Onoandyu Oityi, Oityi Mbulinga?

Siovaa uhanda tunoñgonoke ombunga yae aiho. Mahi pahe ombunga yae onkhuavo ikala keulu. Ombimbiliya ipopia okuti onoandyu “ovana va Huku.” (Jó 38:7) Oityi Ombimbiliya ipopia tyayemba konoandyu? Okuti mbukuatesako ovanthu? Okuti ambuho onoandyu ombunga ya Huku?

1. Onoandyu oityi? Oityi mbulinga?

Siovaa watunga onoandyu etyi nkhele ehenetunge ohi. Onoandyu mbukala keulu, nambo mbukahi vala nga Siovaa, kambumonwa komaiho. (Ova Hebeleu 1:14) Mahi keulu kuna onoandyu onoñgapi? Kuna onoandyu ononyingi-nyingi, ngwe nambo o ngovanthu vala, tyati umwe ei ikahi ñgaa, ei ikahi ñgaa. (Eholololo 5:11) Onoandyu ‘mbutavela ondaka ya Huku, mbulinga etyi apopia.’ (Salmo 103:20) Kohale Siovaa ankho utuma onoandyu mbutuale ondaka yae kovanthu. Tupu pamwe ankho umbutuma mbukuateseko ovanthu vae, pamwe ankho opala veveyovole. Na hono Siovaa umbutuma mbukuateseko vokulongesa vakuavo Ombimbiliya opo vetyivile okuvasa ovanthu vesuka nokunoñgonoka Huku.

2. Okuti Satanasi novilulu navo onoandyu?

Onoandyu mbumwe kambetavelele ku Siovaa. Oandyu yokwetyihimbika umwe, “Eliapu Satanasi, lina likahi nokuyapula ovanthu kombanda yohi aiho.” (Eholololo 12:9) Satanasi wayapulile ku Huku ovo Andau na Eva. Pahe ayapula vali onoandyu ononkhuavo, ambehetavela ku Siovaa, ambuhulu kwe. Walingile tupu ngotyo, omokonda nae ankho uhanda atumaine. Onoandyu ombo mbokuahula kwe, ombo mbutiwa ovilulu. Atyiti umwe na Satanasi novilulu viae, Siovaa evetaata aveho keulu, pahe veli pano pohi. Siovaa wapopia okuti apa katutu meya okuvehanya-ko. — Tanga Eholololo 12:9, 12.

3. Oityi Satanasi novilulu valinga vetunyone?

Satanasi novilulu, vahanda ovanthu velipake momatambu. Vamwe venda kovatali, no kovitapi, no kononganga, no kovimbanda. Satanasi novilulu tupu vakemba ovanthu vasoke okuti tyitavela okupopia no vokuanyima. Mahi Siovaa wapopia umwe nawa-nawa mo Mbimbiliya okuti: “Mwahaovolei vokuundapa novilulu, nii ovitapi.” (Levítico 19:31) Siovaa wetupopila tupu ngotyo, omokonda utyii okuti Satanasi novilulu, vahanda vala okutunyona. Siovaa utuhandela vala otyiwa, kahande tulipake kumwe nonondyale mbae.

KUHANDE OKUNOÑGONOKA VALI?

4. Onoandyu mbukuatesako ovanthu vanoñgonoke Siovaa

Onoandyu hamboko mbenda momaumbo ovanthu otyo mbuvelongesa. Otyilinga tyambo, okukuatesako ovanthu va Huku tyina vakalongesa vakuavo, vetyivile okuvasa ava vahanda okunoñgonoka Huku. Tangei Eholololo 14:6, 7, amutomphola omapulo aa:

• Oityi tuesukisila onoandyu mbutukuateseko tyina tukalongesa vakuetu Ombimbiliya?

• Pahe etyi wamona okuti onoandyu mbupondola okukukuatesako utyivile okuvasa ovanthu vesuka nokunoñgonoka Huku, tyekukalesa-vo ñgeni? Oityi wakalela ngotyo?

5. Wehelipake movilulu

Satanasi novilulu, vati umwe ovo vahahande Huku, ovo vahahande ovanthu. Tangei Luka 9:38-42, amutomphola epulo eli:

• Oityi ovilulu vilinga ovanthu?

Onthwe katuhande okulinga otyipuka natyike, matyitulingisisa tulipake movilulu. Tangei Deuteronômio 18:10-12, amutomphola omapulo aa:

• Ngetyi tuatanga mo Mbimbiliya, ovipuka patyi ovanthu valinga viayemba kovilulu? Potyilongo tyenyi, ovipuka patyi ovanthu valinga viayemba komatambu?

• Tyina utala ñgaa, okuti Siovaa walinga nawa etyi ati muehelipakei movilulu? Oityi wapopila ngotyo?

Talei OVIDIU, amutomphola omapulo aa:

OVIDIU: “Yalei Eliapu” (5:02)

• Okaseta kana Palesa akuta omona wae kenkhanya, okuti kemuamena umwe kovilulu? Oityi wakumbululila ngotyo?

• Oityi Palesa akalinga konyima oku, ehelipake vali movilulu?

Nkhele tya kohale, ovanthu va Huku kavelipake movilulu. Tangei Ovilinga 19:19 na 1 Ova Kolindu 10:21, amutomphola epulo eli:

• Oityi tuesukisila okuyoka ovipuka aviho tuna-vyo viayemba komatambu?

6. Motyivili okulwisa Satanasi novilulu

Ovilulu vituminwa na Satanasi, mahi onoandyu mba Huku mbutuminwa na Mingeli. Mingeli, enyina ekuavo lya Sesusi. Mahi okuti ñgaa Mingeli una umwe ononkhono mbokuluisa Satanasi novilulu? Tangei Eholololo 12:7-9, amutomphola omapulo aa:

• Olie una vali ononkhono? Okuti o Mingeli no noandyu, ine o Satanasi novilulu?

• Okuti ñgaa ovanthu va Huku, vena umwe okutila owoma Satanasi novilulu?

Satanasi novilulu, ove upondola okuvelwisa, avatiliko. Tangei Tiaku 4:7, amutomphola epulo eli:

• Oityi una okulinga opo Satanasi novilulu viae veheye

ETYI WELILONGESA

Welilongesa okuti onoandyu mba Huku mbutukuatesako. Wamona okuti Satanasi novilulu kavelivili na Huku. Tupu wamona okuti Satanasi novilulu vahanda ovanthu velipake momatambu na vevenyone.

Okupitulula

• Oñgeni onoandyu mbukuatesako ovanthu vanoñgonoke Siovaa?

• Ovalie ovo Satanasi novilulu?

• Otyiwa okukala kokule novilulu mokonda yatyi?

KUHANDE OKUOVOLA VALI?

Tanga onthele ei utale oityi tutila Sesusi oe Mingeli.

“Olie Utiwa o Mingeli o Alakandyu?” (Mo jw.org)

Ovanthu vamwe vati Eliapu otyipuka tyimwe tyili momutima wetu tyituhindila ovivi. Okuti otyo otyili?

“Ñgaa Kouye Kuna Umwe Eliapu?” (Mo jw.org)

Tala etyi omukai umwe alingile elipole omawanga.

“Pahe Wanoñgonoka Oityi Tueya Okulinga Kouye” (Omutala Womulavi 1 ya Julho yo 1993)

Tanga onthele ei utale oñgeni Satanasi novilulu vakemba ovanthu.

“Otyili Kombinga Youmbanda Nowanga” (Ondyila Ituala Komuenyo Wahapu, elongeso 5)