A5
Enyina lya Huku Movihonekwa Viovakwa-Kilisitu mo Ngeleku
Ovanongo vokwatanga Ombimbiliya vetyitavela okuti Huku una enyina, liahonekwa nomaletela ekwana (Tetragrama) (יהוה) Movihonekwa vyo Hembeleu lili-mo tyikehika 7.000. Mahi ovanyingi vati Movihonekwa Viovakwa-Kilisitu mo Ngeleku kaliali-mo. Otyo uvasila Monombimbiliya ononyingi, pamwe no Mbolunyaneka kamwapakelwe enyina Siovaa kovihonekwa evi vati o Testamendu Omphe. Na apa umwe papopiwa etyi tyatunda Movihonekwa vyo Hembeleu, mwene pali umwe o Tetragrama yenyina lya Huku, ovapitiyi Vonombimbiliya mbumwe enyina velipola-po avapake-po okuti o “Tatekulu.”
Mahi Ombimbiliya Ikola Yaava Ekevelelo Liouye Omupe kayalingilwe ngootyo tyilinga ovanthu vamwe. Ei mwene ina umwe enyina lya Siovaa, liahonekwa-mo 237 Movihonekwa Viovakwa-Kilisitu mo Ngeleku. Ovapitiyi Vombimbiliya ei valinga tupu ngootyo, o mokwasoka kovipuka evi vivali: (1) Omikanda vyo Ngeleku tuna-vio hono havio-ko mwene vyo tete. Onokopiya ononyingi mbuli-ko hono, o mbokwahonekelwe konyima, mbokwahonekelwe etyi palamba-le omanima ovityita vivali okutuka apa pahonekwa mbo tete. (2) Pomuvo watyo opo, vokwakopiyala monombwingwa Mbombimbiliya, apa vavasa o Tetragrama veipola-po avapake-po okuti Kýrios, ondaka yo Ngeleku yokuti “Tatekulu,” pamwe tupu, mombwingwa vakopiyala, o Tetragrama ankho yapolwapo-ale papingiywa Tatekulu.
Votyilinga Tyokupitiya Ombimbiliya Ikola Yaava Ekevelelo Liouye Omupe, vetyimona umwe okuti o Tetragrama yenyina lya Huku monombwingwa mbo tete Mbovihonekwa Viovakwa-Kilisitu mo Ngeleku ankho omolili. Vasoka tupu ngootyo, vamona ovipuka evi:
Monokopiya Mbovihonekwa vyo Hembeleu evi ovanthu vatangaile pononthiki mba Sesusi, no pononthiki mbovalongwa vae, o Tetragrama yali-mo. Otyo ovanthu ankho kavetyaanye vetyii nawa. Pahe ko Qumran kwavasiwa onombwingwa Mbovihonekwa vyo Hembeleu mbakopiyalelwe mono 49 pomuvo wa Kilisitu, mbutulekesa-tyo umwe nawa.
Pononthiki mba Sesusi no pomuvo wovatumwa vae, o Tetragrama yali Movihonekwa vyo Hembeleu viapitiywa mo Ngeleku. Momanima ovityita novityita, ovanongo vokwatanga Ombimbiliya ankho vasoka okuti o Tetragrama monombwingwa mbo Septuaginta Grega mbapitiywa okupola mo Hembeleu, kayali-mo. Mahi mono 1950, ovanongo vokwatanga, avatange movinthimbu vimwe vionombwingwa mbo kohale mbo Septuaginta Grega yali-ko pononthiki mba Sesusi. Movinthimbu muna umwe enyina liatyo mwene lya Huku, liahonekwa nomaletela o Hembeleu. Pononthiki mba Sesusi enyina lya Huku ankho limoneka Movihonekwa vyo Ngeleku. Mahi etyi tyati mono 400 omu (kotyita tya kwana) etyi Kilisitu eile-ale, pahe enyina lya Huku alihimbika okuvomba-mo monombwingwa mbo Septuaginta Grega, mo Códice Vaticano nomo Códice Sinaítico. Okuhimbikila momukanda Ehimbikilo atee momukanda wa Malakiya apa enyina lya Huku liali pahe ankho kali-po vali. Otyo tyaenda ngootyo, katyituhuvisa tyina tutala monombwingwa mbumbwe mbo pomuvo opo mbapakwa nawa, enyina lya Huku oku vati oko Testamendu Omphe kali-ko.
Sesusi wetyipopilile umwe poluhandya okuti: “Ame naholololela enyina liove ovanthu wampha, ava wapola mouye.” Mwene wetyipopile umwe nawa okuti ovilinga viae uvilingila “enyina lya Tate yae”
Ovihonekwa Viovakwa-Kilisitu mo Ngeleku mwene vityipopia okuti Sesusi wapopaile enyina lya Huku, elipopila umwe na vakwavo. (Swau 17:6, 11, 12, 26) Mwene wetyipopile melikwambelo liae ati: “Ame naholololela enyina liove ovanthu wampha, ava wapola mouye.” Nkhele apopi vali ati, ‘mandyivenoñgonokesa vali’ enyina liove. — Swau 5:43; 10:25.
Ovihonekwa vyo Ngeleku navio viatuka komphepo ya Huku aviyawiswa kovihonekwa vikola vyo Hembeleu, ine enyina lya Siovaa kovihonekwa vyo Ngeleku kalimoneka-ko opo ñgeno katyaviukile. Momanima o potyita tyo tete etyi Kilisitu eile-ale, omulongwa Tiaku wapopilile ovakulu mo Selusalei ati: “Simiyau wapopia atyiho Huku alinga, etyi ahinangela tete kovanthu vovilongo, etyi asoka okupola-mo ovanthu vatyinde enyina liae.” (Ovilinga 15:14) Ine Tiaku wapopile vala ngootyo, mahi pomuvo opo nawike enyina olio ulii, ñgeno katyaviukile.
Enyina lya Huku Kovihonekwa vyo Ngeleku liamoneka-ko tyatipulwa. Eholololo 19:1, 3, 4, 6, ipopia enyina lya Huku liapopilwa mondaka “Aleluya.” Ondaka oyo itunda mo yo Hembeleu ihangununa okuti “Hilivikei Sah.” “Sah,” enyina lya Siovaa liatipulwa. Nomanyina amwe apopiwa Kovihonekwa vyo Ngeleku apolwa menyina lya Huku Movihonekwa vyo Hembeleu. Ngwe tyili, okuyemba kwootyo, enyina lya Sesusi lipopia okuti “Siovaa oe Eyovo.”
Momikanda Ovakwa-Kilisitu ova Sundaa ankho vahoneka ankho vapaka-mo enyina lya Huku. Omukanda Tosefta, omukanda umwe wovitumino viapopiwa komulungu wahonekwa mono 300 Pomuvo wa Kilisitu, wapopia omikanda Viovakwa-Kilisitu ankho viyokwa Motyasapalo wati: “Omikanda viono Evandyelista no vyo minim [mokutala Ovakwa-Kilisitu ova Sundaa] kaviliyovola motupia. Mahi viyekwa umwe vipile apa vili, navio Nenyina liatyo lya Huku lili-mo.” Momukanda oo apopia ngootyo, tupu wapopia-mo Rabbi Yosé omu Ngalileya, wali-ko mono 200 Pomuvo wa Kilisitu, tupu wati monthiki onkhwavo kosimanu, “enyina lya Huku lina okutetwa-po, [momikanda Viovakwa-Kilisitu] ovinthimbu viatyo avipakwa nawa, tyahupapo ngatyo tyiyokwa.”
Ovanongo vokwatanga Ombimbiliya vetyitavela okuti enyina lya Huku ankho liapopiwa apa Ovihonekwa vyo Ngeleku viapopia etyi tyatunda Movihonekwa vyo Hembeleu. Pombwelo yondaka “Tetragrama mo Testamendu Omphe,” O Ndisiyonaliu imwe Yombimbiliya itiwa The Anchor Bible Dictionary yati: “Pena umwe ovipuka vilekesa okuti o Tetragrama Yenyina lya Huku, Yahweh, mwene liahonekelwe umwe tete ko Testamendu Omphe pokwahoneka etyi tyatunda ko Testamendu Onkhulu.” Omukulu umwe watanga utiwa o George Howard wati: “Mokonda pomuvo opo o Tetragrama ankho ihonekwa umwe Monombimbiliya mbo Ngeleku [o Septuaginta] ankho mbuhonekwa movikapela vyo tete, tutyitavela umwe okuti mo Testamendu Omphe ovahoneki vapakele-mo o Tetragrama pokupopia etyi tyitunda Mombimbiliya yo Hembeleu.”
Ovapitiyi vamwe vayumbwa onthumbi vapaka-mo enyina lya Huku Movihonekwa Viovakwa-Kilisitu mo Ngeleku. Ovapitiyi vamwe valinga ngootyo ovo vatetekela okupaka enyina lya Huku Mombimbiliya tyipona vokwapitiya Ombimbiliya Ikola Yaava Ekevelelo Liouye Omupe. Ovapitiyi ovo omikanda viavo vapitiya ovievi: A Literal Translation of the New Testament . . . From the Text of the Vatican Manuscript, yapitiywa na Herman Heinfetter (1863); The Emphatic Diaglott, yapitiywa na Benjamin Wilson (1864); The Epistles of Paul in Modern English, yapitiywa na George Barker Stevens (1898); St. Paul’s Epistle to the Romans, yapitiywa na W. G. Rutherford (1900); The New Testament Letters, yapitiywa na J.W.C. Wand, Bishop of London (1946). Okuyawisa kwoombo, omupitiyi utiwa Pablo Besson wapitiyila melaka lyo Espanhol mono 1900 okuya na kuno (konthyimbi yotyita 20), wakapa enyina “Jehová” mu Luka 2:15 nomu Sunda 14, no poutoi ukehika umwe 100 wapaka-po enyina lya Huku, ngokuti olio ñgeno lienda-mo. Onombimbiliya mbumwe mbapitiywa-le kohale mbelaka lyo Hembeleu mbovihonekwa vyo Ngeleku okuhimbikila mono 1550 (kotyita 16) okuya na kuno, mbuna o Tetragrama. Melaka lyo Alemão, muna Onombimbiliya 11 mbuna enyina “Siovaa” (pamwe liapopiwa mo Hembeleu okuti “Yahweh”) kovihonekwa vyo Ngeleku, ava vamwe velipaka ponthele alilandula kondaka “Tatekulu.” Onombimbiliya 70 mbelaka lyo Alemão mbapopia enyina lya Huku poutoi.
Enyina lya Huku momukanda Ovilinga 2:34 Mombimbiliya Emphatic Diaglott, yapitiywa na Benjamin Wilson (1864)
Onombimbiliya mbuna enyina lya Huku momalaka omakwavo Kovihonekwa Viovakwa-Kilisitu mo Ngeleku, mbulamba potyita. Omalaka omanyingi omo Afilika, no omo Amelika, no omo Asiya, nomalaka oko Europa, nomalaka o koulongo wo Pasifiku, Monombimbiliya mbumwe momalaka oo muna enyina lya Huku. (Tala pefo 1998 pena omutete watyo, no pefo 1999.) Ovapitiyi Vonombimbiliya ombo vapaka enyina lya Huku Mombimbiliya, mokwamona ovipuka twapopia-le. Onombimbiliya mbumwe ngoombo Mbovihonekwa vyo Ngeleku, mbapitiywa vala omanima ano, imwe ngooyo, Ombimbiliya itiwa Rotumano (1999), muyo enyina lya Huku “Jihova,” liahonekwa-mo 51 ponovelesikulu 48. Onkhwavo o Batake (yo Toba) (1989) ko Indonesia, enyina lya Huku “Jahowa” liahonekwa-mo 110.
Enyina lya Huku mu Maluku 12:29, 30 Mombimbiliya melaka lyo Havai
Ngwe tyotyili, kuna ovipuka ovinyingi vilekesa okuti enyina Siovaa lina okukala apa liali Movihonekwa vyo Ngeleku. Ngwe otyo umwe otyo vokwapitiya Ombimbiliya Ikola Yaava Ekevelelo Liouye Omupe valinga. Vena unene onthilo nenyina liaamwene lya Huku, vena owoma kavahande natyike tyali Mombimbiliya momalaka okonthuko tyitunde-mo. — Eholololo 22:18, 19.