“Ombambilonia Onene” Oityi

ONONDAKA mbumue mbupopia omukanda wa Revelação, otyilekeso vala. (Revelação [Apocalipse] 1:1) Mo ngeleka, upopia omukai umue wokuna enyina “Mbambilonia Onene”, liahonekwa mombamba yae. Omukai oo, wapumphama kombanda ‘yovanthu ovanyingi’. (Revelação [Apocalipse] 17:1, 5, 15) Mokonda kutupu omunthu upondola okulinga ngotyo, otyo tyilekesa okuti Ombambilonia Onene, hamukai wotyotyili otyilekeso vala. Iya ekunga olio, lilekesa tyi?

Mu Revelação [Apocalipse] 17:18, omukai oo, upopiwa okuti ‘epundaumbo enene likahi nokutumina onohamba mbo kombanda yo ohi.’ Ondaka ‘epundaumbo’ ilekesa onthumbo yovanthu vaongana. Mokonda ‘epundaumbo olio enene’ iya litumina ‘onohamba mbo kombanda yoohi,’ omukai oo Mbambilonia Onene, eongano enene livasiwa mouye auho. Tyaviuka okuihana Ombambilonia Onene okuti eongano liouye auho. Eongano liatyi? Eongano lionongeleya. Tala oñgeni onotestu mbumue momukanda wa Revelação mbulekesa nawa okuti tyotyili Ombambilonia Onene, eongano lionongeleya.

Eongano, pamue o liopulitika, ine o liovitanda, ine o lionongeleya. Omukai utiwa Ombambilonia Onene heonganoko liopulitika. Mokonda Ondaka ya Huku ipopia okuti ‘onohamba mbouye,’ ine ovatumini vopulitika vekahi ‘nokulinga omaumbalehi’ nomukai oo. Omukai oo, upopiwa okuti ukahi nokulinga oumbalehi, mokonda youpanga ekahi nokulinga novatumini vouye. Otyo aihanenwa okuti ‘ekunga enene’.—Revelação [Apocalipse] 17:1, 2; Tiago 4:4.

Tupu, Ombambilonia Onene heonganoko liovitanda. Mokonda ‘vakuavitanda mouye,’ mavakalila putyina Ombambilonia ihanyaunuapo. Ombimbiliya ipopia okuti onohamba no vakuavitanda mavakatalamena ‘kokule’ okutala ehanyauno lio Mbambilonia Onene. (Revelação [Apocalipse] 18:3, 9, 10, 15-17) Otyo, tyilekesa okuti Ombambilonia Onene, heonganoko liopulitika, tupu haliovitandako. Mahi, Ombambilonia Onene, eongano lionongeleya.

Otyipuka otyikuavo tyilekesa okuti Ombambilonia Onene Eongano lionongeleya, omokonda Ombimbiliya yati, omukai oo ukahi nokuyapula ovanthu aveho ‘novilinga viae vioumbanda’. (Revelação [Apocalipse] 18:23) Mokonda ovilinga aviho vioumbanda viatuka konongeleya no kovilulu ine onoandyu onombi, Ombimbiliya iihana Ombambilonia Onene okuti ‘eumbo liovilulu ine onoandyu onombi’. (Revelação [Apocalipse] 18:2; Deuteronômio 18:10-12) Tupu, eongano olio, liyele unene ongeleya yotyotyili. Mokonda lihole okumonesa ononkhumbi ‘ovauli’ no ‘nosandu’ mba Huku. (Revelação [Apocalipse] 18:24) Enga, Ombambilonia Onene iyele unene ongeleya yotyotyili, imonesa ononkhumbi ononene nokuipaa ‘onombangi mba Jesus’. (Revelação [Apocalipse] 17:6) Ngotyo, omukai oo utiwa Ombambilonia Onene, eongano lionongeleya ambuho mbomatutu. Eongano lionongeleya ambuho mbuyele Jeova Huku.