Olie Utiwa Ondyale ya Kristu?

MOKONDA onondaka “ondyale ya Kristu” (anticristo) mbukahi nokuundapeswa ehimbwe movipuka ovinyingi, okupolelela kovatumini alo ko nosinema, otyiwa okulipula okuti: Olie utiwa ondyale ya Kristu? Okuti hono tuesukisa okuovola okunoñgonoka onondaka ombo? Tyotyili, opo tunoñgonoke olie utiwa ondyale ya Kristu, tuna okuhimbikila okuovola mo Mbimbiliya, omu onondaka ombo mbuvasiwa ovikando vitano.

Povahoneki vo Mbimbiliya, o apostolu João vala wapopia onondaka “ondyale ya Kristu.” Wati ondyale ya Kristu olie? Tala onondaka ombo, momukanda wae wo tete: “Vana vange, ei oola yahulilila, iya ngetyi muetyiiva okuti ondyale ya Kristu maiya, pahe kukahiale nokumoneka onondyale ononyingi mba Kristu. Moluotyo, tuanoñgonoka okuti ei oola yahulilila. Vatunda pokati ketu, mokonda ankho havetu-ko-ale . . . Olie onkhembi, ha youna wokuaanya okuti Jesus o Kristu? Omunthu oo, ondyale ya Kristu, una waanya He no Mona.”​—1 João 2:18, 19, 22.

Oityi tulilongesila konondaka ombo? João wapopia “onondyale ononyingi mba Kristu,” okulekesa okuti ondyale ya Kristu ha munthu-ko wike, mahi ovanthu ovanyingi. Onondyale mba Kristu, omaongano ine ovanthu vayandyanesa ounkhembi wokuti Jesus ha Kristu ko ine ha Mesiya ko, nokuhalongesa otyili konthele ya Huku Nomona Wae Jesus Kristu. Onondyale mba Kristu ovokuliti ovo Kristu ine vatumwa nae. Mahi, mokonda “vatunda pokati ketu,” vayapuka mondongeso yotyotyili yo Mbimbiliya. Tupu, ovanthu ovo, ankho okoveli-ale pomuvo João ahoneka omukanda wae, “moola yahulilila.” Mokutala, oola yahulilila, onthyulilo yomuvo wo no apostolu.

Oityi vali João ahoneka konthele yondyale ya Kristu? Etyi apopia konthele yovauli vomatutu, alondola okuti: “Omaulo aeho apopia okuti Jesus Kristu weile akala omunthu, atunda ku Huku. Mahi, omaulo aeho apopia okuti Jesus keile akala omunthu, kaatundile ku Huku. Mahi, oo omaulo ondyale ya Kristu mueivile okuti maiya, iya pahe ikahi-ale mouye.” (1 João 4:2, 3) Momukanda wae wa vali, João wapopia vali okuti: “Ononkhembi ononyingi mbeliyandyana mouye, ovanthu vana vehetavela okuti Jesus Kristu weile akala omunthu. Ou oe onkhembi tupu ondyale ya Kristu.” (2 João 7) Tyayandyuluka nawa okuti João ankho wanoñgonoka okuti ondyale ya Kristu, ovanthu aveho vayandyanesa ounkhembi konthele ya Jesus Kristu, nondongeso yae.

Puetyi João ehenepopie konthele yononkhembi ombo mbonongeleya, Jesus Kristu walondolele ovalanduli vae okuti: “Lungukei kovauli vomatutu, veya kuonwe notyikova tyongi, mahi, mokati omahunyu alia ovanthu.” (Mateus 7:15) Apostolu Paulu tupu walondolele Ovakristau mo Tesalonika okuti: “Muhayekei nawike emuyondye, mokonda tyina onthiki oyo yeheneye, ovanthu vokuayapuka motyili, nomulume ondingavivi nkhele mavaholololwa. Omulume oo, oe makahanyua-ko.”​—2 Tessalonicenses 2:3.

Pomuvo wo no apostolu, ovauli vomatutu, no vokuayapuka motyili, ankho oko vekahi-ale. Iya ankho valinga ononkhono mbokusoyesa ewaneno lio Vakristau. Aveho ovo ankho vokukahi nokuyandyanesa omatutu konthele ya Jesus Kristu, nondongeso yae, vakutikinyua “mondyale ya Kristu” yapopiwa na João. Tyamoneka nawa oñgeni Jeova evetala etyi Paulu apopia okuti ‘makahanyua-ko.’

Iya hono? Omaongano, novanthu onondyale mba Kristu, na hono kavetavela Kristu, nondongeso yae. Vayandyanesa ounkhembi, nomatutu opo ovanthu vehetyivile okuimbuka olie Tate, Jeova Huku, Nomona Wae, Jesus Kristu. Otyiwa tulunguke kounkhembi oo wonongeleya. Tala onongeleka onombali.

Mokueenda kuomanima omanyingi, onongeleya mbukahi nokulongesa Outatu Ukola, upopia okuti He Nomona veli momunthu wike. Neelema olio, ondyale ya Kristu inguanguanesa ovanthu, iya kaiyandyulula nawa olie Jeova Huku, olie Jesus Kristu. Eelema olio, lityika ovanthu vomitima omiwa okulinga etyi Ombimbiliya ivelunda okulinga: okuhetekela Jesus Kristu, nokufuena ku Huku.​—1 Coríntios 11:1; Tiago 4:8.

Onongeleya tupu mbunguanguanesa ovanthu mokuundapesa ono Mbimbiliya mbuhena enyina lia Huku, Jeova. Soka valinga ngotyo, ngwe enyina Jeova likahi movihonekwa vio tete vio Mbimbiliya ovikando vihungi po 7.000. Otyo tyaeta tyi? Ovanthu kavetyivili okunoñgonoka nawa olie Huku yotyotyili.

Mahi, okunoñgonoka enyina lia Huku, Jeova, tyihole okukuatesako ovanthu ovanyingi okufenda Huku nomutima omukuatyili opo vafuene Kwe. Otyo tyalingile Richard. Richard uhinangela etompho akalele nalio no Nombangi mba Jeova vevali. Wati: “Vandekesile mo Mbimbiliya okuti enyina lia Huku, o Jeova. Andyihambukwa unene okunoñgonoka okuti Huku una enyina. Otyipuka otyo, ankho hinetyiive-ale.” Etyi eiva otyipuka otyo, Richard alingi omapiluluko momuenyo wae, aendela movitumino vio Mbimbiliya, iya ahambukiswa Jeova. “Okunoñgonoka enyina lia Huku, tyankhuatesako okukala noupanga omuwa nae.”

Mokueenda kuomanima omanyingi, ondyale ya Kristu ikahi nokutyika ovanthu ovanyingi opo vahanoñgonoke Huku. Mahi, mokonda yokulilongesa Ondaka ya Huku Ombimbiliya, onthue tuanoñgonoka olie ondyale ya Kristu, iya tyetuyovola kounkhembi wonongeleya.​—João 17:17.