Oñgeni Tupondola Okutualako “Notyituwa Tyokukevelela”?

 1. Oityi tyipondola okutunkhisa elundo?

ONONTHIKI mbonthyulilo youye wa Satanasi mbahimbika mo 1914, etyi Kristu akala Ohamba keulu. Menima olio, akuhimbika ovilwa keulu iya Jesus atahela Eliapu novilulu viae pano pohi. (Tanga Revelação 12:7-9.) Satanasi ankho utyii okuti ‘omuwo wae kauhi.’ (Revelação 12:12) Mahi ‘omuvo oo uhehi’ wakalako vali ehimbwe tyipona etyi vamwe ankho vakevelela. Okuti matunkhi elundo putyina tukevelela Jeova aeteko onthyulilo youye wa Satanasi?

 2. Omapulo patyi maakumbululwa monthele ei?

² Hatyiwako okunkhia elundo, mokonda tyipondola okutulingisisa okulinga ovipuka tyahasoko. Moluotyo, oityi matyitukuatesako okukala notyituwa tyokukevelela? Onthele ei maitukuatesako okukumbulula omapulo aa. (1) Oityi tupondola okulilongesila koumphua-lundo womuuli Mikeia? (2) Ovipuka patyi mavilekesa okuti onthyulilo ikahi popepi? (3) Oñgeni matulekesa okuti tupandula oumphua-lundo wa Jeova?

 3. Pomuvo wa Mikeia, ova Isilayeli ankho vena ovitateka patyi?

³ Tanga Miquéias 7:2-6. Omuuli wa Jeova Mikeia wamuene etyi ova Isilayeli vayekelepo katutu-katutu okukala nekolelo mu Jeova, iya moutumini Wohamba Akasi, avakala vali unene tyehena ekolelo. Mikeia waeleka ova Isilayeli vehena ekolelo nomukete. Ova Isilayeli ovo, ankho velifwa nomukete mokonda ankho valinga onya vakuavo, okuveetela oluihamo. Ovivi ankho viavilapo unene, alo umwe mokati kombunga ovanthu ankho vetupu vali ohole navakuavo. Mikeia ankho utyii okuti kametyivili okupilulula otyitateka otyo, moluotyo, elikuambela ku Jeova nomutima wae auho. Iya akevelela noumphua-lundo opo Huku aviukise ovipuka. Mikeia ankho una onthumbi yokuti Jeova maviukisa otyitateka momuvo Wae.

 4. Ovitateka patyi tuna?

⁴ Nga Mikeia, nonthue tukahi pokati kovanthu vena elungavi. Ovanyingi “kavapandula, ononkhembi, nokuhena oluembia.” (2 Timóteo 3:2, 3) Tyipondola okutunumanesa tyina vana tuundapa navo, na vana tulongeswa navo kosikola, novomunthele yetu vena otyituwa tyelungavi. Mahi, ovaumbili vamwe va Huku vena vali otyitateka otyinene. Jesus wapopile okuti ovalanduli vae mavayalwa no nombunga mbavo. Iya onondaka mbae mbelifwa no ombu mbukahi mu Miquéias 7:6. Jesus wati: “Ame neya okuyapula omukuendye na tate yae, omuhikuena na ina, ine o ina ivi nomufikuena wanepua. Ngotyo, onondyale mbomunthu, ovanthu vombunga yae muene.” (Mateus 10:35, 36) Katyapepukile okukoleleya tyina tukuelwa, nokuyalwa novo mombunga vahaumbila Jeova! Inkha tukahi motyitateka ngotyo, tuhayekeipo okukoleleya. Mahi tutualeiko nekolelo mu Jeova, nokukevelela noumphua-lundo opo etyitetulule. Inkha tutualako okuita ombatelo yae, metuavela ononkhono nounongo tuesukisa opo tutualeko nekolelo mwe.

5, 6. Oñgeni Jeova ayambele Mikeia, mahi oityi Mikeia ahamuene?

⁵ Jeova wayambele Mikeia mokonda youmphua-lundo wae. Mikeia wamuene onthyulilo Yohamba ondingavivi Akasi, noutumini wae. Wamuene etyi Ezekia omona wa Akasi, akala ohamba iya akuatesako ova Isilayeli okupindulapo efendelo liotyotyili. Tupu, Mikeia wamuene oñgeni eulo ahonekele konthele yo Samaria liafuisuapo etyi ova Asiria valwisa ouhamba wo Isilayeli wokokulio kuekumbi.​—Miquéias 1:6.

⁶ Mahi, Mikeia kamuene okufuisuapo kuomaulo aeho Jeova emutumine okuhoneka. Mongeleka, Mikeia wahonekele okuti: “Kononthiki mbonthyulilo, omphunda yondyuo ya Jeova, maikakulama kombanda yo nomphunda, aikalepa unene tyipona ovipunda. Iya oko ovanthu mavakahatekela. Iya omalongo omanyingi tyotyili maakaya aati: ‘Endyuei, tulondei komphunda ya Jeova.’” (Miquéias 4:1, 2) Mikeia wankhia etyi ankho nkhele kuakambela omanima omanyingi opo eulo olio lifuisuepo. Mikeia ankho watokola okutualako nekolelo mu Jeova alo umwe kononkhia, ahatale kuetyi vakuavo ankho valinga. Wahonekele okuti: “Ovanthu aveho, mavaendela kese umwe menyina lia huku yavo. Mahi onthue, matuendela menyina lia Jeova, Huku yetu apeho, apeho.” (Miquéias 4:5) Mikeia wakevelele noumphua-lundo mokueenda kuomivo viononkhumbi mokonda ankho una onthumbi ononene yokuti Jeova mafuisapo omilao Viae aviho. Omuuli oo wekolelo wayumbile onthumbi mu Jeova.

7, 8. (a) Ehunga patyi tuna liokukala nonthumbi mu Jeova? (b) Oityi matyilingisa omuvo okulamba vali liwa?

⁷ Okuti nonthue tuna onthumbi ngo oyo mu Jeova? Tuna ehunga ewa liokukala nonthumbi ngo oyo. Tuete okufuisuapo kueulo lia Mikeia. Mokueenda “kuononthiki mbonthyulilo,” ovanthu ovanyingi vomalongo aeho, nomihoko nomalaka, vekahi nokuya “komphunda yondyuo ya Jeova.” Namphila vatunda momalongo eliyele, ovafendi ovo, “vanthila omitunga viavo omatemo no nosaluwa,” iya kavahande ‘vali okulilongesa ovita.’ (Miquéias 4:3) Elao limwe enene okukala pokati kovanthu va Jeova vena ombembwa!

⁸ Atuho tuhanda Jeova aeteko liwa onthyulilo youye uno wovivi. Mahi opo tukevelele noumphua-lundo, tuesukisa okusoka ngetyi Jeova asoka. Waholovona Jesus Kristu opo akakoyese ovanthu, tupu wanakale onthiki meketyilinga. (Atos 17:31) Mahi putyina onthiki oyo nkhele yeheneye, Huku ukahi nokuavela ovanthu aveho omphitilo yokukala “nenoñgonoko liafuapo konthele yotyili,” opo vaendele muetyi velilongesa, iya avayovolwa. Omuenyo wovanthu ukahi motyiponga. (Tanga 1 Timóteo 2:3, 4.) Apa katutu, onthyulilo maiya. Inkha tuundapa nombili mokukuatesako ovanthu okukala nenoñgonoko konthele ya Huku, matutale okuti omuvo ukahi nokulamba liwa. Iya tyina onthyulilo yameya, matuhambukwa mokonda tuaundapa nombili movilinga viokuivisa!

9-11. Okuti 1 Tessalonicenses 5:3 yafuisuapuale? Hangununa.

⁹ Tanga 1 Tessalonicenses 5:1-3. Apa katutu omalongo maakapopia okuti “Ombembwa nepamo!” Inkha katuhande okuyondyua nonondaka ombo, tuesukisa “okukala tyipahi nokutualako tyalunguka.” (1 Tessalonicenses 5:6) Pahe matulilongesa ovipuka vimwe mavituala ovanthu okupopia okuti “Ombembwa nepamo!”

¹⁰ Konyima yovita vivali viouye auho, omalongo ankho ahanda unene ombembwa. Etyi ovita viotete viouye auho vialamba, kualingwa eongano litiwa Liga das Nações pala okuetako ombembwa. Konyima yovita via vali viouye auho, ovanthu ankho vasoka okuti o Nações Unidas maityivili okuetako ombembwa. Ovatumini no nonkhalamutwe mbonongeleya vayumba onthumbi momaongano oo evali. Mongeleka, o Nações Unidas yapopile okuti 1986, Enima Liombembwa Ouye Auho. Menima olio, ononkhalamutwe ononyingi mbopulitika, no mbonongeleya veliongiyile nonkhalamutwe Yongeleya yo Katolika opo velikuambele okuita ombembwa.

¹¹ Mahi, ombembwa oyo yapopiwa, nomaiviso omakuavo alingwa, kayafuisilepo “ombembwa nepamo” yahonekwa mu 1 Tessalonicenses 5:3. Mokonda yatyi? Mokonda ombembwa yapopiwamo mailandulwa ‘nehanyauno maliya otyiuhulukila.’

12. Oityi twii konthele yonondaka “Ombembwa nepamo”?

¹² Olie makapopia onondaka ombo mbakolela mbokuti “Ombembwa nepamo”? Otyilinga patyi ononkhalamutwe mbonongeleya, Novakristau ovakuavo vomouye vena konthele oyo? Oñgeni ovatumini mavakutikinyuamo? Ombimbiliya kaitupopila. Tutyii okuti katyisukisa oñgeni onondaka ombo mambupopiwa, mahi “ombembwa nepamo,” kamaikakala yotyotyili. Satanasi nkhele ukahi nokutumina ouye uno. Ouye auho wavola, iya kamaupiluluka. Hatyiwako okutavela konondaka ombo mba Satanasi atuyekepo okukala ovakuatyili!

13. Omokonda yatyi onoandyu mbakuatela onomphepo mbehanyauno?

¹³ Tanga Revelação 7:1-4. Putyina tukevelela onondaka mba 1 Tessalonicenses 5:3 okufuisuapo, onoandyu mbepondolo mbakuata onomphepo mbehanyauno mbononkhumbi ononene. Oityi mbukevelela? Apostolu João wahoneka okuti ovalembulwa “ovapika va Huku yetu” vena okupewa enyingilikilo liahulililako.a Tyina onthele oyo yakolela yamapu, onoandyu mambuyeke onomphepo mbehanyauno. Oityi matyikamonekapo?

14. Oityi tyilekesa okuti apa katutu Ombambilonia Onene maihanyuako?

¹⁴ Ombambilonia Onene, ihangununa onongeleya ambuho mbomatutu, maihanyuapo ngetyi yatokala. Tuetiale okuti onthyulilo yayo ikahi popepi. Tyina yamehikipo, nawike metyivili okuikuatesako. (Revelação 16:12; 17:15-18; 18:7, 8, 21) Tupondola okutala okuti hono itupu ombatelo mokonda olaliu, no televisau, no jornale, vipopia omapita onongeleya no nonkhalamutwe mbayo. Nongotyo, ononkhalamutwe mbonongeleya kavasoko okuti vekahi motyiponga otyinene. Olusoke luavo kaluaviukile! Konyima yokupopia okuti “Ombembwa nepamo!” ovatumini mavakautukila ongeleya yomatutu aveihanyaunako aiho. Kamatukamona mona vali Ombambilonia Onene! Tyilityili tyaviuka okukevelela noumphua-lundo ovipuka ovio vihuvisa.​—Revelação 18:8, 10.

15. Jeova ukahi nokukevelela noumphua-lundo mokonda yatyi?

¹⁵ Namphila ovanthu vapenyesa enyina liae, Jeova ukahi nokukevelela noumphua-lundo opo aviukise ovipuka momuvo waviuka. Jeova kahande nawike una omutima waviuka ahanyaunueko. (2 Pedro 3:9, 10) Okuti nonthue otyo tusoka? Putyina nkhele onthiki ya Jeova yeheneye, pena ononkhalelo mbelikalaila mbokulekesa okuti tuapandula oumphua-lundo wae.

16, 17. (a) Omokonda yatyi tuesukisila okukuatesako vana vayekapo okuumbila Jeova? (b) Omokonda yatyi vana vayekapo okuumbila Jeova vesukisila okukondoka liwa kwe pahetyino?

¹⁶ Kuatesako vana vayekapo okuivisa. Jesus wapopia okuti keulu kukala ehambu tyina ongi imwe yavombele yamavasiwa. (Mateus 18:14; Lucas 15:3-7) Tyotyili Jeova usuka unene navana valekesa okuti vemuhole, namphila vehekahi nokumuumbila nombili pahetyino. Tyina tuvekuatesako okukondoka mewaneno, tuhambukiswa Jeova no noandyu.

¹⁷ Okuti ukahi pokati kavana vahaumbila Huku nombili pahetyino? Hamwe wayekapo okuenda komaliongiyo mokonda yaumwe mewaneno wekuleva. Mokonda pahe palambale omuvo, lipula: ‘Okuti pahe ndyikahi vali nawa, iya nahambukwa vali? Okuti o Jeova wandeva, ine omunthu omukuankhali? Okuti Jeova Huku wandingile tyimwe nahahandele?’ Jeova apeho ututekula nawa. Namphila pahetyino hamwe katukahi nokufuisapo omulao wetu wokumuumbila, utuyeka tukale novipuka oviwa aava. (Tiago 1:16, 17) Apa katutu onthiki ya Jeova maiya. Pahe ou omuvo wokukondoka ku Tate yetu woluembia, Jeova, nomewaneno. Ei, oyo vala omphangu yapama yokukala mononthiki mbuno mbahulililako.​—Deuteronômio 33:27; Hebreus 10:24, 25.

18. Omokonda yatyi tuesukisila okukuatesako vana vekahi komutwe?

¹⁸ Kuatesako noukuatyili vana vekahi komutwe. Mokonda Jeova Omunthita woluembia, utuhongolela nokutuyakulila. Waholovona Omona wae opo akale Omunthita Omunene wotyunda. (1 Pedro 5:4) Ovakulu vomauaneno, vekahi momauaneno alamba po 100.000, vaovola omuvo wokunthita onongi ambuho mba Huku. (Atos 20:28) Tyina tukuatesako noukuatyili vana vekahi komutwe, tulekesa okuti tupandula atyiho Jeova na Jesus vekahi nokutulingila.

19. Oñgeni tupondola okufuena puvakuetu?

¹⁹ Kala kumwe novakuatate vove. Otyo tyihangununa tyi? Tyina omafualali okualongoka nawa aluiswa no nondyale, kese efualali lifuena pekuavo, opo aluile kumwe. Okulinga ngotyo tyivekuatesako okuliyakulila. Satanasi ukahi nokulwisa vali unene ovanthu va Huku. Ngotyo, ou hamuvo wokuluisa ovakuatate vetu. Mahi omuvo wokufuena vali kuvakuetu, nokuhatale koviponyo viovakuatate vetu, nokuyumba onthumbi mu Jeova.

20. Oityi tuesukisa okulinga pahetyino?

²⁰ Moluotyo, tutualeiko nokupameka oupanga wetu na Jeova nokukala notyituwa tyokukevelela. Tukevelelei noumphua-lundo onondaka “Ombembwa nepamo!” nenyingilikilo liahulililako liovalembulwa. Konyima yotyo, onoandyu ononkhuana mambukayeka onomphepo mbehanyauno, iya Ombambilonia Onene aikahanyuako. Putyina tukevelela ovipuka ovio vihuvisa vimoneke, tulandulei ehongolelo liavana vekahi komutwe meongano lia Jeova. Fuena puvakuenyi opo ufinde Eliapu novilulu viae! Ou omuvo wokulandula elondolo liomuhoneki wo no salmu wati: “Kalei nomitima viakola, pamekei omitima vienyi, amuho onwe mukevelela Jeova.”​—Salmo 31:24.