RÄ LECCIÓN 2

Ñä ja ngu ri ꞌñehe

2 Corintios 2:17, TNM

NÄꞌÄ MÄHYONI GI PE̱FI: Pa dä za gi ñä ja ngu ri ꞌñehe, usa nuꞌu̱ yä noya hingi hei ꞌne ñä ko rä tꞌekꞌei, pa njabu̱ nuꞌu̱ toꞌo o̱xꞌäꞌi dä bädi te gi mbeni de näꞌä tema ꞌne te gi senti po geꞌu̱.

HANJA DÄ ZA GI PE̱FI

Xatuäbi Äjuä ꞌne ñhoki xä ñho ko rä imformasion. Yꞌapäbi rä mfatsꞌi Jeoba pa gi jamäsu hanja ma gi uni rä imformasion, hingä pa gi ꞌñexäse̱ ri nsu. Ntiende xä ñho nuꞌu̱ yä punto ma gi ꞌñudi. Ogi hetätho näꞌä rä imformasion, mänꞌa dä hogi gi esplika ko ri noyase̱.

Mu̱ ma gi hñeti de rä Mäkä Tꞌofo o de nꞌa rä publicación, nsaya ndunthi yä mꞌiki pa gi ntiende xä ñho näꞌä mää ꞌne njabu̱ hingi mfeꞌtse. ꞌNehe, yꞌo̱tꞌe ntsꞌe̱di po gi hñuꞌspäbi nuꞌu̱ yä sentimiento ri ꞌñehe.
Ñä ko ngatꞌho ri koraso. Mbeni por hanja nuꞌu̱ toꞌo o̱xꞌäꞌi di japäbi mꞌe̱di dä yꞌo̱de rä imformasion. Mu̱ gi jabu̱, po näꞌä rä forma ma gi ñä ꞌne nuꞌu̱ yä ademán ma gi yꞌo̱tꞌe, ma dä nheki ge gi ñä ko ngatꞌho ri koraso.

Pa gi ñä ja ngu ri ꞌñehe, huahni te mä noya ma gi usa. ꞌÑudi rä tꞌekꞌei po näꞌä rä imformasion. Pa geꞌä, mähyoni gi ñä xä ñho ꞌne dä ñꞌo rä ꞌñuu näꞌä ma gi mää.
Hyandi nuꞌu̱ toꞌo o̱xꞌäꞌi. Mu̱ njabu̱ di nzäi yä jäꞌi habu̱ gi ꞌmu̱i, dä hogi gi ju̱xä ri da pa gi hyandi nuꞌu̱ toꞌo o̱xꞌäꞌi. Ora ma gi uni nꞌa rä discurso, yꞌo̱tꞌe ntsꞌe̱di po gi hyandi kada nꞌa de nuꞌu̱ xä ntini.