Wɔ ɛvolɛ dɔɔnwo mɔɔ ɛpɛ nu la anu, Ɛzinzalɛ Arane ne hanle kɛ: “Awie mɔɔ ze Nyamenle kpalɛ la banyia ye nu anwodozo kpole wɔ sɔnea mekɛ nu.” Ɛhye le nɔhalɛ kpalɛ! Saa yɛbahola yɛagyinla sɔnea nloa a, ɔwɔ kɛ yɛkulo Gyihova na yɛnyia ye nu anwodozo bɔkɔɔ. (Mat. 22:36-38; Gye. 5:11) Kenga Baebolo ne dahuu amaa wɔabikye Gyihova kpalɛ. (Gye. 4:8) Saa ɛlɛkenga Baebolo ne a, fa wɔ adwenle sie Gyihova subane ngɛnlɛma ne mɔ azo. Nea kɛ ɛbanwu kɛzi Gyihova kulo wɔ na ɔte nganeɛ ɔmaa wɔ la wɔ edwɛkɛ mɔɔ ɔka nee ye nyɛleɛ nu. (Ɛzɛ. 34:6) Ɔluakɛ bɛanla ɛlɔlɛ ali bɛangile bie mɔ la ati, ɔyɛ se ɔmaa bɛ kɛ bɛbalie bɛali kɛ Nyamenle kulo bɛ. Saa ɛlɛ ngyegyelɛ ɛhye bie a, bɔ mɔdenle kɛ ɛbahɛlɛ ndenle mɔɔ Gyihova dua zo da anwunvɔnezelɛ nee atiakunlukɛnlɛma ali kile wɔ alehyenlɛ biala la. (Edw. 78:38, 39; Wlo. 8:32) Saa ɛsuzu wɔ anwubielɛ nwo na ɛdwenledwenle mɔɔ ɛkenga ye wɔ Nyamenle Edwɛkɛ ne anu la anwo a, ɛbahola wɔahɛlɛ ninyɛne dɔɔnwo mɔɔ Gyihova ɛyɛ ɛmaa wɔ la. Mekɛ mɔɔ ɛlɛdwenle mɔɔ Gyihova ɛyɛ ɛmaa wɔ anwo la, ɛlɔlɛ mɔɔ ɛlɛ ɛmaa ye la bayɛ kpole.​—Edw. 116:1, 2. w19.07 2-3 ¶4-5

Gyihova ɛtɛmaanle yɛ tumi kɛ yɛzi kpɔkɛ yɛmaa awie mɔ. Awie mɔɔ ɔdi mɛla mɔɔ anwo ɛngyia la ɛmbɔ ɔ diema nwo bane, emomu ɔbɔ mɔdenle kɛ ɔnyia ɔ diema ne diedi zo tumi. Seetan Abɔnsam ɛnrɛgyakyi kɛ ɔbayɛ Gyihova nɔhalɛ azonvolɛ kpɔdekpɔde. (1 Pita 5:8; Yek. 2:10) Seetan nee menli mɔɔ gyi ɔ nzi la babɔ mɔdenle kɛ bɛfa bɛ sa bɛado Gyihova ɛzonlenlɛ zo. Noko ɔnle kɛ yɛmaa ɛzulolɛ ka yɛ! (Dit. 7:21) Gyihova gyi yɛ nzi, na ɔbahɔ zo yeaboa yɛ saa bɔbɔ bɛfa bɛ sa bɛto yɛ gyima ne azo a. (2 Ek. 32:7, 8) Bɛmaa yɛbɔ kpɔkɛ kɛ yɛbayɛ mɔɔ ɛvoya mɔɔ limoa mediema ne mɔ yɛle la bie, bɛzele bɛ mekɛ zo tumivolɛma ne kɛ: “Saa ɔle kpalɛ wɔ Nyamenle anyunlu kɛ yɛkɛdie bɛ yɛkɛdɛla Nyamenle a, ɛnee bɛdabɛ bɛbua. Na yɛmɛ yɛnrɛhola yɛnrɛgyakyi kɛ yɛkɛha ninyɛne mɔɔ yɛnwu ye nee mɔɔ yɛde la.”​—Gyi. 4:19, 20. w19.07 13 ¶18-20

Saa yɛlɛdi daselɛ a, ɔwɔ kɛ yɛbɔ mɔdenle kɛ yɛbanwu deɛmɔti menli mɔɔ yɛyia bɛ lɛ adwenle ngakyile la. Bɛtetele ɛzoanvolɛ Pɔɔlo wɔ Dwuuma avinli. Ɛnee ɔwɔ kɛ ɔbɔ mɔdenle ɔmaa ye edwɛkɛ ne dwu Maanle maanle ne anu amra mɔɔ bɛnze Gyihova nee Ngɛlɛlera ne anwo edwɛkɛ dɔɔnwo la ahonle nu. Bie a ɔwɔ kɛ yɛyɛ neɛnleanu amaa yɛade yɛ azɛlɛsinli ne anu amra edwɛkɛ bo. (1 Kɔl. 9:20-23) Yɛ bodane a le kɛ yɛ sa baha menli “mɔɔ fɛta” la. (Mat. 10:11) Amaa yɛadwu menli ahonle nu la, ɔwɔ kɛ yɛmaa bɛkile bɛ adwenle na yɛtie bɛ kpalɛ. Adiema bie mɔɔ wɔ England la biza menli adwenle wɔ kɛzi bɛbanyia abusua nu anyelielɛ, kɛzi bɛtete ngakula anzɛɛ kɛzi bɛgyinla nzisi nloa la anwo. Saa ɔtie bɛ mualɛ ne ɔwie a, ɔka kɛ, “Kɛzi ɛdwenle folɛdulɛ ɛhye mɔɔ bɛhɛlɛle la asɛɛ ɛvolɛ 2,000 ɛpɛ nu la anwo ɛ?” Akee ɔkenga ngɛlɛlera mɔɔ yekpa la wɔ ye fonu ne azo wɔ mekɛ mɔɔ ɔnga edwɛkɛkpɔkɛ “Baebolo” a. w19.07 21-22 ¶7-8