. (a) Okumanuhula okapitulu 10 Paulu wati Ovakristau ova Hebreu ankho vena okulinga tyi? (b) Oityi Paulu apopila ovilinga viekolelo vio vaumbili va Jeova kohale?

⁹ Jeova wakuatesako Paulu okuhoneka omukanda oo, opo apameke Ovakristau ovo. Mokapitulu 10, tete wahangununa okuti ovitumino via Moisesi “okahi kovipuka oviwa maviya,” nokuti mavaevelwa vala ononkhali mbavo menyina liotyilikutila tya Jesus. Konthyulilo yokapitulu 10, Paulu wati vena okukoleleya opo vapole ouwa kotyilikutila otyo. Oe wati: “Muesukisa okukoleleya, opo tyina muamalingi ehando lia Huku, mupewe etyi mualawa. Mokonda, apa ‘katutu vala,’ iya ‘una meya, mehiki kamasete.’”—Hebreus 10:1, 36, 37.

¹⁰ No nondaka ombo, Paulu wapameka Ovakristau opo vakoleleye. Mokapitulu 12, tupu wevepameka opo vakoleleye, iya ati, “hatekei nekoleleyo,” movilinga muapewa. Mahi, tete wati Huku wemutuma evehonekele konthele yotyipuka otyikuavo, tyikahi mokapitulu 11. Omo, oe wapopia ovipuka vilingwa no vokuna ekolelo liotyotyili, okulekesa oityi ekolelo liotyotyili mu Huku. Oityi apopila tete ekolelo etyi ehenepaleke okupopia konthele yekoleleyo? Omokonda ankho uhanda Ovakristau vanoñgonoke okuti opo vakale nekolelo liotyotyili mu Jeova, vena okukoleleya nokupameka omutima. Oe wapopia ovalume ovanyingi novakai vo kohale vatualako nekolelo mu Jeova no pomivo viepuiya. Otyo ankho matyivatela Ovakristau okukoleleya movitateka viepuiya. Etyi apopia ovilinga viekolelo vio vaumbili ovo aveho va Jeova kohale, Paulu apopila Ovakristau ova Hebreu okuti: “Mokonda tuna ekaka enene lio nombangi mbeliseta nonthue, tupu nonthue tutuleipo omulemo auho nonkhali ituyondya tyihepuiya. Tuhatekei nekoleleyo movilinga tuapewa.”—Hebreus 12:1.

“Ekaka Enene lio Nombangi”

11. Etyi tyalinga “ekaka lio nombangi,” tyituhinangelesa tyi?

¹¹ Paulu wati ovaumbili va Jeova kohale, “ekaka enene lio nombangi mbeliseta nonthue.” Vatuaileko nekolelo mu Jeova alo konthyulilo yomienyo viavo. Otyo tyilekesa okuti no Vakristau vapondola okutualako nekolelo mu Jeova alo umwe pomivo viepuiya. “Ekaka lio nombangi” ankho likahi ngovahateki vatualako okuhateka alo vavitula. Otyo, tyipameka vakuavo okutualako okuhateka alo navo vavitula. Inkha ñgeno tukahi nokuhateka, iya tutyii okuti vokuhateka nawa vekahi nokututala nokutulunda opo tutualeko, ñgeno tualinga ononkhono alo tuhika. Ngotyo, Ovakristau ova Hebreu ankho vesukisa okusoka kovaumbili ovo va Jeova vo kohale. Otyo, ankho tyipondola okuvepa ondundo no kuvehinangelesa okuti navo vapondola “okuhateka nekoleleyo” alo vehika. Tupu nonthue matutyivili.

12. Oityi tulilongesila kekolelo liovanthu Paulu apopia?

¹² Tupondola okulilongesila kekolelo lia vana Paulu apopia, mokonda ovanyingi puvo vali monkhalelo ngo yetu. Noe waliko puetyi Jeova ehenehanyeko ouye nombila onene. Iya onthue tukahiko momuvo Jeova ehenehanyeko ouye wa Satanasi. Jeova waitile Abraiau na Sara vasepo eumbo liavo. Oe evelae okuti mevelingi elongo enene opo limuumbile, iya avakevela omulao oo ufuisuepo. Jeova utuita tuyekepo okulinga omahando etu atulingi etyi ahanda. Oe walaa okuti inkha tulinga ngotyo, matukala omapanga ae iya oe eketuyamba. Moesesi waendele ondyila onde motyilongo tyokuna ovitateka okuenda Kotyilongo Tyomulao. Onthue tukahi mouye wovivi, iya tukevelela ouye omupe Jeova etulaa. Otyiwa tusoke nawa kovaumbili ovo vekolelo. Tupondola okulilongesila kovipuka valingile opo vahambukiswe Jeova, na vina viemunumanesile.—Romanos 15:4; 1 Coríntios 10:11.

Oityi Tyevekuatesako Okuhateka alo Vavitula?

13. Onkhalelo ya Noe ankho yepuiya mokonda yatyi? Oityi tyemuvatela okulinga atyiho Jeova emutumine?

¹³ Oityi tyakuatesako ovaumbili ovo va Jeova okuhateka alo vavitula? Tala etyi Paulu ahoneka konthele ya Noe. (Tanga Hebreus 11:7.) ‘Ombila yahanyeneko ovanthu aveho novinyama, ankho Noe nalumwe eimuene.’ (Gênesis 6:17) Ankho kakuneloke ombila. Mahi, Noe kasokele okuti ombila kamaiya. Omokonda yatyi? Omokonda ankho una onthumbi yokuti apeho Jeova ufuisapo etyi apopia. Tupu Noe kasokele okuti okutavela ku Jeova tyipuiya. Oe walinga nawa-nawa etyi Jeova emutuma. Ombimbiliya yati: “Walinga umwe ngotyo.” (Gênesis 6:22) Noe ankho una okulinga ovipuka ovinyingi. Ankho una okutanga owato, nokuongiya ovinyama, nokulia kuombunga yae no kuovinyama, ankho una okulondola ovanthu konthele yombila onene nokukuatesako ombunga yae okukala nekolelo liapama mu Jeova. Okulinga atyiho Jeova emutumine hapeho ankho tyapepuka. Anthi, ankho una ekolelo mu Jeova, iya akoleleya movilinga ovio. Moluotyo, Jeova wahupisa Noe nombunga yae, eveyambe unene.

14. Oñgeni Abraiau na Sara valekesa okuti vena ekolelo mu Huku? Oityi tulilongesila kuvo?

¹⁴ Paulu wati Abraiau na Sara valinga onthele “yekaka lionombangi mbeliseta nonthue.” Etyi Huku evetuma okuiluka mo Ur, omuenyo wavo aupiluluka. Mahi vali nekolelo enene mu Jeova, iya avemutavela alo mononkhalelo mbepuiya. Ombimbiliya iihana Abraiau okuti “o he yaaveho vena ekolelo,” mokonda walingile ononkhono ononene mbokuumbila Jeova. (Romanos 4:11) Ovakristau ova Hebreu ankho vei nawa omuenyo wa Abraiau nombunga yae, moluotyo, Paulu wapopia vala ovituwa viae vimwe. Mahi, otyo ankho tyilekesa nawa okuti vali nekolelo enene. Paulu wati: “Aveho ovo vankhia nekolelo, namphila kavatambulile ovipuka valawa. Mahi vevimonena kokule avevitavela, nokuivisa kounyingi okuti havatyitwa tyilongo, ovaenda kombanda yoohi.” (Hebreus 11:13) Ekolelo liavo mu Huku noupanga wavo nae, vievevatelele okukoleleya.

15. Oityi Moisesi atyindilile onkhalelo ina akoyelepo?

¹⁵ Omuumbili omukuavo wa Jeova ukahi “mekaka lionombangi,” o Moisesi. Oe wasilepo eumbo liae nga Abraiau. Moisesi wasilepo omunkhima nomalumono mombala yohamba. Waholovonene “okutekulwa onya kumwe novanthu va Huku.” Oityi alingilile ngotyo? Paulu wakumbulula okuti: “Oe ankho utala nawa kondyambi mafetwa.” Tupu wapopia Moisesi okuti: “Oe watualeleko nekolelo ngatyina eete Una uhamoneka komaiho.” (Tanga Hebreus 11:24-27.) Moisesi ankho utyii okuti kuna otyipuka tyakolela vali tyipona “ehambu lionkhali lihasete okupwa.” Kwe Huku ankho omunthu wotyotyili, iya ankho utyii okuti omilao via Huku aviho mavifuisuapo. Otyo, otyo tyemukuatesileko okukola omutima nokukoleleya mononkhalelo mbepuiya. Tupu tyemuvatelele okulinga ononkhono mbokuhongolela ova Isilayeli okutunda mo Egitu okuenda Kotyilongo Valaelwe.

16. Oñgeni tutyii okuti Moisesi kayekelepo okuumbila Huku etyi atiwa kamanyingila Motyilongo Valaelwe?

¹⁶ Abraiau na Moisesi vankhia etyi Huku ehenefuisepo evi evelaele. Etyi ova Isilayeli vehenenyingile Motyilongo Valaelwe, Huku wapopila Moisesi okuti: “Otyilongo mandyipe ova Isilayeli motyimonena kokule, mahi kumanyingilamo.” Mokonda Moisesi na Arau kavetavelele ku Huku pomeva o Meribaa, kavanyingilile Motyilongo Tyomulao. “Vayekele ovanthu vonomphuki vevenumanese unene, iya avalingi etyi tyihankhimaneka [Huku].” (Deuteronômio 32:51, 52) Moisesi ankho utyii okuti kamanyingila Motyilongo Tyomulao, mahi kayekelepo okuumbila Huku. Oe kasokele okuti etokolo lia Huku kaliaviukile. Otyo tutyii mokonda oe waita Jeova akanene nawa omihoko vio Isilayeli. Okuhulililako wevepopila okuti: “Ove una ehambu ove Isilayeli! Olie ukahi ngove, elongo liayovolwa na Jeova, ondyakulilo yove ikukuatesako, nomutunga wove wounene?”—Deuteronômio 33:29.

Etyi Tulilongesilako

17, 18. (a) Oityi tulilongesila “kekaka lionombangi”? (b) Onthele mailandulako maipopi tyi?

¹⁷ Tuelilongesa konthele ya vamwe “mekaka lionombangi mbeliseta nonthue,” ngotyo opo tuhateke alo konthyulilo, tuna okukolela unene mu Huku no momilao viae. (Hebreus 11:6) Ekolelo olio lina okutalelwa monkhalelo tutyinda omuenyo wetu pahe. Tutyii okuti Huku wetulaa omuenyo omuwa komutwe. Tupondola okumona “Una uhamonwa komaiho.” Huku omunthu wotyotyili kuonthue, moluotyo tuhateka nekoleleyo.—2 Coríntios 5:7.

¹⁸ Okuhateka, kwo Vakristau kakuapepukile. Mahi, tupondola okuhika konthyulilo. Onthele mailandulako, maipopi ovipuka vimwe mavituvatela okuhika konthyulilo.

Okuti upondola okuhangununa?

• Oityi Paulu ahonekela konthele yekolelo “lionombangi” mbo kohale?

• Oñgeni okusoka “kekaka enene lionombangi mbeliseta nonthue” tyitulunda okuhateka nekoleleyo?

• Oityi tulilongesila ku Noe, na Abraiau, na Sara, na Moisesi?

[Olutalatu pefo 22]

Abraiau na Sara vatokolele okusapo omuenyo omuwa mo Ur