1. Omaulo Ombimbiliya etukuatesako okunoñgonoka-tyi?

OITYI matyimonekela ovaumbili va Siovaa apa katutu? Katuesukisile okufuanyeka, mokonda Ombimbiliya itupopila ovipuka viakolela unene mavimoneka apa katutu. Mo Mbimbiliya, muna omaulo ayandyulula etyi ovatumini vankhimana vali mouye auho mavakalinga. Eulo limwe, livasiwa momukanda wa Daniel 11. Eulo olio, lipopia onohamba onombali onondyale. Imwe ohamba yo kokulio kuekumbi, onkhuavo ohamba yo kokumbili kuekumbi. Ovipuka ovinyingi viapopiwa meulo olio viafuisuapo-ale. Ngotyo, tupondola okukala nonthumbi yokuti vina viakambela, navio mavifuisuapo.

 2. Ngetyi tyipopia Gênesis 3:15 ne Eholololo 11:7, nokapitulu 12:17, oityi tuesukisa okuhinangela opo tunoñgonoke nawa eulo lya Daniel?

² Otyipuka tyo tete tuesukisa okuhinangela opo tunoñgonoke nawa eulo lya Daniel 11, otyetyi: eulo olio lipopia vala ovatumini vamonesile unene ononkhumbi ovanthu va Huku. Mouye auho, Onombangi mba Siovaa kavehi-mo. Mahi no ngotyo, veyelwe novatumini. Omokonda yatyi? Omokonda etyi Satanasi novanthu vo mouye wae vahanda, okuhanyako ovaumbili va Siovaa. (Tanga Gênesis 3:15; Eholololo 11:7; 12:17.) Otyipuka tya vali tuesukisa, okunoñgonoka okuti eulo lya Daniel lina okulikuata nomaulo omakuavo avasiwa Mondaka ya Huku. Mokonda opo tunoñgonoke umwe nawa eulo lya Daniel, tuna okutala etyi ono tesitu ononkhuavo mbo Mbimbiliya mbupopia.

 3. Oityi matulilongesa monthele ei, no monthele mailandulako?

³ Ngotyo, onthele ei maihangununa eulo lya Daniel 11:25-39. Maihangununa olie wali ohamba yo kokulio kuekumbi, nohamba yo kokumbili kuekumbi okupolelela mo 1870 alo 1991. Matutale omokonda yatyi tuesukisila okupilulula onkhalelo tunoñgonoka eulo olio. Pahe onthele mailandulako maihangununa eulo livasiwa mu Daniel 11:40–12:1. Onthele oyo, maipopi etyi ono velesikulu ombo mbupopia konthele yetyi tyamoneka-po okupolelela mo 1991, matyikapwa vala mo Alumagedom. Putyina ulilongesa ononthele ombo onombali, otyiwa okuendela kumwe nokakasa kati: “Onohamba Onombali Mbuliyele, Kononthiki Mbonthyulilo.” Mahi tete tuesukisa okunoñgonoka ovalie onohamba onombali mbapopiwa na Daniel.

 4. Ovipuka patyi vitatu mavitukuatesako okunoñgonoka ohamba yo kokulio kuekumbi nohamba yo kokumbili kuekumbi?

⁴ “Ohamba yo kokulio kuekumbi” “nohamba yo kokumbili kuekumbi,” omanyina apelwe onohamba ankho mbukala kokulio no kokumbili kwo tyilongo tyo Isilayeli. Oñgeni tutyii? Omokonda yetyi oandyu yapopila Daniel okuti: “Neya okukupopila etyi matyimoneka novanthu vove [ovanthu va Huku] kononthiki mbonthyulilo.” (Dan. 10:14) Ova Isilayeli vayekapo okukala ovanthu va Huku mo Pendekoste yenima 33. Okutuka opo, Siovaa ayandyulula nawa okuti ovalongwa va Sesusi, pahe ovo ovanthu vae. Ngotyo, ovipuka ovinyingi viapopiwa meulo lya Daniel okapitulu 11, haunene vipopia ovalongwa va Sesusi, kavipopi ova Isilayeli. (Ovil. 2:1-4; Loma 9:6-8; Gal. 6:15, 16) Mokueenda kuomuvo, ovatumini velikalaila vakalele ohamba yo kokulio kuekumbi nohamba yo kokumbili kuekumbi. Mahi no ngotyo, ovatumini ovo aveho valingile ovipuka evi vitatu: Tete, aveho vamonesile ononkhumbi ovanthu va Huku. Vali, onkhalelo valingile onya ovanthu va Huku, ilekesa nawa okuti ankho veyele Huku yotyotyili, Siovaa. Tatu, onohamba ombo ambuho mbulwa poyambo.

 5. Okuti okuhimbikila menima 100 alo mo 1870 kuali ohamba yo kokulio kuekumbi nohamba yo kokumbili kuekumbi? Hangununa.

⁵ Okuhimbikila menima 100, momawaneno amuhimbika okunyingila Ovakilisitau vomatutu. Avapilulula otyili tyondaka ya Huku opo vayandyanese omatutu avo. Okupolelela opo atee mo 1870, Siovaa ankho utupu eongano pano pohi. Ovakilisitau vomatutu avehimbika okuyova ngeholi. Pahe ankho tyipuiya okuimbuka Ovakilisitau votyotyili. (Mat. 13:36-43) Omokonda yatyi tuesukisila okunoñgonoka otyipuka otyo? Omokonda tyitukuatesako okunoñgonoka okuti okuhimbikila menima 100 alo mo 1870, kakuakalele ohamba yo kokulio kuekumbi nohamba yo kokumbili kuekumbi. Ankho kutupu eongano lya Huku pano pohi maliutukilwa no nohamba ombo onombali.b Otyo tyilekesa okuti ohamba yo kokulio kuekumbi nohamba yo kokumbili kuekumbi mbamoneka vala konyima yo 1870. Oñgeni tutyii?

 6. Onalupi ovaumbili va Huku vehimbika okuonganekwa vali? Hangununa.

⁶ Okuhimbikila mo 1870, Huku ahimbika okuonganeka ovanthu vae pano pohi. Menima liatyo olio, omukuatate Charles Taze Russell avehimbika okulilongesa Ombimbiliya nomapanga ae. Ngetyi Huku apopile, Russell nomapanga ae avehimbika ‘okukokola ondyila’ yokuvialeka Ouhamba wa Mesiya. (Mal. 3:1) Pahe Huku ankho una ovaumbili vae vemufenda tyaonganekwa nawa. Okuti pomuvo opo kuali ovatumini vamonesile ononkhumbi ovanthu va Huku? Otyo matutale.

 7. Olie wakala ohamba yo kokumbili kuekumbi atee movilwa vyo tete viouye auho?

⁷ Mo 1870, o Gra-Bretanha ankho otyilongo tyitumina vali ovilongo ovikuavo mouye auho. Ankho tyina omafualali omanyingi nomauta omanyingi. Meulo lya Daniel, muapopiwa ombinga onthutu yanyina-po onombinga ononkhuavo ononthatu. Ombinga onthutu o Gra-Bretanha, onombinga ononthatu mbulekesa o França no Espanha no Holanda. (Dan. 7:7, 8) Pahe o Gra-Bretanha aikala ohamba yo kokumbili kuekumbi atee Movilwa Vyo Tete Viouye Auho. Pomuvo watyo opo, o Estados Unidos aikala otyilongo tyamona vali mouye auho. Pahe avahonyo no Gra-Bretanha, avahimbika okuundapela kumwe.

 8. Tunde apa ononthiki mbonthyulilo mbahimbika atee hono, olie ohamba yo kokumbili kuekumbi?

⁸ Movilwa Viotete Viouye Auho, o Estados Unidos no Gra-Bretanha avelihulu. Ankho vena omafualali omanyingi nomauta omanyingi. Pomuvo opo, o Estados Unidos no Gra-Bretanha, novilongo ankho vatumina, avikala ovilongo viankhimana vali mouye auho. Outumini oo, autiwa Anglo-Amelikana. Ngetyi Daniel apopile, ohamba yo kokumbili kuekumbi, aikongolola “omafualali omanyingi-nyingi etyivila okulwa.” (Dan. 11:25) Mononthiki mbuno mbonthyulilo, o Anglo-Amelikana, oyo ohamba yo kokumbili kuekumbi.c Mahi olie ohamba yo kokulio kuekumbi?

 9. Onalupi ohamba yo kokulio kuekumbi yamoneka? Oñgeni eulo lya Daniel 11:25 liafuisuapo?

⁹ Etyi Russell nomapanga ae vahimbika okulilongesa Ombimbiliya, apalambe vala enima like, akumoneka ohamba omphe yo kokulio kuekumbi. Mo 1871, omukulu umwe utiwa Otto von Bismarck wahonyeka ovilongo ovinyingi, aviho avikala otyilongo ankho tyankhimana tyitiwa Alemanha. Ohamba imwe itiwa Wilhelm I, ankho itumina otyilongo tyitiwa Prussia, ngayo ikala Ohamba yo Alemanha; iya Bismarck akala omukuatesiko wae.d Katutu-katutu, o Alemanha aihimbika okutumina ovilongo vimwe vyo Afrika, no vilongo vimwe vikala konthele yelunga litiwa Pacifico. Aihimbika okulilolela no Gra-Bretanha. Ankho ihanda okunkhimana vali, nokutumina vali ovilongo ovinyingi tyipona o Gra-Bretanha. (Tanga Daniel 11:25.) O Alemanha nayo aikala nomafualali omanyingi nomauta omanyingi. Ankho kuakambela vala katutu opo velifwe no Gra-Bretanha! Omafualali o Alemanha aaluisa onondyale mbavo movilwa vyo tete viouye auho.

10. Oñgeni eulo lya Daniel 11:25b, 26 liafuisuapo?

¹⁰ Daniel waulile etyi ankho matyiende no Alemanha nomafualali ayo omanyingi. Wapopile okuti ohamba yo kokulio kuekumbi ankho “kamaitualako tyitai.” Omokonda yatyi? “Mokonda [ankho] maveilavisa. Vana valia nae, maveitokesa.” (Dan. 11:25b, 26a) Pononthiki mba Daniel ha aveho ankho valia nohamba. Ovo vana vala ‘vaundapela ohamba.’ (Dan. 1:5) Eulo olio lipopia-lie? Lipopia ovanthu ankho vena ovilinga ovinene mo Alemanha, ngetyi ononkhalamutwe mbomafualali, nomapanga ohamba ankho vemupakaila-mo. Ovanthu ovo, katutu-katutu avaende konyima ohamba, aveitokesisa.e Daniel kapopile vala okuti o Alemanha ine ohamba yo kokulio kuekumbi maitoko, mahi tupu wapopile etyi ankho matyiendepo tyina yamaluisa ohamba yo kokumbili kuekumbi. Daniel 11:26 yapopia ohamba yo kokulio kuekumbi okuti: “Omafualali ayo maatiliswa, ovanyingi avalekwa.” Otyo umwe tyaendelepo movilwa vyo tete viouye auho! O Alemanha aitiliko, ovanyingi “avalekwa.” Alo pomuvo opo, kakuali ovilwa viaipaele ovanthu ovanyingi-nyingi ngovilwa vyo tete viouye auho.

11. Oityi ohamba yo kokulio kuekumbi nohamba yo kokumbili kuekumbi valingile?

¹¹ Daniel 11:27, 28, ipopia ovipuka ankho mavihongiliya ovanthu okuhimbika Ovilwa Vyo Tete Viouye Auho. Yapopia okuti ohamba yo kokulio kuekumbi nohamba yo kokumbili kuekumbi ankho “mavapumphama komesa na velikembe.” Tupu Daniel wapopia okuti ohamba yo kokulio kuekumbi ankho maiongiya “ovipuka ovinyingi.” Otyo umwe tyaendelepo! O Alemanha no Gra-Bretanha ankho vapopia okuti kavahande okulwa, vahanda ombembwa. Mahi tuamona okuti otyo ankho omatutu vala etyi vahimbika okulwa mo 1914. Etyi vehenehike menima lyo 1914, o Alemanha ankho otyilongo tyamona unene. Atee umwe aikala otyilongo tya vali tyamona vali unene mouye auho. Pahe Daniel 11:29, 30, ipopia okuti ohamba yo kokulio kuekumbi, o Alemanha, mailuisa ohamba yo kokumbili kuekumbi, aitili-ko. Ngatyo umwe tyiendapo!

12. Oityi ohamba yo kokulio kuekumbi nohamba yo kokumbili kuekumbi valingile movilwa vyo tete viouye auho?

¹² Tunde mo 1914, onohamba ombo onombali ambuhimbika okulwa vali unene. Tupu ambuhimbika okuluisa unene ovanthu va Huku. Mongeleka, movilwa vyo tete viouye auho ovatumini vo Alemanha novo Gra-Bretanha, vamonesile unene ononkhumbi ovanthu va Huku mokonda vaanyene okulipaka moufualali. Ovatumini vo ko Estados Unidos, navo avapake ononkhalamutwe mbeongano mokaleya. Ovipuka ovio viafuisapo eulo livasiwa mu Eholololo 11:7-10.

13. Konyima yo 1930, no movilwa vya vali viouye auho, oityi ohamba yo kokulio kuekumbi yalingile?

¹³ Konyima yo 1930, ohamba yo kokulio kuekumbi aimonesa vali ononkhumbi ovanthu va Huku. Mahi ovipuka avitokota vali unene movilwa vya vali viouye auho. Etyi otyikundyi tyo pulitika tyitiwa o Nazi tyahimbika okutumina o Alemanha, omutumini watyo ankho utiwa Hitler no vokuahula kwe, availika ovilinga vyo Nombangi mba Siovaa mo Alemanha. Vaipaele ovakuatate valamba po 1500, ovanyingi vatyo, avapakwa movipembe vyo nonkhuatwa opo vaundape ngovapika. Ovipuka ovio aviho viapopilwe-ale na Daniel! Wapopile okuti ohamba yo kokulio kuekumbi ankho mailingi “ovipuka visilisa omphangu ikola . . . aipolo-ko otyilikutila tyilingwa apeho.” Oñgeni etyilinga? Opuetyi ailika ovilinga viokuivisa. Pahe ovakuatate ankho tyivepuiya okupopila vakuavo enyina lya Huku. (Dan. 11:30b, 31a) Atee umwe Hitler aane okuti maipaa ovaumbili va Huku aveho vakala mo Alemanha.

14. Olie wakala ohamba yo kokulio kuekumbi konyima yovilwa vya vali viouye auho? Hangununa.

¹⁴ Etyi ovilwa vya vali viouye auho viapwa, otyilongo tyo Uniau Sovietika atyikala ohamba yo kokulio kuekumbi. Atyihimbika okutumina ovilongo ovinyingi ankho vituminwa no Alemanha. O Uniau Sovietika ailingi umwe ngetyi tyalingile o Nazi. Avamonesa ononkhumbi ovanthu aveho ankho vaholovona okutavela Huku tyipona kovatumini.

15. Oityi ohamba yo kokulio kuekumbi yalingile konyima yovilwa vya vali viouye auho?

¹⁵ Konyima yovilwa vya vali viouye auho, ohamba omphe yo kokulio kuekumbi, o Uniau Sovietika, aimonesa unene ononkhumbi ovanthu va Huku. Eulo livasiwa mu Eholololo 12:15-17, liaeleka ononkhumbi ovanthu va Huku ankho mavamoneswa nohamba yo kokulio kuekumbi, ‘nondongi.’ Otyo umwe tyamonekele-po! O Uniau Sovietika ailika ovilinga viokuivisa, aitumu ovakuatate ovanyingi kotyilongo tyimwe tyikala kokule tyitiwa o Siberia. Tunde apa ononthiki mbahulilila mbahimbika, ohamba yo kokulio kuekumbi imonesa ononkhumbi ovanthu Huku. Ihanda okutalameka ovilinga viavo, mahi nii kaina nokutyivila.f

16. Oñgeni o Uniau Sovietika yafuisapo eulo lya Daniel 11:37-39?

¹⁶ Tanga Daniel 11:37-39. Ngetyi tyipopia eulo olio, ohamba yo kokulio kuekumbi “aihesuku [umwe] na Huku yo votate yae.” Oñgeni etyilekesile? O Uniau Sovietika aihimbika okulinga ovipuka vimwe na isoyese onthumbi ovanthu ankho vena monongeleya. Mongeleka, tunde mo 1918, yatuma opo onosikola mbulongese ovalongwa okuti kouye kutupu Huku. Iya oñgeni ohamba yo kokulio kuekumbi “yankhimaneka huku yovimato?” O Uniau Sovietika yakongololele omafualali omanyingi, aimane onombongo ononyingi mokupangiya omauta omanene. Tyilinge ohamba yo kokulio kuekumbi, tyilinge ohamba yo kokumbili kuekumbi, ambuho katutu-katutu ambuongiya omauta aipaa ovanthu ovanyingi-nyingi momuvo wike vala.

17. “Otyipuka tyitoyesa tyieta ehanyu” oityi?

¹⁷ Ohamba yo kokulio kuekumbi aikuatesako ohamba yo kokumbili kuekumbi okueta “otyipuka tyitoyesa tyieta ehanyu.” (Dan. 11:31) Otyipuka otyo o Nações Unidas (Omalongo Aongana).

18. Omokonda yatyi Ombimbiliya ipopila okuti o Nações Unidas “otyipuka tyitoyesa”?

¹⁸ O Nações Unidas “otyipuka tyitoyesa” mokonda ipopia okuti mayeeta ombembwa mouye auho, ngwe Ouhamba wa Huku vala utyivila. Tupu, eulo olio lipopia okuti o Nações Unidas otyipuka “tyieta ehanyu,” mokonda oyo maiya okuhanyako onongeleya ambuho mbomatutu. — Tala okakasa kati: “Onohamba Onombali Mbuliyele, Kononthiki Mbonthyulilo.”

19-20. (a) Omokonda yatyi tuesukisila okunoñgonoka ovipuka tuelilongesa monthele ei? (b) Omapulo patyi matukumbulula monthele mailandulako?

¹⁹ Tuesukisa okunoñgonoka ovipuka ovio aviho tuelilongesa mokonda vilekesa okuti, eulo lya Daniel lipopia ohamba yo kokulio kuekumbi, nohamba yo kokumbili kuekumbi, liafuisuapo okupolelela mo 1870 atee 1991. Otyo tyitukalesa nonthumbi yokuti onthele yakambela, nayo maiya okufuisuapo.

²⁰ Mo 1991, o Uniau Sovietika ailiyapauka. Pahe olie wakala ohamba yo kokulio kuekumbi? Olie ohamba yo kokulio kuekumbi hono? Otyo matuya okulilongesa monthele mailandulako.

1-2. Oityi matulilongesa monthele ei?

PAHE tyimoneka vali nawa okuti tukahi kononthiki mbahulilila mbouye uno. Apa katutu, Siovaa na Sesusi Kilisitu maveya okumanako omautumini aeho ehole okuluisa Ouhamba wa Huku. Tyina onthiki oyo ihenehikepo, tutyii okuti ohamba yo kokulio kuekumbi nohamba yo kokumbili kuekumbi mavatualako okulinana-nana, nokumonesa ononkhumbi ovaumbili va Huku.

² Monthele ei, matulilongesa eulo livahiwa mu Daniel 11:40–12:1. Matutale olie ohamba yo kokulio kuekumbi hono. Konyima, atulilongesa oityi tyitukalesa nonthumbi yokuti Siovaa metuamena movitateka matukamona apa katutu.

3-4. Olie ohamba yo kokulio kuekumbi hono? Hangununa.

³ Etyi otyilongo tyo Uniau Sovietika tyeliyapuka mo 1991, ovaumbili va Huku ankho vakala motyilongo otyo otyinene, avafimi-po katutu. Daniel wapopile omuvo oo okuti omuvo “wokukuatesuako kapii.” (Dan. 11:34) Pahe ovakuatate vetu ankho vapondola okuivisa vala ngetyi vahanda. Ngatyo umwe valinga! Ovaivisi aveliyawisa unene movilongo ankho viakutikinyua mo Uniau Sovietika. Etyi palamba omanima amwe, o Russia novilongo viahula kuyo, avikala ohamba yo kokulio kuekumbi. Ngetyi tuelilongesa monthele yokualamba, opo otyilongo tyikale ohamba yo kokulio kuekumbi, nohamba yo kokumbili kuekumbi, tyina okulinga ovipuka evi vitatu: (1) okumonesa ononkhumbi ovanthu va Huku; (2) okulinga ovipuka vilekesa okuti tyiyele Huku, novanthu vae; (3) okulwa poyavo.

⁴ Omokonda yatyi tupopila okuti, hono o Russia novilongo viahula kuyo, ohamba yo kokulio kuekumbi? Omokonda (1) vekahi nokumonesa ononkhumbi ovanthu va Huku. Mongeleka, pahetyino vailika ovilinga viokuivisa iya vekahi nokulinga onya ovakuatate ovanyingi. (2) Ovipuka ovio vekahi nokulinga vilekesa nawa okuti veyele Siovaa novanthu vae. (3) O Russia ikahi nokulilola nohamba yo kokumbili kuekumbi, o Anglo-Amelikana. Pahe tutalei etyi o Russia novilongo viahula kuyo vihole okulinga, viyandyulula nawa okuti tyotyili ohamba yo kokulio kuekumbi umwe.

 5. Daniel 11:40-43 ipopia omuvo patyi, iya oityi tyihole okumonekapo momuvo oo?

⁵ Tanga Daniel 11:40-43. Ono velesikulu ombo mbupopia omuvo wonthyulilo. Mbupopia oñgeni ohamba yo kokulio kuekumbi nohamba yo kokumbili kuekumbi mavelinana-nana. Daniel waulile okuti onohamba ombo onombali ankho “mambuliyahe” mononthiki mbahulilila. — Dan. 11:40; okatoi.

 6. Oityi tyilekesa okuti onohamba onombali mbukahi nokulinana-nana?

⁶ Ohamba yo kokulio kuekumbi nohamba yo kokumbili kuekumbi mbukalela vala okulwa mokonda mbuhanda okutumina ouye. Mongeleka, konyima Yovilwa Vya Vali Viouye Auho, ovilongo ovinyingi vyo Europa avihulu ko Uniau Sovietika. Otyo atyilundu ohamba yo kokumbili kuekumbi okuhinda eongano litiwa Organização do Tratado do Atlântico Norte [OTAN]. Onohamba ombo mbutualako okumanena onombongo mokupangiya omauta omanyingi aipaa ovanthu ovanyingi. Tupu mbaluile poyambo etyi mbahongilinyine ovilwa viaendele ko Afrika no ko Asia no ko Amelika Latina. O Russia novilongo viahula kuyo, viankhimana unene momanima ano. Ohamba yo kokulio kuekumbi nohamba yo kokumbili kuekumbi vehole okuluila mono komputadole. Mbuhole okulitendeleya poyavo okuti mukuavo ukahi nokulinga ovipuka vihekahi nawa opo anyone otyilongo tyae. Daniel tupu wapopile okuti ohamba yo kokulio kuekumbi maimonesa ononkhumbi ovanthu va Huku. Ngwe otyo umwe ikahi nokulinga. — Dan. 11:41.

 7. Oityi “otyilongo Tyehiwa nawa”?

⁷ Daniel 11:41 ipopia okuti ohamba yo kokulio kuekumbi mainyingila ‘motyilongo Tyehiwa nawa.’ Otyipi otyilongo otyo? Kohale, otyilongo tyo Isilayeli ankho otyo “otyiwa vali kovilongo aviho.” (Eze. 20:6) O Isilayeli ankho otyilongo otyiwa mokonda omo vala ankho muna ovanthu vafenda Siovaa ngetyi ahanda. Mahi tunde mo Pendekoste yenima 33, ondaka “otyilongo” kaipopi vali omphangu pano pohi mokonda ovaumbili va Huku vavasiwa mouye auho. Opo muaina ondaka oyo ipopia-tyi hono? Ipopia ovipuka Onombangi mba Siovaa valinga vielikuata nefendelo liavo, ngetyi okuenda komaliongiyo no movilinga viokuivisa.

 8. Oñgeni ohamba yo kokulio kuekumbi yanyingilile ‘motyilongo Tyehiwa nawa’?

⁸ Tunde apa ononthiki mbonthyulilo mbahimbika, ohamba yo kokulio kuekumbi ihole okunyingaila ‘motyilongo Tyehiwa nawa.’ Mongeleka, etyi o Alemanha ankho ohamba yo kokulio kuekumbi pomuvo wo Nazi, yanyingilile motyilongo otyo. Haunene movilwa vya vali viouye auho, o Alemanha aimonesa ononkhumbi ovakuatate vetu, nokuveipaa. Pahe etyi ovilwa viapwa, o Uniau Sovietika aikala ohamba yo kokulio kuekumbi. Nayo yanyingilile ‘motyilongo Tyehiwa nawa’ etyi yamonesa ononkhumbi ovanthu va Huku, aivetumu kotyilongo tyikala kokule tyitiwa o Siberia.

 9. Momanima ano, oñgeni o Russia novilongo viahula kuyo, vanyingila ‘motyilongo Tyehiwa nawa’?

⁹ Momanima ano, ohamba yo kokulio kuekumbi, o Russia novilongo viahula kuyo, nayo yanyingila ‘motyilongo Tyehiwa nawa.’ Oñgeni yanyingila-mo? Mo 2017, yailika efendelo lyo Onombangi mba Siovaa, aipake vamwe povakuatate vetu no nomphange mokaleya. Tupu yailika omikanda vietu; atee umwe Ombimbiliya yetu nayo yailikwa. Tyihe-otyo vala, yapunda Ombetele yetu ko Russia no nondyuo mbo Maliongiyo no Mbovionge. Pahe okutalela kovipuka ovio, mo 2018, Ononkhalamutwe mbo Nombangi mba Siovaa vapopia okuti, o Russia novilongo viahula kuyo, ovio ohamba yo kokulio kuekumbi. Mahi alo umwe tyina Onombangi mba Siovaa vamoneswa ononkhumbi novatumini, kavalingi ovipuka opo vevetokesise. Vaendela monondongwa mbo Mbimbiliya mbupopia okuitilako “onohamba novatumini aveho,” haunene tyina valinga ovipuka vityika efendelo lietu. — 1 Tim. 2:1, 2.

10. Okuti ohamba yo kokulio kuekumbi maikatilisa ohamba yo kokumbili kuekumbi? Hangununa.

¹⁰ Eulo livasiwa mu Daniel 11:40-45, haunene lipopia ohamba yo kokulio kuekumbi. Okuti otyo tyilekesa okuti ohamba yo kokulio kuekumbi maitilisa ohamba yo kokumbili kuekumbi? Au. Tupopia ngotyo mokonda ohamba yo kokumbili kuekumbi maivasiwa tyina Siovaa na Sesusi vameya okumanako omautumini aeho movilwa vyo Alumagedom. (Ehol. 19:20) Omokonda yatyi tuna onthumbi oyo? Mokonda otyo tyapopiwa momukanda wa Daniel no we Eholololo.

11. Oityi eulo lya Daniel 2:43-45 lihangununa? (Tala olutalatu lwo kondye.)

¹¹ Tanga Daniel 2:43-45. Mono velesikulu ombo, omuuli Daniel wapopia omautumini aluisile ovanthu va Huku. Daniel weepopia ngatyina ononthele mbelikalela mbotyilolo tyalingwa novipuka vielikalaila. Onthele yahulililako yotyilolo otyo, onomphai mbotyivela mbahonya nonthata. Onomphai ombo mbulekesa o Anglo-Amelikana, outumini mauhulilila-ko. Eulo olio lihangununa okuti o Anglo-Amelikana [o Gra-Bretanha no Estados Unidos] maivasiwa Nouhamba wa Huku tyina wameya okuhanya-ko omautumini aeho pano pohi.

12. Omutwe wa pandu-vali ulekesa-tyi, iya omokonda yatyi tyakolela okutyinoñgonoka?

¹² Apositolu Suau tupu wapopile omautumini amonesile ononkhumbi ovanthu va Huku. Suau waeleka omautumini oo nenyama lina omitwe epandu-vali. Omutwe wa pandu-vali ulekesa o Anglo-Amelikana. Otyo otyipuka tyakolela unene mokonda petupu vali omutwe omukuavo ukuama kwo. Omutwe wa pandu-vali mauvasiwa koutumini tyina Sesusi no noandyu vameya okuuhanyako, kumwe nenyama liatyo.b — Ehol. 13:1, 2; 17:13, 14.

13-14. Olie “Goge yotyilongo tya Magoge”? Omokonda yatyi mahandela okuhanya-ko ovanthu va Huku?

¹³ Eulo limwe livasiwa mu Ezequiel, litunoñgonokesa etyi matyikaenda-po tyina onohamba ombo onombali mbuhenehanyue-ko. Omaulo avasiwa mu Ezequiel 38:10-23 no mu Daniel 2:43-45, 11:44–12:1 no mu Eholololo 16:13-16, 21, ngoti apopia vala omuvo wike. Inkha ongotyo, opo muaina ovipuka mavimoneka apa katutu ovievi:

¹⁴ Tyina ononkhumbi ononene mbamehimbika, mapakala vala katutu, ‘onohamba mbo kombanda yohi aiho’ ambulikuate kumwe. (Ehol. 16:13, 14; 19:19) Oupanga oo, Ombimbiliya iwihana okuti o “Goge yotyilongo tya Magoge.” (Eze. 38:2) Mavautukila ovaumbili va Huku opo vevehanye-ko. Apositolu Suau wapopia etyi matyivelundu okuveutukila. Oityi? Wamona omamanya omanene ongandavila atokela konondyale mba Huku. Omamanya oo, tyafuile alekesa onondaka mbekoyeso mambukaiviswa novanthu va Huku pomuvo opo. Onondaka ombo mambukanumanesa Goge ya Magoge, ahande okuhanyako ovaumbili va Huku kombanda yohi aiho. — Ehol. 16:21.

15-16. (a) Oityi omukanda wa Daniel 11:44, 45 upopia? (b) Oityi matyikamonekela ohamba yo kokulio kuekumbi, novatumini ovakuavo valinga onthele ya Goge ya Magoge?

¹⁵ Tanga Daniel 11:44, 45. Onondaka mbekoyeso matukaivisa, netyi Goge ya Magoge metuutukila, ngoti tyelikuata kumwe netyi tyapopia ono velesikulu ombo. Ñgeni ngotyo? Daniel wapopia okuti ‘onondaka mbatunda koutundilo, no kokulio kuekumbi, mambukanumanesa unene’ ohamba yo kokulio kuekumbi. Pahe ohamba oyo aihande “okuipaa ovanthu ovanyingi.” “Ovanyingi” ovo Daniel apopia, ngoti ovanthu va Siovaa.c Apa Daniel ngoti ankho ukahi nokupopia omuvo Onombangi mba Siovaa mavautukilwa na Goge.

¹⁶ Tyina ohamba yo kokulio kuekumbi kumwe novatumini ovakuavo vameya okutuutukila, Siovaa mevenumanena, evehanye-ko movilwa vyo Alumagedom, mokonda utupu etyi tyimupona. (Ehol. 16:14, 16) Pahe kamakukakala vali ohamba yo kokulio kuekumbi, novatumini ovakuavo valinga onthele ya Goge ya Magoge. Aveho mavahanyuako, “avehena ou uvekuatesako.” — Dan. 11:45.

17. Olie omona wohamba utiwa o Mingeli wapopiwa mu Daniel 12:1? Oityi alinga?

¹⁷ Daniel 12:1 ipopia nawa-nawa oñgeni ohamba yo kokulio kuekumbi novatumini ovakuavo mavakahanyuako, no ñgeni onthue matukayovolwa. (Tanga.) Oityi ovelesikulu oyo ihanda okupopia? Mingeli, enyina ekuavo lyo Hamba yetu Sesusi Kilisitu. Tunde apa Sesusi akala ohamba mo 1914, “utai opo aamene” ovanthu va Huku. Apa katutu “makatuka” opo ahanyeko onondyale mbae mo Alumagedom. Daniel wapopia ovilwa ovio okuti “omuvo upuiya vali” tunde apa ovanthu vatungwa. Iya Suau wapopia okuti tyina o Alumagedom iheneye nkhele makukala ‘ononkhumbi ononene.’ — Ehol. 6:2; 7:14.

18. Omokonda yatyi tuhapondola okutila owoma ovipuka mavimoneka apa katutu?

¹⁸ Tuhatilei owoma mokonda tyilinge Daniel tyilinge Suau, aveho vapopia okuti Siovaa na Sesusi mavaamena ovanthu vavo mononkhumbi ononene. Daniel wapopia okuti vana mavakahupa, omanyina avo “maahonekwa momukanda.” (Dan. 12:1) Oityi tuesukisa okulinga opo omanyina etu ahonekwe momukanda oo? Tuesukisa okulinga ovipuka vilekesa okuti tuna ekolelo Mondyona ya Huku, Sesusi Kilisitu. (Suau 1:29) Tuesukisa okulipakula ku Siovaa, atumbatisalwa. (1 Pet. 3:21) Tupu tuesukisa okukuatesako Ouhamba wa Huku, mokulongesa ovanthu konthele ya Siovaa.

19. Oityi tuesukisa okulinga pahetyino iya omokonda yatyi?

¹⁹ Pahe ou omuvo wokupameka onthumbi yetu mu Siovaa, no meongano liae. Omuvo wokuhula Kouhamba wa Huku. Inkha tulinga ngotyo, matuhupu tyina ohamba yo kokulio kuekumbi nohamba yo kokumbili kuekumbi mbameya okuhanyuako Nouhamba wa Huku.

Omaulo amwe apopiwa mokakasa aka apopia ovipuka viaendelepo momuvo wike vala. Omaulo oo aeho alekesa nawa okuti tukahi “komuvo wonthyulilo.” — Dan. 12:4.

• 

  

  Otesitu: Ehol. 11:7; 12:13, 17; 13:1-8, 12

  Eulo: “Enyama” litumina ovanthu pano pohi omanima alamba 3.000. Mononthiki mbonthyulilo, omutwe wa pandu-vali uvetwa autoko. Konyima, omutwe oo auvelulwa, iya ‘ohi aiho ailandula’ enyama. Satanasi ‘ulwisa ovasukuki’ nenyama olio.

  Okufuisuapo: Konyima Yombila Onene, ovatumini ovanyingi vamonesilwe ononkhumbi ovanthu va Siovaa. Pahe Movilwa Vyo Tete Viouye Auho, etyi palamba omanima alamba po 3.000, outumini wo Gra-Bretanha auhimbika okusoya. O Gra-Bretanha yahimbika okupama vali etyi yelihonyeka no Estados Unidos. Haunene mononthiki mbuno mbonthyulilo, Satanasi utuma ovatumini vouye auho opo vamonese ononkhumbi ovanthu va Huku.

• 

  Otesitu: Dan. 11:25-45

  Eulo: Oundyale maukala pokati kohamba yo kokulio kuekumbi nohamba yo kokumbili kuekumbi mononthiki mbahulilila.

  Okufuisuapo: O Alemanha no Anglo-Amelikana valuile. Konyima, mo 1945, o Uniau Sovietika novilongo viahula kuyo, avakala ohamba yo kokulio kuekumbi. Mo 1991, o Uniau Sovietika yeliyapauka, mahi mokueenda kuomuvo, o Russia novilongo ovikuavo viahula kuyo, avakala ohamba yo kokulio kuekumbi.

• 

  Ono tesitu: Isa. 61:1; Mal. 3:1; Luka 4:18

  Eulo: Siovaa watuma “omutumwa-ndaka” wae opo ‘akokole ondyila’ mokonda meya okuvialeka Ouhamba wa Mesiya. Omutumwa-ndaka oo una otyilinga ‘tyokuivisa onondaka onongwa konondalawa.’

  Okufuisuapo: Okuhimbikila menima 1870, Omukuatate Charles Taze Russell nomapanga ae, avahimbika okulilongesa Ombimbiliya opo vanoñgonoke otyili. Pahe okupolela mo 1880, avaimbuka okuti ovaumbili va Huku vesukisa okuivisa. Mongeleka, vahonekele ononthele mbuna onosapi mbati: “Tuesukisa Ovaivisi 1.000”; “Tuanakwa Opo Tuivise.”

• 

  Ono tesitu: Mat. 13:24-30, 36-43

  Eulo: Omulume umwe wakuna otiliku mepia liae. Akuya ondyale yae aikuno-mo evu ine eholi. Aviho aviyekwa vikulile kumwe atee pomuvo wokuteya. Etyi omuvo wokuteya wehikapo, evu alitukulwa-mo alipakelwa opo.

  Okufuisuapo: Tunde mo 1870, Ovakilisitau vo tyotyili avahimbika okupunguluka Kovakilisitau vomatutu. Tunde apa ononthiki mbonthyulilo mbehimbika, Ovakilisitau vo tyotyili vekahi nokuyapulwa kefendelo lyo matutu opo vanyingile meongano lya Huku.

• 

  Ono tesitu: Dan. 2:31-33, 41-43

  Eulo: Otyilolo otyinene tyatungwa novivela vielikalaila; onomphai mbatyo o mbovivela viahonya nonthata.

  Okufuisuapo: Onthata, ilekesa ovanthu vatuminwa no Gra-Bretanha no vokutuminwa no Estados Unidos. Ovanthu ovo, vanumanena ovatumini iya apeho vevetyitukila-po. Mokonda yavo, o Anglo-Amelikana, pamwe isoya-soya.

• 

  

  Ono tesitu: Mat. 13:30; 24:14, 45; 28:19, 20

  Eulo: “Otiliku” ipakwa “motyimbundu.” “Omupika omukuatyili nokualunguka” upewa otyilinga tyokuava okulia “vomeumbo.” ‘Onondaka onongwa Mbouhamba’ mbuhimbika okuiviswa “kombanda yohi aiho.”

  Okufuisuapo: Mo 1919, omupika omukuatyili nokualunguka wapewa otyilinga tyokuhongolela ovilinga vilingwa novanthu va Huku pano pohi. Tunde menima olio, Ovalilongesi vo Mbimbiliya avahimbika okuivisa vali unene tyipona kohale. Hono, Onombangi mba Siovaa vaivisa movilongo vilamba po 200, iya valinga omikanda vilongesa Ombimbiliya momalaka alamba po 1.000.

• 

  Ono tesitu: Dan. 12:11; Ehol. 13:11, 14, 15

  Eulo: Enyama lyo nombinga onombali lipopila ovanthu opo “valinge otyilolo tyenyama,” aliavela “omuenyo otyilolo” otyo.

  Okufuisuapo: O Gra-Bretanha no Estados Unidos vahindile o Liga das Nações. Tupu novilongo ovikuavo avinyingila meongano olio. Mo 1926, ohamba yo kokulio kuekumbi nayo ainyingila meongano olio. Mahi yakala-mo vala atee mo 1933. Ovanthu ankho vasoka okuti o Liga das Nações mayeeta ombembwa yotyotyili pano pohi, otyipuka tyivilwa vala Nouhamba wa Huku. Tupu otyo ovanthu hono vakevelela ko Nações Unidas.

• 

  

  Otesitu: Dan. 8:23, 24

  Eulo: Ohamba ina otyipala tyitilisa owoma, “ihanya ovipuka ovinyingi.”

  Okufuisuapo: O Anglo-Amelikana yaipaa ovanthu ovanyingi-nyingi, tupu yahanya ovipuka ovinyingi. Mongeleka, Movilwa Vya Vali Viouye Auho, o Estados Unidos yatokesile onombomba onombali mbaipaele ovanthu ovanyingi-nyingi (bombas atómicas). Ovanthu vokuaipawa no nombomba ombo, ovo tyilongo tyimwe ankho tyiliyele no Estados Unidos no Gra-Bretanha.

• 

  Ono tesitu: Dan. 11:31; Ehol. 17:3, 7-11

  Eulo: “Enyama enkhuhu” litunda metoto, alikala ohamba yatyinana. Enyama olio, lina onombinga ekwi. Onombinga ekwi mbuhanya-ko “ekunga.” Konyima, nalio alihanyua-ko. Omukanda wa Daniel upopia okuti ohamba oyo, “otyipuka tyitoyesa tyieta ehanyu.”

  Okufuisuapo: Movilwa Vya Vali Viouye Auho, o Liga da Nações yatokele-po. Konyima yovilwa, akuhindwa o Nações Unidas. O Nações Unidas ipopia okuti ikahi nokulinga otyipuka tyivilwa vala Nouhamba wa Huku, ngetyi tyalingile o Liga da Nações. O Nações Unidas oyo maiya okuhanya-ko onongeleya ambuho mbomatutu.

• 

  

  Ono tesitu: 1 Tes. 5:3; Ehol. 17:16

  Eulo: Ovatumini vapopia okuti “tuna ombembwa, tukahi metuliyo!” Konyima, “onombinga ekwi . . . nenyama,” vihanyako “ekunga.” Pahe ovatumini navo avahanyuako.

  Okufuisuapo: Ovatumini mavakapopia okuti vaeta ombembwa nepamo. Konyima, ovilongo vikuatesako o Nações Unidas mavihanyeko onongeleya mbomatutu. Opo ononkhumbi onene mambuhimbika. Ononkhumbi ononene mambukapwa tyina ouye uno wamahanyuako mo Alumagedom.

• 

  Ono tesitu: Eze. 38:11, 14-17; Mat. 24:31

  Eulo: Goge unyingila motyilongo tyovanthu va Huku. Konyima, onoandyu “ambukaongiya ovaholovonwa.”

  Okufuisuapo: Ohamba yo kokulio kuekumbi novatumini ovakuavo, mavakautukila ovanthu va Huku. Tyina vamautukilwa, mapakala vala katutu, ovalembulwa nkhele veli pano pohi avatualwa keulu.

• 

  Ono tesitu: Eze. 38:18-23; Dan. 2:34, 35, 44, 45; Ehol. 6:2; 16:14, 16; 17:14; 19:20

  Eulo: ‘Una wavelama konkhambe ongonga’ makamanuhula “okufinda” onondyale mbae tyina amahanyeko Goge nomafualali ae. “Enyama” ‘malikayumbwa metala liotupia’; iya otyilolo atyihanyua-po nemanya.

  Okufuisuapo: Sesusi, Ohamba Youhamba wa Huku, makayovola ovanthu va Huku. Sesusi, novo 144.000 no noandyu, mavakahanya-ko aveho mavakautukila ovanthu va Huku. Opo, opo omautumini ovanthu maakapuila!