Lakkoofsa

16 Achiis Qoraan+ inni ilma Yizhaar,+ ilma Qehaat,+ ilma Leewwii+ taʼe, ilmaan Ruuben+ keessaa Daataanii fi Abiraam warra ilmaan Eeliyaab+ taʼan, akkasumas Oon isa ilma Peelet taʼee wajjin ni kaʼe. 2 Isaan namoota Israaʼel 250 warra ajajjoota yaaʼichaa taʼan, warra gumicha keessaa filatamanii fi beekamoo taʼanii wajjin Musee irratti kaʼan. 3 Isaan Musee fi Aaroniin mormuudhaan+ walitti qabamanii, “Waaʼeen keessan nu gaʼeera! Guutummaan yaaʼichaa, hundumti isaanii qulqulluu dha;+ Yihowaanis isaan gidduu jira.+ Maarree, isin gumii Yihowaa irratti kan of guguddistan maaliifi?” isaaniin jedhan.

4 Museen kana yommuu dhagaʼu, yeruma sana adda isaatiin lafatti gombifame. 5 Achiis Qoraa fi deggertoota isaa hundumaatiin akkana jedhe: “Yihowaan kan isaa kan taʼe eenyu akka taʼe,+ akkasumas qulqulluu kan taʼee fi isatti dhihaachuu kan qabu eenyu akka taʼe+ ganama ni beeksisa; namni inni filatus+ isatti ni dhihaata. 6 Akkana godhaa: Qoraa fi deggertoonni kee hundi+ qodaawwan ibiddaa fudhadhaa;+ 7 achiis boru Yihowaa duratti ibidda itti naqaatii ixaana isaan irra kaaʼaa; namni Yihowaan filatu+ sun inni qulqulluu dha. Isin ilmaan Leewwii+ keessa baataniittu!”

8 Achiis Museen Qoraadhaan akkana jedhe: “Yaa ilmaan Leewwii, maaloo, dhagaʼaa. 9 Waaqni Israaʼel yaaʼii Israaʼel irraa adda isin baasee,+ tajaajila godoo qulqulluu Yihowaa keessatti raawwatamu raawwachuuf akka isatti dhihaattanii fi yaaʼicha tajaajiluuf isaan dura akka dhaabbattan isiniif heyyamuun isaa,+ 10 akkasumas ilmaan Leewwii warra obboloota keessan taʼan hundumaa wajjin ofitti isin dhiheessuun isaa isinitti hanqatee? Maarree isin tajaajila lubummaas fudhachuuf yaaluu qabduu?+ 11 Kanaan kan kaʼes, atii fi deggertoonni kee warri walitti qabamanii jiran hundi Yihowaa mormitaniittu. Aaron irratti kan gungumtan hoo inni eenyu taʼee ti?”+

12 Boodas Museen Daataanii fi Abiraam+ warri ilmaan Eeliyaab taʼan akka dhufan isaanitti dhaame; isaan garuu akkana jedhan: “Nuti hin dhufnu! 13 Lafa onaa keessatti nu ajjeesuuf biyya aannanii fi damma maddisiistu keessaa nu baasuun kee sitti hanqatee?+ Amma immoo bulchaa hundumaa irra caalu nu irratti of gochuu* barbaaddaa? 14 Kana malees, ati biyya aannanii fi damma maddisiistu kamitti iyyuu nu hin galchine yookiin maasii fi maasii wayinii dhaalaan nuuf hin kennine.+ Maarree, namoonni kun akka jaamaatti si duukaa akka buʼan* barbaaddaa? Nuti hin dhufnu!”

15 Kanaan kan kaʼes, Museen baayʼee aaree Yihowaadhaan, “Aarsaa midhaanii isaanii ilaaluuf hin garagalin. Ani harree tokko illee isaan jalaa hin fudhanne yookiin isaan keessaa nama tokko illee hin miine”+ jedhe.

16 Achiis Museen Qoraadhaan akkana jedhe: “Ati, isaan, akkasumas Aaron, deggertoota kee hundumaa wajjin boru Yihowaa duratti dhihaadhaa. 17 Tokkoon tokkoon namaa qodaa ibiddaa isaa fudhatee ixaana isa irra haa kaaʼu; tokkoon tokkoon namaa qodaa ibiddaa isaa Yihowaa duratti haa dhiheessu; isaan walumatti qodaawwan ibiddaa 250 haa dhiheessan; sii fi Aaroniin dabalatee tokkoon tokkoon keessan qodaa ibiddaa keessan qabadhaa dhihaadhaa.” 18 Kanaafuu, isaan tokkoon tokkoon isaanii qodaa ibiddaa isaanii ni fudhatan; achiis ibidda itti naqanii ixaana isaan irra kaaʼan; sana boodas Musee fi Aaronii wajjin balbala dunkaana walgaʼii dura dhaabbatan. 19 Qoraan balbala dunkaana walgaʼii duratti deggertoota+ isaa yommuu isaan irratti walitti qabu, ulfinni Yihowaa guutummaa yaaʼichaatti mulʼate.+

20 Yeroo kanatti Yihowaan Musee fi Aaroniin akkana jedhe: 21 “Ani hatattamaan haxaaʼee akkan isaan balleessuuf, tuuta kana gidduudhaa adda of baasaa.”+ 22 Isaanis adda isaaniitiin lafatti gombifamanii, “Waaqa hafuura nama* hundumaa kan taate yaa Waaqayyo,+ cubbuu nama tokkootiin kan kaʼe guutummaa yaaʼichaa irratti ni dheekkamtaa?”+ jedhan.

23 Achiis Yihowaan Museedhaan akkana jedhe: 24 “‘Naannoo dunkaanota Qoraa, Daataanii fi Abiraam irraa fagaadhaa!’ jedhiitii yaaʼichatti himi.”+

25 Museenis kaʼee gara Daataanii fi gara Abiraam dhaqe; jaarsoliin+ Israaʼelis isaa wajjin dhaqan. 26 Innis yaaʼichaan, “Isin cubbuu isaanii hundumaatiin haxaaʼamtanii akka hin balleeffamneef, maaloo, dunkaanota namoota hamoo kanaa irraa fagaadhaa; wanta kan isaanii taʼe kam iyyuu hin tuqinaa” jedhe. 27 Isaanis yeruma sana kallattii hundumaatiin dunkaanota Qoraa, Daataanii fi Abiraam irraa ni fagaatan; Daataanii fi Abiraamis gad baʼanii haadhotii manaa isaanii, ilmaan isaanii fi ijoollee isaanii warra xixinnoo wajjin balbala dunkaanota isaanii dura dhaabbatan.

28 Achiis Museen akkana jedhe: “Wantoota kana hundumaa kanan godhe ofii kootiin kakaʼee utuu hin taʼin Yihowaan na ergee akka taʼe kanaan ni beektu: 29 Namoonni kun kan duʼan akkuma namoonni hundi duʼanitti yoo taʼee fi adabni isaan irra gaʼus adabuma namoota hundumaa irra gaʼu yoo taʼe, Yihowaan na hin ergine jechuu dha.+ 30 Haa taʼu malee, Yihowaan wanta adda taʼe isaan irratti yoo raawwate, laftis banamtee* isaanii fi wanta kan isaanii taʼe hundumaa yoo liqimsite, isaanis akkuma lubbuudhaan jiranitti gara Awwaalaatti* yoo gad buʼan, namoonni kun Yihowaa akka tuffatan dhugumaan ni beektu.”

31 Inni wantoota kana hundumaa dubbatee akkuma xumureenis, lafti isaan irra dhaabbatan ni baqaqxe.+ 32 Lafattiinis banamtee* isaanii fi maatii isaanii, akkasumas nama kan Qoraa taʼe hundumaa+ fi miʼawwan isaanii hundumaa ni liqimsite. 33 Kanaafuu, isaanii fi wanti kan isaanii taʼe hundi akkuma lubbuudhaan jiranitti gara Awwaalaatti* gad ni buʼan; lafattiinis isaan irratti ni deebite; akka kanaan, isaan gumicha gidduudhaa ni balleeffaman.+ 34 Israaʼelonni warri naannoo isaanii turan hundis iyya isaanii yommuu dhagaʼan, “Lafti akka nu hin liqimsine sodaanneerra!” jedhanii baqatan. 35 Achiis ibiddi Yihowaa biraa baʼee+ namoota 250 warra ixaana aarsaa turan sana ni nyaate.+

36 Yeroo kanatti Yihowaan Museedhaan akkana jedhe: 37 “Qodaawwan ibiddaa+ kun qulqulluu waan taʼaniif, Eleʼazaar ilmi Aaron lubichaa ibidda keessaa akka isaan fuudhu itti himi. Ibiddichas achi fageessee akka bittinneessu itti himi. 38 Isaan qodaawwan ibiddaa kana Yihowaa duratti dhiheessuu isaaniitiin kan kaʼe qodaawwan kun qulqulluu waan taʼaniif, qodaawwan ibiddaa namoota cubbuu hojjechuudhaan lubbuu isaanii dhaban* sanaa iddoo aarsaa sana uwwisuuf+ haphifamanii haa tumaman. Isaanis Israaʼelotaaf mallattoo haa taʼan.”+ 39 Kanaafuu, Eleʼazaar lubichi qodaawwan ibiddaa sibiila diimaa warra namoonni ibiddaan gubatan sun dhiheessan fuudhee iddoo aarsaa sana uwwisuuf ni tume; 40 kanas kan godhe akkuma Yihowaan karaa Musee isatti himetti ture. Kunis namni sanyii Aaron keessaa hin taanee fi isaaf hin heyyamamne* kam iyyuu Yihowaa duratti ixaana aarsuuf akka hin dhihaanne,+ akkasumas eenyu iyyuu akka Qoraa fi akka deggertoota isaa akka hin taane Israaʼelota kan yaadachiisu dha.+

41 Guyyaa itti aanuttis guutummaan yaaʼii Israaʼel, “Isin lamaan saba Yihowaa ajjeestaniittu” jedhanii Musee fi Aaron irratti gungumuu jalqaban.+ 42 Yaaʼichi Musee fi Aaroniin mormee yommuu walitti qabametti, isaan gara dunkaana walgaʼiitti garagalanii yommuu ilaalan, kunoo, duumessi dunkaanicha ni uwwise; ulfinni Yihowaas mulʼachuu jalqabe.+

43 Musee fi Aaronis gara fuuldura dunkaana walgaʼii sanaa ni dhaqan;+ 44 Yihowaanis Museedhaan akkana jedhe: 45 “Namoota nana, ani hatattamaan haxaaʼee akkan isaan balleessuuf,+ yaaʼii kana gidduudhaa adda of baasaa.” Yeroo kanatti isaan adda isaaniitiin lafatti gombifaman.+ 46 Achiis Museen Aaroniin, “Dheekkamsi Yihowaa biraa waan baʼeef, ati qodaa ibiddaa fudhadhu; iddoo aarsaa sana irraas ibidda fuudhiitii achi irra kaaʼi;+ ixaanas isa irra kaaʼi; achiis dafii gara yaaʼichaa dhaqiitii araara isaaniif argamsiisi.+ Dhaʼichi sun jalqabeera!” jedhe. 47 Aaronis akkuma Museen jedhe yeruma sana isa fudhatee gara gumicha walakkaatti fiige; yeroo kanatti dhaʼichi sun gumicha gidduutti jalqabee ture. Kanaafuu, inni ixaanicha qodaa ibiddaa irra kaaʼee sabichaaf araara argamsiisuu jalqabe. 48 Innis warra duʼanii fi warra lubbuudhaan jiran gidduu dhaabbatee ture; dhaʼichi sunis suutuma suuta ni dhaabbate. 49 Warra sababii Qoraatiin duʼan utuu hin dabalatin, namoonni dhaʼicha sanaan duʼan 14,700 turan. 50 Dhuma irratti Aaron balbala dunkaana walgaʼii duratti gara Museetti yommuu deebiʼu, dhaʼichi sun dhaabbatee ture.