Ononkhuana?

Ovalume vekuana vavelama kononkhambe tyipondola okumoneka ngoti omaelema ine okuwelesa owoma. Mahi ove kupondola okutila owoma. Mokonda yatyi? Omokonda Ombimbiliya kumwe novipuka vikahi nokumoneka hono vitukuatesako okuveimbuka. Namphila etyi vaendela tyieta ovitateka pano pohi, mahi no ngotyo tyipondola okukala onondaka onongwa pala ove nombunga yove. Ñgeni ngotyo? Tete, tuna okuvenoñgonoka nawa aveho.

Emonekelo olio lihimbika ngetyi: “Namona onkhambe imwe ongonga, iya una wavelama-ko ankho una onkhondyi, iya apewa ekolowa, watunda nokufinda opo akamanuhule okufinda.”—Apocalipse 6:2.

Olie wavelama konkhambe ongonga? Ekumbululo tulivasa Mombimbiliya momukanda wa Apocalipse. Una wavelama-ko wiihanwa okuti “Ondaka ya Huku.” (Apocalipse 19:11-13) Enyina olio liokuati, Ondaka, liapewa Jesus Kristu, mokonda oe mutumwa ndaka wa Huku. (João 1:1, 14) Tupu, wiihanwa okuti, “Ohamba yo nohamba, na Tatekulu yo vo tatekulu,” iya tupu wiihanwa okuti, “Omukuatyili Wotyotyili.” (Apocalipse 19:16) Tyimoneka nawa okuti Jesus una epondolo liokukala ohamba yovilwa, iya ngwe kaundapesa omapita epondolo liae. Otyo tyipondola okukatula omapulo amwe.

Olie waavela Jesus epondolo liokufinda? (Apocalipse 6:2) Omuuli Daniele wamuene emonekelo limwe omu Mesiya aihanwa okuti “omona womulume,” una “una Ononthiki Ononyingi,” Jeova Huku,a emuavala “outumini, nomunkhima, nouhamba.” (Daniel 7:13, 14) Ngotyo, Huku Omukulami oe waavela Jesus epondolo, notyilinga tyokutumina, nokukoyesa. Onkhambe ongonga, otyilekeso tyaviuka tyo vilwa Viomona wa Huku, mokonda Ombimbiliya tyina ipopia otyivala otyingonga tyilekesa ouviuki.—Apocalipse 3:4; 7:9, 13, 14.

Onalupi ahimbika okuhateka? Tala okuti Jesus wahimbika okuhateka etyi apewa ekololwa. (Apocalipse 6:2) Onalupi Jesus avialekwa opo akale Ohamba? Kavialekelwe etyi atutiliswa aende no keulu. Ombimbiliya ilekesa omuvo Jesus akevela. (Hebreus 10:12, 13) Jesus wapopilile ovalongwa vae enyingilikilo malivekuatesako okuimbuka onthyulilo yomuvo akevelela, no ñgeni mahimbika okutumina keulu. Jesus watile, tyina amahimbika okutumina, ovivi mouye maviliyawisa vali unene. Tupu wapopia okuti, ovilwa maviliyawisa, nondyala, nomauvela. (Mateus 24:3, 7; Lucas 21:10, 11) Konyima Yovita Viotete Viouye Auho viahimbika menima 1914, atyimoneka umwe nawa okuti1914, omuvo wovitateka Ombimbiliya iihana okuti “ononthiki mbahulilila.”—2 Timóteo 3:1-5.

Mahi omokonda yatyi ovivi mouye vikahi nokuvilapo tunde etyi Jesus ahimbika okutumina menima 1914? Omokonda pomuvo opo, Jesus wahimbika okutumina keulu, ha popano pohi. Movilwa viaendele keulu, Jesus Ohamba yavialekwa pahe, tupu wiihanwa okuti o Mingeli, watahulile pano pohi Satanasi novilulu viae. (Apocalipse 12:7-9, 12) Satanasi watahulilwa pano pohi iya pahe wanumana unene mokonda utyii okuti una vala ononthiki mbehehi. Tyotyili kapakambele unene opo Huku afuisepo ehando liae pano pohi konthele ya Satanasi. (Mateus 6:10) Pahe, tutalei ovalume ovakuavo vetatu vavelama kononkhambe, opo tutale inkha tyili-tyili tukahi umwe “kononthiki mbahulililako.” Tyelikalela no yotete, ilekesa umwe olie wavelama-ko, vetatu vokualandula-ko, otyilekeso tyovipuka vikahi nokumoneka mouye auho.

“Iya kuatunda onkhuavo, onkhambe yotyivala tyotupia. Una wavelama-ko watumua okupola ombembwa kombanda yohi, opo ovanthu veliipae. Iya apewa omutunga umwe omunene.”—Apocalipse 6:4.

Otyo tyilekesa ovita. Tala okuti ngwe kapolo ombembwa yotyilongo tyike vala, mahi ombembwa yomouye auho. Menima 1914, omo muatetekela ovita viouye auho. Akulandula ovita via vali viouye auho iya ovita ovio aviipaa ovanthu ovanyingi vali tyipona yo tete. Vamwe vapopia okuti ombalulo yovanthu vankhila movilwa tunde menima 1914 valamba po nomiliau 100! Iya otyo atyietela ononkhumbi ovanthu ovanyingi.

Iya pahe ngotyo, onthue tuli momuvo patyi? Motyikando tyo tete ovanthu avahimbika okuliipaa poyavo. Alo umwe omaongano okuti o ombembwa, ngetyi o Nações Unidas, kaetyivili okutalameka una wavelama konkhambe onkhuhu.

“Ame andyimono, etyi aikula oselu yatatu, neiva otyiendanomuenyo tyatatu tyati: “Endyu!” Iya ame andyimono onkhambe imwe onthikovei, iya una wavelama-ko ankho una otyipeyalo pomaoko. Iya ame neiva ondaka imwe ngoti ikahi pokati koviendanomuenyo vikuana yati: ‘Oneka ike yotiliku mondenaliu ike, iya ononeka ononthatu mbosevata mondenaliu ike, mahi uhanyone o azeite yomundyambi novinyu.’”—Apocalipse 6:5, 6.

Otyo tyilekesa ondyala. Tuetyimona nawa okuti makukala ondyala imwe onene alo umwe oneka ike yotiliku mailande ondenaliu ike, ngwe ondenaliu ike kotyita tyo tete omunthu wiifetua vala tyina amaundapa onthiki yatyo aiho! (Mateus 20:2) Ombongo yatyo oyo, ankho ilanda ononeka ononthatu mbo sevata, ngwe o sevata okañgima kamwe okatutu vali kotiliku. Oñgeni omunthu metyivili okuavela okulia ombunga yae aiho? Ovanthu vekahi nokupakelua-mo opo vahapesele unene okulia, mahi kohale ankho omulela wo azeite novinyu ovikulia via kese nthiki.

Tunde menima 1914, okuti tuete una wavelama konkhambe onthikovei ukahi nokuhateka? Eenga! Ovanthu vehungi po nomiliau 70 vankhia mokonda yondyala okutuka mo 1914. Eongano limwe liati: “ovanthu 805 movilongo etyive mouye auho, vena ondyala yahapu tunde menima 2012 alo menima 2014.” Eongano ekuavo liapopia okuti: “Momanima aeho ondyala iipaa vali ovanthu ovanyingi tyipona o SIDA, no malalia nomukolo.” Eongano ekuavo liapopia okuti, Namphila ovanthu vekahi nokulinga ononkhono opo vamaneko ondyala, mahi una wavelama konkhambe onthikovei utualako nokuenda no komutwe.

“Iya andyimono, onkhambe imwe ihena otyivala. Iya una wavelama-ko ankho enyina liae Ononkhia. Iya Ondyembo ankho ilandula nawa monyima yae. Iya vapewa epondolo liokutumina onthele ya kuana yohi, opo vaipae nomutunga omule, nondyala, nonombela mbuipaa, nomanyama okombanda yohi.”—Apocalipse 6:8.

Una wavelama konkhambe oyo otyilekeso tyononkhia, nomauvela aipaa. Konyima yenima 1914, ouvela umwe utiwa Gripe espanhola, awiipaa ovanthu ovanyingi-nyingi. Tyafwa ovanthu onomiliau 500 vali nouvela oo, vahupile-po kavehi!

Mahi ouvela oo ankho onthyimbi vala. Ovanongo vamwe vapopia okuti ovanthu ovityita novityita vankhile mokonda yenkhuenyenye okuhimbikila menima 1901 alo menima 2000. Hono ovanthu ovanyingi-nyingi vekahi nokunkhia mokonda yo SIDA, nomukolo, no malalia, namphila ovanongo vekahi nokuovola ovihemba opo vamaneko omauvela oo.

Ovanthu vekahi nokunkhia mokonda yovita, nondyala, ine omauvela. Ondyembo itualako nokukuata ovanthu opo vahakale vali nekevelelo.

Ononthiki mbuno mbepuiya unene mambukapua-ko. Hinangela okuti Jesus ‘wahimbika okufinda’ menima 1914, etyi atahulila Satanasi pano pohi, mahi nkhele kenemane okufinda. (Apocalipse 6:2; 12:9, 12) Apa katutu, mokueenda kuo Armagedom, Jesus makutu Satanasi aipaa ovanthu vana vahula kwe. (Apocalipse 20:1-3) Jesus kamakamana-ko vala etyi vana vavelama kononkhambe ononthatu vaendela, mahi tupu makaviukisa etyi vahanyauna. Ñgeni ngotyo? Tala omilao vio Mbimbiliya.

Kakukakala vali ovilwa, makukala vala ombembwa. Jeova “makamanako ovita alo kuna kuaoyela ohi. Uhanya ononkhondyi nokuteta-teta omaonga.” (Salmo 46:9) Ovanthu vana vehole ombembwa, “mavakapiñgana ohi, iya avakakala nombembwa onene.”—Salmo 37:11.

Kakukakala vali ondyala, makukala okulia okunyingi.“Makukakala ovilia ovinyingi kombanda yohi. Alo umwe kononthongo-nthongo mbo nomphunda makukakala okulia okunyingi.”—Salmo 72:16.

Kakukakala vali omauvela nononkhia, aveho mavakakala nekongoko likahi nawa, nomuenyo wahapu. Huku, “makasekuna ononkhuka momaiho avo, ononkhia, okulila, no nongembia kamavikakalako vali. Mokonda ovipuka ovio aviho mavikalamba.”—Apocalipse 21:4.

Puetyi Jesus ali pano pohi, walingile omahuviso ngotyilekeso tyetyi makalingila ovanthu mouhamba wae. Ankho wovola ombembwa, walinge amahuviso, aavela okulia ovanthu ovanyingi, ahakula ovavei, alo umwe watutilisile ovanthu vokuankhia.—Mateus 12:15; 14:19-21; 26:52; João 11:43, 44.

Onombangi mba Jeova mavakala nehambu liokukulekesa Mombimbiliya yove muene oñgeni upondola okulifuiika opo uhupiswe. Okuti ove uhanda okulilongesa vali?