Ondaka ya Jeova Ina Omuenyo

Ononthele Mbavilapo Mbomukanda wa Revelação (Apocalipse)—II

OITYI ovafendeli va Jeova Huku vakevela? Iya vana vehemufende? Oityi Satanasi no vilulu viae vakevela? Ononkhano patyi onongwa ovanthu ovataveli mavakomona mokueenda kuomanima Ovityita Ekwi vioutumini wa Kristu? Omakumbululo omapulo oo nomakuavo vali akolela, aholololwa mu Revelação 13:1–22:21.a Movikapitulu ovio, muna omamonekelo 9 okuahulililako pomamonekelo 16 João atambula, konthyulilo yotyita tyotete P.K.

João wahoneka okuti: “Omuna-mbembwa oyouna utanga onondaka mbeulo eli na vana vembutehelela nokuendelamo.” (Revelação 1:3; 22:7) Okutanga nokuundapesa etyi tulilongesa momukanda wa Revelação tyituavela ondundo yokuumbila Huku. Tupu, tyipameka ekolelo lietu mu Huku no Mona wae Jesus Kristu, nokutuavela okevelo ewa komutue.b—Hebreus 4:12.

OKUNENGULA OMATISELA EPANDU-VALI ONYENGO YA HUKU

(Revelação 13:1–16:21)

Revelação 11:18 yati: “Mahi omalongo aanumana unene, iya onyengo ya [Huku] aiya, nomuvo wokuanakwa . . . pala okunyona vana vanyona oohi.” Pala okulekesa omokonda yatyi maetela onyengo yae, emonekelo lia tyinana lilekesa ovilinga “viotyinyama . . . tyokuna onombinga ekwi, nomitue epandu-vali.”—Revelação 13:1.

Memonekelo lia tyive, João wamona “Ondyona itai komphunda yo Siau, kumue novanthu 144,000.” Ovo ‘valandwa povanthu.’ (Revelação 14:1, 4) Onoandyu mbupopia etyi matyilandulako. Memonekelo lialandulako, João wamona “onoandyu epandu-vali mbuna omahingano epandu-vali.” Jeova watuma onoandu ombo opo mbunengulile “omatisela epandu-vali onyengo ya Huku”, mouye wa Satanasi. Omatisela oo ena onondaka nomalondolo ekoyeso Huku makalinga. (Revelação 15:1; 16:1) Omamonekelo oo evali, alekesa vali nawa omakoyeso Ouhamba wa Huku, elikuata nokuhika kuombendo yapandu-vali, nonkhu yatatu.—Revelação 11:14, 15.

Omapulo Ombimbiliya Akumbululwa:

13:8​—“Omukanda wawingua womuenyo wo Ndyona,” otyityi? Omukanda oo wawingua muna vala omanyina avana mavakatumina na Jesus Kristu Mouhamba wae keulu. Muakutikinyua omanyina Ovakristau ovalembulwa vokukahi nkhele pano pohi, vena ekevelo liokupewa omuenyo keulu.

13:11-​13​—Oñgeni enyama lio nombinga onombali lipopia ngongandu, nokulaukisa alo umue otupia keulu? Tyotyili onombinga ombo onombali mbenyama—o Anglo-Amelikana Outumini Wouye​—likahi nokupopia ngongandu, okulekesa okuti yundapesa ononkhono, okukuluminya, no kuhongiliya ovanthu kononkhono okutavela efendelo liayo. Lilaukisa otupia keulu, mokulilekesa ngatyina omuuli wotyotyili, mokonda ipopia okuti yetyivila okufinda ovivi movita ovinene vivali viouye auho, nokuafinda outumini wo Komunisimu.

16:17​—“Omphepo” muna muanengulilwa etisela liapandu-vali otyityi? “Omphepo” oyo, ilekesa onkhalelo yomalusoke atuka ku satanasi, ‘[eyembelo liomutima] omphepo ikahi pahe nokutumina vana vehetavela.’ Omphepo oyo yokuna oukola, ikahi nokufimwa nouye auho wa Satanasi.—Efésios 2:2.

Otyo Tyitulongesa Tyi:

13:​1-4, 18. “Enyama” otyilekeso tyoutumini wovanthu, watuka ‘pokati kelunga,’ otyinyingi tyovanthu tyilitaha-taha. (Isaías 17:12, 13; Daniel 7:2-8, 17) Enyama olio o Satanasi welilinga nokuliavela epondolo. Lina omuvalu 666, ulekesa nawa okuti kaliafuilepo. Okunoñgonoka enyama olio oityi, tyituvatela unene opo tuehelilandula, nokuhetyihuvila ine okutyifenda ngetyi ovanthu mouye valinga.—João 12:31; 15:19.

13:16, 17. Namphila tumona ononkhumbi pokulinga ovilinga vietu via kese nthiki, ngo ‘pokulanda nokulandesa,’ tuheliyekei alo enyama olio litumina omienyo vietu. Okutavela enyingilikilo lienyama olio kokuvoko kuetu ine omo mbamba, tyilekesa okuti tuayeka enyama olio litumine ovituwa vietu nomalusoke etu.

14:​6, 7. Oandyu iivisa itulongesa okuti tuna okuivisa nondyanga onondaka onongwa Mbouhamba wa Huku wavialekua. Tuna okuvatela vana tulongesa Ombimbiliya, opo vakale nonthilo na Huku nokunkhimaneka Jeova.

14:14-​20. Tyina ovilinga ‘viokuteya,’ ovilinga viokuongiya vana mavakayovolwa viamamanuhuka, oo maukakala omuvo woandyu yokuliata ‘etala enene liovinyu yonyengo ya Huku,’ okuongiya ‘ovinyu yopohi.’ Omuvinyu, onkhalelo ya Satanasi yokutumina ouye ou wovivi “novilenda” viovinyango ovivi, mavikanyimako apeho. Onthue tuna okutokola okuanya okuhongiliyua nomuvinyu woohi.

16:13-​16. ‘Onondaka mbahasukukile’ tyilekesa onondaka Satanasi ekahi nokuyandyanesa, pala okuhongiliya ovatumini pano pohi opo vahatehelele okunengulwa komatisela onyengo ya Huku. Nokuvehongiliya opo vayale Jeova.—Mateus 24:42, 44.

16:21. Tyina onthyulilo youye uno ihika popepi, okuivisa omakoyeso Jeova makalinga ouye wovivi wa Satanasi, mamukakutikinya onondaka mbumue mbalema mbomakoyeso a Huku, mbaelekwa nomamanya ombila. Mahi, no ngotyo ovanthu ovanyingi mavatualako okupopia Huku omapita.

OHAMBA OMUFINDI UKAHI NOKUTUMINA

(Revelação 17:1–22:21)

“Ombambilonia Onene,” eongano lionongeleya mbomatutu ouye auho, onthele imue itoyesa youye wa Satanasi. Emonekelo 11, liihana okuti “ekunga enene,” omukai womaumbalehi, ‘wapumphama kotyinyama otyinene otyinkhuhu.’ Omukai oo makaipawa no ‘nombinga ekwi” mbotyinyama oku apumphama. (Revelação 17:1, 3, 5, 16) Omamonekelo alandulako alekesa okuti ‘epundaumbo olio enene’ liokuaelekwa nekunga, liatekapo. Moluotyo, ovanthu va Huku vaihanwa nondyanga opo vakanyauke ‘okutunda mepundaumbo olio.’ Okuteka kuepundaumbo olio enene, kukahi nokulilwa novanthu ovanyingi. Anthi, keulu kuna ehambu enene, mokonda ‘yokasamendo ko Ndyona.’ (Revelação 18:4, 9, 10, 15-19; 19:7) Memonekelo 13, wavelama “konkhambe ongonga” ukahi nokuenda okukaluisa omalongo. Ahanyaunako ouye wovivi wa Satanasi.—Revelação 19:11-16.

Iya oñgeni ‘onyoka yokonthuko, Satanasi Eliapu’ akala? Onalupi oe ‘makayumbwa metala liotupia’? Otyo tyipopiwa nawa memonekelo 14. (Revelação 20:2, 10) Omamonekelo evali ahulililako, alekesa nawa oñgeni omuenyo maukakala mokueenda kuomanima Ovityita Ekwi. Etyi “eholololo” liehika konthyulilo, João wamona ‘ondongi yomeva omuenyo, ahateka pokati ketapalo enene.’ Iya kese ‘munthu una ohunga’ ukahi nokukongwa, opo anwe.—Revelação 1:1; 22:1, 2, 17.

Omapulo Ombimbiliya Akumbululwa:

17:16; 18:​9, 10​—Omokonda yatyi ‘ovatumini pohi’ valilila epundaumbo ovo muene vahanyauna? Tyivelilisa elungavi liavo enene. Tyina, ovatumini pano pohi mavaimbuka okuti kuvo Ombambilonia Onene, ankho yakolela unene. Mavamono okuti ongeleya yalio ankho yahitika ovilinga viavo ovivi. Tupu Ombambilonia Onene, ankho ivekuatesako okueta ovakuendye pala ovita viavo. Ankho, ivatela unene okulunda ovanthu okutavela okutuminwa.

19:12​—Omokonda yatyi o Jesus vala wii enyina liae epe, nawike vali ulii? Tyafuile enyina olio lilekesa otyilinga tyakolela tya Jesus , ngetyi tyapopiwa mu Isaías 9:6, makalinga mokueenda kuonthiki ya Tatekulu. Nawike wii enyina olio. Mahi oe muene ulii, mokonda wanoñgonoka nawa oityi tyihangununa otyilinga otyo tyavilapo. Anthi, ovilinga ovio vimue Jesus uviavela omphunga. Moluotyo, ‘uvehoneka enyina liae epe.’—Revelação 3:12.

19:14​—Olie makaenda na Jesus mo Armagedon? ‘Mongombo yovita keulu’ mavakaundapa na Jesus movita via Huku, muakutikinya onoandyu, novalembulwa vana vafinda nokuatambulale ondyambi yavo keulu.—Mateus 25:31, 32; Revelação 2:26, 27.

20:11-​15​—Omanyina avalie ahonekwa ‘mombuingwa [ine “momukanda”] womuenyo’? Omukanda oo, muahonekwa omanyina ovanthu aveho mavakapewa omuenyo wahapu—Ovakristau ovalembulwa, notyinyingi otyinene tyovanthu, novaumbili va Huku ‘ovaviuki mavakatutiliswa.’ (Atos 24:15; Revelação 2:10; 7:9) Omanyina a vana ‘vehevaviuki mavakatutiliswa,’ maakahonekwa vala ‘momukanda oo womuenyo’ inkha vaendela ‘movipuka viahonekwa momikanda viokuwingwa’ vionondonga mavikaikulwa mokueenda kuomanima Ovityita Ekwi. Anthi, omanyina oo kaahonekelwe no tinda yahanyimi vali. Omanyina ovalembulwa, maakahonekwa tyihanyimi vali, tyina vamalekesa ekolelo liavo alo pononkhia. (Revelação 3:5) Omanyina a vana mavakapewa omuenyo wahapu pano pohi, maakahonekwa tyihanyimi vali, tyina vamalolwa otyikando tyahulililako, konthyulilo yomanima ovityita ekwi.—Revelação 20:7, 8.

Otyo Tyitulongesa Tyi:

17:​3, 5, 7, 16. “Ounongo wokeulu” utukuatesako okunoñgonoka “eelema liomukai no liotyinyama [otyinkhuhu] tyemutyinda.” (Tiago 3:17) Otyinyama otyo otyilekeso tyeongano liahimbika kuihanwa okuti Ewaneko Liomalongo (Liga das Nações) iya alipindukapo nenyina Omalongo Aongana (Nações Unidas). Okunoñgonoka eelema olio, katyituavela ondundo yokuivisa nombili onondaka onongwa Mbouhamba wa Huku, nonthiki yekoyeso ya Jeova?

21:​1-6. Tupondola okukala nonthumbi yokuti omuenyo omuwa wapopiua okuti maukaetwa Nouhamba wa Huku, tyotyili matukeumona. Omokonda yatyi? Omokonda oyo Ombimbiliya yati: “Tyapwa viafuisuapo!”

22:​1, 17. “Ondongi yomeva omuenyo” ilekesa etyi Jeova alinga opo ayovole ovanthu ovataveli monkhali no mononkhia. No hono omeva oo oko ekahi. Tutavelei nolupandu “okutambula otyali omeva omuenyo.” Tupu, tukalei nehando enene liokuihana vakuetu navo veye okunwa!

[Onondaka Poutoi]

[Olutalatu pefo 25]

Ovanthu vokutavela mavakamona omuenyo omuwa Mouhamba wa Huku!