Oñgeni Ombimbiliya Yehika Kwoonthwe

Namphila omapapelo atyo okwahonekelwe o Hembeleu no Alamaiku, no Ngeleku,a ehehikile kononthiki mbetu kuno, mahi ondaka oyo yapopia otyili. Naina oñgeni tupondola okuyumba-ko onthumbi okuti etyi tyipopia Ombimbiliya hono, otyo umwe tyapopilwe Movihonekwa vyo tete viafiminwa?

Ovihonekwa vyo Hembeleu viehika tupu kwoonthwe, otyitumino Huku apakele-ko ankho tyiti Ovihonekwa vikola vina okukopiyalwa, avihonekwa vali kotyipuka otyikwavo.b Mongeleka, Siovaa watumaine onohamba mbova Isilayeli okuti vena okutaindya Ombwingwa yavo mwene ngako vahoneka Otyitumino. (Epalukununo 17:18) Tyehe-otyo vala, Huku ankho utuma vomuhoko wa Levii vapake nawa Otyitumino otyo vetyilongesa ovanthu. (Epalukununo 31:26; Neemiya 8:7) Etyi oukonde wova Sundaa wapwa ko Mbambilonia, akwoonganekwa ovanthu vokuhoneka. (Esitala 7:6, okatoi) Apakala apakala, pahe ovahoneki ovo avakopiyala onombwingwa ononyingi mbomikanda 39 Viovihonekwa vyo Hembeleu.

Mokweenda kwomanima ovityita novityita, ovahoneki ovo avakopiyala omikanda ovio. Konyima pahe, ovahoneki vamwe ova Sundaa ankho vatiwa ova Masoletu (massoretas) avesala natyo, atyilingi otyiso tyavo. Omukanda Códice de Leningrado oo omukanda omukulu vali unene wahonekelwe nova Masoletu momanima 1008/1009 P.K. Mahi pokati apa, mono 1950, kwavasiwa onombwingwa 220, novinthimbu vimwe viavasiwa Melunga Liankhia (Mar Morto). Onombwingwa ombo, mbakala-ko omanima alamba potyita, tyipona omukanda Códice de Leningrado. Ngwe okweeleka Onombwingwa Mbo Melunga Liankhia nomukanda Códice de Leningrado, tumona-po tyimwe tyesukisa unene: Onombwingwa mbo Melunga Liankhia, mbelikalela vala monondaka mahi ha mweetyi mbupopia.

Ya pahe omikanda 27 vyo Kovihonekwa Viovakwa-Kilisitu mo Ngeleku? Omikanda ovio viahonekwa na vamwe povatumwa va Kilisitu, na vamwe povalongwa vae vo tete. Ovo navo valandulile otyiso tyovahoneki ova Sundaa, navo avakopiyala omikanda ovio monombwingwa ononkhwavo. (Ova Kolosu 4:16) Namphila Omutumini umwe wo Loma utiwa o Diocleciano na vamwe vali vahandele okuhanyauna omikanda Viovakwa-Kilisitu vo tete, mahi kwahupile ovinthimbu vimwe ovinyingi, nonombwingwa mbumwe mbehika umwe kononthiki mbetu kuno.

Ovihonekwa Viovakwa-Kilisitu avipitiywa momalaka omakwavo. Onombimbiliya mbo tete mbapitiyilwe momalaka aa: arménio, copta, etíope, georgiano, latim, nomo siríaco.

Ha ambuho onokopiya mbonombwingwa Mbonombimbiliya onondaka mbatyo mbelifwa. Naina, oñgeni tyamoneka okuti ombwingwa ipopia etyi tyapopilwe tete oyei?

Otyo tupondola okutyeeleka nomulongesi watuma ovalongwa vae 100, vakopiyale okapitulu akeho momukanda umwe. Omukanda oo ine uvomba, okweeleka etyi ovalongwa ovo aveho vakopiyalele matyimoneka umwe nawa otyityi omukanda watyo mwene wapopile. Ovalongwa ovo vapondola okuponya movipuka vimwe, mahi ha aveho mavaponyo etyi mukwavo nae aponya. Tyelifwa nootyo, tyina vokwatanga vaeleka omikanda omikulu, nonokopiya mbonombwingwa Mbombimbiliya ombu twavasa, vavasa-mo ovipuka vimwe vokwakopiyalele vapengesa, mahi pahe avatale ei yayemba vali kweetyi tyapopilwe mwene tete.

Oñgeni matuyumbu-ko onthumbi okuti tyali Mombimbiliya yo tete, otyo umwe mwene tyapopiwa? Omukulu umwe watanga mosikola utiwa o William H. Green wapopia Ovihonekwa vyo Hembeleu wati: “Tupondola umwe okuti petupu vali omukanda upopia umwe mwene nawa etyi tyapopilwe kohale Ngombimbiliya.” Ovihonekwa Viovakwa-Kilisitu mo Ngeleku, evi vamwe vati, o Testamentu Omphe, omukulu umwe watanga mosikola utiwa F. F. Bruce wahoneka okuti: “Ovipuka vilekesa umwe okuti o Testamentu Omphe yelikwata umwe nawa novihonekwa vyo tete, viaviuka vali nawa tyipona ovipuka ovikwavo ovanthu vahonaikile kohale, nawike utyaanya otyo.” Apopi vali okuti: “Ine etyi ipopia tyali vala tyovanthu vahoneka, ñgeno tyahuvisa ovanthu ovanyingi.”

Ovihonekwa vyo Hembeleu: Ombimbiliya Ikola Yaava Ekevelelo Liouye Omupe yovihonekwa vyo Hembeleu, (1953-1960) yapolwa Mombimbiliya itiwa Biblia Hebraica ya Rudolf Kittel. Mahi pahe Onombimbiliya ononkhwavo onomphe mbo Hembeleu, ngei itiwa Biblia Hebraica Stuttgartensia nonkhwavo itiwa Biblia Hebraica Quinta, pokwapitiywa mbapolwa Monombwingwa mbamoneka konyima, mbavasiwa Melunga Liankhia (Mar Morto). Omikanda ovio viovanongo vonosikola, ovio viaeta omukanda Códice de Leningrado una outoi wonondaka mbapolwa monombwingwa ononkhwavo, o Pentateuco samaritano, nonombwingwa mbutiwa Rolos do Mar Morto, no Septuaginta grega, no Targum Aramaico, no Vulgata latina, no Peshitta siríaca. Mombimbiliya Biblia Hebraica Stuttgartensia no Biblia Hebraica Quinta, namo vokwapitiya Ombimbiliya Ikola Yaava Ekevelelo Liouye Omupe vatala-mo.

Ovihonekwa vyo Ngeleku: Pokati kokuti nenima 1853 atee menima 1881, omukulu umwe omunongo utiwa B. F. Westcott nomukwavo utiwa o F.J.A. Hort, vaelekele Ombimbiliya yo pomuvo opo, neetyi tyipopia onombwingwa mbovihonekwa vyo Ngeleku pweetyi mavapitiya Ombimbiliya yo Ngeleku, mokonda ankho vetyimona okuti oyo yafwena vali kovihonekwa ovikulu. Tyina twati mono 1950, Votyilinga Tyokupitiya Ombimbiliya Ikola Yaava Ekevelelo Liouye Omupe, ngamo vatala tyina vapitiya Ombimbiliya. Tupu vatala monombwingwa mbo momanima okuhimbikila mono 125 P.K. atee menima 300 P.K. Okutuka opo, akumoneka vali onombwingwa ononkhwavo. Tupu pahe kwamoneka vali Ovihonekwa vya Nestle na vya Aland novihonekwa ovikwavo vyo Sociedades Bíblicas Unidas. Ovipuka vimwe vavasa navio viapakwa Mombimbiliya Ikola Yaava Ekevelelo Liouye Omupe.

Okutalela kovihonekwa ovio twavasa, tyamoneka umwe nawa okuti onondaka mbumwe mbapakwa monovelesikulu Mbovihonekwa vyo Ngeleku, ngoombu mbuli Monombimbiliya mbumwe, mbayawiswa-mo vala, Movihonekwa viafiminwa ovikulu kambali-mo. Mokonda tyokuyapaula onovelesikulu Mombimbiliya tyahimbika vala mono 1550, onovelesikulu mbumwe pahe mbesala-sala tyehena onondaka Monombimbiliya ononyingi. Onotesitu mbuna onovelesikulu ngoombo ombombu: Mateusi 17:21; 18:11; 23:14; Maluku 7:16; 9:44, 46; 11:26; 15:28; Luka 17:36; 23:17; Swau 5:4; Ova Loma 16:24. Mombimbiliya ei, ponovelesikulu mbatyo mbehena onondaka papakwa okatoi ketyipopia.

Onondaka ononyingi mbokwamanuhula omukanda wa Maluku 16 (ovelesikulu 9-20), nonondaka mbehehi mbokwamanuhula okapitulu 16, nonondaka mbayandyululwa mba Swau 7:53–8:11, tyamoneka umwe nawa okuti, movihonekwa vyo tete kambali-mo. Onovelesikulu ngoombo mbayombelekwa-mo vala, Mombimbiliya eic kambapakelwe-mo.

Onondaka mbumwe nambo mbaviukiswa mbuyembe kweetyi ovanongo vokwatanga vati otyo tyaviuka vali kovihonekwa vyo tete. Mongeleka omu mutyipopila onombwingwa mbumwe, Mateusi 7:13 yati: “Nyingililei kombundi yahita, mokonda ombundi yokwahandyuka, ondyila onthanda itwala mehanyauno, ava ovanyingi opo veli nokunyingilila.” Monombimbiliya mbo tete ondaka “ondyila onthanda” ankho kayapakelwe-mo. Mahi etyi patangwa vali nawa, tyamoneka okuti ondaka oyo “ondyila onthanda,” movihonekwa viotete ankho omoili. Pahe Mombimbiliya ei yapakwa-mo. Ovipuka ovinyingi-ale ngoovio viaviukiswa. Mahi ovio havinene, kavityopola etyi Ondaka ya Huku yahanda okupopia.