ਸਦੀਆਂ ਤੋਂ ਯਹੋਵਾਹ ਨੇ ਹੌਲੀ-ਹੌਲੀ ਤੇ ਸਾਫ਼-ਸਾਫ਼ ਦੱਸਿਆ ਹੈ ਕਿ ਪਾਪੀ ਇਨਸਾਨ ਕਿਵੇਂ ਯਹੋਵਾਹ ਦੇ ਨੇੜੇ ਆ ਸਕਦੇ ਹਨ। ਆਦਮ ਤੇ ਹੱਵਾਹ ਦਾ ਦੂਜਾ ਪੁੱਤਰ ਹਾਬਲ, ਉਹ ਪਹਿਲਾ ਇਨਸਾਨ ਸੀ ਜਿਸ ਨੇ ਯਹੋਵਾਹ ʼਤੇ ਨਿਹਚਾ ਕੀਤੀ। ਹਾਬਲ ਯਹੋਵਾਹ ਨੂੰ ਪਿਆਰ ਕਰਦਾ ਸੀ ਅਤੇ ਉਸ ਦੇ ਨੇੜੇ ਜਾਣਾ ਚਾਹੁੰਦਾ ਸੀ। ਇਸ ਕਰਕੇ ਉਸ ਨੇ ਯਹੋਵਾਹ ਨੂੰ ਬਲ਼ੀ ਚੜ੍ਹਾਈ। ਹਾਬਲ ਚਰਵਾਹਾ ਸੀ, ਇਸ ਕਰਕੇ ਉਸ ਨੇ ਆਪਣੇ ਇੱਜੜ ਵਿੱਚੋਂ ਕੁਝ ਲੇਲਿਆਂ ਨੂੰ ਵੱਢਿਆ ਤੇ ਉਨ੍ਹਾਂ ਨੂੰ ਯਹੋਵਾਹ ਅੱਗੇ ਬਲ਼ੀ ਵਜੋਂ ਚੜ੍ਹਾਇਆ। ਯਹੋਵਾਹ ਨੇ ਕੀ ਕੀਤਾ? ਬਾਈਬਲ ਦੱਸਦੀ ਹੈ: “ਯਹੋਵਾਹ ਹਾਬਲ ਤੋਂ ਖ਼ੁਸ਼ ਸੀ ਅਤੇ ਉਸ ਨੇ ਉਸ ਦੀ ਭੇਟ ਸਵੀਕਾਰ ਕੀਤੀ।” (ਉਤ. 4:4) ਯਹੋਵਾਹ ਨੇ ਇੱਦਾਂ ਦੇ ਹੋਰ ਲੋਕਾਂ ਦੀਆਂ ਬਲ਼ੀਆਂ ਵੀ ਸਵੀਕਾਰ ਕੀਤੀਆਂ ਜੋ ਉਸ ਨੂੰ ਪਿਆਰ ਕਰਦੇ ਸਨ ਅਤੇ ਉਸ ʼਤੇ ਭਰੋਸਾ ਕਰਦੇ ਸਨ, ਜਿਵੇਂ ਨੂਹ। (ਉਤ. 8:20, 21) ਇਨ੍ਹਾਂ ਬਲ਼ੀਆਂ ਨੂੰ ਸਵੀਕਾਰ ਕਰ ਕੇ ਯਹੋਵਾਹ ਨੇ ਇਹ ਦਿਖਾਇਆ ਕਿ ਪਾਪੀ ਇਨਸਾਨ ਉਸ ਨੂੰ ਖ਼ੁਸ਼ ਕਰ ਸਕਦੇ ਹਨ ਅਤੇ ਉਸ ਦੇ ਨੇੜੇ ਆ ਸਕਦੇ ਹਨ। w24.08 3 ਪੈਰੇ 5-6

ਬੇਇਨਸਾਫ਼ੀ ਹੋਣ ਤੇ ਸ਼ਾਇਦ ਸਾਨੂੰ ਬਹੁਤ ਬੁਰਾ ਲੱਗੇ ਅਤੇ ਅਸੀਂ ਨਿਰਾਸ਼ ਹੋ ਜਾਈਏ। (ਉਪ. 7:7) ਅੱਯੂਬ ਅਤੇ ਹੱਬਕੂਕ ਵਰਗੇ ਪਰਮੇਸ਼ੁਰ ਦੇ ਵਫ਼ਾਦਾਰ ਸੇਵਕਾਂ ਨੂੰ ਵੀ ਇੱਦਾਂ ਹੀ ਲੱਗਾ ਸੀ। (ਅੱਯੂ. 6:2, 3; ਹੱਬ. 1:1-3) ਇੱਦਾਂ ਮਹਿਸੂਸ ਕਰਨਾ ਕੁਦਰਤੀ ਹੈ। ਪਰ ਸਾਨੂੰ ਧਿਆਨ ਰੱਖਣ ਦੀ ਲੋੜ ਹੈ ਕਿ ਬੇਇਨਸਾਫ਼ੀ ਹੋਣ ʼਤੇ ਅਸੀਂ ਕਿੱਦਾਂ ਪੇਸ਼ ਆਉਂਦੇ ਹਾਂ ਤਾਂਕਿ ਅਸੀਂ ਕੁਝ ਗ਼ਲਤ ਨਾ ਕਰ ਬੈਠੀਏ ਅਤੇ ਗੱਲ ਨੂੰ ਹੋਰ ਨਾ ਵਿਗਾੜ ਲਈਏ। ਜਦੋਂ ਬੇਇਨਸਾਫ਼ੀ ਕਰਨ ਵਾਲਿਆਂ ਨੂੰ ਸਜ਼ਾ ਨਹੀਂ ਮਿਲਦੀ, ਤਾਂ ਸ਼ਾਇਦ ਸਾਡੇ ਮਨ ਵਿਚ ਆਵੇ ਕਿ ਚੰਗੇ ਕੰਮ ਕਰਨ ਦਾ ਕੀ ਫ਼ਾਇਦਾ। ਜ਼ਰਾ ਜ਼ਬੂਰਾਂ ਦੇ ਲਿਖਾਰੀ ʼਤੇ ਗੌਰ ਕਰੋ। ਉਸ ਨੇ ਦੇਖਿਆ ਕਿ ਦੁਸ਼ਟ ਲੋਕ ਚੰਗੇ ਲੋਕਾਂ ਨਾਲ ਮਾੜਾ ਸਲੂਕ ਕਰਦੇ ਹਨ, ਪਰ ਫਿਰ ਵੀ ਉਹ ਵਧ-ਫੁੱਲ ਰਹੇ ਹਨ। ਉਸ ਨੇ ਕਿਹਾ: “ਇਹ ਸਾਰੇ ਦੁਸ਼ਟ ਹਨ ਜਿਨ੍ਹਾਂ ਦੀ ਜ਼ਿੰਦਗੀ ਅਕਸਰ ਆਰਾਮ ਨਾਲ ਗੁਜ਼ਰਦੀ ਹੈ।” (ਜ਼ਬੂ. 73:12) ਬੇਇਨਸਾਫ਼ੀ ਹੁੰਦੀ ਦੇਖ ਕੇ ਉਹ ਇੰਨਾ ਨਿਰਾਸ਼ ਹੋ ਗਿਆ ਕਿ ਉਸ ਨੇ ਸੋਚਿਆ ਕਿ ਯਹੋਵਾਹ ਦੀ ਸੇਵਾ ਕਰਨ ਦਾ ਕੋਈ ਫ਼ਾਇਦਾ ਨਹੀਂ। ਉਸ ਨੇ ਕਿਹਾ: “ਜਦੋਂ ਮੈਂ ਇਨ੍ਹਾਂ ਗੱਲਾਂ ਨੂੰ ਸਮਝਣ ਦੀ ਕੋਸ਼ਿਸ਼ ਕੀਤੀ, ਤਾਂ ਮੈਂ ਪਰੇਸ਼ਾਨ ਹੋ ਉੱਠਿਆ।”​—ਜ਼ਬੂ. 73:14, 16. w24.11 3 ਪੈਰੇ 5-7

ਅਸੀਂ ਯਹੋਵਾਹ ਦੀ ਮਹਿਮਾ ਕਰਦੇ ਹਾਂ ਕਿਉਂਕਿ ਅਸੀਂ ਉਸ ਦਾ ਗਹਿਰਾ ਆਦਰ ਕਰਦੇ ਹਾਂ। ਸਾਡੇ ਕੋਲ ਯਹੋਵਾਹ ਦਾ ਆਦਰ ਕਰਨ ਦੇ ਬਹੁਤ ਸਾਰੇ ਕਾਰਨ ਹਨ। ਯਹੋਵਾਹ ਸਰਬਸ਼ਕਤੀਮਾਨ ਹੈ। ਉਸ ਕੋਲ ਅਸੀਮ ਤਾਕਤ ਹੈ। (ਜ਼ਬੂ. 96:4-7) ਉਹ ਬਹੁਤ ਬੁੱਧੀਮਾਨ ਹੈ। ਉਸ ਦੀਆਂ ਬਣਾਈਆਂ ਚੀਜ਼ਾਂ ਤੋਂ ਉਸ ਦੀ ਬੁੱਧ ਸਾਫ਼ ਝਲਕਦੀ ਹੈ। ਯਹੋਵਾਹ ਨੇ ਹੀ ਸਾਨੂੰ ਜੀਵਨ ਦਿੱਤਾ ਹੈ ਅਤੇ ਜੀਉਂਦੇ ਰਹਿਣ ਲਈ ਹਰ ਚੀਜ਼ ਵੀ ਦਿੱਤੀ ਹੈ। (ਪ੍ਰਕਾ. 4:11) ਯਹੋਵਾਹ ਵਫ਼ਾਦਾਰ ਹੈ। (ਪ੍ਰਕਾ. 15:4) ਉਹ ਹਰ ਕੰਮ ਵਿਚ ਸਫ਼ਲ ਹੁੰਦਾ ਹੈ ਅਤੇ ਹਮੇਸ਼ਾ ਆਪਣੇ ਵਾਅਦੇ ਪੂਰਾ ਕਰਦਾ ਹੈ। (ਯਹੋ. 23:14) ਇਸੇ ਕਰਕੇ ਯਿਰਮਿਯਾਹ ਨਬੀ ਨੇ ਉਸ ਬਾਰੇ ਕਿਹਾ: “ਧਰਤੀ ਦੀਆਂ ਸਾਰੀਆਂ ਬਾਦਸ਼ਾਹੀਆਂ ਵਿਚ ਜਿੰਨੇ ਵੀ ਬੁੱਧੀਮਾਨ ਹਨ, ਉਨ੍ਹਾਂ ਵਿੱਚੋਂ ਇਕ ਵੀ ਤੇਰੇ ਵਰਗਾ ਨਹੀਂ।” (ਯਿਰ. 10:6, 7) ਸੱਚੀਂ, ਸਾਡੇ ਕੋਲ ਆਪਣੇ ਪਿਤਾ ਯਹੋਵਾਹ ਦਾ ਆਦਰ ਕਰਨ ਦੇ ਬਹੁਤ ਸਾਰੇ ਕਾਰਨ ਹਨ। ਪਰ ਅਸੀਂ ਆਪਣੇ ਪਿਤਾ ਯਹੋਵਾਹ ਦਾ ਸਿਰਫ਼ ਆਦਰ ਹੀ ਨਹੀਂ ਕਰਦੇ, ਸਗੋਂ ਅਸੀਂ ਉਸ ਨੂੰ ਪਿਆਰ ਵੀ ਕਰਦੇ ਹਾਂ। ਇਸ ਕਰਕੇ ਅਸੀਂ ਉਸ ਦੀ ਮਹਿਮਾ ਕਰਦੇ ਹਾਂ। w25.01 3 ਪੈਰੇ 5-6