Ongeleya Yotyotyili Ipondola Okukuetela Ouwa Wahapu!

 1. Inkha “tufuena ku Huku” oityi tukamonako?

YEHOVA una oluembia navana vemuumbila. Inkha ufenda Yehova, mekuavela ononkhaneno onongwa pahetyino, no komutue. Ombimbiliya yati: “Fuenei ku Huku, iya oe mafuene kuonue.”—Tiago 4:8.

 2. Oñgeni tupondola okufuena ku Huku? Iya otyo tyikelikuata ñgeni kumue no malikuambelo etu?

² Opo ufuene ku Huku, una yokulilongesa Ondaka ya Huku no kuyuundapesa momuenyo wove. Inkha ulinga omalikuambelo ekahi kumue nehando lia Yehova, oe matehelela omalikuambelo ove no kuekumbulula. O apostolu Ndjuau wahoneka okuti: “Ei oyo onthumbi tuna mu [Huku], okuti kese etyi tumuita inkha tyikahi kumue nehando liae metutehelela. Haunene, inkha tutyii okuti Huku ukahi nokututehelela putyina tuita, tukala nonthumbi yokuti matutambula ovipuka tuemuita.”—1João 5:14, 15.

3-7. Oñgeni tupondola okukala nounongo utunda ku Huku? Oñgeni ounongo oo upondola okutukuatesako?

³ Tupu, mokutualako nokufuena ku Huku, oe mekuavela ounongo, opo utyivile okupunguhuna ovitateka viomuenyo wanthiki nanthiki. Ombimbiliya yati: “Inkha umue pokati kenyi akambela ounongo, atualeko nokuita ku Huku.”—Tiago 1:5.

⁴ Oñgeni ounongo utunda ku Huku upondola okukukuatesako? Tete, ounongo oo, upondola okukukuatesako okunoñgonoka ovipuka vinumaneka Yehova. Maukukuatesako okunoñgonoka omokonda yatyi ovipuka ovio viapengela, netyi ove upondola okulinga opo ulityilike okulinga ovipuka viatyo ovio. Enoñgonoko olio lipondola okukuamena kovitateka ovinyingi vikahi nokupita novanthu hono. Ngongeleka: okutavela konondonga mba Huku kombinga yovituwa viakohokua, tyiamena ovanthu va Huku kovipuka ovivi. Tyiveamena kokukala omunthimba tyehetyihandele, no komauvela elitambulisua pokulinga oumbalehi. Tupu, tyiamena ovanthu kokukala tyihena ehambu motyinepo no kokulihenga.

⁵ Oityi ounongo utunda ku Huku upondola okukuavela vali? Upondola okukukuatesako okupola esilivilo komuenyo. Upondola okukukuatesako okulinga omatokolo aviuka kovipuka visilivila, ngo kuundapesa nawa onombongo mbove. Mokakala nounongo wokutualako okuovola ovipuka vina vali esilivilo, no kuanya vina vihena esilivilo.

⁶ Ounongo utunda ku Huku, tupu upondola okukukuatesako koupanga wove navakuenyi. Omuenyo wombunga yove upondola okukala nehambu enene. Ounongo utunda ku Huku upondola okupameka vali oupanga wove navakuenyi mefendelo. Tupu, ove upondola okuhumbilua alo umue navana vahafende Yehova.

⁷ Haunene, okukala nounongo utunda ku Huku maukaviukisa onkhalelo yomuenyo wove. Maukekukuatesako okutetulula nawa ovipuka vinumanesa, no vitateka viomuenyo. Tupu, mokakala nonthumbi kombinga yokomutue. Onthumbi oyo, maikukuatesako okukala nomalusoke omawa, nekongoko molutu.—Provérbios 14:30; Isaías 48:17.

 8. Inkha uumbila Huku, kumakala vali nouoma watyi?

⁸ Inkha uumbila Huku yotyotyili, moyovoka kouoma, ukahi nokumonesa emone ovanthu vahaumbila Yehova. Mokonda yokuanoñgonoka okuti ovanthu vokuankhia vetupu vali omuenyo melangalo, kumakala vali nouoma wavana vokuankhia. Tupu, mokonda yonthumbi yokuti Huku makatutilisa vokuankhia, kumakala vali nouoma wokunkhia. Iya mo kuanoñgonoka okuti Huku una epondolo aliho, kumakala vali nouoma noumbanda ine onouanga.—João 8:32.

9-11. Ovalie mavakakala Mouye omupe? Iya ovalie kamavakakalamo?

⁹ Inkha ufuena ku Huku, kukakala vali nouoma wetyi matyikeya komutue. Ngetyi tuelilongesale, Ombimbiliya yapopia ovitateka ovinyingi tuli nokumona hono kombanda yoohi. Yehova utupopila okuti ovitateka evi, vina vala okamuvo okatutu. Mokonda Ouhamba wa Huku apa katutu maukapilulula oohi ino omphangu imue yombembua.—Lucas 21:10, 11, 31; 23:43.

¹⁰ Vana vafuena ku Yehova no kumuumbila, ovo vala mavakakala momphangu oyo yombembua. Ombimbiliya yati: “Apa katutu ondingavivi kamaikalako vali; ove mokemutaindya pomphangu yae, anthi, kepo vali. Anthi, onondalaua mavakapiñgana oohi, avakahambukilua ombembua onyingi.”—Salmo 37:10, 11.

¹¹ Ovanthu vokuanya okutavela ovitumino via Huku, kamavakakala nomuenyo wahapu. (2 Tessalonicenses 1:8, 9) Kamavakakalako vali. Mavekelipaka kumue na Satanasi no vilulu viae onoandyu onombi, mononkhia mbahapu. (Revelação 20:10, 14) Anthi, vana vokulilongesa kombinga ya Yehova no kumuumbila, mavakakala nehambu enene Mouye omupe kombanda yoohi.

12. Oityi Ombimbiliya ipopia kombinga yomuenyo komutue?

¹² Yehova una ovipuka vihuvisa aholekela vana vemuhole! Tala vala etyi Ondaka yae ipopia kombinga yomuenyo Mouye omupe kombanda yoohi:

• Okulia Okunyingi: “Makukakala okulia okunyingi kombanda yoohi. Makukakala okulia kuahapu alo kombanda yonomphunda.”—Salmo 72:16.

• Onondyuo Onongua: “Mavakatunga onondyuo, iya avakakalamo.”—Isaías 65:21.

• Makukakala ovilinga Vihambukisua: “Ovaholovonua vange mavakalia kovilinga viomaoko avo. Kavakaundapa vala avahapolomo natyimue.”—Isaías 65:22, 23.

• Kamakukakala vali Omauvela: “Puvana mavakakala kombanda yoohi, naumue vali makapopia okuti: ‘Ame ndyivela.’”—Isaías 33:24.

• Kamakukakala Vali Oulema: “Komuvo watyo oo, omaiho ovamphoki maakapatuluka, omakutui ovimpholo maakahituluka. Komuvo watyo oo, otyilema matyikalombauka ngombambi, elaka liotyihita mulungu malikaimba no kukawilila nehambu.”—Isaías 35:5, 6.

• Kamakukakala vali onongembia, okuliunga, no nonkhia: “Huku makasekuna ononkhuka momaiho avo, ononkhia, okulila, no nongembia kamavikakalako vali. Mokonda ovipuka ovio aviho mavikalamba.”—Revelação 21:4.

• Kamakukakala vali ovita: “[Huku] makamanako ovita kononthele mbatyo ambuho mbouye.”—Salmo 46:9.

• Makukakala omuenyo wahapu: “Ovaviuki mavapiñgana oohi, iya avakakalamo apeho.”—Salmo 37:29.

13. Olie vala upondola okupilulula oohi ino omphangu yombembua? Omokonda yatyi?

¹³ Ovanthu vetupu epondolo liokulinga ovipuka ovio. Anthi, Yehova una epondolo liokulinga ovipuka aviho apopia. Natyimue tyipondola okumutyilika okulinga etyi ahanda. Ombimbiliya ipopia okuti: “Huku utupu natyimue tyimupona.”—Lucas 1:37.

14. Oñgeni ove upondola okuvasa ondyila ituala komuenyo wahapu?

¹⁴ Mokuundapesa Onombangi mbae, Yehova ukahi nokuavela ovanthu kononthele mbatyo ambuho omphito “yokunyingilila mombundi yahita” no kuendela mondyila ituala komuenyo wahapu. Kala pokati kovanthu ovo vena ehambu, vekahi nokutavela okuendela mondyila oyo yomuenyo. Endela mongeleya yotyotyili, opo ukakale nononkhaneno onongua mba Yehova mbahapu!—Mateus 7:13, 14.