Pebrero

Nen mansasakit si Arin Hezekias tan ngalngali la ompatey, akikasi ed si Jehova ya onabig ni komon. Dinengel nen Jehova so pikakasi nen Hezekias tan pinaabig to. (2 Ara. 20:​1-6) Pero nen akikasi si apostol Pablo ed si Jehova ya ekalen To komon so sakey ya “sabit ed laman” to, agpinaabig nen Jehova si Pablo. (2 Cor. 12:​7-9) Nen labay ya ipapatey nen Arin Herodes si apostol Pedro tan Santiago, si Pedro labat so inliktar na anghel. Si Santiago balet et impapatey nen Herodes panamegley na espada. (Gawa 12:​1-11) Ompan naisip mo, ‘Akin et inligtas nen Jehova si Pedro, si Santiago balet et andi?’ Agtayo amta ta anggapoy ibabaga na Biblia. Basta say segurado, si Jehova et “agbalot manggaway ag-inkahustisya.” (Deu. 32:4) On, no maminsan, say ebat nen Jehova ed pikakasi tayo et duma ed samay labay tayon nagawa. Pero baleg so tiwala tayo ya amin ya gagawaen nen Jehova et maaro tan patas, kanian agtayo kukuestionen so ebat to ed pikakasi tayo.—Job 33:13. w23.11 21 ¶6

Insulat nen Santiago ya saray totoon marunong et “akaparaan ya ontulok.” Antoy labay ya ibaga na “akaparaan ya ontulok”? Dapat mabulos tayon unoren iramay inikdan nen Jehova na autoridad—amay agtayo napipilitan. Pero siempre, agtayo ontulok ed sikara no iganggan da ya agtayo unoren si Jehova. (Gawa 4:​18-20) Ompan mas mainomay tayoy ontulok ed si Jehova nen say diad too. Natural met labat itan ta amta tayon perpekto si Aman Jehova tan lanang ya duga iray ganggan to. (Sal. 19:7) Pero aliwan perpekto iray totoon walaan na autoridad—saray atateng, opisyal na gobierno, tan saray elder. Tandaan tayo balet ya si Jehova so angiter na autoridad da. (Pro. 6:20; 1 Tes. 5:12; 1 Ped. 2:​13, 14) Kanian no uunoren tayo ra, si Jehova ya mismo so uunoren tayo. w23.10 6 ¶2-3

Say sakey ya paraan pian ombiskeg so pananisia tayo et no isipen tayoy pakapanyari nen Jehova. Walay pakayari ton gawaen so amin ya imbaga to. Tandaan tayo ya sikato so Makapanyarin-amin a Dios. (Job 42:2; Mar. 10:27; Efe. 3:20) Nen 100 lay taon nen Abraham tan 90 la nen Sara, imbaga nen Jehova ya nawalaan iray anak ya laki. (Gen. 17:​15-17) Im-promise to met ed si Abraham ya iter toy dalin na Canaan ed saray apo to tan magmaliw ya kayarian da itan. Nen abaybayag lan naaripen ed Ehipto iray Israelita ya apo nen Abraham, singa imposible ya nakayarian da so Canaan. Pero agawa itan! Imbaga met nen Jehova ed sakey ya birhen, si Maria, ya ilukon toy Anak na Dios. Atan imay ilalak ya insipan nen Jehova diad hardin na Eden. Nilibon taon lay linmabas pero sinegurado ton nagawa itan! (Gen. 3:15) No isipen tayon maong no panon ya tinoor nen Jehova iray sipan to, diman tayo mas natalosan ya anggapoy limitasyon na pakapanyari to. Atan so manpabiskeg na pananisia tayo ya ontua so balon mundo.—Jos. 23:14; Isa. 55:​10, 11. w23.04 28 ¶10-12

Inebatan nen Jehova so pikakasi nen David tan inligtas to. (1 Sam. 19:​10, 18-20; 2 Sam. 5:​17-25) Singa si David, makapantiwala tayo met ya ebatan nen Jehova iray pikakasi tayo. (Sal. 145:18) No maminsan, say ebat nen Jehova ed pikakasi tayo et aliwan samay labay tayon nagawa. Singa bilang, amitlon akikasi si Pablo ya ekalen la komon nen Jehova so “sakey a sabit ed laman” to. Kasin inebatan nen Jehova itan ya espisipikon pikakasi nen Pablo? On, pero dumay ebat nen Jehova. Ag-inekal nen Jehova so problema to, pero inikdan To na biskeg pian tuloytuloy ya makapanlingkor. (2 Cor. 12:​7-10) Singa si Pablo, ompan wala ray panaon ya say ebat nen Jehova ed saray pikakasi tayo et duma ed labay tayon nagawa. Tandaan tayo ya amta nen Jehova no antoy sankaabigan parad sikatayo. Diad tua, “sarasarag ton gawaen so mas ni nen say amin a bengatlan kekerewen odino iisipen tayo.” (Efe. 3:20) Kanian no maminsan, say timing tan say mismon ebat to ed pikakasi tayo et amay agtayo iilaloan. w23.05 8-9 ¶4-6

Maabig no isipen tayon lanang so promise na Biblia ya nabilay iray inaatey. Akin ey? On ta agtayo bemben so bilay tayo. Ompan na-diagnose ya wala manayay graben sakit tayo o walay biglan ompatey ya kapamilya o kaaro tayo. (Ecl. 9:11; Sant. 4:​13, 14) Napakilos itayo na ilalon kioli ya manmatoor anggano ondalan tayo ed ontan iran subok. (1 Tes. 4:13) Ibabaga na Biblia ya kabkabat tan inar-aro itayo nen Aman Jehova. (Luc. 12:7) Lalo tayon natalosan itan no dalepdepen tayo so kioli. Isip mo pa: No bilayen nen Jehova so sakey ya too, kaukolan ton ipawil so amin ya detalye pian sikato nin siansia iman. Labay ton ibaga sirin, kabkabat to tayo! Tan ontan lay panangaro nen Jehova ed sikatayo kanian nanggawa na paraan pian anggano ompatey tayo et walay tsansa tayon nabilay lamet tan agtayo lan balot ompatey! Akin et makapantiwala tayo ya nabilay iray inaatey? Lapud kombinsido tayo ya amay nan-promise et talagan labalabay tan sarasarag ton gawaen so im-promise to. w23.04 8-9 ¶2-4

Nantulongan si Jose tan Maria pian mansiansian mabiskeg so espiritualidad da. Nen wala lay ananak da, sinegurado da ya kompleto iran pamilya diad panagdayew dad si Jehova. (Luc. 2:​22-24; 4:16) Balibalin aligen na saray sanasawa natan so alimbawa nen Jose tan Maria. No walay ananak yo, ompan no maminsan et nairapan kayon miaral o man-family worship. Tan ompan ngalngali anggapo lay panaon yon sanasawa ya manpikasi o manaral ya saniba. Pero tandaan, no saniba kayon mandayew ed si Jehova, lalo kayon onapit ed sikato tan mas onasingger so liknaan yo ed sakey tan sakey. Komon ta lanang yon iyuna ed bilay yo so panagdayew ed si Jehova. No walay problema ed relasyon yon sanasawa, ompan natukso kayon agla man-family worship. Pero aleg komon, agyo idadamay so panagdayew yod si Jehova. Ituloy yo nin siansia anggano antikey labat. No oniay gawaen yo anggano walay problema, napapetang yoy aroan yo tan ag-onkapuy so espiritualidad yo. w23.05 22 ¶7-8

Anto ran kualidad so impanengneng nen Obadias lapud matakot ed Dios? Sikatoy matua tan napantiwalaan, kanian sikato so apilin mangasikaso ed sankaabungan na ari. (Ikompara so Nehemias 7:2.) Say takot to met ed Dios so nampakilos ed sikato ya manpakpel. Akin et kaukolan toy manpakpel? On ta say amo to et si Arin Ahab. Mauge-uges iyan ari! (1 Ara. 16:30) Sankaruksaan met so asawa nen Ahab ya si Jezebel. Say dios na sayan bii et si Baal tan kabkabusol toy Jehova kanian sinali ton ekalen so dugan panagdayew ed Israel. Dakel ingen ya propeta nen Jehova so impapatey to. (1 Ara. 18:4) Nen tutugisen nen Jezebel iray propeta na Dios, inyamot nen Obadias ed ungib so 100 ya propeta nen Jehova ya “tunggal 50, tan sinuplayan [to] ray tinapay tan danum.” (1 Ara. 18:​13, 14) No naamtaan nen Jezebel so gagawaen nen Obadias, seguradon ipapatey to! Siempre, too met labat si Obadias tan agto labay so ompatey. Pero sikatoy akaparaan ya mangirisga ed bilay to ta inar-aro toy Jehova tan saray kapara ton lingkor na Dios. w23.06 16 ¶9-10

Tuloytuloy ya idadaulo nen Jehova iray lingkor to anggad natan. Igigiya to ra panamegley na Salita to tan say Anak to, say ulo na kongregasyon. Diad panaon tayo, kasin walay ebidensya ya tuloytuloy nin manguusar si Jehova na saray totoo ya mangirepresenta ed sikato? On wala. Singa bilang, imanoen iray agawa manlapu la nen 1870’s. Kalkalnan atalosan nen Charles Taze Russell tan saray kakaiba to ya importantin taon so 1914, ta diad satan ya taon et nasumpal iray propesiya tungkol ed Panarian na Dios. (Dan. 4:​25, 26) Atalosan da itan lapud inaral dan maong iray propesiya ed Biblia, tan mabiskeg so tiwala ra ya ontua iratan. Mapatpatnag ya inggiya nen Jehova so impan-research da. Nen 1914, dakel so agawa ya patunay ya ginmapo lan manuley so Panarian na Dios. Agawa so World War I. Insan kayari to et kinmayat iray makaalis ya sakit, tan wala ray agawan yegyeg tan eras diad nanduruman pasen ed interon mundo. (Luc. 21:​10, 11) Mapatpatnag ya inusar nen Jehova iraman ya mapaabeban lalaki pian igiya iray lingkor to. w24.02 22 ¶11

Kombinsido tayo ya inar-aro itayo nen Jehova tan labay to ya maliket so bilay tayo. (Roma 8:​35-39) Kombinsido tayo met ya parad pankaabigan tayo iray prinsipyo ed Biblia. (Isa. 48:​17, 18) Pero, nasubok so pananisia tayo no walay biglan nagawa ed bilay tayo. Singa bilang, ompan naproblema tayo lapud desisyon na sakey ya kapamilya tayo. Ompan na-diagnose ya wala manayay graben sakit tayo tan apektoen toy panaglingkor tayod si Jehova. Ompan bigla labat ya walay onsabin kalamidad tan sakey tayo ed saray biktima. Odino pairapen itayo na gobierno lapud pandadayew tayod si Jehova. No ondalan ka ed ontan iran subok, ompan isipen mo: ‘Akin et nagagawa ’yad siak? Wala amoy ginawak ya aliwa kanian apabarong koy Aman Jehova.’ No ontan so naliliknam, agka mapaga. Anggan saray matoor ya lingkor nen Jehova nensaman et alikna da met itan.—Sal. 22:​1, 2; Hab. 1:​2, 3. w23.04 14 ¶1-2

No natutukso tayo ya manggaway aliwa, kaukolan tayoy onaksion ya tampol pian naekal itan ed isip tayo ta agtayo labay ya naderal so pikakaaro tayo ed si Jehova. Labay nen Jehova ya magmaliw tayon “matulok [manlapud] puso.” (Roma 6:17) Agtayo pipilien no anto labat ed saray ganggan to so labay tayon unoren. Kombinsido tayo ya parad pankaabigan tayo so amin ya ganggan to. (Isa. 48:​17, 18; 1 Cor. 6:​9, 10) Uusaren nen Satanas iray gobierno tan arum nin totoo pian maltratoen tan pakapuyen so liknaan na saray lingkor na Dios. Si Satanas et singa leon ya labay to tayon “buagen”—labay ton naderal so relasyon tayod si Jehova. (1 Ped. 5:8) Nen inmunan siglo, saray Kristiano et tinaktakot, sinakitan, tan pinatey ni ingen na saray onsusumpa lapud katooran da ed si Jehova. (Gawa 5:​27, 28, 40; 7:​54-60) Anggad natan et ontan nin siansiay pakana nen Satanas. Diad Russia tan ed arum ni ran bansa, dakel so manmamaltrato tan onsusumpa ed saray agagi tayo. Uusaren met nen Satanas so graben isusumpa pian arap-arapan to tayon atakien. Pero no maminsan, laen to tayod benegan. Atan iramay agnaliklikas o “masilib a pakana” to.—Efe. 6:11. w23.07 15-16 ¶6-9

No diman mo aaraley Biblia, diman mo met lalon naar-aro si Jehova kanian mas napakilos ka ya unoren iray ganggan to. Agka met padalus-dalos ya mandesisyon ta labay mon iyaplika iray prinsipyo ed Biblia. Mansasagpot ka pian ondakep so ugalim ta sankanonot mo no antoy makapaliket ed Dios. Aaligen mo met so ugali nen Aman Jehova ya singa sakey ya ugaw ya aaligen toy ugali na maar-aron ateng to. (Efe. 5:​1, 2) Tepetan tayo sirin so sarili tayo: ‘Kasin mas mabiskeg so panangarok natan ed si Jehova kompara nen balo ak nin Tasi? Kasin nanengneng ed kabibilay ko ya talagan aaligen koy panagnonot nen Jehova? Kasin naging mas maaro ak ed saray agagi?’ No diad inlabas na panaon et alikas mon singa binmetel lay panangarom ed si Jehova tan ed agagi, agka komon nadidismaya. Diad tua, ontan so agawa ed arum ya Kristiano nen inmunan siglo. Pero ag-ira sinukoan nen Jesus, kanian seguradon agto ka met sukoan. (Apo. 2:​4, 7) Amta to ya napapetang tayo lamet so panangaro tayod si Jehova tan ed agagi. w23.07 8 ¶2-3

Nantutumbokan ya lingo so agawaan nen apostol Pedro. Unona, malaslastog ton imbaga ya manmatoor kuno ed si Jesus anggano agmanmatoor iray kakaiba ton apostol. Sobsobray tiwala to ed sarili to! (Mar. 14:​27-29) Aminpigan met ya akaugip si Pedro anta binagaan nen Jesus ya mantultuloy ya manbantay. (Mar. 14:​32, 37-41) Insan nen aarestoen lay Jesus, batik si Pedro ta tinmakot. (Mar. 14:50) Tan say sankagrabian ya ginawa nen Pedro, amitlo ton imburi si Jesus tan nansamba ni ingen ya agton talaga kabat. (Mar. 14:​66-71) Nen a-realize to balet so kabelat na kasalanan to, kinmapkapuy tan inmakis ya ampaipait. (Mar. 14:72) Imbes ya pampasnokan nen Jesus si Pedro, imbaga to ya ikdan toy kaaruman ya responsabilidad. (Juan 21:​15-17) Tua, amta nen Pedro ya ambelbelat so kasalanan to. Pero akin et agto sinukoan so sarili to? On ta anggano onman so agawa, kombinsido si Pedro ya sikatoy agsinukoan nen Jesus. Antoy naaralan tayo? Importante ya kombinsido tayo ya inar-aro itayo nen Jehova tan labalabay to tayon perdonaen.—Roma 8:​38, 39. w24.03 18-19 ¶13-15

Saramay manggagaway imoral et naandi so respeto dad sarili da tan anggapoy lupa ya iyarap dad totoo ta amta ran kababaing so gagawaen da. Dakel so nalulukonan anta uga-ugaw ni ra. Tan dakel met so nabubuyak ya pamilya. No isipen tayo iratan ya amin, kasin labay mo ni so onla ed “abung” na makulangkulang ya bii? Saray imoral ya totoo et nabalang day pabor nen Jehova kanian singa ra inatey ed espiritual. Pero diad tua, nayari met ya ompatey iran literal ta maslak ed sikara et nanaalisan na nanduruman sakit. (Pro. 7:23) Atan so rason no akin ya oniay nabasa ed sampot na Proverbio kapitulo 9: “Saray sangkaili na sayan bii et walad kaaralman na Lubok.” Akin balet et dakel nin siansia so mangaawat ed imbitasyon to anggano amta ran aliway pansumpalan da? (Pro. 9:​13-18) Say sakey ya patit ya uusaren nen Satanas et say pornograpiya. Iisipen na arum ya aliwa met itan ya mauges ta onnengneng ka met labat. Pero diad tua, saramay onnenengneng ed satan et abebbebay pakanengneng dad sarili da tan ed arum. Tan singa ra adik ta anap-anapen da la itan. No say sakey et makanengneng na malaswan litrato o video, mairap to lan ekalen itan ed isip to. Ibabaga na Biblia ya nepeg tayon pateyen odino ekalen iray makalaman ya pilalek tayo. Pero kabaliktaran so gagawaen na pornograpiya ta bibilayen to itan. (Col. 3:5; Sant. 1:​14, 15) Kanian maslak ed saramay onnenengneng ed pornograpiya et makakagaway imoral. w23.06 23 ¶10-11

Anggano wala ray bansa ya mikokompetensia ed alyansa na Britanya tan Amerika, anggapo lay onsalat ed satan bilang world power. Segurado tayo ed satan ta say kenaan na “bato” ya mangisisimbolo ed Panarian na Dios et samay “sali” ya irerepresenta toy alyansa na Britanya tan Amerika. (Dan. 2:​34, 35, 44, 45) Kasin kombinsido ka ya tua imay propesiya nen Daniel tungkol ed sali ya gawad balatyang tan pitek? No on so ebat mo, ipanengneng mo sirin ed kabibilay mo. Singa bilang, no kombinsido ka ed satan, agka la manpayaman ed sayan sistema ta antam ya asingsingger met la yan naderal. (Luc. 12:​16-21; 1 Juan 2:​15-17) Sakey ni, no natatalosan mo iyan propesiya, napakilos kan iprayuridad so panagpulong tan pananap na saray naiyaralan moy Biblia. (Mat. 6:33; 28:​18-20) Kanian tepetan moy sarilim, ‘Kasin nanengneng ed saray desisyon ko ya kombinsido ak ya asingsingger lan deralen na Panarian na Dios so amin ya gobierno na too?’ w23.08 11 ¶13-14

Mapaabebam ya bidbiren ya wala ran talagay agmo nagawaan lapud situasyon, edad, o sakit mo. Makaaral kad alimbawa nen Barzilai. Aliwan mauges no tanggian mo so sakey ya pribilehyo no agmo lan talaga kaya. (2 Sam. 19:​35, 36) Makaaral ka met ed si Moises. Manpatulong ka tan ipasam so arum ya responsabilidad, no matukoy. (Exo. 18:​21, 22) No awaten mo ya wala ray limitasyon mo, agmo piliten ya gawaen so agmo kaya, kanian agka nakesawan. Iwasan tayo met ya tetetelen so sarili tayo ed makapuy ya desisyon na arum. Agtayo naidesisyonan so arum. No mauges so nansumpalan na desisyon da, kaukolan dan arapen itan. Tan no maminsan et agtayo la ran talaga nipaliis ed resulta na ginawa da. Singa bilang, ompan mandesisyon so sakey ya anak ya agto la labay so manlingkor ed si Jehova. Seguradon ansakisakit ed saray atateng no ontan so gawaen na anak da. Pero no tetelen day sarili da, ambelbelat itan ed liknaan. Aglabay nen Jehova ya ontan so nalikna da. w23.08 29 ¶11-12

Aliwan perpekto si Samson ya singa sikatayo, kanian wala met iray pagkakataon ya aliway desisyon to. Walay ginawa ton desisyon ya aliwliway nansumpalan to ta agto ninonot so asainmin ya inter nen Jehova ed sikato. Nen medyo abayag met lan manlilingkor si Samson bilang ukom, ginmusto ed “sakey a bii diad Lawak na Sorek, a say ngaran to et Delila.” Antis ya ginmusto ed si Delila, walay nobya to dati ya biin Filisteo ya labay to lan asawaen. Pero sayan desisyon to et “nanlapu . . . ed si Jehova, ta Sikatoy manaanap na pankanawnawan onsumpad saray Filisteo.” Ag-abayag, linmoob si Samson ed abung na sakey ya paabang ya bii diad Gaza, ya syudad na saray Filisteo. Diad saman, sikatoy pinabiskeg nen Jehova kanian abagot to iray balbaleg ya puerta ya manproprotekta ed satan ya syudad. (Ukom 14:​1-4; 16:​1-3) Duma balet iyay impanggusto tod si Delila ta posible ya sayan bii et Israelita. Imbaga na saray Filisteo ed si Delila ya ikdan day balbaleg ya kuarta no traidoren toy Samson. Tinanggap toy suhol da tan pinmayag ed labay dan nagawa. w23.09 5 ¶12-13

Makatulong so “aralem a pakatalos” pian magmaliw tayon maulimek. Say toon aralem so pakatalos to et agtampol man-react no kuestionen na arum iray papanisiaan to. Antoy makatulong pian nawalaan tayoy aralem ya pakatalos? Isipen tayo ya saray tepet na totoo et singa iceberg. Melmelag labat ya parte so nanengneng ed tapew na danum pero balbaleg manaya so akaamot ya walad dalem na danum. Singa ontan met no walay mantepet ed sikatayo. Ompan walay akaamot ya motibo to may nantepet odino walay arum nin isyu ya sankanonot to kanian onman so intepet to. Agtayo sirin bastabasta oneebat. Amtaen tayo nin unona no akin ya onman so intepet to may too. (Pro. 16:23) Imanoen no panon ya impanengneng nen Gideon so aralem ya pakatalos. Aminsan, ampetang so ulo na saray Efraimita ed si Gideon ta agto ra kuno tinawag ya tampol nen akilaban ed saray Midianita. Pero anton talagay rason, akin et ampetang so ulo ra? Kasin asakitan ira ta ma-pride ira? Antokaman so rason, tinalosan nen Gideon so liknaan da tan maulimek so impitongtong to. Antoy resulta ey? Ibabaga na Biblia ya “kinmepay sanok da.”—Ukom 8:​1-3. w23.09 16 ¶8-9

No isipen tayoy elet na aroan nen Jehova tan Jesus, anggapoy makapipara ed inka-close dan sanama. Kanian imadyin mo pay alikna nen Jehova legan ton nanenengneng ya maniirap so inad-aro ton Anak. Seguradon singa duduyoken so puso to! Ampaipait ed sakey ya ateng no ompatey so anak to. Anggano amta tayon walay kioli, ansakisakit nin siansia no walay ompatey ya inad-aro tayo. Seguradon ontan met so alikna nen Jehova nen anengneng toy impanirap tan impatey na inad-aro ton Anak nen Nisan 14, 33 C.E. (Mat. 3:17) Diad sarayay ontutumbok ya agew antis na Memoryal, marakep no i-personal study o i-family worship tayo so tungkol ed dondon. Tan diad mismon agew na Memoryal, agyo lilingwanan ya bantayan so espisyal ya Morning Worship program. No akaparaan so puso tayo parad Memoryal, napakilos itayon tulongan so arum pian minabang met ira ed satan.—Esd. 7:10. w24.01 11 ¶10-12

Pian ikdan itayo nen Jehova na pakayari to, manpikasi tayo ed sikato. Bilang ebat ed pikakasi tayo, ikdan to tayo na “pakayari . . . a mas mabiskeg nen say pakayari na too.” (2 Cor. 4:7) Ombiskeg tayo met no manbasa tayo na Biblia tan no dalepdepen tayo ray nababasa tayo ditan. (Sal. 86:11) Say mensahe nen Jehova ya walad Biblia et “makapanyari.” (Heb. 4:12) On, no manpikasi kad si Jehova tan manbasa kay Biblia, seguradon tulongan to ka tan ombiskeg so liknaan mo pian nasarag mo ray subok, agnabalang so liket mo ed panaglingkor, tan nakayam so antokaman ya asainmin. Sakey ed saray pinabiskeg nen Jehova et si propetan Jonas. Kakkaukolan nen Jonas so pakpel tan biskeg. Walay ipapagawa nen Jehova ed sikato. Pero lapud tinmakot, tinakasan toy asainmin to. Tan lapud saya, sikatoy inatey lawari ed bagyo, pati saray kaiba tod barko. Nen sikatoy imbantak na saray marino ed dayat, inakmon na balbaleg ya sira. Antoy ginawa nen Jonas? Sikatoy nampikasi.—Jon. 2:​1, 2, 7. w23.10 13 ¶4-6

Anggano parad saray Kristiano nen inmunan siglo iray sulat nen apostol Pedro, impila iratan nen Jehova ed Biblia pian pakaaralan tayo. (Roma 15:4) Amayamay ya totoo natan so agmanisia ed saray propesiya ed Biblia. Wala ray mamabalaw ed sikatayo lapud abaybayag tayo la kunon ipupulong so isabi na anggaan pero anggapo met ni anggad natan. Ibabaga ni ingen na arum ya ag-itan nagawa. (2 Ped. 3:​3, 4) No ibaga itan na sakey ya apulongan tayo, katrabaho, o kapamilya, ompan pandudaan tayo met la iray propesiya ed Biblia ya anggad onkapuy lay pananisia tayo. Pero walay imbaga nen Pedro ya makatulong pian agtayo naapektoan anggano ontan so ibaga na arum. Iisipen na arum ya singa mabaybayag ya onkilos si Jehova, ta anggad natan et anggapo ni anggaan. Pian agtayo isipen ya matantan si Jehova, makatulong imay imbaga nen Pedro ya nabasa ed 2 Ped. 3:​8, 9. Impanonot to ya say sanlibon taon et singa sakey agew labat ed si Aman Jehova. Maan-anos si Jehova. Agto labay ya walay anggan sakey ya naderal. Pero no onsabi la may inyeskedyul ton agew ya deralen iyan sistema, agto la itan i-postpone. w23.09 26-27 ¶2-5

Akin et sinulatan nen apostol Pablo iray Hebreon Kristiano ya taga Judea? Walay duara ya posiblin rason. Unona, labay to ran pasesegen. Maslak ed sikara et Judaismo so abangonan dan relihyon. Kanian nen nagmaliw iran Kristiano, seguro babalawen ira na saray lider na Judaismo. Akin ey? On ta diad Judaismo et walay balibalin templo ya pandadayewan da, walay nanenengneng dan altar ya pambabagatan na ayayep, tan wala ray saserdote da. Anggapo iratan ya amin ed saray Kristiano. Kanian ompan makakaibeg ira, tan atan so rason ya kinmapuy so pananisia ra. (Heb. 3:​12, 14) Ompan say arum ed sikara ingen et natutukso lan ompawil ed Judaismo. Komadua, impa-realize nen Pablo ed saray Hebreon Kristiano ya singa ni ra ugaw ed espiritual. Kaukolan dan talosan iray balo tan aralem ya katuaan—say “anawet a naakan” ya walad Salita na Dios. (Heb. 5:​11-14) Mapatnag ya say Mosaikon Ganggan ni so tutumboken na arum ed sikara. w23.10 24-25 ¶3-4

Ompan mandesisyon so arum ya agagin bibii ya agla ra miasawa. (Mat. 19:​10-12) No single ka, tandaan mo ya papablien nen Jehova tan Jesus iray single ya Kristiano. Diad interon mundo, bendisyon ed kongregasyon iray single ya sister. Maar-aro ira tan imamalasakit da iray agagi kanian ituturing da ran espiritual ya atsi o nanay ed kongregasyon. (Mar. 10:​29, 30) Wala ray manlilingkor ya full-time. Balbaleg so nitutulong na saray sister ed panagpulong ya kimey ed interon mundo. (Sal. 68:11) Sika ey? Marakep no natan ni labat et iplanom lay manlingkor ya full-time. Sarag moy manpayunir, man-volunteer ed construction, o man-Bethelite. Ipikasim so goal mo. Kerew kay tips ed saray agagi ya manlilingkor ya full-time, tan tepet mo no anto ray kailangan mon gawaen pian magmaliw kan kualipikado. Insan iplanom ya maong no panon mon naabot so goal mo. Exciting so manlingkor ya full-time! Ditan mo na-realize ya dakel ni manayay nagawaan mo parad si Jehova. w23.12 22 ¶16-17

Lapud manasingger lay baleg ya kairapan, importante ya mamasya tayo ed kimey ya panagpulong. Pero panon to no biglan mankaproblema tayo ed kuarta, o wala ray onkontra ed pampupulong tayo? Ompan say unonan naapektoan et say ministeryo tayo. Antoy makatulong pian iyuna tayoy Panarian anggano mair-irap so situasyon? Tandaan tayo ya kaiba tayoy “Jehova na saray armada.” Im-promise to ya suportaan to tayo basta iyuna tayoy Panarian, kanian anggapoy nepeg tayon pampagaan o takotan. (Ag. 2:4) Labay nen Jehova ya manpokus tayo ed kimey ya panagpulong tan panagbangat ta bilay na totoo so nalalanor. Pinaseseg nen Aggeo iray Judio ya ituloy da so panagpaalagey tan lingwanan da la iray asayang ya taon. No manumpisa ira lamet, im-promise nen Jehova ya sikatoy “mangiter . . . na bendisyon.” (Ag. 2:​18, 19) Segurado tayo met natan ya bendisyonan nen Jehova iray sakripisyo tayo no iyuuna tayod bilay tayo so kimey ya ipapagawa to. w23.11 16 ¶8; 17 ¶11

Diad sulat nen apostol Pablo ed saray taga Roma, imbaga to ya amin ya totoo et makasalanan. No ontan sirin, antoy gawaen tayo pian naala tayoy pabor na Dios tan ipasen to tayon matunong? Pian naebatan itan ya tepet, impaimano nen Pablo so alimbawa nen Abraham. Tinawag nen Jehova si Abraham ya matunong nen sikatoy manaayam lad Canaan. Antoy basiyan nen Jehova akin et tinawag toy Abraham ya matunong? Kasin lapud uunoren toy amin ya walad Mosaikon Ganggan? Andi, ta diad saman et anggapo ni so Mosaikon Ganggan. (Roma 4:13) Linmabas ni so masulok ya 400 ya taon insan inter nen Jehova itan ya ganggan ed bansan Israel. Anto sirin so basiyan nen Jehova? Lapud agnaparaan ya kaabigan nen Jehova, tinawag toy Abraham ya matunong ta impatnag toy pananisia.—Roma 4:​2-4. w23.12 3 ¶4-5

Diad samay labi ya imbaga nen propetan Natan ed si Arin David so teksto tayo ed sayan agew, imbaga nen Jehova ed si Natan ya aliwan si David so mangipaalagey na templo. (1 Awa. 17:​3, 4, 11, 12) Antoy reaksion nen David? Imbes ya nadismaya, sikatoy nampokus la ed pantipon na pundo tan materyales ya usaren na anak ton si Solomon parad sayan proyekto. (1 Awa. 29:​1-5) Nen impaamta nen Natan ed si David ya aliwan sikato so mangipaalagey na templo, wala ni sakey ya mensahe ya impaibaga nen Jehova ed sikato. Im-promise nen Jehova ya diad pamilya nen David so panlapuan na ari ya manuley anggad angga. (2 Sam. 7:16) Diad balon mundo, seguradon malikeliket si David no naamtaan to ya nanlapud pamilya to si Jesus, say Ari ya manuley ed Sanlibon Taon! Antoy naaralan tayo ed sayan salaysay? Agtayo komon nadidismaya no agtayo nagawaan so amin ya goal tayo ed espiritual. Singa agawad si David, ompan walay arum ya bendisyon ya ipaparaan nen Jehova parad sikatayo ya mas ni nen say iilaloan tayo. w23.04 16 ¶8-10

Wala ray libro ed Biblia ya balibalin basaen no natatakot ka ta pabiskegen day liknaan mo. Seguradon napaseseg ka no basaen mo ray libron Job, Salmo, tan Proverbio, pati saramay imbaga nen Jesus ya nabasa ed Mateo kapitulo 6. No manpikasi kad si Jehova tan basaen moy Salita to, naliknam so malmalet ya lakap to. Seguradon ag-itayo paulyanan nen Jehova no ondadalan tayod graben subok. Agtayo bukbukor ya arapen so problema tayo. (Sal. 23:4) Im-promise nen Jehova ya bantayan to tayo, paligenen toy liknaan tayo, suportaan, tan ligliwaen to tayo. Oniay ibabaga na Isaias 26:3 tungkol ed si Jehova: “Salimbengan mo iramay sigpot a manmamatalek ed sika; ikdan mo ra na mantultuloy a kareenan, lapud sika so panmamatalekan da.” Kanian mantiwala kad si Jehova tan awat moy tulong to. No ontan so gawaen mo, seguradon walay biskeg mo ya arapen iray graben subok. w24.01 25 ¶16-17

Nagagawa la iyan propesiya natan. Tan nia ni sakey ya propesiya ya nasusumpal ed panaon tayo: “Bangatan nen Jehova so amin ya ananak mo, tan magmaliw a daakan so kareenan na saray ananak mo. Malet kan niletneg ed inkatunong. . . . Anggapoy takotan mo tan anggapoy sengegay panggiwgiw mo, ta ag-itan makaasingger ed sika.” (Isa. 54:​13, 14) Anggan si Satanas ya “dios na sayan sistema na mundo” et anggapoy pakayari ton patundaen so kimey ya panagbangat na saray lingkor nen Jehova. (2 Cor. 4:4) On, nipawil la so dugan panagdayew tan aglan balot itan narutakan. Mansiansia itan anggad angga. Tandaan tayo sirin ya anggapon balot so armas ya makatalo ed sikatayo! w24.02 4 ¶10

Bilang Tasi, seseryosoen tayo imay sipan tayo ed si Jehova nen indedika tayoy sarili tayo ed sikato. Atan so manunan sankanonot tayo no manggagawa tayoy desisyon ya naapektoan so pamilya tayo. Tua, inar-aro tayo ray kapamilya tayo tan agtayo papaulyanan so responsabilidad tayod sikara. Pero duga kasi ya iyuna tayo so panlabayan da nen say panlabayan nen Jehova? Andi. (Mat. 10:​35, 36; 1 Tim. 5:8) Si Jehova so nanlapuan na uksoyan na pamilya tan labay ton maliket so pamilya tayo. (Efe. 3:​14, 15) Kanian no labay mo ya nalikna na pamilyam so tuan liket, gawam so panlabayan nen Jehova. Labay to ya panengnengan moy panangaro tan respeto iray kapamilyam. Legan mon susumpalen so obligasyon mod sikara, tandaan mo ya papablien nen Jehova so amin ya pansasakripisyom pian niyunam so panagdayew mod sikato.—Roma 12:10. w24.02 17 ¶11; 18 ¶13