Ku oraabe ori ow’eishe-emwe kandi orikwenda kwongyera kuba omwegyesa murungi, ebi orikwegyesa n’obuhabuzi obu orikuha byegamize aha Kigambo kya Ruhanga. Ba omwegi murungi wa Baibuli n’ebitabo by’ekibiina. (Enf. 15:28) Waaba nooyeyegyesa, teekateeka n’obwegyendesereza aha ku orikubaasa kugyendera aha Byahandiikirwe. Kandi waaba nooyegyesa, teeraho kuhika aha mutima gw’abakuhurikiize. Noobaasa kwongyera kuba omwegyesa murungi waashaba abareeberezi abamazire obwire obuhabuzi, kandi okabugyenderaho. (1 Tim. 5:17) Abareeberezi bashemereire kuba nibabaasa kugumya ab’eishe-emwe na banyaanyazi-itwe, kwonka obumwe baine kubaha obuhabuzi, kandi bakabahana. Omu mbeera ezo zombi, abareeberezi baine kworeka embabazi. Waaba nootwaza gye, oine rukundo, kandi orikwegamiza ebi orikwegyesa aha Kigambo kya Ruhanga, noija kuba omwegyesa murungi ahabw’okutooreza Omwegyesa Mukuru Yesu.—Mat. 11:​28-30; 2 Tim. 2:24. w24.11 24 ¶16

Nituha Yehova ekitiinisa omu bi turikumugambaho. Omu mishororongo egyo, abaheereza ba Yehova nibahigwa ‘kweshongorera Yehova,’ ‘[kuhimbisa] eiziina rye,’ ‘kworeka okujuna kwe,’ kandi ‘bakamanyisa ekitiinisa kye omu mahanga.’(Zab. 96:​1-3) Egyo yoona n’emiringo oku turikubaasa kuha Tataitwe ow’omu iguru ekitiinisa omu bigambo byaitu. (Byak. 4:29) Nitubaasa n’okuhaisa Yehova ekitiinisa turikukoresa ebintu byaitu eby’omuhendo. Abaheereza ba Yehova ab’amazima batwire nibahaisa Yehova ekitiinisa omu muringo ogwo. (Enf. 3:9) Nk’eky’okureeberaho, Abaisraeli bakaba bahayo kushagika omurimo gw’okwombeka n’okureeberera hekalu. (2 Bag. 12:​4, 5; 1 Bus. 29:​3-9) Abeegi ba Kristo abaabaire nibafayo bakaba nibamushagika n’entumwa ze barikukoresa ‘ebintu byabo.’ (Luk. 8:​1-3) Abakristaayo omu kyasha ky’okubanza nabo bakahayo eby’okuhwera ab’eishe-emwe bagyenzi baabo. (Byak. 11:​27-29) Hati, naitwe nitubaasa kuhaisa Yehova ekitiinisa turikuhayo twekundiire. w25.01 4 ¶8; 5 ¶11

Niki ekyahweraire Koruneelio kubatizibwa? Baibuli neeyoreka ngu we n’ab’omu ka ye boona bakaba ‘nibatiina Ruhanga.’ Kandi akaba naashaba Ruhanga obutoosha. (Byak. 10:2) Petero ku yaabuuriire Koruneelio amakuru marungi, we n’eka ye bakaikiriza Kristo kandi baabatizibwa ahonaaho. (Byak. 10:​47, 48) Koruneelio akaba ayeteekateekire kukora empinduka zoona ezirikwetengyesa kuramya Yehova ari hamwe n’eka ye. (Yos. 24:15; Byak. 10:​24, 33) Koruneelio akaba naabaasa kwikiriza obujunaanizibwa obu yaabaire aine kumuremesa kuba Omukristaayo. Kwonka ekyo tarakiikiriize kubaho. Mbwenu shi nikikwetengyesa kukora empinduka z’amaani kubaasa kwikiriza amazima? Kyaba nikwo kiri, Yehova naija kuba Omuhwezi waawe. Naija kukuha emigisha ahabw’okumariirira kumuheereza omu muringo ogurikuhikaana n’emisingye ya Baibuli. w25.03 5 ¶12-13