Otyili Konthele yo Armagedom

“Ovilulu . . . viaya konohamba mbouye auho, iya aveveongiya pomphangu itiwa Armagedom, melaka lio Hebreu.” (Onthue tuembuyendameka.)—REVELAÇÃO 16:14, 16, João Ferreira de Almeida.

ARMAGEDOM ovikando vimwe ipitiyua “Harmagedom,” enyina liomphangu. Mahi ngoti pano pohi kapakalele omphangu oyo.

Iya omokonda yatyi ondaka “Armagedom” apeho veyeleka nonthiki yononkhumbi, ngetyi ovita? Oityi ondaka oyo ihangununa tyilityili?

Vaongiyua Pomphangu Itiwa Armagedom

Mo Hebreu ondaka yotete yapitiyua Har–Magedon, ihangununa okuti “Omphunda yo Megido.” Namphila omphunda oyo kayakaleleko, mahi kuna omphangu imwe iiwe okuti o Megido. Ankho omphangu imwe yakolela papingahana omatapalo evali omanene kokumbili kuomphangu pakalele ova Isilayeli kohale. Popepi nomphangu oyo palingilwe ovilwa ovinene. Moluotyo, enyina Megido apeho lipopiwa pokupopia ovita.a

Mahi, enyina Megido kalihangununa ovita vialingilue, mahi oityi vialingilwe. O Megido ankho ikala Motyilongo Tyalaelwe, Jeova Huku apele ova Isilayeli. (Êxodo 33:1; Josué 12:7, 21) Oe walaele ovanthu ovo okuti meveamena kuvana veveluisa, iya etyilingi. (Deuteronômio 6:18, 19) Kehuviso, Jeova waamenene ova Isilayeli komatolopa Ohamba Jabim nongombo yae yovita ankho ihongolelwa na Sisera, mo Megido.—Juízes 4:14-16.

Moluotyo, ondaka “Har–Magedon,” ine “Armagedom,” ina ehangununo limwe liakolela. Yelikuata novilwa vionongombo onombali mbovita mbuwanena.

Eulo mu Revelação, lipopia konthele yomuvo ukahi nokuya, tyina Satanasi novilulu mavakahongiliya ovatumini vovanthu opo vaongiye omatolopa avo, vatyitukilepo ovanthu va Huku novilinga viavo. Iya tyina Huku amaluisa ovatumini ovo, mapankhi ovanthu ovanyingi.—Revelação 19:11-18.

Omokonda yatyi Huku upopiwa Mombimbiliya okuti “omukuankhenda, wahanumana liwa, nokuna okankhenda okanene,” makaipaa ovanthu ovanyingi? (Neemias 9:17) Opo tutyinoñgonoke, tuesukisa okukumbulula omapulo aa etatu: (1) Olie wahimbika ovilwa? (2) Omokonda yatyi Huku elipakelapo? (3) Oityi ovilwa ovio mavikaetela oohi novanthu vakalamo?

 1. OLIE WAHIMBIKA OVILWA?

Huku haeko wahimbika novilwa vio Armagedom. Anthi, Huku makaamena ovanthu onondalwa ku vana mavahande okuveipaa. Ovanthu ovakalavi movilwa ovio, “onohamba mbo kombanda yoohi aiho,” ovatumini vouye. Omokonda yatyi valwila? Omokonda, Satanasi mahongiliya ovatumini nomatolopa opo vatyitukilepo vana vafenda Jeova Huku.—Revelação 16:13, 14; 19:17, 18.

Hono, mokonda movilongo vimwe ovanthu vapondola okupopia etyi vahanda nokuholovona ongeleya vahanda, okupopia okuti ovatumini mavahande okumanako onongeleya ambuho, ngoti hatyiliko. Mahi, otyo tyaendelekuale motyita 20, iya pahe tyikahi nokuhimbika vali.b Nongotyo, kuna ovipuka vivali ovinene vielikalela konthele yovilwa vialingiluale novatumini, nevi mavikaeta o Armagedom. Tete, ovatumini mavakatyitukilapo ovanthu va Huku ouye auho. Vali, Jeova Huku makakumbulula monkhalelo imwe ehenelinge tunde kohale. (Jeremias 25:32, 33) Ombimbiliya ipopia ovilwa ovio okuti “ovita vionthiki onene ya Huku Wepondolo Aliho.”

 2. OMOKONDA YATYI HUKU ELIPAKELAPO?

Jeova ulongesa ovanthu vemufenda vakale ovana-mbembwa nokuhole onondyale mbavo. (Miquéias 4:1-3; Mateus 5:43, 44; 26:52) Ngotyo, kamavakakuata omauta opo veliamene tyina ovilwa ovio ovinene viameya. Inkha Huku kalingi natyike opo ayovole ovanthu vae, mavanyimuako. Tupu, enyina lia Huku, Jeova liakutikinyuamo. Inkha ovanthu va Huku vaipawa no nondyale mbavo, matyikala ngoti Jeova utupu ohole, hamuviuki, nokuhena epondolo. Anthi, Jeova kamayeke valinge ngotyo!—Salmo 37:28, 29.

Huku kahande okuipaa omunthu nawike, moluotyo ulondola konthele yetyi makalinga. (2 Pedro 3:9) Nomahipululo ekahi Mombimbiliya, oe uhinangelesa aveho okuti kohale wayovolele ovanthu vae konondyale mbavo. (2 Reis 19:35) Tupu, Ombimbiliya itulondola okuti komutwe wandyila tyina Satanasi novanthu vae vamautukila ovanthu va Huku, Jeova mekevelekesa ononkhono mbae. Tyotyili Ondaka ya Huku yapopiale kohale okuti Jeova makahanyaunako onondingavivi. (Provérbios 2:21, 22; 2 Tessalonicenses 1:6-9) Pomuvo opo, vana mavautukila ovanthu va Huku maveketyimona nawa okuti vekahi nokuluisa Wepondolo Aliho.—Ezequiel 38:21-23.

 3. OITYI OVILWA OVIO MAVIKAETELA OOHI NOVANTHU VAKALAMO?

Ovilwa vio Armagedom mavikayovola ovanthu ovanyingi. Tyotyili, oyo, onthyimbi yomuvo umwe wombembua pano pohi.—Revelação 21:3, 4.

Omukanda wa Revelação upopia konthele “yotyikumba otyinyingi” matyikahupa kovilwa ovio. (Revelação 7:9, 14) Huku mevehongolela, nokuvekuatesako okupilulula oohi aiho aikala Omphangu Yombembwa ngetyi Jeova ahandele tunde konthyimbi.

Tutyii onalupi ovanthu va Huku mavautukilwa?

[Onondaka Poutoi]

[Olutalatu pefo 6]

Jeova Huku waamenene ovanthu vae kohale

[Olutalatu pefo 7]

Jeova makaamena vali ovanthu vae, mokueenda kuovilwa vio Armagedom