“Ame Ndyikahi Nonwe Ononthiki Mbatyo Ambuho”

 1. (a) Popia monondaka mbehehi onthengele-popia yotiliku nevu. (b) Oñgeni Jesus ahangununine onthengele-popia oyo?

IMWE pononthengele-popia mba Jesus konthele Youhamba, ipopia omulimi wakuna ombuto ongwa yotiliku iya ondyale aikunumo evu. Evu alikulila kumwe notiliku, mahi omulimi atumu ovapika vae “vayeke aviho vikulile kumwe alo pokuteya.” Pomuvo wokuteya, evu aliyokua iya otiliku ayongiyua. Jesus wahangununine nawa onthengele-popia oyo. (Tanga Mateus 13:24-30, 37-43.) Oityi onthengele-popia oyo ilekesa? (Tala okakasa kati “Otiliku Nevu.”)

 2. (a) Oityi tyilekesa ovipuka viamonekele mepia liomulimi? (b) Onthele patyi yonthengele-popia matulilongesa?

² Ovipuka viapopiwa monthengele-popia oyo, vilekesa oñgeni, nonalupi Jesus maongiya ovanthu vekahi ngotiliku, Ovakristau ovalembulwa mavakatumina nae Mouhamba wae. Okukuna kuahimbika mo Pendekoste yo 33 P.K. Iya mamanuhula okuongiya tyina ovalembulwa vekahi pano pohi konthyulilo youye uno vamatambula enyingilikilo liahulililako avaende keulu. (Mateus 24:31; Revelação 7:1-4) Ngetyi omunthu ukahi potyitongo-tongo tyomphunda etyivila okutala atyiho tyili mombuelo, onthengele-popia ya Jesus itukuatesako okunoñgonoka etyi ankho matyimoneka mokueenda kuomanima 2.000. Moluotyo, ovipuka patyi tuanoñgonoka konthele Youhamba? Onthengele-popia, ipopia omuvo wokukuna, nowokukula, nowokuteya. Onthele ei maipopi haunene konthele yomuvo wokuteya.a

 3. (a) Oityi tyamonekele konyima yotyita tyotete? (b) Ngetyi tyipopia Mateus 13:28, epulo patyi liakatulwa, iya onalie? (Tala pokuati tupu tala.)

³ “Evu liamoneka” konthyimbi yotyita tyavali P.K., etyi Ovakristau vomatutu vamoneka. (Mateus 13:26) Motyita tyakuana, Ovakristau ovo velifwa nevu veliyawisa unene avalambepo Ovakristau ovalembulwa. Hinangela okuti monthengele-popia, ovapika vaitile komuhona wavo opo vatukulemo evu.b (Mateus 13:28) Oñgeni omuhona akumbululile?

 4. (a) Ekumbululo lia Jesus, lilekesa tyi? (b) Onalupi Ovakristau velifwa notiliku vanoñgonokwa?

⁴ Jesus wapopile konthele yotiliku nevu okuti: “Yekei aviho vikulile kumwe alo pokuteya.” Otyo tyilekesa okuti, okuhimbikila pomuvo Wovakristau votete alo hono, apeho kuna Ovakristau ovalembulwa velifwa notiliku pano pohi. Tupu, Jesus wapopilile ovalongwa vae okuti: “Ndyikahi nonwe ononthiki mbatyo ambuho, alo konthyulilo youye uno.” (Mateus 28:20) Moluotyo, Ovakristau ovalembulwa, ankho mavayakulilwa na Jesus ononthiki ambuho alo komuvo wonthyulilo. Mahi, mokonda evu, ine Ovakristau vomatutu, vekulila kumwe notiliku, katutyii nawa olie ankho ukahi ngotiliku mokueenda kuomanima oo aeho. Mahi, etyi ankho kuakamba omanima amwe opo omuvo wokuteya uhimbike, vana ankho velifwa notiliku vanoñgonokwa. Oñgeni otyo tyanoñgonokwa?

 5. Oñgeni eulo lia Malakia liafuisilwepo potyita tyotete?

⁵ Etyi ankho kuakamba omanima omanyingi opo Jesus apopie onthengele-popia yotiliku, nevu, Jeova watumine omuuli Malakia aule ovipuka vialekesilwe monthengele-popia ya Jesus. (Tanga Malaquias 3:1-4.) ‘Omutumwa ankho upendya ondyila’ o João Batista. (Mateus 11:10, 11) Etyi Jesus eya mo 29 P.K., omuvo wokukoyesa elongo lio Isilayeli ankho ukahi nokuhikapo. Jesus ankho omutumwa wavali wapopiwa meulo lia Malakia. Wasukulile tuvali ondyuo ya Huku mo Jelusalei, tete opokuhimbika ovilinga viae viokuivisa, vali okonthyulilo yovilinga viae viokuivisa. (Mateus 21:12, 13; João 2:14-17) Moluotyo, ovilinga via Jesus viokusukukisa vialingwa mokueenda kuomuvo umwe.

 6. (a) Oñgeni eulo lia Malakia liafuisuapo mononthiki mbetu? (b) Omomuvo patyi Jesus eya okutala nawa ondyuo ya Huku? (Tala pokuati tupu tala.)

⁶ Oñgeni eulo lia Malakia liafuisuapo mononthiki mbetu? Mokueenda kuomanima omanyingi alo mo 1914, Charles Taze Russell novakuatate ankho vaundapa nae, valingile ovilinga vielifwa nevi vialingile João Batista. Velilongesile Ombimbiliya opo vanoñgonoke oityi tyilityili ilongesa. Ovalilongesi Vombimbiliya valongesile etyi tyilityili tyihangununa otyilikutila tyofeto yeyovo, nokuti oifelunu yotupia omatutu, nokuivisa onthyulilo Yomivo vio Nosendiyu. Mahi ankho nkhele kuna ovanthu ovanyingi vonongeleya velipopia okuti ovalanduli va Kristu. Moluotyo, ovalie pokati kavo ankho vekahi ngotiliku? Pala okukumbulula epulo olio, Jesus wahimbika okutala nawa ondyuo yopaspilitu ya Huku mo 1914. Ovilinga ovio viokutala nawa, nokusukukisa, vialingwa okuhimbikila mo 1914 alo konthyimbi yo 1919.c

 7. Mo 1914 etyi Jesus ahimbika okutala nawa, oityi avasile?

⁷ Etyi Jesus ahimbika okutala nawa, oityi avasile? Wavasile Ovalilongesi vamwe Vombimbiliya ankho vena ombili, vaundapesa ononkhono mbavo, nomalumono pala okutualako novilinga viokuivisa mokueenda kuomanima alamba po 30.d Tyotyili, Jesus no noandyu, vahambukilwe unene etyi vavasa ovanthu ovo vehehi velifwa notiliku vapama nawa iya avahaliwa nevu! Mahi ankho nkhele tyesukisa “okusukula ovana va Levi,” ovalembulwa. (Malaquias 3:2, 3; 1 Pedro 4:17) Omokonda yatyi?

 8. Oityi tyamonekele konyima yo 1914?

⁸ Konthyulilo yo 1914, vamwe Povalilongesi Vombimbiliya avanumana mokonda kavaile keulu. Mokueenda kuo 1915 no 1916, ovilinga vieongano viokuivisa avitepuluka mokonda youndyale ankho valingwa. Oundyale oo auvilipo vali etyi Omukuatate Russell ankhia mohanyi ya Kulindi yo 1916, mokonda pahe oundyale wahimbika mokati keongano. Povakuatate epandu vali ankho vahongolela o Sociedade Torre de Vigia de Bíblias e Tratados, vekuana avehetavela etyi Omukuatate Rutherford aholovonwa opo akale komutwe. Avaovola okuyapaula ovakuatate, mahi mu Kwenye Kunene yo 1917, avapolwa Mombetele, ngotyo Ombetele aisukuka! Tupu, vamwe Povalilongesi Vombimbiliya avayekepo okuumbila Huku mokonda yowoma novanthu. Mahi, ovanyingi puvo avetavela otyilinga tya Jesus tyokusukula iya avapiluluka. Moluotyo, Jesus amono okuti ovo, Ovakristau votyotyili vekahi ngotiliku, mahi aanye Ovakristau aveho vomatutu, okukutikinyamo aveho veli monongeleya Mbovakristau vomouye. (Malaquias 3:5; 2 Timóteo 2:19) Oityi tyalandulako? Opo tutyinoñgonoke, tukondokei vali monthengele-popia yotiliku nevu.

9, 10. (a) Oityi matulilongesa konthele yomuvo wokuteya? (b) Oityi tyalingwa tete mokueenda kuomuvo wokuteya?

⁹ Jesus wapopile okuti: “Okuteya, onthyulilo youye uno.” (Mateus 13:39) Omuvo oo wokuteya wahimbika mo 1914. Matulilongesa ovipuka vitano Jesus apopile meulo liae konthele yomuvo oo.

¹⁰ Tete, okuongiya evu. Jesus wapopia okuti: “Pomuvo vokuteya mandyitumu ovateyi okuti: Ongiyei Tete evu amulikutu ovipandi.” Konyima yo 1914, onoandyu mbahimbika “okuongiya” Ovakristau velifwa nevu, mokuveyapula kovalembulwa, “ovana vouhamba.”—Mateus 13:30, 38, 41.

11. Alo hono, oityi tyikuatesako okulekesa okuti Ovakristau votyotyili velikalela no vomatutu?

¹¹ Putyina otyilinga tyokuongiya tyitualako, pahe atyimoneka umwe nawa ovalie velifwa notiliku, na vana velifwa nevu. (Revelação 18:1, 4) Mo 1919, atyimoneka nawa okuti Ombambilonia Onene yatoka. Oityi haunene tyakuatesileko okulekesa okuti Ovakristau votyotyili velikalela no vomatutu? Ovilinga viokuivisa. Vana ankho veli komutwe Povalilongesi Vombimbiliya, avahimbika okupopia okuti aveho meuaneno vesukisa okuivisa Ouhamba. Mongeleka, omukanda To Whom the Work Is Entrusted (Ovalie Vapewa Otyilinga), walingua mo 1919, walundile Ovakristau aveho ovalembulwa opo vaivise umbo na umbo. Ankho wati: “Ovilinga vimoneka ngoti ovinyingi, mahi ovia Tatekulu, nononkhono mbae matutyivili okuvilinga. Tuna elao liokuundapa movilinga ovio.” Oityi Ovalilongesi Vombimbiliya valingile? Omutala Womulavi wo 1922 (mo Ingelesi) wapopile okuti okuhimbikila opo, avayawisa vali ovilinga viavo viokuivisa. Liwa-liwa ovilinga viokuivisa umbo na umbo viakala enyingilikilo Liovakristau ovo vekolelo, alo hono.

12. Tunde nalupi otiliku ikahi nokuongiyua?

¹² Vali, okuongiya otiliku. Jesus watuma onoandyu mbae okuti: “Kaongiyei otiliku movimbundu viange.” (Mateus 13:30) Okuhimbikila mo 1919, ovalembulwa vekahi nokuongiyua mewaneno Liovakristau liasukuka. Ovakristau ovo ovalembulwa mavavasiwa nomuenyo konthyulilo youye uno, mavakaongiyua vala movimbundu tyina vamatumbula ondyambi yavo yokuenda keulu.—Daniel 7:18, 22, 27.

13. Oityi Revelação 18:7 ipopia konthele yekunga ine Ombambilonia Onene, okukutikinyamo Ovakristau vomouye?

¹³ Tatu, okulila nokukueka omayo. Tyina onoandyu mbamaongiya evu, oityi matyimonekapo? Jesus wapopile konthele yevu okuti: “Omo mamukakala okulila nokukueka omayo.” (Mateus 13:42) Okuti otyo tyikahi nokumoneka pahetyino? Au. Hono, Ovakristau vomouye, valinga onthele yekunga, nkhele velipopia okuti: “Napumphama ngonkhai-hamba, himuhepeko, himekeliyavela na lumwe.” (Revelação 18:7) Tyotyili, Ovakristau vomouye vasoka okuti vekahi nawa movilinga viavo, alo umwe vapopia okuti ‘vepumphi ngonkhai-hamba’ kombanda yovatumini vopulitika. Pahetyino, vana vekahi ngevu velipakako, kavalili. Mahi otyo matyipiluluka.

14. (a) Onalupi Ovakristau vomatutu ‘mavakueke omayo,’ iya omokonda yatyi? (b) Oñgeni epiluluko lienoñgonoko lietu konthele ya Mateus 13:42 lielikuata nolusoke lukahi mu Salmo 112:10?(Tala pokuati tupu tala.)

¹⁴ Tyina eongano aliho lionongeleya mbomatutu liamahanyuako mokueenda kuononkhumbi ononene, vana ankho vekahimo mavakahataika okuovola apa mavaholama, mahi kamavakavasa omphangu yapama pala okuholama. (Lucas 23:30; Revelação 6:15-17) Tyina vamaimbuka okuti kamavahupu kehanyauno, mavakalila nokuehulilwa ‘nokukueka omayo’ nonyengo. Ngetyi Jesus apopile meulo liae konthele yononkhumbi ononene, momuvo watyo oo wenthiki, “mavekeliyavela.”e —Mateus 24:30; Revelação 1:7.

15. Oityi matyikalingwa evu, iya onalupi?

¹⁵ Kuana, okuyumbwa motupia. Oityi matyikalingwa ovipandi vievu? Onoandyu “mambukeviyumba motupia.” (Mateus 13:42) Otyo tyilekesa okuti aveho mavahanyuako. Moluotyo, vana ankho vekahi meongano liomalongeso omatutu, mavakahanyuako mokueenda kuonthyulilo yononkhumbi ononene, mo Armagedom.—Malaquias 4:1.

16, 17. (a) Oityi Jesus apopia monthengele-popia yae matyikamoneka konthyulilo? (b) Omokonda yatyi tupopila okuti otyo matyikafuiswapo komutwe?

¹⁶ Tano, okuliaima. Jesus wamanuhula eulo liae okuti: “Kononthiki ombo, ovaviuki mavakaliaima ngekumbi, mouhamba wa Tate yavo.” (Mateus 13:43) Onalupi iya opi mavakaliaimina? Onondaka ombo mambukafuiswapo komutwe. Mahi mambukafuiswapo keulu, ha popano pohi.f Tutalei omahunga evali alekesa omokonda yatyi tupopila ngotyo.

¹⁷ Tete, onalupi otyo matyikamoneka? Jesus wati: “Kononthiki ombo, ovaviuki mavakaliaima.” Onondaka “kononthiki ombo” mbulekesa nawa etyi Jesus apopiliale, ‘okuongiya evu aliyumbwa motupia.’ Otyo matyikalingwa mokueenda kuonthyulilo yononkhumbi ononene. Ngotyo, ovalembulwa tupu ‘mavakaliaima’ komutwe wandyila. Vali, opi otyo matyikamoneka? Jesus wapopia okuti ovaviuki ‘mavakaliaimina mouhamba.’ Otyo tyilekesa tyi? Ovalembulwa aveho vekolelo nkhele veli pano pohi tyina ononkhumbi ononene mbamehimbika, mavakatambula enyingilikilo liavo liahulililako. Moluotyo, ngetyi tyalekesa eulo lia Jesus konthele yononkhumbi ononene, mavakaongiyua keulu. (Mateus 24:31) Oko, mavakaliaimina “mouhamba wa Tate yavo,” iya tyina o Armagedom yalamalambe, mapakala vala katutu avahambukilwa kumwe na Jesus “motyinepo tyo Ndyona.”—Revelação 19:6-9.

18, 19. Omononkhalelo patyi okunoñgonoka onthengele-popia ya Jesus konthele yotiliku nevu tyituetela ouwa?

¹⁸ Ouwa patyi atuho tupola kokunoñgonoka etyi onthengele-popia oyo ilekesa? Tutalei ovipuka vitatu. Tete, tyitukuatesako okunoñgonoka omokonda yatyi Jeova ayekelelako ovanthu onondingavivi. Wembuyekelako, pala okufuiika ine okupongiya “onombiya mbokankhenda,” Ovakristau velifwa notiliku.g (Romanos 9:22-24) Vali, otyo tyipameka onthumbi yetu. Tyina onthyulilo ihika popepi, onondyale mbetu mavetuyale vali unene, “mahi kamavetufindi.” (Tanga Jeremias 1:19.) Ngetyi Jeova ayakulila otiliku momanima omanyingi, Tate yetu keulu menyina lia Jesus no noandyu, makakala nonthwe “ononthiki mbatyo ambuho” mbukahi nokuya.—Mateus 28:20.

¹⁹ Tatu, onthengele-popia itukuatesako okuimbuka ovalie Ovakristau velifwa notiliku. Omokonda yatyi otyo tyakolela unene? Mokonda tuesukisa okunoñgonoka ovalie Ovakristau velifwa notiliku inkha tuhanda okuvasa ekumbululo liepulo ekuavo Jesus alingile meulo liae konthele yononthiki mbahulililako. Wapulile okuti: “Olie tyilityili omupika wekolelo nokualunguka?” (Mateus 24:45) Ononthele onombali mambulandulako, mambukumbulula epulo olio.